Published:Updated:

இனி எல்லாம் லாபமே - 14

திசை மாற்றும் உள்ளுணர்வு!

இனி எல்லாம் லாபமே - 14

திசை மாற்றும் உள்ளுணர்வு!

Published:Updated:

தொழிலானாலும் சரி, முதலீடானாலும் சரி உள்ளுணர்வு என்பது மிகப் பெரிய அளவில் நம்மைத் திசை திருப்புகிறது எனலாம். ஒரு செயலை ஆரம்பிக்கும்போது இதில் நாம் வெற்றி பெறுவோமா அல்லது தோல்வி அடைவோமா என நம்முடைய மூளைக்குள் தொடர்ந்து சாதக, பாதகங்களைக் கணக்கில் எடுத்துக்கொண்டு அல்லாடுகிறோம். அந்தச் செயலை செய்ய ஆரம்பித்தபிறகும்கூட நம் மனதில், வெற்றி பெற்றால், தோல்வியுற்றால் என்ற இரண்டு நிலைகளையுமே அலசிக்கொண்டே இருக்கிறோம். இறுதியாக, அந்தச் செயலில் வெற்றி பெற்றபின்னர் நமக்கு மறந்துபோவது இத்தனை நாட்கள் மனதில் அந்தச் செயலின் தோல்வி குறித்துக் கொண்டிருந்த எண்ணங்களெல்லாம்தான். வெற்றியின் அளவைப் பொருத்து, தோல்வி குறித்த எண்ணங்களில் மறதியின் வேகம் இருக்கும்.

இனி எல்லாம் லாபமே - 14

உதாரணமாக, நாம் பலமுறை நம்முடைய பள்ளி/கல்லூரி கல்வி மற்றும் வேலைக்கான நுழைவுத் தேர்வுகளை எழுதிவிட்டு நம்முடைய மதிப்பெண் குறித்த பயத்துடன் உலாவுவோம். நாம் எழுதிய விடைகள் சரிதானா என்ற ஆய்வை நமக்கு நாமே சரிவரச் செய்துகொள்ள முடியாததால், இந்தவகை எண்ணம் நமக்குத் தோன்றும். முடிவுகள் வெளிவந்த பின்னர் சூப்பர் வெற்றி பெற்றிருந்தால், அந்தப் பயங்களெல்லாம் உடனடியாய் ஒரேயடியாய் மறந்துபோய்விடும். கொஞ்சம் குறைந்த மதிப்பெண் வாங்கித் தேர்வடைந்திருந்தால், கொஞ்ச காலத்துக்கு நல்லவேளை ஃபெயில் ஆகவில்லை என்ற எண்ணம் நிலைத்து, பின்னர் அந்த நினைப்புக்கள் மறந்துவிடும்.

ஒட்டுமொத்த விகடனுக்கும் ஒரே ஷார்ட்கட்!

இதில் பரிட்சை என்பது ஒரு உதாரணம்தான். அலுவலகத்தில் ஒரு மீட்டிங், வேலையில் அடைய வேண்டிய டார்கெட், செல்ல வேண்டிய வெளியூர்/வெளிநாட்டுப் பயணம், குழந்தையின் அட்மிஷன் என எல்லா வெற்றி/தோல்வி என்ற இருநிலை கொண்ட விஷயங்களிலுமே அது நடந்து முடியும் ஆசையும் (பாசிட்டிவ் எண்ணம்) பயமும் (நெகட்டிவ் எண்ணம்) மாறிமாறி வந்துபோய்க் கொண்டேயிருக்கும்.

அந்த செயல் நடந்து முடிந்த பின்னால் முடிவுக்கு ஏற்றாற்போல் பாசிட்டிவ் எண்ணமோ/நெகட்டிவ் எண்ணமோ உள்ளுணர்வாக உருவெடுத்துவிடுகிறது. நான் அப்பவே நினைத்தேன்... எனக்குத் தெரியும், நான் வெற்றி பெறுவேன் என்று என நாம் சொல்வது அதானால்தான்.

உண்மையில் நமக்கு வெற்றி/தோல்வி என்ற இரண்டு எண்ணங்களும் மனதில் நிழலாடினாலும் முடிவு தெரிந்தபின்னர் முடிவுடன் ஒப்புமை கொண்ட விஷயங்கள் மனதில் நிலைத்து நின்றுவிடுகிறது. அப்படி நிலைத்து நிற்பதையே நாளடைவில் நாம் உள்ளுணர்வு என்று முடிவுசெய்துவிடுகிறோம். உளவியல் ஆய்வுகளும் இதையே சொல்கின்றன.

ஒரு செயலில் ஈடுபடும்போது பொதுவாக நினைவில் நிற்பவை அதில் எதிர்கொள்ளும் பாசிட்டிவ் விஷயங்களே. இறுதியாக அந்தச் செயலில் கிடைத்தது வெற்றியானாலும் சரி, தோல்வியானாலும் சரி நினைவில் நிற்பதென்னவோ இது மட்டுமேதான். வெற்றி கிடைத்தால் பாசிட்டிவ் விஷயங்கள் உள்ளுணர்வாய் மாறுகின்றன. தோல்வி கிடைத்தால் பாசிட்டிவ் விஷயங்கள் மறக்கப்படுகின்றன.

இனி எல்லாம் லாபமே - 14

சரி, முதலீட்டுக்கு வருவோம். முதலீட்டில் வெற்றி பெறுவதிலும் இந்த உள்ளுணர்வு என்பது தன்னுடைய பங்களிப்பை கச்சிதமாகச் செய்துவிடுகிறது. இதில் வெற்றி என்பது தொடர்ந்து வரும்போது உள்ளுணர்வு கொஞ்சம் கொஞ்சமாக அதீத தன்னம்பிக்கையாக  (Overconfidence) மாறிவிடும் வாய்ப்பும் உள்ளது.

இதில் நீங்கள் புரிந்துகொள்ள வேண்டியது என்னவென்றால், நம்முடைய மூளையின் திறன் குறித்த விஷயங்களைத்தான். நம்முடைய மூளை நாம் நம்முடைய வாழ்வில் எதிர்கொள்ளக்கூடிய சவால்களைத் திறம்பட எதிர்கொள்வதற்கான திறன்களைக் கொண்டதாக இருக்கிறது. அதேசமயம், நம்முடைய கடந்த காலத்தைத் துல்லியமாக நினைவில் வைத்துக்கொள்வதில் கொஞ்சம் தடம் புரளும் வண்ணமே செயல்படுகிறது. அதனாலேயேதான் நமக்குப் பிடித்த விஷயங்கள் குறித்த பாசிட்டிவ் விஷயங்களைப் பக்காவாக ஒதுக்கி பதிவு செய்துவைக்கிறது. வெற்றி நமக்குப் பிடிக்கும். செயல் முடிந்தபின்னர் வெற்றி கிடைத்தால் அது குறித்த பதிவுகள் மூளையில் இடம்பிடிக்கின்றன. அதுவே, உள்ளுணர்வின் வெளிப்பாடு என்று நாமும் நினைக்க ஆரம்பித்துவிடுகிறோம்.

ஒரு முதலீட்டை செய்யும்போது நாம் சற்று பயத்துடனேயே ஆரம்பிக்கிறோம். வெற்றி கிடைத்தால், அட, இவ்வளவுதானா என்ற மனநிலைக்குச் சுலபத்தில் போகிறோம். இதனாலேயே அடுத்த முதலீட்டில் நாம் நினைப்பதுதான் சரியாக இருக்கும் என்ற ஆணித்தரமான எண்ணத்துடன் செயல்பட ஆரம்பிக்கிறோம். ஏனென்றால், உள்ளுணர்வு சொல்கிறதே! உள்ளுணர்வின் பிடியில் இருந்து நம்மால் சுலபத்தில் தப்பித்துவிட முடியாது. இதைப் புரிந்துகொள்வதில்தான் நம்முடைய வெற்றியே இருக்கிறது. இதிலிருந்து ஒரேயடியாய் நம்மால் தப்பிக்க முடியாவிட்டாலும் நம்முடைய மூளையின் முடிவெடுக்கும் நடைமுறை (ப்ராசஸ்) மற்றும் ஞாபகம் வைக்கும் நடைமுறை குறித்து நினைவில் வைத்துக்கொண்டால், ஓரளவு தடம் புரளாமல் முதலீடு செய்ய முடியும்.

நடைமுறை நினைவில் இருந்தால் மட்டும் போதுமா? உள்ளுணர்வு சொல்வது என்பது பழக்கமாயிற்றே! சுலபத்தில் நம்மை ஆட்கொண்டுவிடும் இல்லையா? ஒன்றை நம்மால் தவிர்க்க முடியாது என்று தெரிந்தால், அதைத் தவிர்ப்பதற்கான முயற்சிகளை நிறுத்திவிட்டு, அந்த வகை விஷயம் நம்மிடம் வருவதைத் தெரிந்துகொள்ளும் வகையில் நம்முடைய செயல்பாட்டை நாம் மாற்றி அமைத்துக்கொள்ள வேண்டும்.

முதலீட்டில் முதலில் பயம், இறுதியில் வெற்றி பெற்ற பின்னர் அதீத தன்னம்பிக்கை என்றுதானே நம் நிலைமை மாறுகிறது என நாம் கவலைப்படுகிறோம். இதைத் தடுப்பதற்குப் பதில், ஆரம்பத்தில் நாம் முதலீடு செய்யும்போது, எந்த அளவுக்கு லாபம் குறித்து உறுதியில்லாத(Uncertainity) நிலையில் இருந்தோம் என்பதைக் குறித்துவைத்துக் கொள்ளவேண்டும். அந்த முதலீட்டைச் செய்தபின்னர், ஒவ்வொரு நிலையிலும் லாப/நஷ்டம் குறித்த உறுதியில்லாத நிலை எந்த அளவுக்கு இருந்தது என்பதையும் குறித்து வைத்துக்கொண்டே வரவேண்டும். இறுதியில் நாம் வெற்றி அடைந்தாலுமே முதலீடு செய்ய ஆரம்பித்த நாள் முதல் வெற்றிகரமாக வெளியேறிய நாள் வரையிலுமான மனநிலையை நாம் டாக்குமென்ட் செய்துவிட்டோமேயானால், அதனை ஒருமுறை நாம் திருப்பிப் பார்த்தால் நமக்குச் சட்டென உள்ளுணர்வு வந்து எட்டிப் பார்க்கவே பார்க்காது.

இதனாலேயே முதலீட்டு முடிவுகளை எடுக்கும்போதே வெற்றி, தோல்விக்கான வாய்ப்புகள் குறித்த நம்முடைய எண்ணங்களை முதலீடு செய்த நாளின் ஆரம்பத்திலிருந்து குறிப்பிட்ட காலகட்ட இடைவெளிகளில் பதிவு செய்யவேண்டும். அப்படிச் செய்துவந்து திருப்பிப் பார்த்தால், உள்ளுணர்வு என்ற விஷயமும் அதீத தன்னம்பிக்கை என்ற விஷயமும் நம்மை அண்டாமல் ஓரளவுக்கு நம்மால் தடுக்கமுடியும். ஏனென்றால், எழுதி வைத்தவற்றைத் திரும்பிப் பார்க்கும்போது, எந்த அளவுக்கு நாம் பயந்து பயந்து இந்த முதலீட்டுக் காலகட்டத்தில் இருந்திருக்கிறோம் எனத் தெளிவாக நமக்குப் புரியும்.

அதனாலேயே முதலீட்டில் லாப நஷ்டம் என்ற இரண்டுக்கும் வாய்ப்புள்ளது. நாம் ஒன்றும் எதிர்காலத்தைக் கணிப்பதில் சிறந்தவர்கள் இல்லை (அப்படி இருந்திருந்தால் ஏன் இவ்வளவு பயம் என்று நமக்கு நாமே கேட்டுக்கொள்வோமே!) என்பதும் நமக்குப் புரியும்.

இனி எல்லாம் லாபமே - 14

இந்த உள்ளுணர்வு என்பது ஏற்கெனவே நாம் பார்த்த ஓரிரு விஷயங்களை உள்ளடக்கியதாகவே இருக்கும். பொதுவாக, நாம் நமக்குப் பிடித்த விஷயங்களையே கவனத்தில் கொள்கிறோம் என்பது அதில் ஒன்று. நாம் லாபம் வரும் என்று நினைத்து ஒன்றில் முதலீடு செய்ய ஆரம்பிக்கும்போது அந்த எண்ணத்தை ஊக்குவிக்கும் வகையில் வரும் செய்திகளையே நாம் மனதில் கொள்கிறோம். எதிர்செய்திகள் ஏதும் வந்தால் அதைக் கண்டுகொள்வதும் இல்லை – கருத்தில்கொள்வதும் இல்லை. இதனை நாம் ஏற்கெனவே பார்த்தோம்.

இப்படிப் பிடித்ததை நினைவில் கொண்டு திரியும் நாம், வெற்றி கிடைத்தவுடன் நினைவில் உள்ளவற்றைத் திரும்பிப் பார்த்தால் என்னவாகும்? நாம் முதலீடு செய்த தேதியில் இருந்து அந்த முதலீட்டில் இருந்து வெற்றிகரமாக வெளியேறிய தேதி வரையிலான அந்த முதலீடு குறித்த பாசிட்டிவ் செய்திகள்தானே!

அட, என்ன ஒரு திறமையான ஆள் நான். நான் இந்த முதலீட்டை கண்டுபிடித்துச் செய்த நாள் முதல் இன்றுவரையில் இத்தனை பாசிட்டிவ் செய்தி வந்திருக்கிறது. இதெல்லாம் நடக்க இருக்கும் சிறந்த கம்பெனி இது என்பதை எப்படி நான் முன்னாடியே கண்டுபிடித்துவிட்டேன் பார்த்தீர்களா என்கிற இறுமாப்பு நம்மிடையே வரும் இல்லையா? இந்த வகை இறுமாப்புத் தவறு என்பதை ஒப்புக் கொள்வீர்கள்தானே!

(லாபம் தொடரும்)

டாக்டர் எஸ்.கார்த்திகேயன்

டாப் கியரில் ஓலா!

ஓலா டாக்ஸி நிறுவனம், டாக்ஸி ஃபார் சூர் டாக்ஸி நிறுவனத்தை 200 மில்லியன் டாலர் (சுமார் 1,240 கோடி ரூபாய்) விலை கொடுத்து வாங்கி இருக்கிறது. இந்திய டாக்ஸி நிறுவனங்களில் இதுதான் முதல் மற்றும் மிகப் பெரிய இணைப்பு நடவடிக்கையாகும். இந்த இணைப்புக்குப் பிறகும் டாக்ஸி ஃபார் சூர் அதே பெயரில் இயங்கும் என்று ஓலா நிறுவனம் தெரிவித்துள்ளது. லோக்கல் டாக்ஸிகளே, உஷார், உஷார்!