Published:Updated:

ஆண்டு வருமானம் ரூ.18 லட்சம்... உங்களுக்கும் வீட்டுக் கடன் மானியம்!

ஒட்டுமொத்த விகடனுக்கும் ஒரே ஷார்ட்கட்

Use App
ஆண்டு வருமானம் ரூ.18 லட்சம்... உங்களுக்கும் வீட்டுக் கடன் மானியம்!
ஆண்டு வருமானம் ரூ.18 லட்சம்... உங்களுக்கும் வீட்டுக் கடன் மானியம்!

ஞா.சக்திவேல் முருகன்

பிரீமியம் ஸ்டோரி

கரமயமாக்கல் காரணமாக நகரங்களில் வீடுகளின் தேவை அதிகரித்து வருகிறது.  அதைக் கணக்கில்கொண்டு 2015-ம் ஆண்டு ஜூன் மாதம் 17-ம் தேதி, ‘அனைவருக்கும் வீடு திட்டம்’ (பிரதம மந்திரி ஆவாஸ் யோஜனா) என்ற பெயரில் ஒரு திட்டத்தை மத்திய அரசின் வீட்டு வசதி மற்றும்  நகர்ப்புற வறுமை ஒழிப்பு அமைச்சகம் செயல்படுத்தி வருகிறது.

இந்தத் திட்டத்தின் கீழ், பொருளாதார அளவில் நலிந்த பிரிவினர், ஆறு லட்சம் ரூபாய்க்குக் குறைவான ஆண்டு வருமானம் கொண்டவர்கள் வீடு வாங்கும்போதோ, புதிதாக வீடு கட்டும்போதோ, புதுப்பிக்கும்போதோ வங்கியில் கடன் பெறலாம். ஆறு லட்சம் ரூபாய் வரை பெறப்படும் கடனுக்கு 6% மானியம் வழங்கப்படுகிறது.

இதன் அடுத்தகட்டமாக, பிரதமர் நரேந்திர மோடி 2016-டிசம்பர் 31-ம் தேதி அனைவருக்கும் வீடு திட்டத்தில் நடுத்தர மக்களும் பயன்படும் வகையில் மானியத் திட்டத்தை அறிவித்தார். இந்தத் திட்டம் குறித்த அம்சங்களை உத்தரப்பிரதேசம், பஞ்சாப், உத்தராஞ்சல் உள்ளிட்ட ஐந்து மாநிலத் தேர்தல் காரணமாக வெளியிடாமல் வைத்திருந்தது மத்திய அரசு. தற்போது தேர்தல் முடிவடைந்த நிலையில், அந்தத் திட்டத்துக்கான அறிவிப்பு விரிவாக வெளியிடப்பட்டுள்ளது. 

ஆண்டு வருமானம் ரூ.18 லட்சம்... உங்களுக்கும் வீட்டுக் கடன் மானியம்!

வீட்டுக் கடனுக்கான மானியம் யாருக்கு?

இந்தத் திட்டத்தின் கீழ் அனைத்து நகரப் பகுதிகளில் இருப்பவர்களும் பயனடையலாம். அதாவது, நகர எல்லையில் அல்லது முனிசிபாலிட்டி எல்லையில் வீடு இருக்க வேண்டும். இதுவரை சொந்த வீடு இல்லாதவர்கள் இந்தத் திட்டத்தின் மூலம் வீடு வாங்கிப் பயனடையலாம். முக்கியமாக, இதற்கு முன்பு மத்திய அரசின் திட்டங்களின் கீழ் பயன்பெறாதவராக இருக்கவேண்டும்.

 எங்கு கடன் கிடைக்கும்?

இந்தத் திட்டத்தில் நடுத்தர வருமானம் கொண்ட பிரிவினரை இரண்டு பிரிவாகப் பிரித்திருக்கிறார்கள். முதல் பிரிவில் ஆண்டுக்கு ஆறு லட்சம் ரூபாயிலிருந்து 12 லட்சம் ரூபாய் வரை வருமானம் கொண்டவர்களும், இரண்டாவது பிரிவில் 12 லட்சம் ரூபாயிலிருந்து 18 லட்சம் ரூபாய் வரை வருமானம் கொண்டவர்களும் இந்தத் திட்டத்தின் கீழ் பயன்பெறலாம். இவர்கள் வணிக வங்கிகள், வீட்டுக் கடன் நிறுவனங்கள், மண்டல அளவில் உள்ள ஊரக வங்கிகள், மாநிலக் கூட்டுறவு வங்கிகள், நகரக் கூட்டுறவு வங்கிகள், சிறு நிதி வங்கிகள், வங்கி சாரா நிதி நிறுவனங்கள் போன்றவற்றில் வீட்டுக் கடன் பெறலாம். இவ்வாறு வீட்டுக் கடன் பெறும்போது இந்தத் திட்டத்தைக் குறிப்பிட்டு விண்ணப்பிக்க வேண்டும்.

 எவ்வளவு மானியம் கிடைக்கும்?

இந்தத் திட்டத்தின் கீழ் வீடு வாங்குதல், வீடு கட்டுதல், வீட்டை அனைத்து வசதிகளும் கொண்ட வகையில் மாற்றியமைத்தல் போன்றவற்றுக்குக் கடன் பெறலாம். 12 லட்சம் ரூபாய் வரை வருமானம் உள்ளவர்கள், அவர்கள் வாங்கும் வீட்டுக் கடனில் 9 லட்சம் ரூபாய்க்கு 4% வட்டி மானியம் வழங்கப்படும். 18 லட்சம் ரூபாய் வரை வருமானம் உள்ளவர்கள், அவர்கள் வாங்கும் வீட்டுக் கடனில் 12 லட்சம் ரூபாய் வரை 3% வட்டி மானியம் பெறலாம். மேற்குறிப்பிட்ட தொகைக்கு மேல் உள்ள கடனுக்கு மானியம் கிடையாது. 

ரூ.12 லட்சத்துக்குக் குறைவாக வருமானம் உள்ளவர்கள் வீடு கட்டும்போது, அதன் பரப்பளவு  90 சதுர மீட்டராக இருக்க வேண்டும். ரூ.18 லட்சம் வரை வருமானம் உள்ளவர்கள் 110 சதுர மீட்டர் கொண்ட வீடு கட்ட வேண்டும். கட்டுமான ஏரியா என்பது சுற்றுச்சுவர் கொண்டதாகவும் இருக்க வேண்டும்.

20 வருடங்கள் அல்லது அதற்குக் குறைவான வருடங்களில் கடனைத் திருப்பிச் செலுத்த வேண்டும். மானியத்தைப் பெறுபவர்கள் அவர்களின் வீட்டுக் கடனில் அல்லது மாதாந்திரத் தவணையில் மானியத்தைச் சரிசெய்து கொள்ளலாம். வங்கியில் வீட்டுக் கடன் வாங்கும் போது அந்த வங்கியும், வீட்டுக் கடன் வாங்குபவரும் இந்தத் திட்டத்தின் கீழ் கடன் வாங்குகிறோம் என்ற விவரத்தையும், அதன் வரைமுறை திட்டத்தையும் முழுமையாகப் படித்து விண்ணப்பிக்க வேண்டும். வீட்டுக் கடன் பெறுபவர்கள் தங்களின் ஆதார் எண்ணை இணைக்க வேண்டும். இந்தத் திட்டத்தின் கீழ் பெண்கள், தாழ்த்தப்பட்டோர் மற்றும் பழங்குடி பிரிவைச் சார்ந்தவர் களுக்கு முன்னுரிமை வழங்கப்படும்.

 எத்தனை மாதங்களில்  வீட்டைக் கட்ட வேண்டும்?

ஒரு குறிப்பிட்ட வங்கியில் பயனாளியாகச் சேர்ந்து வீட்டுக் கடன் பெற்று மானியம் பெற்றபிறகு, கடன் வாங்கிய வங்கியை மாற்றக்கூடாது. வீடு கட்டுபவர்களுக்கு ஒவ்வொரு கட்டுமான நிலையிலும் மானியம் பகுதியாகப் பிரித்துக் கொடுக்கப்படும். கட்டி முடிக்கப்பட்ட வீட்டை வாங்குபவர்களுக்கு ஒரே தவணையில் மானியம் வழங்கப்படும். ஒவ்வொரு காலாண்டிலும் எந்தளவுக்குக் கட்டுமானத்தை முடித்திருக்கிறீர்கள் என்ற விவரத்தை வழங்க வேண்டும். ஓராண்டுக்குள் கட்டுமானத்தை முடிக்க வேண்டும். முதல் தவணை வழங்கியதிலிருந்து அதிகபட்சம் 36 மாதங்களுக்குள் முடித்துவிட வேண்டும். ஒருவேளை முழுமையாக முடிவு பெறாமல் இருந்தால், மானியத்தைத் திருப்பிச் செலுத்த வேண்டியிருக்கும். கட்டுமானம் செய்து கொண்டிருக்கும்போது வங்கிகள் உங்களது கட்டுமானத் தளத்தைப் பார்வையிடவும் செய்யலாம்.

வீட்டுக் கடன் வழங்கும் வங்கிகள் இந்தத் திட்டத்தின் கீழ் 2,000 ரூபாய் மட்டுமே பிராசஸிங் கட்டணமாக வாங்க வேண்டும். அதற்கு மேல் பெறக்கூடாது. ஒருவேளை, குறிப்பிட்ட தொகையைவிட அதிகமாகக் கடன் வழங்கும் போது அந்தத் தொகைக்கான பிராசஸிங் கட்டணத்தைத் தனியே பெற்றுக்கொள்ளலாம். ஃபிக்ஸட் அல்லது ஃப்ளோட்டிங் என்பதைக் கடன் வழங்கும் வங்கிகள் முடிவு செய்து கொள்ளலாம்.

இந்தத் திட்டம் 2017-ம் ஆண்டுமுழுக்க செயல்பாட்டில் இருக்கும். மக்களின் வரவேற்பைப் பொறுத்து, அடுத்தடுத்த ஆண்டுகளுக்கு விரிவாக்கம் செய்யப்படும். ஆகையால், நீங்கள் வீடுகட்ட நினைத்தால் அல்லது வீடு வாங்க நினைத்தால் இது அதற்குப் பொருத்தமான நேரம் என்பதைப் புரிந்துகொள்ளுங்கள்!

பஞ்சாயத்து அப்ரூவல் மனை விற்பனை தடை நீக்கம்

 தமிழ்நாட்டில் பஞ்சாயத்து அப்ரூவல் மூலம் விற்கப்பட்ட மனைகளை வாங்கவோ, விற்கவோ விதிக்கப்பட்ட தடையை சென்னை உயர்நீதிமன்றம் நீக்கியுள்ளது. தமிழக அரசின் கோரிக்கையை ஏற்று, இந்தத் தடை நீக்கப்பட்டுள்ளது. 2016 அக்டோபர் 20-ம் தேதிக்குமுன் பதிவு செய்யப்பட்ட மனைகளை மறுவிற்பனை செய்ய அனுமதிக்கப்பட்டுள்ளது. அதாவது, இந்தத் தேதிக்குமுன் பத்திரம் பதிவு செய்யப்பட்ட அங்கீகரிக்கப்பட்ட, அங்கீகரிக்கப்படாத மனைகளை மறுவிற்பனை செய்துகொள்ளலாம் என உயர் நீதிமன்றம் தெரிவித்துள்ளது.

அதே நேரத்தில், ஏற்கெனவே லே அவுட் போடப்பட்டு, அங்கீகாரம் பெறப்படாத மனைகளைப் பதிவு செய்ய உயர் நீதிமன்றம் தடை விதித்துள்ளது. லே அவுட்களில் சாலையின் அகலம் குறைந்தபட்சம் 22 அடியாக இருக்க வேண்டும் என உயர் நீதிமன்றம் சுட்டிக் காட்டியிருக்கிறது. மேலும், சாலை, கழிவு நீர் வசதிகளை ஏற்படுத்தித் தர, முறைப்படுத்த தமிழக அரசுக்கு ஏப்ரல் 11-ம் தேதி வரை உயர் நீதிமன்றம் அவகாசம் அளித்துள்ளது. பிற மனைகளுக்கு அரசு கொள்கை முடிவெடுக்க நீதிமன்றம் உத்தரவு பிறப்பித்துள்ளது.    

- சேனா  சரவணன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு