Published:Updated:

SME கைடுலைன் : எஸ்எம்இ: லாபம் தரும் லாஜிஸ்டிக்ஸ்!

ச.ஸ்ரீராம்

SME கைடுலைன் : எஸ்எம்இ: லாபம் தரும் லாஜிஸ்டிக்ஸ்!

ச.ஸ்ரீராம்

Published:Updated:

 தொழில் முனைவோர்களின் வெற்றிக்கு...

பொருட்களை அதிக அளவில் தயாரித்து விற்றால் அதிக லாபம் கிடைத்துவிடும் என்று சொல்லிவிட முடியாது. மூலப்பொருட்களைக் குறைந்த விலையில் வாங்கி, அதைக் குறைந்த விலையில் கொண்டுவரவும், தயாரித்தப் பொருளை குறைந்த விலையில் சந்தைக்கு கொண்டு செல்லவும் முடிந்தால் மட்டுமே தொழில் மூலம் கிடைக்கும் லாபத்தின் வரம்பை உயர்த்த முடியும். தொழில் வட்டாரத்தில் இதற்கு ‘லாஜிஸ்டிக்ஸ்’ என்பார்கள். இந்த லாஜிஸ்டிக்ஸை எஸ்எம்இகள் எப்படி கையாள வேண்டும், இந்த வேலையை நாமே செய்யலாமா அல்லது இதற்கென இருக்கும் நிறுவனங்களின் துணையை நாடலாமா என்பது குறித்து சொல்கிறார் மடிசியாவின் தலைவர் மணிமாறன்.

‘‘லாஜிஸ்டிக்ஸ் என்பது ஒரு பொருளை ஓர் இடத்தில் இருந்து மற்றொரு இடத்துக்கு கொண்டுபோய் சேர்ப்பது மட்டுமல்ல, அதனை எவ்வளவு சிறப்பாகவும், சரியான நேரத்திலும் கொண்டுபோய்ச் சேர்க்கிறோம் என்பது முக்கியம்.   லாஜிஸ்டிக்ஸைப் பொறுத்தவரை, எஸ்எம்இகள் மூன்று முக்கியமான விஷயங்களை எஸ்எம்இகள் கவனிக்க வேண்டும். முதலாவதாக, யார் மூலம் பொருட்களை அனுப்புகிறோம் என்பது. சில எஸ்எம்இகள் தாங்களே சொந்தமாக லாஜிஸ்டிக்ஸ் வசதியை வைத்திருப்பார்கள்.

ஒட்டுமொத்த விகடனுக்கும் ஒரே ஷார்ட்கட்!

உதாரணமாக, ஒரு லாரி அல்லது ஒரு வேன் வைத்துக்கொண்டு தாங்கள் தயாரிக்கிற பொருட்களை அதன்மூலம் சந்தைக்கு கொண்டு செல்வார்கள். இதனால் பொருட்களை கொண்டு செல்லும் செலவு மிகவும் குறையும். குறுகிய எல்லைக்குள் வர்த்தகம் செய்பவர்களுக்கு இந்த முறை மிகவும் ஏற்றது. அல்லது மாவட்டங்களுக்கு இடையேயான பரிமாற்றத்துக்கு இந்த முறை நன்கு பொருந்திவரும். 

SME கைடுலைன் : எஸ்எம்இ: லாபம்  தரும் லாஜிஸ்டிக்ஸ்!

ஆனால், சிறிய முதலீட்டில் தொழில் செய்பவர்கள், சொந்தமாக லாஜிஸ்டிக்ஸ் வசதியை வைத்துக்கொள்ள முடியாதவர்கள், மற்றவர்கள் நடத்தும் லாஜிஸ்டிக்ஸ் நிறுவனங்கள் மூலமே பொருட்களைக் கொண்டு செல்ல முடியும். இதனால் செலவு கொஞ்சம் அதிகமானாலும் எல்லா ஊர்களுக்கும் அதிக அளவில் பொருட்களைக் கொண்டுசெல்ல முடியும்.

இதில் நாம் அவசியம் கவனிக்க வேண்டிய விஷயம், சரியான நேரத்திலும் பாதுகாப்பாகவும் பொருளைக் கொண்டுபோய்  சேர்ப்பார்களா என்பதுதான். இதற்கான உத்தரவாதத்தைப் பெற்றபின்பே, பொருட்களைக் கொண்டு செல்லும் பணியை அவர்களிடம் ஒப்படைக்கலாம். பொருட்களை எடுத்துக்கொண்டு செல்லும் கன்டெய்னர்கள் பொருட்களின் தன்மைக்கு ஏற்ப அமைக்கப்பட்டு இருக்கிறதா, நீங்கள் சொல்லும் பகுதிக்கு பொருட்களை எடுத்துச் செல்ல முறையான அனுமதிகள் பெறப்பட்டுள்ளதா என்பதைக் கவனித்து பொருட்களை அனுப்பும் வேலையைத் தரலாம்.

SME கைடுலைன் : எஸ்எம்இ: லாபம்  தரும் லாஜிஸ்டிக்ஸ்!

கட்டண விஷயத்திலும் ஆராய்ந்து செயல்பட்டால் மட்டுமே லாபம் பார்க்க முடியும். சொந்த வாகனங்களப் பயன்படுத்தி பொருட்களை அனுப்ப நினைக்கும் போது, அதற்கு ஆகும் செலவுகளைக் கணக்கிட்டு, அதனை மற்ற காரணிகளோடு ஒப்பிட்டு சரியான அமைப்பைத் தேர்ந்தெடுப்பதும் அவசியம்.

இரண்டாவதாக, உங்களுக்கான பொருட்கள் எந்த நேரத்தில் உங்களிடம் வந்துசேர வேண்டும் என்பதையும், எந்த நேரத்தில் நீங்கள் சந்தைக்குக் கொண்டுபோய்ச் சேர்க்க வேண்டும் என்பதையும் பொறுத்து உங்கள் நேரத்தை திட்டமிட வேண்டும். உங்களுக்கு வரவேண்டிய நேரத்திலோ அல்லது நீங்கள் கொடுக்கவேண்டிய நேரத்திலோ சிக்கல் ஏற்பட்டாலும், அது உங்களுக்கு பாதிப்பையே ஏற்படுத்தும். இதற்கு சிறந்த திட்டமிடல் தேவை. பொருட்களை எப்படிக் கொண்டு செல்கிறார்கள், எந்த பாதையில் சென்றால் இலக்கை குறுகிய காலத்தில் அடைய முடியும் என்கிற விஷயங்களை ஆராய்வது இந்தத் திட்டமிடலில் அடங்கும்.

இறுதியாக, உங்கள் லாஜிஸ்டிக்ஸ் எப்படி இருக்க வேண்டும் என்பது. சில பொருட்களை ரயில் மூலமாகவும், சில பொருட்களை லாரி மூல மாகவும் கொண்டு செல்ல முடியும். உங்கள் பொருளை எந்தவகையில் கொண்டு சென்றால், குறைந்த காலத்தில், குறைந்த கட்டணத்தில் சேதாரம் இல்லாமல் கொண்டு செல்ல முடியும் என்பதைப் பார்த்து, அதன்படி முடிவெடுக்கலாம்''  என்றார் மணிமாறன்.

இதையும் எஸ்எம்இகள் கவனிக்கலாமே!


லாஜிஸ்டிக்ஸுக்கு இன்ஷூரன்ஸ் அவசியம்!

பொருட்களை கொண்டு செல்லும்போது, திருடு போவதற்கோ அல்லது சேதமடைவதற்கோ வாய்ப்புள்ளது. பொருட்கள் ஒரு மாநிலத்திலிருந்து இன்னொரு மாநிலத்துக்கு கொண்டு செல்லும்போது கொள்ளை அடிக்கப்படலாம். அல்லது பெருமழை, புயல், வெள்ளம் காரணமாக சேதமடையலாம். இதுமாதிரியான பாதிப்புகளிலிருந்து நாம் தப்பிக்க வேண்டுமெனில், நாம் அனுப்புகிற பொருட்களுக்கு இன்ஷூரன்ஸ் எடுப்பது கட்டாயம்.

உள்ளூர், உள்நாடு அல்லது வெளிநாடுகளுக்கு பொருட்களை அனுப்பும்போது, பொருளின் மதிப்பைச் சரியாக எடுத்துச் சொல்லி, இன்ஷூரன்ஸ் எடுப்பது அவசியம். அப்படி எடுத்தால்தான் ஏதாவது பாதிப்பு ஏற்பட்டால், அதிலிருந்து தப்ப முடியும்.


எஸ்எம்இகளை வளர்த்தெடுக்கும் கூகுள்!

SME கைடுலைன் : எஸ்எம்இ: லாபம்  தரும் லாஜிஸ்டிக்ஸ்!

எஸ்எம்இகளுக்கு உதவும் வகையில் கூகுள் ஒரு ஆப்ஸை இந்த மாத இறுதியில் வெளியிட உள்ளது. இதன்மூலம் எஸ்எம்இகள் தங்களை விளம்பரப்படுத்திக் கொள்ளவும், கூகுள் தேடலில் பெரிய நிறுவனங்கள் அளவுக்கு தங்களை தரம் உயர்த்திக்கொள்ளவும் வழி கிடைக்கும் என கூகுளின் எஸ்எம்இ பிரிவு தலைவர் சூர்யநாராயணா தெரிவித்திருக்கிறார். இந்தியா முழுக்க எஸ்எம்இ ஹீரோக்களை அடையாளம் கண்டு அவர்களை மேம்படுத்தும் திட்டத்தை சமீபத்தில் அறிவித்தது கூகுள். இதன் தொடர்ச்சியாக, சென்னையைச் சேர்ந்த ஐந்து எஸ்எம்இ நிறுவனங்களைத் தேர்வு செய்திருக்கிறது. கூகுளின் இந்த முயற்சியினால் எஸ்எம்இகள் மிகுந்த நன்மை அடைவார்கள் என்று எதிர்பார்க்கலாம்.

படம்:  ரா.வருண் பிரசாத்.

எஸ்எம்இ தொழில்முனைவோர் கவனத்துக்கு...

உங்களுடைய சந்தேகங்கள் மற்றும் உங்களுக்கான பிரச்னைகள் பற்றிய கேள்விகளுக்கு தொடர்புகொள்ள வேண்டிய இ-மெயில் முகவரி: msme@vikatan.com   குரல்பதிவு மூலமாகவும் உங்கள் கேள்வியை பதிவு செய்யலாம். அதற்கு 044-66802920 என்ற எண்ணுக்கு டயல் செய்யுங்கள். கணினி குரல் வழிகாட்டும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism