Published:Updated:

ஃபைனான்ஷியல் தவறுகள்... பளிச் தீர்வுகள்! - 5

ஃபைனான்ஷியல் தவறுகள்... பளிச் தீர்வுகள்! - 5
பிரீமியம் ஸ்டோரி
ஃபைனான்ஷியல் தவறுகள்... பளிச் தீர்வுகள்! - 5

பத்து வருடத்தைப் பாழாக்கிய தவறான முடிவுகள்!ஓவியம்: அ.நன்மாறன்

ஃபைனான்ஷியல் தவறுகள்... பளிச் தீர்வுகள்! - 5

பத்து வருடத்தைப் பாழாக்கிய தவறான முடிவுகள்!ஓவியம்: அ.நன்மாறன்

Published:Updated:
ஃபைனான்ஷியல் தவறுகள்... பளிச் தீர்வுகள்! - 5
பிரீமியம் ஸ்டோரி
ஃபைனான்ஷியல் தவறுகள்... பளிச் தீர்வுகள்! - 5

சுரேஷ் பார்த்தசாரதி,  Founder, Myassetsconsolidation.com Registered investment advisor, INA200000878

ஃபைனான்ஷியல் தவறுகள்... பளிச் தீர்வுகள்! - 5

முக்கியமான விஷயங்களில் முடிவுகளை எடுக்கும்முன், ஏற்படப்போகும் விளைவுகளை 360 டிகிரி கோணத்திலும் எப்போதும் அலசி ஆராய வேண்டும்; அதன்பிறகு மனதுக்கு எந்தவிதமான நெருடலும் இல்லாதபட்சத்திலேயே அந்த முடிவை எடுக்க வேண்டும். சின்னதாக ஒரு சந்தேகமோ, இப்படி ஆகுமோ, அப்படி ஆகுமோ என்ற குழப்பமோ இருக்குமானால், அந்த முடிவைத் தள்ளிப் போடுவதே நல்லது. அப்படி இல்லாமல் அவசரப்பட்டு ஒரு முடிவை எடுத்தோம் எனில், எதிர்பாராத சிக்கல்களில் சிக்கிக் காலத்தையும், பணத்தையும் இழக்க வேண்டிய நிலைக்குத் தள்ளப்படுவோம். ராகவன் எடுத்த சில முடிவுகள்தான் அவருடைய வாழ்க்கையின் பத்து ஆண்டு காலத்தை அநியாயத்துக்கு வீணடித்தது. அப்படி அவர் என்ன தவறு செய்தார்...?

மதுரைச் சேர்ந்தவர் ராகவன். சென்னையில் சாஃப்ட்வேர் கம்பெனி ஒன்றில் வேலை கிடைத்தது. வேலை கிடைத்த சில மாதங்களில் திருமணம் நடந்து முடிந்தது. ராகவனின் மனைவி பிரேமாவும் மதுரையைச் சேர்ந்தவர்தான். முதுநிலை பட்டப்படிப்பு படித்தவர். தம்பதியர் இருவரும் சென்னையில் மகிழ்ச்சியாகத்தான் இருந்தார்கள். அப்போதுதான் ராகவன் வேலை நிமித்தமாக முக்கிய முடிவு ஒன்றினை எடுத்தார்.

ராகவனுக்கு வெளிநாட்டுக்குச் சென்று வேலை பார்க்க வேண்டும்; இன்னும் கூடுதல் சம்பளத்தில் வேலைக்குச் செல்ல வேண்டும் என ஆசை. தொடர்ந்து முயற்சி செய்ததன் விளைவாக, ஏஜென்ஸி ஒன்றின் மூலமாக மலேசியாவில் அவருக்கு வேலை கிடைத்தது. தன் மனைவியுடன் மலேசியாவில் குடியேறினார். போகும்போது சென்னையில் பார்த்துவந்த வேலையை ராஜினாமா செய்துவிட்டுச் செல்லவில்லை. ஒரு மாதம் விடுப்பில்தான் சென்றார்.

ஆனால், மலேசியாவில் ராகவன் எதிர்பார்த்ததைப் போல, நிறைய சம்பளம் கிடைக்கவில்லை. வேலைக்குச் சேர்ந்த நிறுவனம் பேசியபடி முழுச் சம்பளத்தையும் கொடுக்க மறுத்தது. 60 சதவிகித சம்பளத்தை மட்டுமே கொடுத்தது. 40 சதவிகித சம்பளத்தைப் பிடித்து வைத்துக்கொண்டது. ராகவனும் முடிந்தவரைப் போராடிப் பார்த்தார். ஆனால், பிரச்னை தீரவில்லை. இந்த சூழலில் அவருக்கு முதல் குழந்தை பிறந்தது. நிறைய பணம் சம்பாதிக்க வேண்டும் என்ற அவரின் கனவு பலிக்காததால், மிகவும் குழம்பிப் போனார் ராகவன்.

ஒட்டுமொத்த விகடனுக்கும் ஒரே ஷார்ட்கட்!

ஃபைனான்ஷியல் தவறுகள்... பளிச் தீர்வுகள்! - 5

சில வருடங்கள் போராடிய ராகவனுக்கு கோபம் அதிகமாகவே, பிடித்து வைத்துள்ள 40 சதவிகித சம்பளப் பணம் போனால் போகட்டும் என்று விட்டுவிட்டு சென்னை வந்துவிட்டார். புதிய வேலைக்கு முயற்சித்தார். வேலை அமைந்து விடும் என்ற நம்பிக்கையில் சென்னையில் வீடு பார்த்து குடியேறினார். குழந்தையை பள்ளியில் சேர்த்து விட்டார். பொருளாதார நெருக்கடியான சமயத்தில் இரண்டாவது குழந்தையும் பிறந்தது.

எவ்வளவு முயற்சித்தும் ராகவனுக்கு சென்னையில் சரியாக வேலை அமையவில்லை. குறைவான சம்பளத்தில் மும்பையில் வேலை கிடைத்தது. வேறு வழியில்லாமல் மனைவியையும், குழந்தைகளையும் சென்னையில் விட்டுவிட்டு, மும்பைக்குச் சென்றார் ராகவன். மும்பையில் அவருக்கு ரூ.60,000 சம்பளம். மும்பையில் வீட்டு வாடகை, சென்னையில் வீட்டு வாடகை என இரட்டிப்பு செலவானது. செலவுகளைச் சமாளிக்க முடியாமல் சிரமப்பட்டார். என்ன செய்தால் பிரச்னைகளிலிருந்து மீளலாம் என்பது தெரியாமல் குழப்பத்துடன் என்னை வந்து சந்தித்தார்.

ராகவன் தன் வாழ்க்கையில் நடந்த ஒவ்வொரு சம்பவத்தையும், எடுத்த முடிவுகளையும் தெளிவாக விளக்கிச் சொன்னார். அவர் செய்த தவறுகளை மிகச் சுலபமாகப் புரிந்துகொண்டேன்.

சம்பளம் இன்னும் அதிகம் தேவை என்பதற்காக வேலை மாறியது அவருடைய முதல் தவறு. புதிய வேலை எத்தகைய சூழலில் அமையக்கூடும் என்பதை அறியத் தவறியதே அவருடைய சிரமங்களுக்குக் காரணம்.

மலேசியாவில் எதிர்பார்த்த மாதிரி வேலை அமையவில்லை என்று சென்னை திரும்பிய பின்னும், சென்னையில் அவர் பார்த்துவந்த நிறுவனத்தில் வேலைக்குச் சேராமல் விட்டது இரண்டாவது தவறு. ராஜினாமா செய்யாமல் விடுப்பு எடுத்துக்கொண்டு சென்றதால், மறுபடியும் அதே நிறுவனத்தில் வேலை பார்க்கும் வாய்ப்பு இருந்தும் தவறவிட்டிருக்கிறார். அடுத்து, மனைவி பிரேமா நன்கு படித்திருந்தும், வேலைக்குச் செல்லும் தகுதியிருந்தும் பெண்கள் வேலைக்குச் செல்லத் தேவையில்லை என்ற எண்ணத்தில் வேலைக்கு அனுப்பாமல் தவிர்த்தது அவர் செய்த மூன்றாவது தவறு.

ஆக மொத்தத்தில், தெளிவான முடிவு எடுக்காமல் இருந்ததுதான் எல்லா தவறுகளுக்கும் காரணமாக அமைந்தது. முதலில் சம்பளம் சற்றுக் குறைவாக இருந்தாலும், சென்னையில் கிடைக்கும் வேலையில் சேரும்படி சொன்னேன்.
அதற்குமுன், மனைவியை வேலைக்கு அனுப்பச் சொன்னேன். பள்ளியொன்றில் ஆசிரியர் வேலைக்குச் செல்ல ஆரம்பித்தார் பிரேமா. ஒரே வருடத்தில் அதிக  சம்பளத்தில் பெரிய பள்ளியொன்றில் அவருக்கு  வேலை கிடைத்தது. இரண்டு குழந்தைகளுக்கும் அதே பள்ளியில் ஃப்ரீ அட்மிஷன் கிடைத்தது. இது மிகப் பெரிய சப்போர்ட்டாக அமைந்தது. இந்த நல்ல சூழ்நிலையில் ராகவனின் மாமனார், மாமியார் சென்னைக்குக் குடிபெயர்ந்தார்கள். இது பிரேமாவுக்கு மிகவும் வசதியாக ஆகிவிட்டது. வேலை அதிகம் இருக்கும் நேரங்களில் அவர்கள் குழந்தைகளை கவனித்துக்கொண்டார்கள்.

ராகவனின் சம்பாத்தியம் குடும்பச் செலவுகளை செய்ய போதுமானதாக இருக்க, பிரேமா சம்பாதித்த ரூ.15,000 அப்படியே மிச்சமானது. அதைக் கொண்டு எதிர்கால இலக்குகளுக்காக முதலீடு களைத் தொடங்கும் வழிகளை தற்போது ஏற்படுத்திக் கொடுத்துள்ளேன்.

தற்போது மலேசிய நிறுவனம் மறுபடியும் வேலைக்கு அழைப்பதாக ராகவன் சொன்னார். ‘‘அவசரப்பட்டு மீண்டும் தவறான முடிவை எடுக்க வேண்டாம். மலேசியா நிறுவனம் முன்பு பிடித்து வைத்துள்ள 40% சம்பளப் பணத்தை திருப்பித் தருகிறதா, மீண்டும் சென்றால் கேரன்டியான சூழல் உள்ளதா என்றெல்லாம் பாருங்கள். இல்லா விட்டால் சென்னையில் இருப்பதுதான் பாதுகாப்புக்கும், உயர்வுக்குமான வழி’’ என்பதை விளக்கமாக எடுத்துச் சொல்லியுள்ளேன்.

ராகவன் எடுத்த தவறான முடிவுகளால் பத்து வருடங்கள் எந்தவிதமான முதலீடுகளும் செய்ய முடியாமல் குழப்பத்துடனேயே வீணாகப் போய்விட்டன. அந்தப் பாடங்கள் இனி அவரை தெளிவான முடிவுகளை எடுக்க வைக்கும் என்ற நம்பிக்கை எனக்கு உள்ளது.

(கற்போம்)

நீங்களும் உங்கள் நிதித் தவறுகளைச் சொல்லித் தீர்வு பெறலாம். அனுப்ப வேண்டிய மெயில் முகவரி : finplan@vikatan.com

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism