Published:Updated:

இனி எல்லாம் லாபமே!

குறைகளைப் பட்டியல் போடுவீர்களா?டாக்டர் எஸ்.கார்த்திகேயன்,ஓவியம்: ஸ்யாம்

இனி எல்லாம் லாபமே!

குறைகளைப் பட்டியல் போடுவீர்களா?டாக்டர் எஸ்.கார்த்திகேயன்,ஓவியம்: ஸ்யாம்

Published:Updated:

வெற்றிகரமான முதலீட்டுக்கு...

சந்தையில் நீண்ட கால அடிப்படையில் செயல்படுவதின் அவசியத்தைப் புரிந்துகொண்ட நாம், அடுத்து பார்க்க வேண்டிய முக்கியமான ஒரு விஷயம், நம்மைப் பற்றி நாம் கொண்டிருக்கும் உயரிய எண்ணங்களை. சாதாரணமாக ஒருவர் நம்மிடம் வந்து உங்களுடைய சாதனைகளைப் பற்றிச் சொல்லுங்கள் என்று கேட்டால், நம்முடைய வயதுக்கேற்றவாறு சிறுவயதில் இருந்து நம்முடைய சாதனைகளை நினைவுபடுத்தி கடகடவெனச் சொல்ல முற்படுவோம்.

உங்களிடம் இருக்கும் குறைகளைச் சொல்லுங்கள் எனக் கேட்டால், பெரியதாய் ஒன்றுமில்லை என்று மழுப்ப முற்படுவோம். அப்படியெல்லாம் இல்லை. குறையென்று எல்லா மனிதர்களுக்கும் சில விஷயம் இருக்கவே செய்யும். இத்தனை விஷயங்களை உங்கள் வாழ்நாள் சாதனையாகச் சொன்ன நீங்கள், உங்கள் குறைகள் என்னென்ன என்று கொஞ்சம் சிந்தித்துப் பட்டியலிடுங்கள். அப்படிப் பட்டியலிடுவதில் தவறேதும் இல்லை என்று விளக்கினாலும், குறைகளைப் பட்டியலிட  மிகவும் யோசிப்போம்.

ஒட்டுமொத்த விகடனுக்கும் ஒரே ஷார்ட்கட்!

சொல்லித்தான் பார்ப்போமே எனத் துணிந்து நம்முடைய குறைகளைப் பற்றி யோசித்தாலுமே, சமீப காலத்தில் நாம் நம்மிடம் கண்ட குறைகள் மற்றும் தவறுகள் மட்டுமே நினைவுக்கு வருமே தவிர, சுலபத்தில் சிறுவயதில் நம்மிடம் இருந்த குறைகள் நினைவுக்கு வராது. ஏனென்றால், நாம் சிறுவயதிலிருந்து பழக்கப் படுத்தப்பட்ட விதமே குறைகளைக் களைந்து அல்லது அவற்றையும் தாண்டி வெற்றிபெற முயற்சி செய்ய வேண்டும் என்ற கோணத்தில்தான்.

இனி எல்லாம் லாபமே!

குறைகளைக் களைதல் என்ற வழியில் நாம் என்னென்ன காரியங்களைச் செய்கின்றோம் என்று பார்த்தால், இயல்பாக வராத பாடத்துக்கு (உதாரணத்துக்குக் கணக்குப் பாடம்!) கூடுதலாக பிரத்யேகமான டியூஷன் வைத்துப் படிப்பதைப் போன்ற பல சீரிய முயற்சிகளைச் செய்து குறைகளைக் களைந்து வாழ்கிறோம். ஒரு விஷயம் கடினமாக இருந்தால், அதில் கூடுதல் பயிற்சி எடுப்பதில் தவறென்ன இருக்கிறது என நீங்கள் கேட்கலாம். அதில் தவறேதும் இல்லை. நிச்சயமாய் நமக்குக் கடினமாய் இருக்கும் ஒரு விஷயத்தில் சீரிய நோக்குடன் அதிக உழைப்பை நாம் கொடுக்கும்போது, அந்த விஷயத்தில் நம்முடைய திறன் மேம்படவே செய்யும்.

ஆனால் இந்தவகை முயற்சிகளைச் செய்து, வென்று பழகிவிட்டதாலேயே நாம் நாளடைவில் அனைத்து இடங்களிலும்/விஷயங்களிலும் குறைகளைப்  பெரிய பொருட்டாக நினைக்காமல் வாழப்பழகி விடுகிறோம். எந்த ஒரு கடினமான விஷயத்துக்கும் உண்மையான ஈடுபாட்டுடன் முழு உழைப்பையும் சரியான திறமை வாய்ந்ததொரு நபரின் உதவியுடன் ஈடுபட்டால் வெற்றிகாண முடியும் என்பது உலகறிந்த உண்மை. இந்த உண்மையை நாமும் பள்ளிப்பருவத்தில் இருந்தே நம்முடைய சொந்த அனுபவத்தையோ அல்லது நமக்குத் தெரிந்தவர்கள் கண்ட முன்னேற்ற அனுபவத்தையோ வைத்து மனதினுள் ஆழமாகப் பதியவைத்துக் கொள்கிறோம். ஒன்று, குறைகளைக் கூடுதல் முயற்சியால் சரிசெய்திருப்போம் அல்லது குறைகள் இருக்கும் விஷயத்தில் தொடர்ந்து ஈடுபடாமல் டேக்டைவர்ஷன் என திசை மாறிச் சென்றிருப்போம். இதனாலேயே நமக்கு நம்முடைய குறைகளை உடனடியாக வெளிப்படையாகப் பட்டியலிட முடிவதில்லை.

இனி எல்லாம் லாபமே!

தனிமனிதக் குறைபாடு களுக்கும் முதலீடுகளுக்கும் என்ன சம்பந்தம் என்று நீங்கள் கேட்கலாம். ஒருவரின் திறமைக் குறைபாட்டைச் சரிசெய்து முன்னேற முடியும் என்பது முன்னேற்றம் தரும் சிந்தனை (பாசிட்டிவ் திங்கிங்). மனிதர்களுக்கு அந்தச் சிந்தனை இல்லாது போனால் உலகில் வாழ்வது கடினமாகிவிடும். நடப்பில் நம்மில் பலரும் நம்முடைய குறைபாடுகளைச் சீரிய முயற்சியால் சரிசெய்து அதன்மூலம் முன்னேற்றத்தையும் கண்டு விடுகிறோம். இதனால் நம் மனதில் பாசிட்டிவ் எண்ணங்கள் எப்போதும் குடிகொண்டி ருக்கின்றன. இது வாழ்க்கைக்கு உதவும் பெரிய விஷயமாக இருந்தபோதிலும், முதலீட்டுச் சந்தைக்குச் சற்றும் உதவாத விஷயமாகவே இருந்துவிடுகிறது.

குறைகளைக் களைதலில் ஓரளவுக்கு வெற்றி பெற்றுவிடுவதாலேயே நம்முடைய குறைகளை நம்மால் சுலபத்தில் பட்டியலிட முடிவதில்லை என்று சொல்லலாம். மனிதர்கள் அனைவரும் உலக வாழ்க்கைக்குத் தேவைப்படும் அனைத்து திறன்களையும் ஒரேமாதிரியாய் கொண்டிருப்பவரில்லை என்பது அனைவருமே ஒப்புக்கொள்ளவேண்டிய ஓர் உண்மை. கணக்கில் புலியாய் இருப்பவருக்கு உயிரியியல் வேப்பங்காயாய் இருப்பதும், ஆங்கிலத்தில் புலியாய் இருப்பவர் கணக்கில் தடுமாறுவதும் நம்முள் இயல்பாய் வரும் திறமை வேறுபாடுகளால் மட்டுமே என்பதை நாம் மறுப்பதற்கில்லை. உலகியல் வாழ்க்கையில் வருகிறதோ இல்லையோ, நேரத்தையும், உழைப்பையும் அதில் செலவிடு; நீ அதில் ஸ்பெஷலிஸ்ட் ஆவாய் என்ற எண்ண ஓட்டத்தில் செயல்படும் நாம் முதலீட்டுச் சந்தைக்கும் அதே மாதிரியான கருத்துகளுடன் வருகிறோம். அப்படி வரும்போதுதான் சிக்கலே ஆரம்பிக்கிறது.

முதலீட்டுச் சூழல்கள் எப்படி இருக்கிறது என்பதை முழுமையாகப் பார்த்து அறிந்து முதலீடு செய்ய முற்படும் நாம் சூழ்நிலை சரியில்லாத காலகட்டத்தில்கூட இது சரியாகிவிடும் என்ற நம்பிக்கைக்கு வரவைப்பது இந்த பாசிட்டிவ் திங்கிங்தான். ஏனென்றால், சரியில்லாத விஷயங்கள் பலவற்றை நாம் ஏற்கெனவே சரிசெய்து வந்திருக்கிறோமே! அதுபோல் இந்த முதலீடும் சரியாகிவிடும். நஷ்டத்தில் இருக்கும் இந்த கம்பெனியும் ஒருநாள் லாபத்துக்கு வரும் என்ற பாசிட்டிவ் எண்ணங்களை நாம் வளர்த்துக்கொள்ள ஆரம்பிக்கிறோம்.

சந்தையில் சூழ்நிலை/கம்பெனியின் செயல்பாடுகள் சரியில்லை என்று யாராவது சொன்னால், இல்லையில்லை சரியாகிவிடும் என்று பாசிட்டிவ்வாய் பேசுகிறோம். அதே எண்ணத்துடன் முதலீடும் செய்கிறோம். ஒருவேளை, நாம் எதிர்பார்த்ததைப் போலவே சூழலோ/கம்பெனியோ சூப்பராய் போக ஆரம்பித்தால்,  பார்த்தீர்களா என் கணிப்புத்திறனை என்கிறோம். மாறாக, சந்தையின் சூழலோ/கம்பெனியின் நிலைமையோ இன்னமும் மோசமானால் நாம் நம்முடைய எண்ணமும்/கணிப்பும் தவறு என்று ஒப்புக்கொள்ளாமல் சந்தையையும் அதில் சம்பந்தப்பட்ட பலரையும் குறை சொல்ல ஆரம்பிக்கிறோம். இதில் கருத்தில்கொள்ள வேண்டிய ஒரு முக்கிய விஷயம் என்னவென்றால், வாழ்க்கைக்கு உதவும் பாசிட்டிவ் திங்கிங் சந்தைக்குப் பெரிய அளவில் உதவுவதில்லை என்பதுதான்.

இனி எல்லாம் லாபமே!

இதெல்லாம் பொய். இப்படியெல்லாம் யாரும் செய்வதில்லை என்று நீங்கள் வாதிடலாம். உங்களுடைய வாதம் சரியென்றே வைத்துக் கொள்வோம். உங்களுடைய பாசிட்டிவ் திங்கிங் செயல்பாடு சந்தைக்கும் முழுமையாகப் பொருந்தி வருகிறது. நீங்கள் நினைப்பது போலவே சந்தையின் சூழலும், கம்பெனியின் சூழலும் முன்னேற்றப் பாதையில் போகிறது என்றே வைத்துகொள்வோம்; அட, இந்தத் திறனை வைத்து நீங்கள் முதலீடுகளைக் கணிப்பதில் பெரும் திறமைசாலி என்றே முடிவும் கட்டுவோம். இப்போது பின்வரும் கேள்விகளுக்கு நீங்கள் பதிலைச் சொல்லுங்கள்.

நீங்கள் செய்த முதலீடு ஒன்றை, விற்றபின் பல மடங்கு விலை ஏறியதே... உங்கள் கணிப்பு எப்படி  தவறாகப் போனது என்று கேட்டால், சந்தை ரொம்பவுமே இர்ரேஷனல். அதனால் மதிப்புக்கும் விலைக்கும் சம்பந்தமே இல்லாமல், நான் விற்றபிறகு விலை மேலேபோனது. நான் விற்றதற்குப் பின்னால் ஸ்பெகுலேட் செய்து ஏத்து ஏத்துன்னு ஏத்தீட்டாங்க... எனப் பலரையும் குறையாய் சுலபத்தில் சொல்லிவிடுவீர்கள்தானே!

இப்போது மற்றுமொரு கேள்விக்குப் பதில் சொல்லுங்கள். நீங்கள் செய்த முதலீடு ஒன்று விலை இறங்க ஆரம்பித்து வாங்குவார் இல்லாமல் கிடக்கிறதே... அதை ஏன் விற்காமல் இன்னமும் காபந்து செய்து வைத்துகொண்டிருக்கிறீர்கள் என்று கேட்டால், அந்த நிறுவனம் தரைதட்டிக் கிடந்தால்கூட, கொஞ்சம் காத்திருங்கள். 2020ல் அது சூப்பராய் போகும் என்ற பாசிட்டிவ் பதிலைச் சொல்வீர்கள்தானே!

இயல்பாகவே நாம் நம்மைப் பற்றிய பாசிட்டிவ் எண்ணங்களைக் கொண்டவர்களாக இருக்கும் வண்ணமே உலகத்தால் வளர்த்தெடுக்கப் படுகிறோம்.  இது வாழ்க்கைக்கு அத்தியாவசியமான ஒன்று என்ற போதிலும், முதலீட்டுச் சந்தையில் கொஞ்சம் நன்றாகவே இடறிவிடக்கூடிய ஒரு விஷயமாகும்.

நம் வாழ்க்கை நம் கையில் இருப்பதால், நம்மைப் பற்றிய நம்முடைய பாசிட்டிவ் திங்கிங் என்பது நமக்கு உதவுகிறது. கம்பெனியின் நிர்வாகம் மற்றவர்கள் கையில் இருப்பதால், வெறுமனே நம்முடைய பாசிட்டிவ் திங்கிங் மட்டும் அதை உயரச் செய்வதில்லை. இதனைத் தெளிவாகப் புரிந்துகொண்டு முதலீட்டு சந்தைக்குள் அனைவரும் வரவேண்டும் என்பதுதான் சரியானது.

(லாபம் தொடரும்)

நிதிப் பற்றாக்குறையைச் சமாளிக்க ரூ.57,000 கோடி தேவை!

இந்த நிதியாண்டுக்கான நிதிப் பற்றாக்குறையைச் சமாளிக்க 57,000 கோடி ரூபாய்த் தேவைப்படுவதாகச் சொல்லி இருக்கிறார் மத்திய நிதி அமைச்சர் அருண் ஜெட்லி. நாட்டின் ஜிடிபியில் 4.1% அளவுக்கு நிதிப் பற்றாக்குறையைக் கொண்டுவர இலக்கு நிர்ணயித்திருந்தார் நிதி அமைச்சர். இந்த நிதியாண்டின் முடிவுக்குள் இந்த இலக்கை அடைந்துவிடுவோம் என்று நம்பிக்கை தெரிவித்திருக்கிறார் அவர். நடக்குமா என்று பொறுத்திருந்து பார்ப்போம்!