Published:Updated:

இனி எல்லாம் லாபமே - 18

கைகொடுக்குமா முதலீட்டுக் கல்வி?

இனி எல்லாம் லாபமே - 18

கைகொடுக்குமா முதலீட்டுக் கல்வி?

Published:Updated:

முதலீட்டுச் சந்தையைப் பொறுத்தவரை, எதிர்பாராதது நடக்கும் என்ற எதிர்பார்ப்புடன் நீங்கள் இருந்தால் பயம் என்பது அறவே முதலீட்டாளர்களின் அருகே வருவதற்கு வாய்ப்பில்லை.

முதலீட்டுச் சந்தை பற்றிய அறிவு மற்றும் கல்வியைப்   பெறுதல், முதலீட்டாளர்களுக்கு எவ்வளவு முக்கியம் என்பதைப் பற்றி தொடர்ந்து பல அத்தியாயங்களிலும் பார்த்துவருகிறோம். முதலீடு குறித்த கல்வி அறிவை முழுமையாகப் பெறுதல் என்பது மிகவும் சவாலான ஒன்றாகவே முதலீட்டாளர்களுக்குத் தொடர்ந்து இருந்துவரும். அதனாலேயே முதலீடு குறித்த சாதாரணக் கேள்விகளுக்குக்கூட அதற்கான பதில் பலசமயங்களில் தெரியாமல் போய்விடுகிறது.

இனி எல்லாம் லாபமே - 18

ஒட்டுமொத்த விகடனுக்கும் ஒரே ஷார்ட்கட்!

பொதுவான முதலீட்டுக் கல்வி என்பதைப் பெறுவ தற்கு முதலீட்டாளர்கள் ஆர்வமாகவே இருக்கின்றனர். ஆனாலும், அவர்களுடைய அடிப்படை குணங்கள் மற்றும் படிப்புகள் (அறிவியல் கல்வி பயின்றவர், இன்ஜினீயரிங் பயின்றவர், காமர்ஸ் கல்வி பயின்றவர், டாக்டர் என) பல்வேறு விதமான வகை யாக இருப்பதால், எல்லோருக் குமாகச் சேர்த்து ஒரேமாதிரியான முதலீட்டுக் கல்வியை வடிவமைத்து சந்தையின் ரெகுலேட்டர்களால் வழங்க முடிவதில்லை.

அடுத்தபடியாக, ஏற்கெனவே நாம் முந்தைய அத்தியாயங்களில் பார்த்ததைப்போல் இந்த இடைஞ்சல்களின் நடுவே முதலீட்டாளர்கள் ஓரளவு பெற்ற இந்தக் கல்வி அறிவே சிலசமயம் அதீத நம்பிக்கையைத் தந்து தவறுகளைச் செய்ய வைத்துவிடும் வாய்ப்பும் இருக்கவே செய்கிறது. இதையெல்லாம் தாண்டி முதலீட்டாளர் கல்வியறிவைப் பெறும் காலமும், அவர் முதலீடு செய்யும் காலமும் அருகருகே இருப்பதில்லை. முதலீட்டைப் பொறுத்தவரை, பெற்ற கல்வியறிவைத் தொடர்ந்து உபயோகப் படுத்திக்கொண்டே இருந்தால் மட்டுமே அது சரியான முடிவுகளை எடுக்க உதவுவதாய் இருக்கும். அப்படியல்லாமல், கற்ற காலத்துக்கும், முதலீடு செய்யும் காலத்துக்கும் நீண்ட இடைவெளி இருந்தால் கல்வியின் மூலம் பெற்ற அறிவை சரிவர உபயோகிக்க முடியாது. அதனாலேயே முதலீடு குறித்த கல்வியைப் பயின்ற பின்னர் முதலீடு செய்கிறோமோ இல்லையோ, தொடர்ந்து சந்தையில் கற்ற கல்வியை உபயோகித்து முதலீட்டு வாய்ப்புகள் இருக்கிறதா என்பதைத் தொடர்ந்து பார்த்துவர வேண்டும். அப்படித் தொடர்ந்து பார்த்து வரும் வேளையில் மட்டுமே நாம் பெற்ற கல்வியை நடைமுறைப்படுத்தும்போது எந்தெந்தவகைத் தவறுகளை நாம் செய்கிறோம் என்பதை நம்மால் கண்டறிய முடியும்.

சரி, கல்வியைப் பெற்றாயிற்று. முதலீட்டுச் சந்தையில் தொடர்ந்து அதனைச் செயல் படுத்தியும் வந்துகொண்டு இருக்கிறோம். ஆனாலும், சந்தை நான்கு நாட்கள் தொடர்ந்து இறங்கினால் பயம் வந்து மனதைக் கவ்விக் கொள்கிறதே என்ற கேள்வியை நீங்கள் கேட்பீர்கள்.

இனி எல்லாம் லாபமே - 18

பயத்துக்கு ஈடு இணையான ஒரு விஷயம் சந்தையில் ஏதுமில்லை எனலாம். என்னதான் புதுமைகள் புகுத்தப்பட்டாலும், கையில் பணம் என்பது கரைபுரண்டு ஓடினாலும், சந்தையின் போக்கை கணித்துக் கண்டுபிடிக்க டெக்னிக்கல் சார்ட்டுகளும், ஃபண்டமென்டல் மாடல்களும், முதலீட்டு முடிவுகளில் டெக்னாலஜி புகுந்து விளையாடினாலும் பயத்துக்கென்னவோ மருந்து என்பது சந்தையில் கண்டுபிடிக்கப்படவே இல்லை. முதலீட்டாளர்களில் மிகக் குறைந்த சதவிகிதத்தினரே எந்தவிதமான பயத்தையும் ஜீரணித்துக்கொள்ளும் சக்திகொண்டவர்களாகத் தங்களை முழுமையாக மாற்றியமைத்துக் கொள்ளும் வல்லமை கொண்டவர்களாக இருக்கின்றனர்.

பெரும்பாலானோர் முதலீட்டைப் பொறுத்தவரை, பயத்துக்கு முழுக்க முழுக்கச் சரணடைபவர்களாகவே இருக்கின்றனர். முதலீடு செய்யாமல் சந்தைக்கு வெளியே இருப்பவர்கள் சுலபத்தில் பயத்தைப் பற்றி கேலி பேசுவார்கள். பயம் என்ன பயம், உங்கள் கையில்தான் எல்லாமே இருக்கிறது என்றெல்லாம்கூடச் சொல்வார்கள்.

ஆனால், அவர்களைச் சந்தையில் முதலீடு செய்ய வைத்து, அதன் பின்னர் பயப்படும் அளவுக்கான இறக்கங்கள் வந்தவேளையில் கேட்டால் கொஞ்சம் பயமாகாத்தான் இருக்கிறது என்றோ அல்லது நடுக்கம் பிடிக்கிறது என்றோ ஒப்புக் கொள்ளவே செய்வார்கள். பயத்தைப் போக்க நேரடி மருந்து என்பது கிடையாது.

நீண்ட நாட்களாக முதலீட்டுச் சந்தையில் இருக்கும் முதலீட்டாளர் களைப் பயம் குறித்துக் கேட்டீர்கள் என்றால், அட, அது அப்பப்ப வந்துவந்துதான் போகும். நாங்கள் பார்க்காத இறக்கமா என்பார்கள்.

இதிலிருந்து நீங்கள் தெரிந்துகொள்ள வேண்டி யது என்ன? என்னதான் முதலீட்டுக் கல்வி யறிவைப் பெற்று, பார்த்துப் பார்த்து முதலீடு களைத் தேர்ந்தெடுத்துச் செய்தாலுமே, பயம் என்பது நாளடைவில் குறையக்கூடிய ஒன்றே தவிர, புதிய முதலீட்டாளருக்கு உடனடியாக இல்லாமல் போய்விடுகிற ஒன்றல்ல என்பதைத்தான்.

சந்தையில் ஒன்றன்பின் ஒன்றாகப் பிரச்னைகள் வந்து போய்க்கொண்டுதான் இருக்கும் என்பதை முதலீடு குறித்த கல்வி சொல்லித்தராது. முதலீட்டில் கவனமாய் இருங்கள். தரமான முதலீடுகளை மட்டுமே செய்யுங்கள். அதிக விலை கொடுத்து குறைந்த மதிப்பு உள்ள பொருட்களை வாங்காதீர்கள் என்றெல்லாம் கல்வி, முதலீட்டாளர்களுக்குச் சொல்லித்தரும். ஆனால், என்னதான் இவை அனைத்தையும் நினைவில்கொண்டு முதலீடுகளைச் செய்தாலும் ஒட்டுமொத்த சந்தையையும் பயம் பற்றிக் கொள்ளும்போது எல்லாவகை முதலீடுகளுமே தடாலடியாகச் சரியவே செய்யும்.

பிரச்னைகள் மின்னல்போல் வந்து வந்து போய்க்கொண்டேயிருந்தாலும், பிரச்னையினால் வந்த பயம் என்பது விலகக் கொஞ்ச காலம் பிடிக்கும். இப்படிப்பட்ட பயத்தை வெல்ல எந்த நேரமும் ஆயத்தமாக இருத்தல் என்பதே முதலீட்டாளர்களுக்குச் சரியான மருந்தாக இருக்கும்.

 அது என்ன ஆயத்தமாய் இருத்தல் என்று கேட்கிறீர்களா? ஒரு பங்கை முதலீட்டுக்காக வாங்குகிறீர்கள். அது வேகமாக இறங்க ஆரம்பிக் கிறது. 15 சதவிகித விலை வீழ்ச்சியை அது சந்திக்கிறது. இது நடந்தால் என்னுடைய நிலை எப்படி இருக்கும் என்பதை அந்தப் பங்கில் முதலீடு செய்வதற்கு முன்னரே சீர்தூக்கிப் பார்த்து மனதில் இருத்திக்கொண்டால், 15  சதவிகித இறக்கம் வந்து நம்மைப் பயமுறுத்தாது. 

பதினைந்து சதவிகித இறக்கம் ஓகே. ஆனால் 30 சதவிகித இறக்கம் வந்தால்..? இதற்கும் மனதில் சின்னதாக ஒரு முன் எதிர்பார்ப்புடன் முதலீடுகளைச் செய்ய ஆரம்பித்தால் பயம் என்ற ஒரு விஷயம் நம்மை அண்டவே செய்யாது. முதலீட்டுச் சந்தையைப் பொறுத்தவரை, எதிர்பாராதது நடக்கும் என்ற எதிர்பார்ப்புடன் நீங்கள் இருந்தால் பயம் என்பது அறவே முதலீட்டாளர்களின் அருகே வருவதற்கு வாய்ப்பில்லை. பயத்தைப் போக்குவதற்கு மருந்தில்லை என்றாலும், பயத்தை அண்டவிடாமல் பார்த்துகொள்ளும் வழியைப் பார்த்தோம்.

இனி எல்லாம் லாபமே - 18

இதற்கு எதிர்மறையான விஷயம் ஒன்றையும் பார்ப்போம். அது பயத்தைப் பலமடங்கு பெரிதாக்கும் ஒரு விஷயம். என்ன என்கிறீர்களா?

அது கடன் வாங்கி முதலீடுகளைச் செய்வது என்பது. குறிப்பாக, புல் (காளை) மார்க்கெட்டில் இது அடிக்கடி நடக்கும். சந்தை தொடர்ந்து ஏறிக்கொண்டேயிருக்கும்போது, புதிய முதலீட்டாளர்கள் பலரும் கடனை வாங்கிச் சந்தையில் முதலீடு செய்ய எத்தனிப்பார்கள்.

 இந்தவகை முதலீடுகள் அதிக அளவிலான பயத்தை உருவாக்க வல்லது. ஏனென்றால், விலை இறங்க ஆரம்பித்தால் காத்திருக்க முடியாது. தொடர்ந்து இறங்குமுகமாகச் சந்தை மாறினால் முதலீட்டை விற்றேயாக வேண்டும் என்ற கட்டாயச் சூழலுக்கு நாம் தள்ளப்படுவோம். இதற்குக் காரணம், இன்னமும் இறங்கினால் தாக்குப்பிடிக்க முடியாது என்ற பயங்கொண்ட நிலை.

சந்தை ஷார்ட் டேர்மில் பல சமயம் முட்டாள் தனமாக லாஜிக்கே இல்லாமல் செயல்படுவதைப் போன்ற தோற்றத்தைத் தந்து ஏற்ற இறக்கங்களுக்கு ஆளாகும். இந்த ஷார்ட் டேர்ம் செயல்பாடு களின்போது கடன் வாங்கி முதலீடு செய்த முதலீட்டாளர்களால் தாக்குப்பிடிக்க முடியாமல் போய் நஷ்டத்தை புக் செய்யவேண்டிய கட்டாயச் சூழலுக்குத் தள்ளப்படுவார்கள்.

கல்வியறிவும், செயல்பாட்டு அறிவும் இருந்தாலுமே கையில் முதலீடு செய்யும் அளவுக்கு உபரியாய் பணம் இருந்தால் மட்டுமே முதலீட்டுச் சந்தைக்குள் வந்து லாபம் பார்க்க முடியும் என்பது உங்களுக்குப் புரிந்திருக்கும் என நினைக்கிறேன்.

(லாபம் தொடரும்)

டாக்டர் எஸ்.கார்த்திகேயன்