Published:Updated:

ஏற்றம் தரும் ஏற்றுமதி தொழில்கள் - 28

ஏற்றம் தரும் ஏற்றுமதி தொழில்கள் - 28

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

பிரீமியம் ஸ்டோரி

நிலைத்து நிற்கும் நிலக்கடலை ஏற்றுமதி!

நிலக்கடலையை விரும்பிச் சாப்பிடாத இந்தியர்களே இல்லை. நிலக்கடலை உடலுக்கு வலுசேர்க்கும் உணவுப்பொருளாகக் கருதப்படுவதே இதற்குக் காரணம். இந்தியர்கள் வாழும் வெளிநாடுகளிலும் நிலக்கடலையின் தேவையானது தொடர்ந்து அதிகரித்து வருகிறது. தவிர, வெளிநாட்டவர்களும் இந்தியாவில் விளையும் நிலக்கடலையை அதன் தனித்துவமான சுவை காரணமாக விரும்பி வாங்குகிறார்கள். இதனால், இந்தியாவிலிருந்து அதிகமான நிலக்கடலை ஏற்றுமதியாகி வருகிறது.

ஏற்றம் தரும் ஏற்றுமதி தொழில்கள் - 28

இந்தியாவுக்கு 2-வது இடம்!

உலகிலேயே நிலக்கடலையை அதிகமாக உற்பத்தி செய்யும் நாடாகத் திகழ்கிறது சீனா. தற்போதைய நிலையில் சீனாவில் 3.6 மில்லியன் ஹெக்டேர் பரப்பளவில் நிலக்கடலை பயிர் செய்யப் படுகிறது. இதன்மூலம் வருடத்துக்கு 6 மில்லியன் டன் நிலக்கடலை வருடந்தோறும் உற்பத்தி செய்யப்படுகிறது. நிலக்கடலை உற்பத்தி செய்வதில் இரண்டாவது பெரிய நாடாக இருக்கிறது நம் இந்தியா. சீனாவைவிட நாம் அதிகப் பரப்பளவில் (8 மில்லியன் ஹெக்டேர்) நிலக்கடலையை விதைத்தாலும், ஆண்டுக்குச் சராசரியாக 5.6 மில்லியன் டன் நிலக்கடலையை மட்டுமே நம்மால் உற்பத்தி செய்ய முடிகிறது. இதற்கு காரணம், நிலக்கடலை விவசாயிகளுக்கு இயற்கைச் சூழல் சாதகமில்லாமல் இருப்பதே. இதேநிலை ஆப்பிரிக்க நாடு களிலும் காணப்படுவதால், கடந்த பத்து ஆண்டுகளில் நிலக்கடலை உற்பத்தி அங்கு மிகவும் பாதிக்கப்பட்டுள்ளது.

உள்நாட்டுத் தேவை போகத்தான் ஏற்றுமதி!

நம் நாட்டைத் தொடர்ந்து அமெரிக்கா, நைஜீரியா, அர்ஜென்டினா மற்றும் இந்தோனேஷியா ஆகிய நாடுகள் அதிக அளவில் நிலக்கடலையை உற்பத்தி செய்கின்றன. இந்த நாடுகள் ஆண்டுக்குச் சராசரியாக 1 முதல் 1.5 மில்லியன் டன் நிலக்கடலையை உற்பத்தி செய்து வருகின்றன.

பொதுவாக, இந்தியாவில் உற்பத்தியாகும் நிலக்கடலை உள்நாட்டு தேவைக்குப் போகத்தான்

ஏற்றம் தரும் ஏற்றுமதி தொழில்கள் - 28

வெளிநாடுகளுக்கு ஏற்றுமதி செய்யப்பட்டு வருகிறது. நிலக்கடலையாக மட்டுமல்லாமல், நிலக்கடலையில் உற்பத்தியாகும் மதிப்புக்கூட்டிய உணவுப் பொருட்களும் (வறுத்த நிலக்கடலை, கடலை மிட்டாய், சாக்லேட், நிலக்கடலையிலிருந்து தயாரிக்கப்படும் வெண்ணெய் போன்றவை) தொடர்ந்து ஏற்றுமதியாகி வருகின்றன.

இன்றைய நிலையில் நிலக்கடலை ஏற்றுமதி எப்படி இருக்கிறது என சென்னை அண்ணா சாலையில் உள்ள மத்திய அரசின் ஏற்றுமதி மேம்பாட்டு நிறுவனமான FIEO (Federation of Indian Export Organisations), தென் மண்டல அலுவலகத்தின் இணை துணை பொது இயக்குநர் உன்னி கிருஷ்ணனிடம் பேசினோம்.

வாய்ப்புள்ள நாடுகள்!

“நிலக்கடலை ஏற்றுமதி வாய்ப்புகள் அதிகரித்துக் காணப் படுகின்றன. ஆனால், இன்றைய நிலையில் நிலக்கடலை ஏற்றுமதி யாளர்களுக்கு தரமான நிலக்கடலையை ஏற்றுமதி செய்வதில்தான் சவாலான நிலை காணப்படுகிறது. சென்ற 2014-15-ம் ஆண்டில் மட்டும் 5,09,000 டன் நிலக்கடலை இந்தியாவிலிருந்து ஏற்றுமதி யானது. இந்தியாவில் விளையும் நிலக்கடலைகளுக்கு மேற்கு ஆசிய நாடுகளில் அதிகமான வரவேற்பு இருக்கிறது. நம் நாட்டில் விளையும் நிலக்கடலை களை ஐரோப்பிய நாடுகள்தான் அதிகமாக இறக்குமதி செய்து வருகின்றன. நிலக்கடலை ஏற்றுமதியில் இதன் பங்கு மட்டுமே 42 சதவிகிதமாகக் காணப்படுகிறது. இதனைத் தொடர்ந்து இந்தோனேஷியா 13%, கனடா (8%), சிங்கப்பூர் (5%), மலேசியா மற்றும் பிலிப்பைன்ஸ் ஆகிய நாடுகள் தலா 3% நிலக்கடலையையும், இதர நாடுகள் (26%) நிலக்கடலையையும் இந்தியாவிலிருந்து இறக்குமதி செய்கின்றன.

அதிகரித்த ஏற்றுமதி தேவை!

2012-13-ல் 4.33 மில்லியன் டன்னாக இருந்த இந்தியாவின் நிலக்கடலை உற்பத்தி, கடந்த 2013-14-ம் ஆண்டில் 6.48 மில்லியன் டன்னாக அதிகரித்து காணப்படுகிறது.  நடப்பு வருடம் மற்றும் இதற்கு முந்தைய வருடங் களிலும் இந்தோனேஷியா, மலேசியா மற்றும் பிலிப்பைன்ஸ் ஆகிய நாடுகளின் நிலக்கடலை தேவை அதிகரித்துக் காணப் பட்டதால், இந்த ஆண்டில் இந்தியாவின் ஏற்றுமதியும் அதிகரித்துக் காணப்படுகிறது. ரஷ்யா மற்றும் சீனாவின் ஏற்றுமதியும் இந்த ஆண்டுகளில் அதிகரித்துள்ளது என்பதையும் இந்திய ஏற்றுமதியாளர்கள் கவனிக்க வேண்டும்” என்றார் தெளிவாக.

ஏற்றம் தரும் ஏற்றுமதி தொழில்கள் - 28

நல்ல கிராக்கி இருக்கிறது!

நிலக்கடலை ஏற்றுமதி யிலுள்ள நெளிவுசுளிவுகளைத் தெரிந்துகொள்ள சென்னை யிலுள்ள கேபிகே வேர்ல்டு வைடு எக்ஸ்போர்ட் நிறுவனத்தின் உரிமையாளரும், நிலக்கடலை ஏற்றுமதியாளருமான கே.பி.கருப்பசாமியிடம் பேசினோம்.

“தற்போது நிலக்கடலை ஏற்றுமதி நன்றாக இருக்கிறது. நிலத்திலிருந்து அறுவடை செய்யும் நிலக்கடலையை அப்படியே ஏற்றுமதி செய்வது குறைந்த அளவிலும், நிலக்கடலை பருப்புகள் மட்டும் ஏற்றுமதி செய்வது அதிகரித்தும் காணப் படுகிறது. நான் மலேசியா, அரபு நாடுகள், இலங்கை, துருக்கி மற்றும் இங்கிலாந்து நாடுகளுக்கு நிலக்கடலை பருப்புகளை ஏற்றுமதி செய்து வருகிறேன்.

விவசாயிகளிடம் கொள்முதல்!

சந்தைகளுக்குச் சென்று நிலக்கடலையை மொத்தமாக வாங்கும்போது, இடைத்தரகர்களுக்கு காசு கொடுத்து வாங்கவேண்டிய நிலை உருவாகும். அதனால், நான் நேரடி யாக விவசாயிகளிடம் கொள்முதல் செய்து மதிப்புக்கூட்டி ஏற்றுமதி செய்து வருகிறேன்.

விவசாயிகளிடம் நிலக்கடலையை வாங்கும்போது குப்பை கள், தூசிகள்  இருக்கும். இதை இப்படியே ஏற்றுமதி செய்வது கூடாது. அதை, சுத்தம் செய்து இறக்குமதி யாளர்களின் தேவைக்கேற்ப பேக்கிங் செய்து ஏற்றுமதி செய்ய வேண்டும்.

அளவு பார்த்து வாங்குங்கள்!

இறக்குமதியாளர்கள் பெரிய அளவிலான நிலக்கடலைகளை அதிகம் விரும்புகிறார்கள் என்பதால், நிலக்கடலையை வாங்கும்போது அளவு பெரியதாக உள்ளவற்றைப் பார்த்து வாங்குங்கள். நிலக்கடலை ஏற்றுமதியில் மிகவும் கவனிக்க வேண்டிய விஷயம், தரம் மட்டுமே. பூஞ்சைகளால் பாதிக்கப்பட்ட ஒரு நிலக்கடலை இருந்தாலும், அது மற்ற நிலக்கடலைகளையும் பாதித்துவிடும். இப்படியே ஏற்றுமதியானால், இறக்குமதியாளர்கள் கையில் கிடைக்கும்போது தரமில்லாமல் போகவும் வாய்ப்புண்டு. இதனால், நிலக்கடலை வாங்கும் போதும், பேக்கிங் செய்யும்போதும் அதிகக் கவனம் தேவை.

ஏற்றம் தரும் ஏற்றுமதி தொழில்கள் - 28

லாபம் தரும் தரமான நிலக்கடலை!

தற்போதைய நிலையில் ஜாவா என்கிற நிலக்கடலை வகை அதிகமாக ஏற்றுமதியாகி வருகிறது. இந்த வகை நிலக்கடலைகளில் சுவை மற்றும் அளவு ஆகியவை சிறப்பாகக் காணப் படுகிறது. அதுமட்டுமல்லாமல் எண்ணெய்ச் சத்துகளும் இதில் அதிகம் இருக்கின்றன. நான் இயற்கை முறையில் விவசாயம் செய்யப்பட்ட நிலக்கடலைகளை மட்டுமே  ஏற்றுமதி செய்து வருகிறேன். இதனால் இந்த நிலக்கடலைகளுக்கு நல்ல விலை கிடைக்கிறது. இறக்குமதியாளர்களிடம் இயற்கை விவசாயமுறை பற்றி எடுத்துச் சொல்லும் போது தொடர்ந்து அவர்களிடம் ஆர்டர்களையும் பெற முடிகிறது. 

சர்வதேச சந்தைகளைக் கவனியுங்கள்!

நிலக்கடலை ஏற்றுமதி செய்யலாம் என்கிற முடிவுக்குப் பிறகு, முதல் ஆர்டர் பெறுவதற்கு மட்டும் எட்டு மாதங்கள் ஆனது. அதற்கிடையில் நான் பெற்ற அனுபவங்கள் ஏராளம். முதல் ஆர்டரைப் பெற்றபிறகு, நல்ல தரமான நிலக்கடலையை ஏற்றுமதி செய்தேன். தொடர்ந்து தரமான நிலக்கடலைகளை ஏற்றுமதி செய்து வருவதால், ஏற்றுமதி சந்தையில் என்னால் நிலைத்திருக்க முடிகிறது. மற்ற நாடுகளின் நிலக்கடலை உற்பத்தி மற்றும் ஏற்றுமதி சந்தையில் மற்ற நாடுகளின் பங்களிப்பு போன்ற நிலக்கடலை குறித்த சர்வதேச சந்தை விவரங்களை அடிக்கடி கவனிப்பேன். தரமும், நேர்மையும்தான் ஏற்றுமதியாளனுக்கு வெற்றியைத் தேடித்தரும் என்பது எனது நம்பிக்கை” என்றார் தெளிவாக.

இந்தியாவில், குறிப்பாக தமிழகத்தில் அதிகம் விளையும் பொருள் என்பதால், நிலக்கடலையை ஏற்றுமதி செய்ய நீங்களும் முயற்சிக்கலாமே!

படங்கள்:  சி.தினேஷ்குமார், மீ.நிவேதன்.   

செ.கார்த்திகேயன்

ஏற்றுமதி Q&a

ஏற்றுமதியாளர்களுக்கு வங்கிகள் தரும் வசதி வாய்ப்புகள் என்னென்ன?

ஆர்.நாராயணன், சென்னை

‘‘பொதுவாக, வங்கிகள் மூலம் பணபரிவர்த்தனை (LC-letter of credit) மேற்கொள்வது பாதுகாப்பானது. இந்த வசதியை வங்கிகள்தான் ஓர் ஏற்றுமதியாளருக்கு ஏற்படுத்திக் கொடுக்கிறது. இதன் மூலம் ஏற்றுமதியாளர்கள், ஏற்றுமதி செய்வதற்காகக் கொள்முதல் செய்யும் மூலப்பொருட்களை வாங்குவதற்கு வங்கிகளிடமிருந்து கடன் பெற்றுக் கொள்ள முடியும். ஏற்றுமதிக்குப் பிறகு, இறக்குமதியாளர்களிடமிருந்து பணம் வருவதற்குக் காலதாமதமானால், எல்சி டாக்குமென்ட்களை வங்கிகளில் சமர்ப்பித்து, அந்தப் பணத்தை முன்னதாகவே பெற்றுக் கொள்ளலாம். இறக்குமதியாளர்களிடமிருந்து பணம் வந்தவுடன், வங்கிக்குச் செலுத்திக்கொள்ளலாம். இந்த நடைமுறை வங்கிகளுக்கு வங்கி வித்தியாசப்படும். அதோடு, உங்களின் பணத்தை அந்நிய செலாவணிக்கு ஏற்ப எப்படி வர்த்தகம் செய்வது என்கிற மேலாண்மை விவரங்களையும் நீங்கள் தெரிந்துவைத்திருப்பது அவசியம்.’’

ஏற்றுமதியாளர்கள் கவனத்துக்கு...

ஏற்றுமதி தொழில் சார்ந்த உங்களின் சந்தேகங்கள் மற்றும் கேள்விகளை exports@vikatan.com என்கிற மெயில் ஐடி-க்கு அனுப்பி வையுங்கள். குரல்பதிவு மூலமாகவும் உங்கள் கேள்வி மற்றும் சந்தேகங்களைப் பதிவு செய்யலாம். அதற்கு 044-668029920 என்ற எண்ணுக்கு டயல் செய்யுங்கள். கணினி குரல் வழிகாட்டும்.

ஏற்றம் தரும் ஏற்றுமதி தொழில்கள் - 28
தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு