Published:Updated:

அஜய் பிரமல் : நினைத்ததை முடிப்பவர்!

ஒட்டுமொத்த விகடனுக்கும் ஒரே ஷார்ட்கட்

Use App
அஜய் பிரமல் : நினைத்ததை முடிப்பவர்!
அஜய் பிரமல் : நினைத்ததை முடிப்பவர்!

பிசினஸ் சூப்பர் ஸ்டார்கள்!ஜெ.சரவணன் - ஓவியம்: கோ.ராமமூர்த்தி

பிரீமியம் ஸ்டோரி

ல்லோரும் முயற்சி செய்யலாம். ஆனால், மற்றவர்களால் முடியாத ஒன்றை முடித்துக் காட்டுபவர்தான் வெற்றியாளராக இருக்க முடியும். அப்படிப்பட்ட ஒரு தொழில் வாழ்க்கையை வாழ்ந்து, உலக பார்மா நிறுவனங்களுக்கு நிகராக ஓர் இந்திய நிறுவனமும் இருக்கிறது என்ற பெருமையை அஜய் பிரமல் சாதித்துக் காட்டி இருக்கிறார். அவருடைய பிசினஸ் வரலாறு  சுவாரஸ்யம் நிறைந்தது.

அஜய் பிரமல் : நினைத்ததை முடிப்பவர்!

 தவிர்க்க முடியாத தொடக்கம்!

அஜய் பிரமல் கல்லூரியில் படித்துக் கொண்டிருந்தபோது அப்படியொரு சம்பவம் நடக்கும் என்று எதிர்பார்த்திருக்கவில்லை. அவர் கண்முன்னே திடுமென அவருடைய தந்தை இறந்துபோனார். அப்போது அஜய்க்கு வயது 24. அவருடைய குடும்பம் டெக்ஸ்டைல் பிசினஸ் செய்துகொண்டிருந்தது. தந்தை இறந்தபின் அஜய் பிரமல் தன் அண்ணனுடன் சேர்ந்து பிசினஸ் பொறுப்பை ஏற்றுக்கொண்டார். ஆனால், அடுத்த சில வருடங்களிலேயே அஜய் பிரமிலின் அண்ணனும் புற்றுநோய்க்கு ஆளாகி இறந்து போனார். வேறு வழியில்லாமல் குடும்பத் தொழிலான டெக்ஸ்டைல் பிசினஸைத் தலைமை ஏற்று நடத்தும் கட்டாயத்துக்கு ஆளானார் அஜய்.

ஆனால், தன் கைக்குக் குடும்ப பிசினஸ் வந்ததைக்கண்டு அவரால் மகிழ்ச்சி அடைய முடியவில்லை. காரணம், அந்த பிசினஸ் முற்றிலும் திவாலாகும் நிலையில் இருந்தது. டெக்ஸ்டைல் துறைக்கு எதிர்காலம் என்பது பெரிய அளவில் இல்லை என்பது அவருக்குப் புரிந்தது. மேலும், அந்தத் துறையில் போட்டியாளர்களும் அதிகம் இருந்தனர். அந்த நிலையிலும் சில ஆண்டுகள் பிசினஸை நடத்திவந்த அதே நேரத்தில், இந்தியச் சந்தையில் வேறு வாய்ப்பு ஏதேனும் இருக்கிறதா என்பதைப் பார்த்துக்கொண்டே இருந்தார்.

 வெளிநாட்டினர்விட்ட இடத்தைப் பிடித்தார்!


1980-களில் இந்தியாவில் இருந்த வெளிநாட்டு பார்மா நிறுவனங்கள் அனைத்தும், பார்மா துறை வளர்ச்சிக்கான வாய்ப்பு இந்தியாவில் இல்லை என்று தங்கள் தொழிலை விட்டுவிட்டு, சொந்த நாட்டுக்கே திரும்பிக் கொண்டிருந்தன. அவற்றில் ஹாய்ஸ்ட் (Hoechst), ஐசிஐ ஆகிய உலக பிரபல நிறுவனங்களும் அடக்கம். அப்படி வெளியேற இருந்த நிக்கோலஸ் லேப்ஸ் என்ற பார்மா நிறுவனத்தை 1988-ம் ஆண்டு வாங்க, அஜய் பிரமல் முடிவு செய்தார்.

அஜய் பிரமல் : நினைத்ததை முடிப்பவர்!

அவர் நடத்திவந்த டெக்ஸ்டைல் நிறுவனம், 1871-ல் தொடங்கப்பட்டது. இத்தனை வருடங்களாக இருந்த டெக்ஸ்டைல் பிசினஸை விட்டுவிட்டு பார்மா தொழிலுக்குப் போகிறாரே என்று அவருடைய நண்பர்களும் அவருடைய நிறுவனத்தில் இருந்த பலரும் கேட்டனர். அதே சமயம், பார்மா துறையில் இருந்தவர்கள், இங்கு என்ன இருக்கிறது என்று இதில் முதலீடு செய்ய வந்திருக்கிறாய் என்று அவரைக் கேட்டனர். ஆனால், அவர் தனது முடிவில் உறுதியாக இருந்தார். அவர் எடுத்த அந்த முடிவுதான் அவரை இன்று உலக அரங்கில் சர்வதேச பார்மா நிறுவனங்களுக்குப் போட்டியாளராக மாற்றி இருக்கிறது.

 பத்து ஆண்டுகளில் இந்தியாவில் முதலிடம்!

ரூ. 16 கோடிக்கு நிக்கோலஸ் லேப்ஸ் நிறுவனத்தை வாங்கினார். அந்த நிறுவனம் இந்தியாவில் தொழில் செய்யத் திணறினாலும் உலகின் பல நாடுகளில் தனது மருந்துகளை விற்பனை செய்துகொண்டிருந்தது. அதைத் தனது வளர்ச்சிக்குச் சாதகமாக எப்படிப் பயன்படுத்தலாம் என்று யோசித்தவர், உலக நாடுகள் முழுவதும் பயணம் செய்து தொழில் செய்வதற்கான வாய்ப்புகளைத் தேடித்தேடிக் கண்டுபிடித்தார். அடுத்த பத்து ஆண்டுகளில் இந்தியாவில் முதன்மை பார்மா நிறுவனம் என்கிற இடத்தைப் பிடித்தார்.

ஒரு தலைவனுக்கு, ரிஸ்க் எடுத்து ஒரு விஷயத்தை முன்னெடுக்கும் தைரியம் இருக்க வேண்டும் என்று அவர் நம்பினார். அதுமட்டுமல்லாமல், எடுக்கப் போகும் ரிஸ்க்கின் விளைவுகள் பற்றியும் நன்றாகத் தெரிந்து வைத்திருக்க வேண்டும். அப்போதுதான் அவற்றுக்கேற்ப நம்முடைய செயல்பாடுகளைத் திட்டமிட முடியும் என்று நினைத்தார் அஜய் பிரமில். 

 வளர்ச்சியின் அடுத்த கட்டம்!

ஜெனரிக் மெடிசன்ஸ் பிசினஸில் சர்வதேச தரத்தில் உள்நாட்டிலேயே மருந்துகள் தயாரித்து விற்பனையில் கலக்கிக்கொண்டிருந்தவருக்கு  2010-ல் மிகப் பெரிய வாய்ப்பு ஒன்று வந்தது. அவருடைய ஜெனரிக் மெடிசன்ஸ் பிசினஸை 3.8 பில்லியன் டாலருக்கு வாங்க அமெரிக்காவைச் சேர்ந்த அப்பாட் (Abbott) நிறுவனம் தயாராக இருந்தது. அந்த நிறுவனத்துக்கு தனது ஜெனரிக் மெடிசன்ஸ் பிசினஸை விற்றார்.

இவ்வளவு கஷ்டப்பட்டு வளர்த்த பிசினஸை விற்க எப்படி மனசு வந்தது என்று அவரை எல்லோரும் திட்டித் தீர்த்தனர். ஆனால், அதற்கான காரணம் அவருக்கு மட்டுமே தெளிவாகத் தெரிந்திருந்தது. ஒரு நிறுவனத்தை வாங்குவதிலும் விற்பதிலும் மிகப் பெரிய பிசினஸ் தந்திரம் இருக்கிறது.

வளர்ச்சிக்கு வாய்ப்புள்ள துறையில் திணறிக் கொண்டிருக்கும் ஒரு நிறுவனத்தை வாங்குவதன் மூலம் எளிதில் அந்தச் சந்தையில் வெற்றி அடைய முடியும். அதேபோல், ஒரு நல்ல நிறுவனத்தை அதன் தற்போதைய சந்தை மதிப்பைக் காட்டிலும் பல மடங்கு அதிக விலைக்கு விற்கலாம். ஆனால், அந்தப் பெரும் பணத்தை அடுத்து என்ன செய்யப் போகிறோம் என்பதற்கான திட்டம் நம்மிடம் இருக்க வேண்டும். தனது ஹெல்த்கேர் பிசினஸை விற்றதன் மூலம் கிடைத்த 3.8 பில்லியன் டாலர் பணத்தை வைத்து, அதைவிட பெரிய பிசினஸ் ஒன்றை உருவாக்கத் திட்டமிட்டார் அஜய் பிரமல்.

அதுவரை சந்தையில் இல்லாத, மிகவும் அவசியமான மருந்துகள் பலவற்றை ஆராய்ச்சி செய்து தயாரிக்க ஆரம்பித்தார். அதற்காக உலகம் முழுக்க 300 ஆராய்ச்சி யாளர்களை வேலைக்கு எடுத்தார். இங்கிலாந்தில் மோர்பெத்தில் (Morpeth) ஆராய்ச்சிக் கூடத்தை அமைத்து, மருந்துகளையும், காஸ்மெட்டிக் தயாரிப்புகளையும் கண்டுபிடித்துச் சந்தையில் அறிமுகப்படுத்தி வருகிறார். அதில் அவருக்குக் கிடைத்திருப்பது அபார வெற்றி.

அஜய் பிரமல் : நினைத்ததை முடிப்பவர்!

ஏறிய குதிரையெல்லாம் ஜெயித்தது!

இப்படி பார்மா துறையில் அவருக்குக் கிடைத்த வருமானத்தைத் தொடர்ந்து அடுத்தடுத்த பிசினஸிலும் முதலீடு செய்ய ஆரம்பித்தார். பார்மா தவிர, ஃபைனான்ஷியல் சர்வீசஸ், பேக்கேஜிங் மற்றும் ரியல் எஸ்டேட் ஆகிய துறைகள் என தனது முதலீட்டைப் பிரித்து முதலீடு செய்தார்.

உலக நிறுவனங்களான மெர்க் (Merck), எலி லில்லி (Eli Lilly), ஃபைசர் (Pfizer), வோடபோன் (Vodafone), பயோ சின்டெக் (Bio-Syntech), பேயர் (Bayer) உட்பட இருபதுக்கும் மேற்பட்ட நிறுவனங்களின் பங்குகளைக் கையகப்படுத்தி இருக்கிறார். தமிழகத்தில் ஸ்ரீராம் குழுமத்துடன் இணைந்து ஃபைனான்ஷியல் சர்வீஸ் பிசினஸ் செய்ய தயாராகி இருப்பது அவருடைய சமீபத்திய பிசினஸ் நடவடிக்கை.

இதுவரை அவர் செய்த முதலீடுகள் அனைத்தும் அவருக்கு நல்ல வருமானத்தை ஈட்டித் தந்திருக்கின்றன. இந்தியாவில் முதல் ஷாப்பிங் மால் கட்டியவர் அஜய் பிரமல்தான். மும்பையில் உள்ள சோபா சென்ட்ரல் என்ற ஷாப்பிங் மால் இன்றும் மும்பையின் ஒரு முக்கிய அடையாளமாக இருக்கிறது. அவருடைய தற்போதைய சொத்து மதிப்பு 3.3 பில்லியன் டாலர்.

தெளிவான சிந்தனை!

அஜய் பிரமலின் இந்த அதிவேக வளர்ச்சிக்குக் காரணம், எப்படி பிசினஸ் செய்ய வேண்டும் என்பதில் அவருக்கு இருந்த தெளிவான பார்வையும் சிந்தனையும்தான். ஒரு பிசினஸ், அதன் வாடிக்கை யாளர்கள், சமூகம், பங்குதாரர்கள் மற்றும் பணியாளர்கள் எனப் பலரையும் உள்ளடக்கியது. எனவே, அவர்கள் அனைவரின் நலனை மனதில் வைத்தே ஒவ்வொரு பிசினஸும் கட்டமைக்கப்பட வேண்டும் என்று அவர் எப்போதும் கூறுவார். அதன்படிதான் அவர் தன் பிசினஸையும் செய்தார். தன் பிசினஸில் தான் எடுக்கும் எந்த ஒரு முடிவும் இவர்கள் யாரையும் பாதிக்காமல் இருக்கும்படி பார்த்துக்கொள்வார். அவருடைய இந்த உணர்வு அவருக்கு மேலும் மேலும் நண்பர்களையும் வாடிக்கையாளர்களையும் பணியாளர்களையும் பெற்றுத்தந்தது. அவருடைய பிசினஸில் அவர் மட்டும் வருமானம் பார்க்கவில்லை; முதலீடு செய்த அனைவருமே பணம் பார்த்தனர்.

தெளிவான சிந்தனையுடன் பிசினஸ் செய்தால், நிச்சயம் வெற்றி கிடைக்கும் என்பதற்கு இவர் சிறந்த உதாரணம்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு