Published:Updated:

பங்கு முதலீடு: ஃபண்டமென்டல் அனாலிசிஸ் - 12

பிரவீன் ரெட்டி, முதன்மை ஆலோசகர், induswealth

கவனிக்க வேண்டிய ரிஸ்க் & ரிட்டர்ன்!

ரு நிறுவனத்தின் அடிப்படைகளை ஆராயும்போது அதில் ரிஸ்க் (இடர்பாடு) மற்றும் ரிட்டர்ன் (வருமானம்) முக்கியத்துவம் பெறுகிறது. அதைப் பற்றிப் பார்ப்பதற்குமுன் ரிஸ்க், ரிட்டர்ன்க்கு இடையே உள்ள தொடர்பை விரிவாகப் பார்ப்போம்.

சென்னையை அடுத்த வண்டலூரை சேர்ந்தவர் ஆனந்த். இவர் தனியார் அலுவலகத்தில் பணிபுரிகிறார். இவர் தினசரி எதிர்கொள்ளும் ரிஸ்க்கைப் பார்ப்போம். அவர் தனது அலுவலகத்துக்கு ரயில் மூலம் செல்கிறார். இந்த ரயில் வண்டலூருக்கு காலை 9 மணிக்கு வரவேண்டும். ஆனால், அது வழக்கமாக 10 நிமிட நேரம் தாமதமாக வரும். ஆனந்த் தினமும் காலை 9.05 மணிக்கு ரயில்வே நிலையம் வந்துவிடுவார். அவர் பெரும்பாலான நாட்களில் ரயிலைப் பிடித்துவிடுவார். சில நேரங்களில் ரயிலை தவறவிடுவதும் நடக்கும்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
பங்கு முதலீடு: ஃபண்டமென்டல் அனாலிசிஸ் - 12

அவருக்கு நாளை காலையில் அலுவலகத்தில் பதவி உயர்வுக்கான முக்கியத் தேர்வு நடக்க இருக்கிறது. அவர் இந்த நேர்முகத் தேர்வுக்குச் சரியான நேரத்துக்குச் செல்ல வேண்டும் என்றால் அவர் காலை 9 மணிக்கு ரயிலை பிடித்தாக வேண்டும். ஆனந்த் நாளைக்கும் அவரின் வழக்கமான 9.05 மணிக்கு வருவார் என்று நினைக்கிறீர்களா?

நம்மில் பெரும்பாலோர் (ஆனந்த்தையும் சேர்த்து) 9 மணிக்கு அல்லது அதற்கு முன்பாக ரயில் நிலையத்துக்கு வர முயற்சி எடுப்போம். ஆனந்த்துக்கு வழக்கமாக இந்த ரயில் 10 நிமிடம் தாமதமாக 9.10-க்கு வரும் எனத் தெரியும். இருந்தாலும் ஆனந்த் ரிஸ்க்கைத் தவிர்க்க (அல்லது எதிர்பாராத நிலை) ரயில் வரும் நேரத்தில் ரயில் நிலையத்தில் இருக்கவே விரும்புகிறார். ஆக, ரிஸ்க் என்பது எதிர்பாராத நிலையைத் தவிர வேறு ஒன்றும் இல்லை.

இப்போது ரிஸ்க் மற்றும் ரிவார்ட் (ரிட்டர்ன்) இடையேயான தொடர்பை பார்ப்போம்.

ரிவார்ட் என்பது ஒருவர் ஒரு செயலை செய்வதற்காகப் பெறுகிற லாபம். அதாவது, ரிஸ்க் எடுப்பதற்கு கிடைக்கும் லாபமாக ரிவார்ட் இருக்கிறது. இந்த ரிவார்ட்டை ஒரு உதாரணத்துடன் பார்ப்போம்.

ஆனந்த் தனது குழந்தையைப் பள்ளிக்கூடத்தில் விட்டுவிட்டு, காலை 9.05 மணிக்கு ரயில் நிலையம் வந்தார். ரயிலை தவறவிடும் வாய்ப்பு இருந்தும், பெரும்பாலான நாட்களில் அவருக்குக் குழந்தையைப் பள்ளிக்கூடத்தில் விடுவது மகிழ்ச்சியான செயலாக இருக்கிறது. பதவி உயர்வுக்கான முக்கிய மீட்டிங் நடக்கும் அன்று குழந்தையைப் பள்ளிக்கூடத்தில்  விட்டுவிட்டு, ரயிலை தவறவிட்டால், அவருக்கான பதவி உயர்வு தள்ளிப் போகும். ஆனந்த் ரயிலை பிடிக்கத் தினமும் ரிஸ்க் எடுக்கிறார். ஆனால், பதவி உயர்வுக்கான மீட்டிங் அன்று அவர் எடுக்கும் ரிஸ்க், ரிவார்ட்-க்கு இணையானது அல்ல.

ரிவார்ட் என்பது எடுக்கும் ரிஸ்க்குக்கு அவசியம் இணையானதாக இருக்க வேண்டும். ஒருவர் அதிக

பங்கு முதலீடு: ஃபண்டமென்டல் அனாலிசிஸ் - 12

ரிஸ்க் எடுக்கும்போது, அவசியம் அதிக ரிவார்ட் எதிர்பார்ப்பார்.

அதிக ரிஸ்க் - அதிக ரிட்டர்ன் என்பது பொதுவாகத் தவறாகப் புரிந்து கொள்ளப்பட்டிருக்கிறது. கண்ணை மூடிக் கொண்டு அதிக ரிஸ்க் - அதிக ரிட்டர்ன் என்று களமிறங்காதீர்கள். உங்களை ஒருவர் அதிக ரிஸ்க் எடுக்கச் சொன்னால், எடுக்கும் ரிஸ்க்குக்கு இணையாக ரிட்டர்ன் கிடைக்குமா என்பதை உறுதிப்படுத்திக் கொள்ளுங்கள். அதிக ரிஸ்க் மட்டுமே அதிக வருமானத்துக்கு வழி வகுக்காது.

கிரிக்கெட் போட்டியின் அடிப்படையில் ரிஸ்க் மற்றும் ரிட்டர்ன் பற்றி பார்ப்போம். இந்திய கிரிகெட் அணி வங்காளதேசத்துக்குப் பயணமாகிறது. வங்காள தேசத்துக்கு எதிரான போட்டியில் இந்திய அணி வெற்றி பெற 80% வாய்ப்பு இருக்கிறது. அதாவது, இந்தியா மற்றும் வங்காளதேசம் மொத்தம் 100 போட்டிகளில் விளையாடினால், 80 போட்டிகளில் இந்தியா வெற்றி பெற வாய்ப்பு இருக்கிறது.

ஒரு குறிப்பிட்ட போட்டியில் யார் வெற்றி பெறுவார் என்பதைக் கணிப்பது கஷ்டமாக இருந்தது. அந்தப் போட்டியில் வங்காளதேசம் வெற்றிப் பெற்றது. அந்த வகையில் குறுகிய காலத்தில் வங்காளதேசம், நம்மை வெற்றி பெற வாய்ப்பு இருக்கிறது. வெற்றி என்பது ஒருபோதும் உறுதியானதல்ல என்பதை நாம் நினைவில் கொள்ள வேண்டும். சூழ்நிலைகள் சரியில்லாமல் போனால், வெற்றி பெற முடியாமல் போகும்.

ஒரு உதாரணம் மூலம் இதை பார்ப்போம். 20 போட்டிகள் கொண்ட கிரிக்கெட் தொடரில் வங்காளதேசத்துக்கு எதிராக இந்தியா விளையாடுகிறது என்று வைத்துக் கொள்வோம். முதல் போட்டியில் இந்தியா வெற்றிப் பெறும் என்று ஒருவர் அவரது மொத்த பணத்தையும் பந்தயம் கட்டுகிறார். முதல் பந்தயத்தில் இந்தியா தோற்றுவிட்டால், அவர் மொத்தப் பணத்தையும் இழப்பார். அவர் தன் பணத்தை 20 பிரிவாகப் பிரித்துக் கொண்டு, ஒவ்வொரு போட்டிக்கும் தனித்தனியாகக் கட்டுகிறார் என்று வைத்துக் கொள்வோம். மொத்தமுள்ள 20 போட்டிகளில், ஒட்டுமொத்தமாகப் பார்க்கும்போது இந்தியா ஜெயிக்க அதிகம் வாய்ப்பு இருப்பதால், அவர் பணம் சம்பாதிக்க வாய்ப்பு இருக்கிறது. இதிலிருந்து ஒருவர் பந்தயம் கட்டும்போதும் நீண்ட காலம் என்கிறபோது மூலதனத்தை இழக்காமல் சம்பாதிக்க வாய்ப்பு இருக்கிறது.

20 போட்டிகள் தொடரில் இந்தியா, வங்காளதேசத்தை வெற்றிக் கொள்ள அதிக வாய்ப்பு இருக்கிறது. அதே நேரத்தில், இந்தியாவுக்கு எதிராக வங்காளதேசமும் வெற்றி பெற வாய்ப்பு இருக்கிறது. அந்த வகையில் அவர், தன் பணத்தைப் பிரித்து 20 போட்டிகளிலும் பந்தயம் கட்டினால், அவர் ஒட்டுமொத்த பணத்தையும் ஒரே பந்தயத்தில் கட்டுவதைவிட அதிகமாக வெற்றி பெற வாய்ப்பு இருக்கிறது. ரிஸ்க்கை பரவலாக்குவதன் மூலம் ஒரு மோசமான விளைவை தவிர்க்க முடியும் ஆனால், துரதிர்ஷ்டத்தைச் சந்தித்துதான் ஆக வேண்டும்.

பங்கு முதலீடு: ஃபண்டமென்டல் அனாலிசிஸ் - 12

நாம் இதுவரைக்கும் பார்த்ததிலிருந்து ரிஸ்க் - ரிட்டன் என்பது..

• ரிஸ்க் என்பது எதிர்பாராதது

• ரிவார்ட்கள், எடுக்கும் ரிஸ்க்களுக்கு அவசியம் இணையானதாக இருக்க வேண்டும். ஒருவர் அதிக ரிஸ்க் எடுக்கும்போது, அவசியம் அதிக ரிவார்ட் எதிர்பார்ப்பார்.

• வெற்றி என்பது எப்போதும் உறுதியானது அல்ல.

• வாய்ப்புகள் பெரிய பங்களிப்பை கொண்டிருக்கின்றன

• நீண்ட காலம் என்கிறபோது மூலதனத்தை இழக்காமல் சம்பாதிக்க வாய்ப்பு இருக்கிறது.

• ஒரு மோசமான விளைவை தவிர்க்க முடியும் ஆனால், எதிர்பாராத துரதிர்ஷ்டத்தைச் சந்தித்துதான் ஆகவேண்டும்

மேலே ரிஸ்க் மற்றும் ரிட்டன் (ரிவார்ட்) இரண்டுக்கும் உள்ள தொடர்பை பற்றிப் பார்த்தோம்.

இனி பங்குச் சந்தையில் உள்ள ரிஸ்க் பற்றிப் பார்ப்போம்.

நாம் ஒரு பங்கை வாங்கும்போது அதன் விலை பல்வேறு காரணங்களால் ஏறி இறங்க வாய்ப்பு இருக்கிறது. இதில் சில நிறுவனத்தின் செயல்பாடு அல்லது நிர்வாகத்துக்குத் தொடர்புடையதாக இருக்கும். சில காரணங்கள், தொழில் துறை சார்ந்ததாகக் குறிப்பாகச் சுற்றுச்சூழல், மூலப்பொருள்களின் விலை ஏற்ற இறக்கம், சட்ட மாற்றங்கள், கரன்சி பரிமாற்ற விகிதங்களில் மாற்றம் உள்ளிட்டவைகளாக இருக்கின்றன. மேலும், ஒட்டுமொத்த சந்தை சரிவை சந்தித்தால் பங்கின் விலையும் குறையும்.

பங்கு முதலீட்டில் ரிஸ்க் தவிர்க்க, பல்வேறு பங்குகளில் முதலீடு செய்து டைவர்சிஃபிகேஷன் போன்றவற்றைச் செய்ய முடியும். ஆனால், ஒட்டுமொத்த சந்தை சரியும்போது அதற்கு எதிராக ஹெட்ஜ் செய்வது என்பது கடினமான காரியம். இன்றைக்கு ஒருவர் பல்வேறு நாடுகளின் பங்குச் சந்தைகளில் முதலீடு செய்ய முடியும். ஆனால், அதற்கு எடுக்க வேண்டிய ரிஸ்க் என்பது மிக அதிகமாக இருக்கும்.

அடுத்த இதழில் பங்குச் சந்தை முதலீட்டில் ரிஸ்க்கை எப்படி நிர்வகிப்பது என்பது பற்றிப் பார்ப்போம்.

தொகுப்பு: சி.சரவணன்

(தொடரும்)