Published:Updated:

இனி எல்லாம் லாபமே - 15

வெற்றியை நிர்ணயிக்கும் மனக்கிளர்ச்சி!

இனி எல்லாம் லாபமே - 15

வெற்றியை நிர்ணயிக்கும் மனக்கிளர்ச்சி!

Published:Updated:

இதுவரை முதலீடு குறித்த பல விஷயங்களை நாம் பேசிவந்துவிட்டோம். எமோஷன் (மனக்கிளர்ச்சி) என்பதைப் பற்றி இந்த வாரம் விரிவாகப் பார்ப்போம்.

ங்கள் வீட்டில் ஓர் இடத்தில் நீங்கள் வேகமாக நடந்து செல்லும்போது தடுமாறி விழுந்து, கால் பிசகிவிடுகிறது. அது சரியாக ஒருவாரம் ஆகிறது. அடுத்து என்ன செய்வீர்கள்? அந்த இடத்துக்கு வரும்போதே நிதானிப்பீர்கள். உங்கள் மனைவியோ, குழந்தை களோ, விருந்தினர்களோ அந்த இடத் தின் அருகில் நடக்கும்போது ஜாக்கிரதை என்று அவர்களையும் உஷார் படுத்துவீர் கள். சாலையில் வண்டி ஓட்டிச் செல்லும்போதும் இதேமாதிரிதான். 

இனி எல்லாம் லாபமே - 15

ஒட்டுமொத்த விகடனுக்கும் ஒரே ஷார்ட்கட்!

இதையெல்லாம் விடுங்கள், அடிக்கடி நீங்கள் செல்லும் ஒரு சாலையில் திடீரெனக் குழந்தை ஒன்று ஓடிவந்து விடுகிறது. ப்ரேக் அடித்துக் குழந்தையையும் இடிக்காமல்; நீங்களும் கீழே விழாமல் இருக்க செய்த முயற்சியில் நீங்கள் வியர்த்து வெலவெலத்துப் போகிறீர்கள். அதன் பின்னர் என்ன செய்வீர்கள்? அந்த சாலையில் நுழையும் போதே அந்தக் குழந்தையின் ஞாபகம் வந்து வண்டியை மெதுவாகவும் அதிகக் கவனத்துடனும் ஓட்டுவீர்கள்தானே?

இவையெல்லாம் நடப்பது எதனால்? கால் வழுக்கினால் ஒரு வாரம் கஷ்டப் பட வேண்டும் என்பதில் இருந்து, குழந்தை திடீரென ஓடிவந்தால் ப்ரேக் அடித்து விழாமல் தப்பிப்பதில் இருக்கும் பயம்வரை உங்களை எமோஷனலாகத் தாக்கிவிடும். அந்த நிகழ்வினால் வந்த பாதிப்பின் தீவிரம் நினைத்தாலே மெய்சிலிர்க்க வைக்கும் இல்லையா!

இனி எல்லாம் லாபமே - 15

வீட்டில் கால் இடறாமல் நடப்பது சகஜமான விஷயம். சாலையில் ப்ரேக் அடித்து திக்குமுக்காடாமல் சாதாரண மாக வண்டி ஓட்டிச் செல்வதும் சகஜமான விஷயம்தான். என்றைக் காவது, ஏதாவது ஓர் இடத்தில்தான் திடுக் நிகழ்வுகள் நிகழ்கின்றன. அவை நம்மை எமோஷனலாக மாற்றிவிடு கின்றன. அந்த எமோஷன்கள் மனதில் இருந்துகொண்டு நம்மை அதுபோன்ற சூழல்கள் வரும்போது கவனமாக இருக்கச் செய்கின்றன.

இப்போது முதலீடுகளுக்கு வருவோம். முதலீடுகளைச் செய்யும் போது அசாதாரண நிகழ்வுகளுக்கு இடையேதான் நாம் நல்ல முதலீடு களைத் தேர்ந்தெடுத்துச் செய்ய வேண்டியிருக்கும். முட்களுக்கு இடையே ரோஜா இருப்பதுபோல, ரிஸ்க்குக்கு நடுவேதான் ரிவார்டு இருக்கும். முதலீடுகளில் இந்த ரிவார்டை அனுபவிக்க ரிஸ்க் என்பதை எடுத்தேயாக வேண்டும் என்ற கட்டாயம் இருக்கும்.

மேலே சொன்ன விஷயங்களில் நல்லவற்றின் நடுவே கெட்டவற்றுக்கான வாய்ப்பு இருக்கும். வாழ்க்கையில் நாம் பெறும் இந்த அனுபவத்துக்கும், முதலீட்டில் நாம் பெறும் அனுபவத்துக்கும் இடையே இந்த வகையிலான மிகப் பெரிய வித்தியாசம் இருப்பதனாலேயே எமோஷன்கள் பெரிய அளவிலான பாதிப்பை நம்முடைய முதலீட்டு முடிவுகளில் கொண்டுவந்து விட்டுவிடுகிறது. நடப்பது, வண்டி ஓட்டுவது போன்ற சாதாரண விஷயங்களின் இடையே ஒரு சிறப்பு நிகழ்வாக கால் பிசகுவது, சாலையில் குழந்தைகள் ஓடிவருவது போன்ற நிகழ்வுகள் இருக்கின்றன.

ஆனால், முதலீட்டுச் சந்தையிலோ கால் பிசகுவது என்பது எப்போதும் நடக்கும் விஷயம். சாலையில் குழந்தை ஓடிவருவது போன்ற நிகழ்வுகள் எப்போதும் சர்வசாதாரணமாக நடக்கும். இதில் நம்முடைய கால் பிசகாமலும், நடுரோட்டில் ஓடிவரும் குழந்தையை இடிக்காமலும்/நாம் வண்டியிலிருந்து விழாமலும் வண்டியை ஓட்டுவது தான் முதலீட்டில் வெற்றி.

 நிஜ வாழ்க்கைக்கும் முதலீட்டு வாழ்க்கைக்கும் இருக்கிற இந்த எதிர்மறையான நிகழ்வு விஷயங்களே எமோஷன்களை மாற்றியமைக்காமல் செயல்படும் போது நம்மைத் தோல்வியை நோக்கி அழைத்துச் செல்கிறது. அதாவது, கால் பிசகினால் நாம் பயப் படுகிறோம் இல்லையா? கால் பிசகாமல் கவனமாக நடக்க முயற்சிகளையும் மேற்கொள்கிறோம் இல்லையா? மீண்டும் மீண்டும் கால் பிசகும்போது அந்த ஏரியாவுக்கே செல்லாமல் சற்றுத் தள்ளி நடக்க ஆரம்பிக்கிறோம் இல்லையா?

முதலீட்டிலும் இதே லாஜிக்தான். தவறான முதலீட்டை தேர்ந்தெடுத்தால் நாம் எமோஷனலாக மாறிவிடுகிறோம். ஒன்று தவறை தவிர்க்க அந்த ஏரியாவுக்கே போகமாட்டேன் எனச் சபதமெடுக் கிறோம். அல்லது அடிக்கடி வழுக்கும் இடத்தில் கவனமாகச் செல்ல ஆரம்பிக்கிறோம். இந்த இரண்டாவது வகைமுடிவில், கவனமாகப் போகின்றேன் பேர்வழி என்று மீண்டும் மீண்டும் முயற்சித்து தோல்வியடைய ஆரம்பிக்கிறோம். நீண்ட நாட்களுக்குப் பின்னரே, அட, இது நமக்கு சரிப்பட்டு வராது என ஒதுங்க ஆரம்பிக்கிறோம்.

அப்படியானால் எமோஷன்களைத் தவிர்த்து முதலீடு செய்வதுதான் சரியாயிருக்குமா என்று கேட்கலாம். அது ஒன்றும் அவ்வளவு சுலபமும் இல்லை; செய்யவும் முடியாது. எப்பாடுபட்டாவது முயற்சி செய்து எமோஷன்களைப் புரிந்துகொண்டு துரத்திவிட்டாலும், மீண்டும் அதே வேகத்தில் திரும்பிவந்து நமக்குள் புகுந்துகொள்ளும் சக்தி அதற்கு உண்டு.

இன்னமும் தெளிவாகச் சொன்னால், சின்னச் சின்ன லாபங்களைத் தொடர்ந்து நாம் பார்க்கும் போது, எமோஷன் மிகவும் இசைவாக மாறி முதலீட்டுச் சந்தையே நம்முடைய கையில் என்ற எண்ணத்தைக் கொண்டுவந்துவிடும். அதனாலேயே நாம் பெரிய அளவிலான முதலீடுகளைச் செய்து நஷ்டத்தைத் தழுவிவிடும் வாய்ப்பு அதிகமாகிக் கொண்டே போய்விடுகிறது.

சந்தை என்பது யாருக்கும் கட்டுப்படாது. சந்தையானது எதிர்காலத்தில் செல்லும் போக்கைக் கணித்தால் மட்டுமே வெற்றியைத் தரும். அப்படிப் பல விஷயங்களைக் கணிக்க ஆரம்பிக்கும்போது பல சமயம் வெற்றியும், பல சமயம் தோல்வியும் வருவதற்கான சாத்தியக்கூறு உள்ளது என்பதனை நாம் தொடர்ந்து நினைவில் வைத்துக்கொண்டே செயல்பட வேண்டும்.

இதுதான் முதலீட்டில் மிகவும் கடினமான ஒன்று. தொடர்ந்து ஏறும் சந்தையில் பலபேர் நல்ல முதலீடுகளைச் செய்வதற்கான சட்டதிட்டங்கள் அனைத்தையும் மறந்து, ஒரேயடியாய் குதித்துக் கையைச் சுட்டுக்கொள்வது இதனால்தான். நீங்கள் இன்றிலிருந்து வியாபாரம் செய்ய ஆரம்பிக்கிறீர்கள். நீங்கள் தொட்டதெல்லாம் துலங்குகிறது. வாங்கிய பங்குகள் எல்லாம் வேகமாக ஏறுகின்றன. உங்கள் எமோஷன் என்ன சொல்லும்? ராஜா கையை வச்சா, அது ராங்கா போனதில்லை என்றுதான் சொல்லும் இல்லையா?

ஆனால், வாங்கிய எல்லா கம்பெனிகளின் ஷேர்களும் எல்லா நாளும் ஏறிவிடுவதில்லை. இந்த நிமிடம் வரையிலும் சின்னச் சின்ன லாபங்களைப் பார்த்த உங்களுக்குப் பெரியதொரு நஷ்டம் அடுத்த நிமிடமோ, அடுத்த நாளோ, அடுத்த வாரமோ, அடுத்த மாதமோ, அடுத்த வருடமோ காட்சியளிக்கக் காத்திருக்கலாம். பெரும்பாலான புல் ரன்களில் முதலீட்டாளர்கள் சிக்கிக்கொள்வது இதனால்தான். எதை வாங்கினாலும் ஏறும் காலத்தில் எதையாவது வாங்கிவிட்டு, நான்தான் முதலீட்டு உலகின் ரட்சகன் என்ற எண்ணத்தை மண்டைக்குள் கொண்டுவிடுகின்றனர் சிலர். அதனாலேயே அளவுக்கு அதிகமாய் ஷேர்களை வாங்கிக் குவிக் கின்றனர். திடீரென ஒரு நாள் பெரிய அளவில் இறக்கம் வரும்போது சிக்கிக் கொண்டு சொத்துக்களை இழக்கின்றனர்.

இனி எல்லாம் லாபமே - 15

அதிக டிராபிக் உள்ள சாலை யொன்றில் சாலை விதிகளைத் துச்சமென மதித்து வேகமாக வண்டியை ஓட்ட ஆரம்பிக்கும் நபர், தூரம் அதிகமாக அதிகமாக அதிவேகமெடுத்துக் கடைசியில் விபத்தைச் சந்திக்கிறாரோ, அதே நிலைதான் சந்தையிலும். இடைஞ்சலுக்கு நடுவே, வேகம் என்பது த்ரில்லையும்; கூடவே நம்முடைய முடிவு மிகவும் துல்லியமானது என்ற எமோஷனல் பலத்தையும் அவருக்குக் கூட்டுகிறது. அவர் போகும் வேகம் மிகத் தவறானது. கரணம் தப்பினால் மரணம் என்ற நிலையிலேயே அவர் வண்டி ஓட்டுகிறார் என்பது அவருக்குச் சற்றும் புரியாது. விபத்தைச் சந்தித்துப் படுக்கையில் விழும் வரை. இல்லையா!?

அதே நிலைதான் முதலீட்டிலும். ஒரே திசையில் (ஏற்றம் என்றால் ஏற்றம், இறக்கம் என்றால் இறக்கம் என) செல்லும் சந்தையில் எதை வாங்கிப் போட்டாலும் விலை ஏறும். எமோஷனும் எகிறும். நான் எப்பேர்ப்பட்ட எக்ஸ்பர்ட் என நம்மை நாமே பாரட்டிக்கொண்டு எகிறிக் குதிப்போம். அந்த நேரத்தில் ட்ரெண்ட் மாறி மண்டை உடையும். அப்போதுதான் நமக்குப் புரியும், அதுவரை நாம் பெற்ற வெற்றி என்பது எதேச்சை யாக அதிர்ஷ்டவசத்தில் கிடைத்த ஒன்று; மறுபடி மறுபடி இதேபோன்ற வெற்றியைக் கொண்டுவருவது சாத்தியமல்ல. சந்தையின் திசையில் போனதாலேயே நமக்கு வெற்றி கிடைத்ததே தவிர, நம்முடைய நிபுணத்துவத்தால் இல்லை என்பது மட்டும் புரியவே புரியாது.

இதற்கெல்லாம் காரணம், நாம் வெற்றியைக் கண்டதும் எமோஷனலாக மாறிவிடுவதுதான். எமோஷன்களை விட்டொழிப்பது கடினம் என்றாலும், இதுபற்றி நாம் கட்டாயம் புரிந்து கொண்டால் தவறுகளைக் கொஞ்சம் குறைக்க முடியும் எனலாம்.

 (லாபம் தொடரும்)

பயணிகள் கார் விற்பனை உயர்வு..!

கடந்த பிப்ரவரி மாதத்தில் இந்தியாவில் பயணிகள் கார் விற்பனை 7 சதவிகிதம் உயர்ந்து, 1,71,727-ஆக அதிகரித்துள்ளது. கடந்த ஆண்டில் இதே காலத்தில் 1,60,717-ஆக இருந்தது. மாருதி சுசூகி நிறுவனம் 90,728 கார்களை விற்று முதலிடத்தில் இருக்கிறது. ஹூண்டாய் நிறுவனம் 37,163 கார்களை விற்று இரண்டாவது இடத்திலும், ஹோண்டா நிறுவனம் 15.065 கார்களை விற்று மூன்றாவது இடத்திலும் இருக்கின்றன. இதே காலத்தில் இருசக்கர வாகன விற்பனை 0.99% குறைந்து, 12,08,084-ஆகக் குறைந்துள்ளது. நம்மவர்கள் டூவீலரிருந்து ஃபோர் வீலருக்கு வேகமாக மாறி வருகிறார்களோ?

டாக்டர் எஸ்.கார்த்திகேயன்