Published:Updated:

நிறைவேறியது ஜிஎஸ்டி... 4 முக்கிய அம்சங்கள்!

ஒட்டுமொத்த விகடனுக்கும் ஒரே ஷார்ட்கட்

Use App
நிறைவேறியது ஜிஎஸ்டி... 4 முக்கிய அம்சங்கள்!
நிறைவேறியது ஜிஎஸ்டி... 4 முக்கிய அம்சங்கள்!

ஜெ.சரவணன்

பிரீமியம் ஸ்டோரி

நீண்ட காலமாக எதிர்பார்த்துக்கொண்டிருக்கும் ஜிஎஸ்டி மசோதா, ஒருவழியாக கடந்த புதன்கிழமை அன்று மக்களவையில் நிறைவேறியிருக்கிறது. மத்திய சரக்கு மற்றும் சேவை வரி மசோதா, ஒருங்கிணைந்த சரக்கு மற்றும் சேவை வரி மசோதா, யூனியன் பிரதேச சரக்கு மற்றும் சேவை வரி மசோதா மற்றும் ஜிஎஸ்டி-யினால் மாநிலங்களின் வரி இழப்பை ஈடுசெய்யும் மசோதா ஆகிய நான்கு துணை மசோதாக்களும் நிறைவேற்றப்பட்டுள்ளன.

இதன்பிறகு மாநிலங்களவையிலும், மாநிலங்களின் சட்டப் பேரவைகளிலும் இந்த மசோதாக்கள் நிறைவேற்றப்பட வேண்டும். மத்திய அரசுக்குச் சாதகமான சூழல் பெரும்பாலான மாநிலங்களில் உருவாகியிருப்பதால் திட்டமிட்டுள்ளபடி, ஜூலை 1-ம் தேதி முதல் ஜிஎஸ்டி வரி மசோதா நடைமுறைப்படுத்தப்படலாம் என்று எதிர்பார்க்கப்படுகிறது. ஜிஎஸ்டியின் முக்கிய அம்சங்களைப் பற்றி இங்கே பார்க்கலாம்.

நிறைவேறியது ஜிஎஸ்டி... 4 முக்கிய அம்சங்கள்!

   ஒரே நாடு, ஒரே வரி

இதுவரை மத்திய அரசின் உற்பத்தி வரி, சேவை வரி மற்றும் கூடுதல் சுங்க வரி மற்றும் மாநில அரசுகளின் மதிப்புக் கூட்டு வரி, கலால் வரி எனப் பலவிதமான வரிகள் இருந்தன. இதனால் வரி செலுத்துவதில் சிக்கல்கள் இருந்ததோடு, வரி ஏய்ப்பும் அதிக அளவில் நடந்தது. ஆனால், இனி இந்த வரிகள் இருக்காது. இவற்றுக்குப் பதிலாக, ஒரே வரியாக ஜிஎஸ்டி வரி விதிப்பு முறை இருக்கும். மத்திய அரசுக்கு சேரவேண்டிய வரி, சிஜிஎஸ்டி (Central-GST) மூலமும், மாநிலங்களுக்கிடையிலான பரிமாற்றங்களுக்கு விதிக்கப்படும் மத்திய-மாநில அரசு வரி, ஒருங்கிணைந்த ஜிஎஸ்டி (Integrated-GST) மூலமும், சண்டிகர், டாமன் டையூ உள்ளிட்ட யூனியன் பிரதேசங்களுக்கான வரி, யூனியன் பிரதேச ஜிஎஸ்டி (Union Territory-GST) மூலமும் செயல்படுத்தப்படும்.

இதுபோக, ஜிஎஸ்டி வரியினால் மாநில அரசுகளுக்கு ஏற்படும் வருவாய் இழப்பை முதல் ஐந்து ஆண்டுகளுக்கு ஈடுசெய்ய, ஈட்டுறுதிச் சட்ட (Compensation Law) மசோதா வழிசெய்கிறது. இந்தச் சட்டம் மூலம் புகையிலை, சொகுசு கார் உள்ளிட்ட ஆடம்பரப் பொருள்களுக்கு கூடுதல் செஸ் வரி விதிக்க மாநிலங்களுக்கு அதிகாரம் வழங்கப்படுகிறது.

   வரி ஏய்ப்பு குறையும்

தற்போது பலவிதமான வரிகள் இருப்பதால், வரிகளைச் செலுத்துவதில் பெரும்பாலானோர் ஆர்வம் காட்டுவதில்லை. இதனால் வரி ஏய்ப்பு பெருமளவில் நடந்து, அரசுக்கு பெரும் இழப்பு உண்டாகிறது.

  செலவு குறையும்; விலை குறையுமா?

தற்போது ஒவ்வொரு வரிக்கும், தனித்தனியாக அரசுத் துறைகள் செயல்பட்டு வருகின்றன. இதனால் பெரும் செலவு ஆவதோடு, தகவல் பரிமாற்றம் என்பது பெரும் சிக்கலாக இருக்கிறது. இந்த ஜிஎஸ்டி வரி விதிப்பு மூலம், அரசின் வரி வசூல் செயல்பாடுகளில் வேகம் ஏற்படுவதோடு, செலவும் குறையும். அதேபோல் தொழில் துறையினருக்கு இந்த ஒரே வரி விதிப்பு முறை லாபகரமானதாக இருக்கும். ஒரே வரி என்பதால், பெரிதாக மெனக்கெட வேண்டியதில்லை. இதனால் நேரம் மிச்சமாகி, தொழில் வளர்ச்சியில் கவனம் செலுத்த முடியும். மேலும், உற்பத்திச் செலவும் குறையும்.

ஆனால், பொருள்களின் விலை குறையுமா என்பது தற்போது வரை கற்பனை அளவில்தான் இருக்கிறது. தொழில் செய்வோர் அனைவரும் வரி வரம்புக்குள் வந்தாலும், அவர்கள் வரியை வசூலிப்பது என்னவோ இறுதிப் பயனாளியான சாதாரண மனிதனிடம்தான். எனவே, அனைத்திலும் வரி விதிப்பு அதிகரிக்கும்போது விலை எப்படிக் குறையும் என்ற குழப்பம் நீடிக்கிறது. ஆனால், அத்தியாவசியப் பொருள்கள், ஆடம்பர பொருள்கள் மற்றும் சேவை எனத் தனித்தனியாகப் பிரிக்கப்பட்டு, அதற்கேற்ப 5, 12, 18 மற்றும் 28% என நான்கு விதமான வரி வரம்புகளை அரசு திட்டமிட்டுள்ளது. நிதி அமைச்சர் அருண் ஜெட்லி கூறுவதன்படி நடந்தால், அத்தியாவசியப் பொருள்களின் விலை குறையும் என்றும், ஆடம்பரப் பொருள்கள்
மற்றும் சேவைகளின் விலை அதிகரிக்கும் என்றும் தெரிகிறது. சேவைகளுக்கு வரி விகிதம் 18 சதவிகிதத்தைத் தாண்டாது என்று தெரிவிக்கப்பட்டுள்ளது. ஆனால்,  நடைமுறைக்கு வந்தபிறகே எதுவும் உறுதியாகத் தெரியும்.

   பொருளாதாரம் மேம்படும்

ஜிஎஸ்டி மசோதாவை அமல்படுத்துவதன் மூலம் இந்தியப் பொருளாதாரம் நிச்சயம் மேம்படும். வரி ஏய்ப்பு குறைந்து, அனைவரும் வரி வரம்புக்குள் வரும்போது அரசின் வருவாய் அதிகரிக்கும்.

இப்படி நடைமுறைச் சிக்கல்களைத் தாண்டி ஜிஎஸ்டி மசோதா இவற்றையெல்லாம் சாத்தியமாக்கும் பட்சத்தில் பொருளாதாரம் நிச்சயம் மேம்படும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு