Published:Updated:

வெற்றிக்குக் கைகொடுக்கும் எஃபெக்டிவ் கொலாபரேஷன்!

வெற்றிக்குக் கைகொடுக்கும் எஃபெக்டிவ் கொலாபரேஷன்!
பிரீமியம் ஸ்டோரி
வெற்றிக்குக் கைகொடுக்கும் எஃபெக்டிவ் கொலாபரேஷன்!

ஞா.சக்திவேல் முருகன்

வெற்றிக்குக் கைகொடுக்கும் எஃபெக்டிவ் கொலாபரேஷன்!

ஞா.சக்திவேல் முருகன்

Published:Updated:
வெற்றிக்குக் கைகொடுக்கும் எஃபெக்டிவ் கொலாபரேஷன்!
பிரீமியம் ஸ்டோரி
வெற்றிக்குக் கைகொடுக்கும் எஃபெக்டிவ் கொலாபரேஷன்!

‘‘தற்போது பணிச்சூழல் மாறி வருகிறது. இந்த மாற்றத்தில் வெற்றிபெற வேண்டுமானால் ஒருங்கிணைந்து (Effective collaboration) பணியாற்றுவது அவசியம். நிறுவனத்திலும், வேலையிலும் ஒருங்கிணைப்பு இருந்தால் மட்டுமே வெற்றிபெற முடியும்’’ என்கிறார் சித்ரா ரங்கமணி. இவர் ப்ரோேவாட்டா டெக்னாலஜீஸ் (Provata Technologies) நிறுவனத்தில் திட்ட மேலாண்மை மற்றும் பயிற்சித் துறையில் ஆலோசகராக இருக்கிறார்.   

வெற்றிக்குக் கைகொடுக்கும் எஃபெக்டிவ் கொலாபரேஷன்!

சோலோ பெர்ஃபாமன்ஸ்

“தனித்தனியாகப் பணி செய்பவர்கள் அவரவர்கள் பணியை நன்றாகச் செய்யலாம். இதற்குத் தனித் திறனாளுதல் (சோலோ பெர்ஃபாமன்ஸ்) என்று பெயர். இப்படித் தனித்துச் சிறப்பாகச் செய்பவர்கள் நன்றாகச் செயல்பட்டுப் பெயர் வாங்கலாம். ஆனால், குழுவாக ஒருங்கிணைந்து வேலை செய்யும்போது தான் மிகப் பெரிய தாக்கத்தையும், விளைவையும் ஏற்படுத்த முடியும். நிறுவனங்களின் வெற்றியின் பின்னணியை ஆராய்ந்தால், மிகப் பெரிய ஒருங்கிணைப்பு இருப்பதை அறிந்துகொள்ள முடியும்.

ஒருங்கிணைப்பு என்பது புதிதல்ல. காலம் காலமாக இருந்து வருகிற ஒன்றுதான். எல்லோரும் சேர்ந்து ஒரு குறிக்கோளை முன்வைத்து வேலை பார்க்கும்போது, அந்தக் குறிக்கோளை அடைவதுடன் சாதனையும் படைக்க முடியும்.  ஓர் ஆள் மட்டும் ஒரு பணியைத் திறமையாக முடிக்க முடியாது. ஆனால், பத்து பேர் ஒருங்கிணைந்து வேலை பார்க்கும்போது மிகப் பெரிய வெற்றியைப் பெற முடியும்.

 உரையாடல் அவசியம்!

வேலை செய்பவர்கள் ஏன், எதற்காக இந்த வேலையைச் செய்கிறோம் என்ற புரிதல் வேண்டும். ஒரு நிறுவனத்துக்கு வேலைக்குச் செல்பவர்கள் அந்த நிறுவனம் குறித்து அனைத்தையும் தெரிந்துகொள்ள வேண்டும். ஒவ்வொரு பிரிவும் என்னென்ன பணிகளை செய்கின்றன என்பது குறித்து புரிதல் வேண்டும்.

ஒவ்வொரு பிரிவில் உள்ளவரும் மற்ற பிரிவில் உள்ளவர்களுடன் பேசிக்கொள்ள வேண்டும். குறைந்தபட்சம் அந்தப் பிரிவுகளின் தலைமைப் பதவியில் இருப்பவர்களாவது பேசிக்கொள்ள வேண்டும். இவ்வாறு உரையாடும்போது, ஒரே பணியைப் பல்வேறு பிரிவுகள் மேற்கொள்வதைவிட,  ஒரே பிரிவு அந்தப் பணியைச் சிறப்பாக செய்துவிட முடியும். இதனைத்தான் சிறப்பான ஒருங்கிணைப்பு எனச் சொல்கிறோம்.
 
சிறந்த ஒருங்கிணைப்புக்குச் சில வழிமுறைகள் உள்ளன. அந்த வழிமுறைகளை ஒவ்வொன்றாகச் சொல்கிறேன்.

 முன்னெடுத்தலுக்கான தலைமை

எந்த இரண்டு நிறுவனங்களை எடுத்துக் கொண்டாலும் ஒரே மாதிரியான பணிச்சூழலை வைத்திருக்க மாட்டார்கள்.  ஒரு நிறுவனத்தின் திட்டமிடல் வேறுமாதிரியாக இருக்கும். அவர்களின் செயல்பாடு வித்தியாசமாக இருக்கும். ஒரு நிறுவனத்தில் ஒரு குறிப்பிட்ட தொழில் நுட்பத்தைப் பயன்படுத்தி வரலாம். மற்றொரு நிறுவனத்தில் அதைவிடக் கூடுதலான தொழில் நுட்பத்தைப் பயன்படுத்தலாம். ஒரு நிறுவனத்தில் உள்ள வெவ்வேறு துறைகளின் செயல்பாடுகளும் வேறு வேறாக இருக்கும். ஒவ்வொரு நிறுவனத்திலும் நிறைய பேர் வித்தியாசமானவர்களாக இருப்பார்கள். இவர்களை எல்லாம் ஒருங்கிணைத்து கொண்டு போவதற்கு லீடு (Lead) என்றழைக்கப்படும் பிரிவுக்கான தலைவர்கள்  இருப்பார்கள். இவர்களிடையே ஒற்றுமையும், பரஸ்பரம் தகவல் பரிமாற்றமும் இருக்க வேண்டும்.

 புரிந்துகொள்ளல்

வாடிக்கையாளர் ஒருவர் நிறுவனத்தின் ஒரு பிரிவின் மேலாளரைச் சந்திக்கிறார். இந்தச் சந்திப்பில் அந்த வாடிக்கையாளர் குறித்துப் பல தகவல்களைக் கேட்டுத் தெரிந்துகொள்கிறார் அந்தப் பிரிவின் மேலாளர்.  அதே வாடிக்கையாளர் மற்றொரு பிரிவின் மேலாளரைச் சந்திக்கிறார். அவரும் ஆரம்பத்தில் இருந்து கேட்ட தகவலையே கேட்டுத் தெரிந்துகொள்வார். இவ்வாறு தொடர்ந்து ஒரே விஷயத்தையே பலர் கேட்கும்போது வாடிக்கையாளர் சுணக்கம் அடைவார். ஒரே தகவலை இரண்டு மேலாளர்களும் கேட்கக்கூடாது. ஒரு பிரிவின் மேலாளர் கேட்ட தகவலை மற்றொரு பிரிவு மேலாளரிடம் பரிமாறிக்கொள்ள வேண்டும். இதன்மூலம் ஏற்கெனவே கேட்டுத் தெரிந்துகொண்ட விவரங்களைத் தவிர்த்து, இதர தகவல்களைத் தெரிந்துகொள்ள நேரம் கிடைக்கும். கூடுதல் தகவல் கிடைப்பதுடன் கால  விரயத்தைத் தடுத்து, வாடிக்கையாளரின் நன்மதிப்பைப் பெறலாம். ஒரு நிறுவனத்தின் அனைத்துப் பிரிவுகளும் இணைந்து செயல்பட வேண்டும்.

 அதிகாரமளித்தல்


கீழ் நிலையில் பணியாற்றுபவர்களுடனும் ஆலோசனை கேட்க வேண்டும். இந்தப் பணியை எவ்வாறு சிறப்பாக மேற்கொள்ளலாம் என்று கேட்க வேண்டும். இவ்வாறு கேட்கும்போது அவர்கள் தீர்வை தேடுவார்கள். அமைதியாக இருக்கும் பணியாளர்கள்கூட பல தீர்வுகளைச் சொல்லலாம். பணியாளர்களை மேலாளர்கள் தட்டிக்கொடுத்து, ஆலோசனை களைப் பெறலாம். மேலாளர் ஆலோசனை கேட்காதபோது, எந்தப் பணியாளரும் பொதுவாக வாய் திறக்க மாட்டார்கள். எனவே, பணியாளர்களிடமும் ஆலோசனை சொல்லும் உரிமையைக்  கொடுக்க வேண்டும். 

ஒட்டுமொத்த விகடனுக்கும் ஒரே ஷார்ட்கட்!

வெற்றிக்குக் கைகொடுக்கும் எஃபெக்டிவ் கொலாபரேஷன்!

ஒளிவுமறைவு இல்லாமை

ஒவ்வொரு பணியிலும் அதில் உள்ள தடைகள் என்னென்ன, அந்தத் தடைகளைத் தாண்டி எப்படிப் பணியை சிறப்பாக முடிப்பது, பணியில் தவறு இருந்தால் அதனை எப்படித் திருத்திக்கொள்வது, பணித்திறனை இன்னும் சிறப்பாக எவ்வாறு மேம்படுத்துவது என்று அவர்களிடமே ஆலோசனை கேட்டுப் பெற வேண்டும். பணி செய்பவர்கள் யோசிப்பதற்கு ஒரு தளத்தை உருவாக்கித்தர வேண்டும். இந்தத் தளத்தில் அவர்கள் குழுவின் செயல்பாடுகளை வெளிப்படையாகப் பேசுவதற்கு வாய்ப்பு வழங்க வேண்டும்.

இப்படி வாய்ப்பு வழங்கினால் ஒவ்வொரு செயலையும் நன்றாகச் செய்வதற்கும், தவறாகச் செய்யும்போது உடனே அதைச் சரி செய்வதற்கும் ஆலோசனை பெற முடியும். இவ்வாறு பணியாளர்களிடம் ஆலோசனை பெறும்போது, ‘‘உங்களின் ஆலோசனையை ஆமோதிக்கிறேன், ஏற்றுக்கொள்கிறேன்’’ என்று சொல்ல வேண்டும். இந்த ஏற்றுக்கொள்ளல், இணைந்து செயல்பட வேண்டும் என்ற உணர்வை அவர்களுக்குள் மேலோங்க வைக்கும்.

 பயிற்சி

சேர்ந்து  ஒரு செயலைச் செய்தால்  மிகப் பெரிய நன்மை கிடைக்கும் என்பதைப் புரிய வைக்க வேண்டும். ஒரே வேலையினை ஒரே நிறுவனத்தில் உள்ள இரண்டு பிரிவுகளில் இருப்பவர்களும் செய்துகொண்டிருப்பார்கள். இருவரும்  கலந்து பேசியிருந்தால், ஒரே பிரிவினர் மட்டுமே செய்வார்கள். இப்படிச் சேர்ந்து செயல்படுவதற்குரிய பயிற்சியை வழங்க வேண்டும். இந்தப் பயிற்சிக்கு ‘லேர்னிங் அண்ட் டிஸ்கவரி’ என்று பெயர். இதற்கு நிறுவனங்கள், குறிப்பிட்ட இடைவெளியில் நேரத்தை ஒதுக்க வேண்டும்.

 தொடர்புகொள்ளும் திறன்

இது சீராக இருக்க வேண்டும். ஏதாவது ஒரு நாள் மட்டும் தகவல்களைப் பரிமாறிக் கொள்வதால் பயனில்லை. அனைவரும் ஒருங்கிணைந்து கூட்டம் நடத்த வேண்டும். இவ்வாறு நடத்தும்போது எல்லோரும் பேசிக்கொண்டால் நிறுவனத்தை நடத்துவது எளிதாக இருக்கும். இதற்கு தகவல் தொடர்புத்திறன் மிக முக்கியம். பக்கத்துப் பக்கத்துப் பிரிவில் இருப்பவர்கள் பேசிக்கொள்ளாமல், அதற்கு நேரமும் இல்லாமல் இருந்தால் அந்த நேரத்தை உருவாக்கிக்கொடுக்க வேண்டும். பரிமாறுதல் என்பதுதான் புதிதாகக் கற்றுக்கொள்ள வழிவகுக்கும்.

 மதிப்பு கொடுத்தல்

ஒருவரின் கோபத்தை வாய் வார்த்தைகளால் மட்டுமே வெளிப்படுத்த வேண்டும் என்று அவசியமில்லை. ஒருவர் ஒரு கூட்டத்துக்கு அரைமணி நேரம் காலதாமதமாக வந்து கோபத்தை வெளிப்படுத்தலாம். சிலர், ஒரு வேலையை மாலையில் முடித்துக்கொடுக்கச் சொன்னால், அடுத்த நாள் காலையில்தான் முடித்துக் கொடுப்பார்கள். இதனால் பலரும் காத்திருக்க வேண்டிய நிலை ஏற்படும். ஒருவர் செய்யும் தாமதம் இன்னொரு பிரிவினரையும் பாதிக்கும். மற்றவர்கள்  காத்திருக்கிறார்கள் என்பதை அறிந்து மதிப்புத் தந்து, பணியை முடித்துக்கொடுக்க வேண்டும்.

 பாராட்டு


காலத்தோடு முடிப்பவர்களுக்குப் பாராட்டுத் தெரிவிக்க வேண்டும். நன்றி தெரிவிக்க வேண்டும். சிறப்பாக முடித்ததற்குப் பாராட்டினால் அடுத்தடுத்த பணிகளையும் சிறப்பாக முடித்துக் கொடுக்க வேண்டும் என்ற பொறுப்பு உணர்வு வரும். நன்றி தெரிக்காமல் இருக்கும்போது அடுத்தடுத்த பணிகளில் சுணக்கம் காண்பிக்க ஆரம்பித்து விடுவார்கள்.

 தொடர் ஓட்டம்

ஒருவர் கொடுக்கும் பணியை இன்னொருவர் தொடர்வார். அதாவது, இது ஒரு தொடர் ஓட்டம் போல்தான். ஒவ்வொரு பிரிவும் இணைந்து செயல்படுவதே ஒரு கலாசாரமாக இருக்க வேண்டும். இது பணியாளர்களுக்குப் புரியப்புரிய நிறுவனத்தின் கலாசாரமாக மாறிவிடும். இதை ஒரு நாளில் சாதிக்க முடியாது என்றாலும்,

நீண்ட கால நோக்கில் சாத்தியமே.

ஒருங்கிணைந்தும், ஆதரவு தெரிவித்தும் வேலை பார்க்க வேண்டும். அதாவது, மனித மூலதனத்தைச் சிறப்பாகக் கையாண்டால் மட்டுமே நிறுவனம் வளர்ச்சிப் பாதையில் முன்னேறும்” என்றார் சித்ரா.

நிறுவனங்களை நடத்தும் நிர்வாகிகள் இப்படிச் செய்து பார்க்கலாமே!

ஜாப் கார்னர்

வெற்றிக்குக் கைகொடுக்கும் எஃபெக்டிவ் கொலாபரேஷன்!

கெயில் நிறுவனத்தில் 73 பணியிடங்கள்

பணியின் பெயர்: எக்ஸிக்யூட்டிவ் டிரெய்னி

கல்வித்தகுதி:  பி.இ/பிடெக்-கில் 65% மதிப்பெண்ணுடன், கேட் தேர்வில் அதிக மதிப்பெண்

வயது வரம்பு:
28 வயது

விண்ணப்பிக்க கடைசி நாள்: 17.2.2017

மேலும் விவரங்களுக்கு:http://www.gailonline.com/final_site/current_opening.html

வெற்றிக்குக் கைகொடுக்கும் எஃபெக்டிவ் கொலாபரேஷன்!

ஏற்றுமதி ஆய்வு நிறுவனத்தில் 44 பணியிடங்கள்

பணியின் பெயர்: தொழில்நுட்ப அலுவலர்  மற்றும் பிரிவு அலுவலர்

கல்வித்தகுதி:  பி.இ., பி.டெக்., அறிவியல் பட்டப்படிப்பு

வயது வரம்பு: 35 வயது

விண்ணப்பக் கட்டணம்: பொது மற்றும் பிற்படுத்தப்பட்டோர் வகுப்பைச் சார்ந்தவர்களுக்குக் கட்டணம் 1000 ரூபாய். இதர பிரிவினருக்குக் கட்டணம் விலக்கு வழங்கப்படுகிறது.

விண்ணப்பிக்கக் கடைசி நாள்: 10.2.2017

மேலும் விவரங்களுக்கு: http://www.eicindia.gov.in/

வெற்றிக்குக் கைகொடுக்கும் எஃபெக்டிவ் கொலாபரேஷன்!

மத்திய ஆயுதப்படை பிரிவில் 2955 பணியிடங்கள்

பணியின் பெயர்:  தொழில்நுட்பப் பணி மற்றும் டிரேடுமேன் பணி

கல்வித் தகுதி: 12-ம் வகுப்பு தேர்ச்சி

வயது வரம்பு: 23 வயது முதல் 27 வயது வரை

விண்ணப்பிக்கக் கடைசி நாள்: 1-3-2017. விண்ணப்பத்தை 31.1.2017 அன்று இணையத்தில் பதிவிறக்கம் செய்துக்கொள்ளலாம்.

விண்ணப்பக் கட்டணம் : ரூ.100 (பொது பிரிவு மற்றும் பிற்படுத்தப்பட்டப் பிரிவினருக்கு) இதர பிரிவினருக்குக் கட்டணம் கிடையாது.

மேலும் விவரங்களுக்கு :
www.crpf.nic.in