Published:Updated:

பிசினஸ் வெற்றிக்கு உதவும் 7 விஷயங்கள்! - நீங்களும் ஆகலாம் பிசினஸ்மேன்! - 5

பிசினஸ் வெற்றிக்கு உதவும்  7 விஷயங்கள்! - நீங்களும் ஆகலாம் பிசினஸ்மேன்! - 5
பிரீமியம் ஸ்டோரி
பிசினஸ் வெற்றிக்கு உதவும் 7 விஷயங்கள்! - நீங்களும் ஆகலாம் பிசினஸ்மேன்! - 5

உங்களை அம்பானி ஆக்கும் வைபரேஷன் தொடர்கே.எஸ்.கமாலுதீன், மேலாண்மை இயக்குநர், ப்ளூபாரத் எக்ஸிம் பிரைவேட் லிமிடெட்

பிசினஸ் வெற்றிக்கு உதவும் 7 விஷயங்கள்! - நீங்களும் ஆகலாம் பிசினஸ்மேன்! - 5

உங்களை அம்பானி ஆக்கும் வைபரேஷன் தொடர்கே.எஸ்.கமாலுதீன், மேலாண்மை இயக்குநர், ப்ளூபாரத் எக்ஸிம் பிரைவேட் லிமிடெட்

Published:Updated:
பிசினஸ் வெற்றிக்கு உதவும்  7 விஷயங்கள்! - நீங்களும் ஆகலாம் பிசினஸ்மேன்! - 5
பிரீமியம் ஸ்டோரி
பிசினஸ் வெற்றிக்கு உதவும் 7 விஷயங்கள்! - நீங்களும் ஆகலாம் பிசினஸ்மேன்! - 5
பிசினஸ் வெற்றிக்கு உதவும்  7 விஷயங்கள்! - நீங்களும் ஆகலாம் பிசினஸ்மேன்! - 5

தொழில் செய்ய விரும்புபவர்கள் தங்களுடைய தொழிலை எப்படிப் பதிவு செய்வது என்பது குறித்து கடந்த இதழில் பார்த்தோம். இந்தப் பதிவு நடைமுறைகளைச் சரியாகச் செய்தால் போதும்; எந்தச் சிக்கலும் இல்லாமல் பிசினஸ் செய்யலாம். அடுத்ததாக, நீங்கள் உங்கள் பிசினஸை சர்வதேச அளவில் செய்ய விரும்பினால், அதனை ஏற்றுமதி மற்றும் இறக்குமதி மூலம் தாராளமாக செய்யலாம்.

ஏற்றுமதி மற்றும் இறக்குமதி செய்வதற்கு அரசின் அனுமதி பெற வேண்டும். அதை ஏற்றுமதி மற்றும் இறக்குமதி உரிமம் (Import and Export Code), சுருக்கமாக IE Code என்பார்கள். இந்த உரிமத்தைப் பெற உங்களுடைய ஆதார் கார்டு, பான் கார்டு, வாடகை ஒப்பந்த ஆவணம், கேன்சல் செய்த காசோலை ஒன்று மற்றும் உங்களுடைய டிஜிட்டல் சிக்னேச்சர் ஆகியவை தேவை.

www.dgft.gov.in என்ற இணையதளத்தில், இந்த உரிமம் பெறுவதற்கான ஆன்லைன் விண்ணப்பப் படிவத்தில் கேட்கப்படும் தகவல்களைப் பூர்த்தி செய்தபின், அதில் கேட்கப்படும் ஆவணங்களையும், டிஜிட்டல் சிக்னேச்சர்களையும் அப்லோட் செய்து ஐஇசி (IEC) பெற்றுக்கொள்ளலாம். இதற்கு ஆகும் செலவு ரூ.500. சரியான ஆவணங்களுடன் பதிவு செய்தால், இரண்டு வாரத்தில் ஐஇசி வந்துவிடும்.

ஏற்றுமதி பிசினஸ் செய்வதாக இருந்தாலும், உள்நாட்டில் பிசினஸ் செய்வதாக இருந்தாலும் நீங்கள் பிசினஸை தொடங்கும்முன் கவனமாக இருக்கவேண்டிய முக்கியமான ஏழு விஷயங்கள் உள்ளன. அவை. 1. கொள்முதல் (Procurement), 2. சந்தை (Market),   3. பொருளின் காலாவதி ஆகும் காலம் மற்றும் சலுகை (Expiry and Offer), 4. சீசன் (Season), 5. பொருளின் பயன்பாடு (Usage), 6. முதலீடு(Investment), 7. விலை நிர்ணயம் (Costing).

பிசினஸ் வெற்றிக்கு உதவும்  7 விஷயங்கள்! - நீங்களும் ஆகலாம் பிசினஸ்மேன்! - 5

ஒட்டுமொத்த விகடனுக்கும் ஒரே ஷார்ட்கட்!

இந்த ஏழு விஷயங்களும் விரிவாக எடுத்துச்சொல்லப்பட வேண்டியவை. அடுத்தடுத்து வரும் வாரங்களில் இந்த விஷயங்கள் ஒவ்வொன்றையும் விளக்கமாக எடுத்துச் சொல்கிறேன். என்றாலும் இப்போதைக்கு இந்த ஏழு விஷயங்கள் பற்றியும் சுருக்கமாக எடுத்துச் சொல்கிறேன்.

   கொள்முதல்!

எந்தவொரு விஷயத்திலும் தொடக்கம் சரியாக இருக்க வேண்டும் என்பார்கள். அது பிசினஸுக்கு நன்றாகவே பொருந்தும். நீங்கள் உங்களுடைய பிசினஸுக்கு தேவையான பொருட்கள், இயந்திரங்கள் மற்றும் பிற விஷயங்களை முதலீடு செய்து வாங்க வேண்டி இருக்கிறது. இவற்றில் மிக கவனமாக செயல்படுவதன் மூலம் நஷ்டத்தைத் தவிர்த்து லாபம் பார்க்க முடியும்.

பிசினஸின் தொடக்கத்தில் நீங்கள் அடையும் லாபம் சிறிய அளவில் இருந்தாலும் கூட, அது உங்களை உற்சாகமாக செயல்பட வைக்கும்.  உதாரணத்துக்கு, மஞ்சள் வாங்க வேண்டுமென்றால், முதலில் சேலம் மஞ்சள் வாங்கி விற்கத் தொடங்கி, பிறகுதான் ஈரோடு மஞ்சளைத் தேர்ந்தெடுக்க வேண்டும்.

அதேபோல், மஞ்சளை சென்னை கோயம்பேட்டில் வாங்கி விற்க நினைத்தால், அதில் எந்தப் பயனும் இல்லை. முடிந்தவரை நமக்கு தேவையான பொருளை நேரடியாக உற்பத்தியாளரிடம் இருந்து வாங்குவதற்கு பார்க்க வேண்டும். இல்லையெனில்,  குறைந்தபட்சம் இரண்டாம் நபரிடம் வாங்க வேண்டும். அடுத்தடுத்து கை மாறிய பிறகு ஒரு பொருளை வாங்கினால் அதன் மூலம் பெரிய அளவில் லாபம் பார்க்க முடியாது. சிலர் நன்றாகத்தான் வியாபாரம் செய்தேன்; நஷ்டம் அடைந்துவிட்டேன் என்பார்கள். காரணம், பொருளைக் கொள்முதல் செய்யும்போது அதை எந்த இடத்தில் வாங்குகிறோம், என்ன விலைக்கு வாங்குகிறோம் என்பதைக் கவனிக்கத் தவறி இருக்கலாம்.

   சந்தை!

அடுத்து நாம் விற்க நினைக்கும் பொருளுக்கான சந்தை எது என்பதைத் தெரிந்துகொள்ள வேண்டும். தொழில் செய்யக்கூடிய இடம்தான் நம் பொருளுக்கான சந்தை. அதாவது, நம் பொருளை எந்த இடத்தில் விற்கப் போகிறோம் என்பதைப் பார்க்க வேண்டும்.

கோயம்பேட்டில் நகைக்கடை வைத்தால் விற்பனை ஆகுமா? அதைப்போல எந்த இடத்தில் எந்தப் பொருளை விற்க வேண்டும் என்பது தெரிந்திருக்க வேண்டும். அதற்கு சந்தையை நன்றாக ஆய்வு செய்ய வேண்டும். நம்முடைய பொருளின் வாடிக்கையாளர்கள் யார்? அவர்களை நாம் எப்படி சென்றடைவது? நம்மிடமிருந்து அவர்கள் எப்படிப்பட்ட சேவைகளை எதிர்பார்க்கிறார்கள் என்கிற கேள்விகளைக் கேட்டு தெளிவான பதிலை நாம் தெரிந்து வைத்திருக்க வேண்டும்.

   பொருள் காலாவதி ஆகும் காலம் மற்றும் சலுகை!


நாம் கொள்முதல் செய்யும் பொருள் எப்போதும் அதிகபட்ச எக்ஸ்பைரி தேதியைக் கொண்டதாக இருக்க வேண்டும். சீக்கிரத்தில் எக்ஸ்பைரி ஆகும் பொருட்களை வாங்கி, அந்த காலகெடுவுக்குள் விற்க முடியாமல் போனால் நஷ்டம் அதிகமாகும். நேரடியாக உற்பத்தியாளரிடமிருந்து வாங்கும் போது இந்தப் பிரச்னை இருக்காது.

மேலும் பொருளை கொள்முதல் செய்யும்போது, கொள்முதல் செய்யும் அளவைப் பொறுத்து ஏதேனும் ஆஃபர் இருக்கிறதா என்பதைக் கேட்டு பார்க்க வேண்டும். அப்படி இருக்கும்பட்சத்தில், நம் பிசினஸ் தேவையைப் பொறுத்து அதற்கேற்ப ஆஃபரைப் பயன்படுத்திக் கொள்முதல் செய்து லாபம் பார்க்கலாம். ஆஃபரில் பொருளை அதிகமாகக் கொள்முதல் செய்யும்போது அந்தப் பொருளின் காலாவதி ஆகும் காலத்தையும் கணக்கில் எடுத்துக்கொள்ள வேண்டும்.

பிசினஸ் வெற்றிக்கு உதவும்  7 விஷயங்கள்! - நீங்களும் ஆகலாம் பிசினஸ்மேன்! - 5

   சீசன்!

பிசினஸில் சீசன் எனப்படும் பருவகாலம் என்ற ஒரு முக்கிய விஷயம் உள்ளது. அதாவது, எல்லா சீசனுக்கும் விற்கும் பொருள், குறிப்பிட்ட சீசனுக்கு மட்டும் விற்கும் பொருள் என்று சீசனை வைத்து பொருட்களை இரண்டாகப் பிரிக்கலாம். நம்முடைய பொருள் விற்பனை ஆவதற்கான சீசன் இருக்கிறதா என்பதைப் பார்க்க வேண்டும். எல்லா சீசன்களிலும் பயன்படுத்தப்படும் பொருள் என்றால் பிரச்னை இல்லை. குறிப்பிட்ட சீசனில் மட்டும் பயன்படுத்தப்படும் பொருள் என்றால் அதன் கொள்முதல் விஷயத்திலும் விற்பனை உத்தியிலும் கவனம் செலுத்த வேண்டும். இல்லை என்றால் நஷ்டம் ஏற்பட்டுவிடும்.

அதேபோல், விழாக்கள், பண்டிகைகள் உள்ளிட்ட நேரங்களில் நம்முடைய பிசினஸை வித்தியாசமாகத் திட்டமிட வேண்டும். அப்போதுதான் போட்டி யாளர்களைவிட அதிகமாக பிசினஸ் செய்ய முடியும். சர்வதேச அளவில் பிசினஸ் செய்யும்போது, நாம் ஏற்றுமதி அல்லது இறக்குமதி நாடுகளின் பொருட் களுக்கான சீசன்களையும் தெரிந்து வைத்திருக்க வேண்டும்.

   பொருளின் பயன்பாடு!

நம்முடைய பொருள் தினசரி பயன்படக்கூடிய பொருளா, வாரத்துக்கு ஒரு முறை அல்லது இரு முறை, மாதத்துக்கு ஒரு முறை பயன்படுத்தப்படும் பொருளா என்பதைப் பொறுத்து அதற்கேற்ப திட்டமிட்டு கொள்முதல் செய்ய வேண்டும். கொள்முதல் செய்த பொருளை அதன் பயன்பாட்டுக்கேற்ப விற்பனையும் செய்துவிட வேண்டும். அப்படி செய்தால் நல்ல லாபம் பார்க்க முடியும்.

   முதலீடு!

நாம் செய்யப் போகும் பிசினஸுக்கான செலவைப் பட்டியலிட்டு எவ்வளவு முதலீடு தேவை என்பதைப் பார்க்க வேண்டும். சொந்த இடத்தில் வைக்கப் போகிறோமா அல்லது வாடகைக்கு எடுக்கப் போகிறோமா, பொருள் கொள்முதல் செய்ய எவ்வளவு தேவை  என்று பார்ப்பது அவசியம்.

உதாரணமாக,  20 அடி கன்டெய்னரில் உப்பு வாங்கி வர்த்தகம் செய்ய ஒரு லட்சம் ரூபாய் போதும். ஆனால், அதே ஒரு கன்டெய்னர் அளவுக்கு முந்திரி வாங்கி வர்த்தகம் செய்ய ஒரு கோடி ரூபாய் தேவை. மேலும், நம்முடைய பிசினஸுக்கு தேவையான மனிதவளம், தொழில்நுட்பம் போன்ற வற்றுக்கு எவ்வளவு தேவை என்பது போன்ற விஷயங்களையும் பட்டியலிட்டுப் பார்த்து மொத்த தொகையில் நம்மிடம் கையில் இருப்பது எவ்வளவு, எவ்வளவு கடன் வாங்க வேண்டும் என்பதை திட்டமிட்ட பிறகே பிசினஸில் இறங்க வேண்டும். இருக்கிற பணத்தில் பொருளைக் கொள்முதல் செய்துவிட்டு வேலைக்கு ஆள் பிடிக்க பணமில்லாமல் திண்டாடக்கூடாது.

   விலை நிர்ணயம்!

பொருளை விற்கும்போது விலையைக் குறைத்து விற்பது, அல்லது அளவைக் குறைத்து விற்பது என்று இரண்டு வகை உள்ளன. எவற்றையெல்லாம் குறைந்த அளவில் கொடுத்தால் வாங்குவதற்கு தயாராக இருப்பார்களோ அதை அளவு குறைத்து விற்கலாம். உதாரணம் ஷாம்பு, மசாலா பொடி போன்ற மளிகைப் பொருட்கள்.

எதில் விலையைக் குறைத்து விற்றால்தான் மற்றவர்களைக் காட்டிலும் அதிக வாடிக்கை யாளர்களைப் பெற முடியுமோ, அவற்றில் விலையைச் சற்று குறைத்து விற்கலாம். ஆனால், நம் லாபத்தைச் சற்றுக் குறைக்கலாமே தவிர, லாபமே இல்லாமல் போகுமளவு விலையைக் குறைக்கக் கூடாது.

எனவே, ஒரு பொருளை உற்பத்தி செய்யும் செலவு, அதை விளம்பரம் செய்யும் செலவு மற்றும் வாடிக்கையாளரிடம் கொண்டு சேர்ப்பது வரையிலான செலவுகள் அனைத்தையும் பட்டியலிட்டு, நம்முடைய லாப சதவிகிதம் எவ்வளவு இருக்கலாம் என்பதையும் முடிவு செய்து பின்னர் விற்பனை விலையை நிர்ணயம் செய்ய வேண்டும்.

(ஜெயிப்போம்)

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism