Published:Updated:

SME கைடுலைன்

எஸ்எம்இகள் அவசியம் எடுக்க வேண்டிய பாலிசிகள்!ச.ஸ்ரீராம்

SME கைடுலைன்

எஸ்எம்இகள் அவசியம் எடுக்க வேண்டிய பாலிசிகள்!ச.ஸ்ரீராம்

Published:Updated:

எஸ்எம்இகளுக்கு நிதிச் சிக்கல் என்பது எப்போதும் இருந்து கொண்டே இருக்கும். அந்தசமயத்தில் பணத்தை மிச்சப்படுத்த அவர்கள் பின்பற்றும் ஒரே வழி, இன்ஷூரன்ஸ் பாலிசிகள் எடுக்காமல் இருப்பதுதான். ஆனால், இந்த முடிவு மிகவும் தவறானது என்கிறார் பாரத் ரீ இன்ஷூரன்ஸ் புரோகேர்ஸ் பிரைவேட் லிமிடெட் நிறுவனத்தின் இயக்குநர் அருணாச்சலம். எஸ்எம்இகள் ஏன் இன்ஷூரன்ஸ் எடுக்க வேண்டும் என்பதை எடுத்துச் சொல்வதோடு, என்னென்ன பாலிசிகளை எடுக்க வேண்டும் என்பதைத் தெளிவாகவும் விளக்கமாகவும் எடுத்துச் சொன்னார் அவர்.

‘‘இன்றைக்கு 100 கோடி ரூபாய் அளவுக்கு டேர்னோவர் கொண்ட ஒரு நிறுவனத்தைக்கூட எஸ்எம்இ என்று தான் சொல்கிறார்கள். இத்தனை பெரிய நிறுவனம் எந்த இன்ஷூரன்ஸ் பாலிசியும் எடுக்காமல் இருந்து, பிற்பாடு ஏதாவது அசம்பாவிதம் காரணமாக பாதிப்பு ஏற்படுமெனில், அதன் விளைவு கள் மிகக் கடுமையாக இருக்கும். எனவே, 5 கோடி டேர்னோவர் செய்யும் நிறுவனமாக இருந்தாலும், 50 - 100 கோடி ரூபாய் டேர்னோவர் செய்யும் நிறுவனமாக இருந்தாலும் சரி, கட்டாயமாக இன்ஷூரன்ஸ் எடுத்தே ஆகவேண்டும்.

ஒரு எஸ்எம்இ என்பவர் தனது உற்பத்தியை நம்பித்தான் இருக்கிறார். உற்பத்திக்குத் தேவையான  சொத்துகள் என்று நாம் கூறுவது, அவரது தொழில் நடக்கும் தொழிற்சாலைக் கட்டடம், இயந்திரங்கள், மூலப்பொருள் மற்றும் தயாரித்தபின் விற்பனையாகக் காத்திருக்கும் பொருள்கள்தான். இவற்றில் எது பாதிக்கப்பட்டாலும் நஷ்டம்தான்.

ஒட்டுமொத்த விகடனுக்கும் ஒரே ஷார்ட்கட்!

SME கைடுலைன்

அதனால் எஸ்எம்இகள் இந்த காப்பீட்டுக்கான  பிரீமியத்தை ஒரு செலவாகக் கருதாமல், அதனைப் பாதுகாப்புக்கான முதலீடாகக் கருதும் மனநிலைக்கு வரவேண்டும். இனி எஸ்எம்இகள் எடுக்க வேண்டிய  இன்ஷூரன்ஸ்களைச் சொல்கிறேன்.

1.வர்த்தக செயல்பாடுகளுக்கான இன்ஷூரன்ஸ்:

முதலில் எந்த மாதிரியான தொழிலை ஒரு எஸ்எம்இ செய்கிறார் என்று பார்த்து, அதற்கேற்ப இந்தத் தொழிலுக்கான இன்ஷூரன்ஸை எடுக்க வேண்டும். அதில் முக்கியமாக கவனிக்க வேண்டியது, அவர் எடுத்திருக்கும் இன்ஷூரன்ஸ் எந்த தொழிலின் கீழ் வகைப்படுத்தப் பட்டுள்ளது என்பதுதான்.

உதாரணமாக, ஒரு எஸ்எம்இ பிளாஸ்டிக் தயாரிக்கும் தொழிலை செய்யும்போது, பிரீமியம் குறைவாக இருக்குமே என்று பேப்பர் தயாரிக்கும் தொழில் பிரிவின் கீழ் இன்ஷூரன்ஸ் எடுத்தால், பாதிப்பு ஏற்படும்போது அதற்கு முழுமையான இன்ஷூரன்ஸ் க்ளைம் கிடைக்காமல் போக வாய்ப்புண்டு. சில சமயங்களில் எந்த க்ளைமும் கிடைக்காமல் போகக்கூட வாய்ப்புண்டு. எனவே, இதுபோன்ற இன்ஷூரன்ஸ்களை எடுக்கும்போது சரியான பிரிவின் கீழ் எடுப்பது அவசியம்.

2. சொத்துக்கள் மீதான இன்ஷூரன்ஸ்!

உங்களது சொத்துக்களான உற்பத்தி இயந்திரங்கள் மீது இன்ஷூரன்ஸ் எடுக்கும்போது எஸ்எம்இகள் ரீஇன்ஸ்டேட்மென்ட் (Reinstatement)  மதிப்பைக் கணக்கிட்டு அதற்கு பிரீமியம் செலுத்த வேண்டும். 

உதாரணமாக, 5 வருடம் பழைமையான 10 கோடி ரூபாய் மதிப்புள்ள ஓர் இயந்திரத்துக்கு பிரீமியம் அதிகமாக கட்ட வேண்டுமே என்கிற காரணத்துக்காக, 5 கோடி ரூபாய் என்ற அளவில் இன்ஷூரன்ஸ் எடுத்தால், பாதிப்பு ஏற்படும்போது அதற்கான இழப்பீடு குறைவாகவே கிடைக்கும். ஆனால், அதே இயந்திரத்துக்கு ரீஇன்ஸ்டேட்மென்ட் மதிப்பைக் கணக்கிட்டு, அதற்கு ஏற்ப பிரீமியம் செலுத்தினால், அந்த இன்ஷூரன்ஸில் இழப்பீடு என்பது இயந்திரத்தின்  ரீஇன்ஸ்டேட்மென்ட் மதிப்புக்கு ஏற்றவாறு  கிடைக்கும். 

சில எஸ்எம்இகள் இயந்திரம் பழுதாகாமல் நீண்ட நாட்களாக  இயங்கி கொண்டிருக்கிறதே, இதற்கு ஏன் அதிக பிரீமியம் தந்து இன்ஷூரன்ஸ் எடுக்க வேண்டும் என்று நினைக்கிறார்கள். என்னதான் நாம் பாதுகாப்பாக இருந்தாலும், திடீரென ஏற்படும் இயற்கை சீற்றங்களால் பாதிப்பு ஏற்பட்டால், அதனால் நமக்கு பெரிய அளவு இழப்பு உண்டாகும்.

3. கவரேஜ் இன்ஷூரன்ஸ்கள்!

இந்தப் பிரிவின் கீழ் முக்கியமான ஆறு இன்ஷூரன்ஸ்கள் உள்ளன.

(i) ஃபயர் இன்ஷூரன்ஸ்:

இந்த இன்ஷூரன்ஸை ஏறக்குறைய அனைத்து எஸ்எம்இகளுமே எடுத்திருப்பார்கள். தொழிற்சாலையில் இருக்கும் இயந்திரங்கள், மூலப் பொருள்கள், தயாரான பொருள்கள் தீ விபத்துக்குள்ளானால் அதற்கான இழப்பைப் பெற செய்வதுதான் இந்த இன்ஷூரன்ஸ். இதில் சில விஷயங்களை எஸ்எம்இகள் கவனிக்க வேண்டும். இந்த இன்ஷூரன்ஸ் பாலிசி மூலம் தீ விபத்துக்குத்தான் இழப்பீடு பெற முடியும். ஒருவேளை எலெட்ரானிக் சர்க்யூட் ஒன்று மின்கசிவால் கருகி அதனால் இழப்பு ஏற்பட்டிருந்தால், அதற்கு இந்த பாலிசியின் மூலம் இழப்பீட்டைப் பெறமுடியாது. எனவே,  எந்த மாதிரியான விபத்துகளினால் இழப்பீடு கிடைக்கும் என்பதை நன்கு புரிந்துகொண்டு இந்த பாலிசியை எடுப்பது அவசியம்.

SME கைடுலைன்

(ii) பர்க்ளரி அல்லது திருட்டு மீதான இன்ஷூரன்ஸ்:

எஸ்எம்இகள் தங்கள் அலுவலகத்தில் திருட்டு நடந்தாலோ,  மூடியிருக்கும் நிறுவனத்தின் கதைவை உடைத்துப் பொருளை திருடினாலோ, சேதப்படுத் தினாலோ அதனால் ஏற்படும் இழப்பு களைத் தடுக்க இந்த இன்ஷூரன்ஸ் பாலிசி எடுக்க வேண்டியது அவசியம். இதனைப் பெறுவதன் மூலம் அலுவலகத்தில் திருட்டு நடவடிக்கைகள் நடந்தால், அதற்கான இழப்பீட்டை பெற்று எஸ்எம்இகள் பயனடையலாம்.
வெளியில் இருக்கும் யாரோ ஒருவர் உங்கள் தொழிற்சாலைக்குள் நுழைந்து பொருள்களை திருடினாலோ, சேதப்படுத்தினாலோதான் இந்த இன்ஷூரன்ஸ் பாலிசி மூலம் இழப்பீடு கிடைக்கும்.  நிறுவனத்தில் வேலை பார்க்கும் ஊழியரே பொருளை திருடி சென்றால், அதற்கு பர்க்ளரி இன்ஷூரன்ஸ் பாலிசி மூலம் இழப்பீடு கிடைக்காது. எனவே, இந்த பாலிசியின் நடைமுறை களை சரியாகப் புரிந்துகொண்டு எடுக்க வேண்டும்.

(iii) வர்த்தக குறுக்கீடுகள் மீதான இன்ஷூரன்ஸ்!

லாபம் மீதான நஷ்டத்துக்காக இந்த இன்ஷூரன்ஸ் எடுக்கப்படுகிறது. இந்த இன்ஷூரன்ஸ் மூலம் ஒரு எஸ்எம்இ தனது நிறுவனத்தில் ஏதாவது ஒரு காரணத்துக்காக ஒரு வாரமோ அல்லது ஒரு மாதமோ என குறிப்பிட்ட காலத்துக்குத் தொழிலை நடத்த முடியாமல் போனால், அதன் மூலம் ஏற்படும் நஷ்டத்தைச் சமாளிக்க இந்த இன்ஷூரன்ஸ் பாலிசி எடுப்பது அவசியம். இந்தசமயத்தில் தொழிற்சாலை அல்லது நிறுவனத்தை  நடத்தும் வாடகை, ஊழியர்களின் சம்பளம் ஆகியவற்றை நிறுவனம் தவிர்க்க முடியாது. அதனால் இந்த இன்ஷூரன்ஸை எஸ்எம்இகள் எடுப்பது மிகவும் அவசியம்.

(iv) மரைன் - கார்கோ டிரான்ஸிட் இன்ஷூரன்ஸ்:

SME கைடுலைன்

தயாரிப்பாளரிடமிருந்து வாடிக்கை யாளருக்குப் பொருள்கள் செல்லும் போதோ அல்லது மூலப்பொருள்கள் நிறுவனத்துக்கு வந்து சேரும்போதோ வருகிற வழியில் சேதமடைந்தாலோ அல்லது திருடுபோனாலோ அதற்கு இழப்பீடு பெற இந்த இன்ஷூரன்ஸ் உதவுகிறது. இதில் திருட்டு மற்றும் சேதம் ஆகியவற்றுக்கு எந்த அளவில் பாதிப்புள்ளது என்பதை ஆராய்ந்து, அந்த அடிப்படையில் எஸ்எம்இகள் இழப்பீடு பெற முடியும்.

(v) இயந்திரம் செயலிழத்தலுக்கான இன்ஷூரன்ஸ்:

எஸ்எம்இகளில் சிலர் நான் இயந்திரங்களை நன்றாகப் பராமரித்து வருகிறேன். எனவே, அடுத்த 10 வருடத்துக்கு இன்ஷூரன்ஸ் எடுக்க வேண்டாம் என்று நினைக்கிறார்கள். ஆனால், நாம் நினைப்பதற்கு மாறாக இயந்திரம் திடீரென பழுதடைந்து விட்டால் அதன்மூலம் ஏற்படும் நஷ்டமானது நம் தொழிலையே ஸ்தம்பிக்க வைத்துவிடக்கூடும்.

(vi) சுற்றுச்சூழல் மாசு இன்ஷூரன்ஸ்:

எஸ்எம்இகள் தங்கள் நிறுவனத்தை ஆரம்பித்திருக்கும் இடம் மற்றும் அந்த இடத்தைச் சுற்றி அமைந்துள்ள இடங்களுக்கு நிறுவனத்தின் கழிவுகளால் ஏதாவது பாதிப்பு ஏற்பட்டால் அந்தப் பகுதி மக்களுக்கு இழப்பீடு அளிக்க வழிவகைச் செய்ய இந்த இன்ஷூரன்ஸ் உதவும். இதெல்லாம் நடக்காது என்ற நம்பிக்கையில் சிலர் இருந்துவிட்டு, திடீரென அந்தப் பகுதி மக்கள் பாதிக்கப்பட்டு அதற்கு இழப்பீடு கேட்கும்போது அதனைச் சொந்த செலவில் தரவேண்டிய சூழல் உருவாகும். இந்த இன்ஷூரன்ஸை எடுப்பதன் மூலம் இந்த நஷ்டத்தைத் தவிர்க்கலாம்.

4 ஃபிடிலிட்டி உத்தரவாத இன்ஷூரன்ஸ்!

உங்கள் நிறுவனத்தின் கணக்கில் பணத்தைச் செலுத்தும் உங்கள் நிறுவன ஊழியர் வங்கிக்குச் செல்லும்போது இடையில் யாராவது வழிமறித்தோ அல்லது அவரே தவறாகச் செயல்பட்டுப் பணத்தை எடுத்துக்கொண்டு போய்விட்டால், இந்த இன்ஷூரன்ஸ் மூலம் க்ளைம் கிடைக்கும். இதில் உள்ள நிபந்தனைகளின்படி, சரியான காரணங்களாக இருந்தால் க்ளைம் கிடைக்கும்.

5. ஊழியர் மற்றும் நிறுவனர்களுக்கான இன்ஷூரன்ஸ்:

எஸ்எம்இ ஒருவர் தானும் தன் ஊழியர்களும் ஆரோக்கியமாக இருக்க குரூப் ஹெல்த் இன்ஷூரன்ஸ், குரூப் பெர்சனல் ஆக்சிடென்ட் இன்ஷூரன்ஸ் ஆகியவற்றையும், அவர்கள் வெளிநாடுகளுக்குப் பயணம் மேற்கொள்ளும் சூழல் வரும்போது டிராவல் இன்ஷூரன்ஸையும் எடுப்பது சிறந்தது.

எஸ்எம்இ இன்ஷூரன்ஸ்: செய்யக்கூடாத தவறுகள்!

1. எந்தப் பொருளை தயாரிக்கிறீர்கள், உங்கள் கிடங்கில் எந்தப் பொருளை சேமித்து வைக்கிறீர்கள் என்பதை உணர்ந்து, அதனைச் சரியாகக் குறிப்பிட்டு, இன்ஷூரன்ஸ் எடுக்க வேண்டும். இல்லையெனில், இழப்பீடு மறுக்கப்பட வாய்ப்புள்ளது.

2. பாலிசியில் இந்தப் பொருளைதான் தயாரிக்கிறேன் என்று சொல்லிவிட்டு, வேறு ஒரு பொருளை தயாரிக்கும்போது இழப்பு நேர்ந்தால், இழப்பீடு கிடைக்காது.

3. கார்கோ டிரான்ஸிட் இன்ஷூரன்ஸ் எடுக்கும்போது எவ்வளவு பொருள்கள் எடுத்துச் செல்லப்படுகிறது என்பதைச் சரியாகக் குறிப்பிடுங்கள். பிரீமியம் குறைைவாகச் செலுத்தினால், குறைவான பிரீமியத்துக்கான இழப்பீடே கிடைக்கும்.''

எஸ்எம்இ தொழில்முனைவோர் கவனத்துக்கு...

உங்களுடைய சந்தேகங்கள் மற்றும் உங்களுக்கான பிரச்னைகள் பற்றிய கேள்விகளுக்கு தொடர்புகொள்ள வேண்டிய இ-மெயில் முகவரி: msme@vikatan.com   குரல்பதிவு மூலமாகவும் உங்கள் கேள்வியை பதிவு செய்யலாம். அதற்கு 044-66802920 என்ற எண்ணுக்கு டயல் செய்யுங்கள். கணினி குரல் வழிகாட்டும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism