Published:Updated:

ஏற்றத்தில் தங்கம்... இப்போது வாங்கினாலும் லாபமா?

ஏற்றத்தில் தங்கம்... இப்போது வாங்கினாலும் லாபமா?
பிரீமியம் ஸ்டோரி
ஏற்றத்தில் தங்கம்... இப்போது வாங்கினாலும் லாபமா?

ஷியாம் சுந்தர் - கமாடிட்டி சந்தை நிபுணர்

ஏற்றத்தில் தங்கம்... இப்போது வாங்கினாலும் லாபமா?

ஷியாம் சுந்தர் - கமாடிட்டி சந்தை நிபுணர்

Published:Updated:
ஏற்றத்தில் தங்கம்... இப்போது வாங்கினாலும் லாபமா?
பிரீமியம் ஸ்டோரி
ஏற்றத்தில் தங்கம்... இப்போது வாங்கினாலும் லாபமா?

ந்த மாதக் கடைசியில் வருகிறது அட்சய திருதியை. ஒவ்வொரு அட்சய திருதியைப் பண்டிகையின்போதும் நம்மவர்கள் தங்கம் வாங்குவது வழக்கம். இந்த அட்சய திருதியையின் போதும் நிறைய தங்கம் வாங்க வேண்டும் என்கிற ஆசை, நம் மக்களிடம் நிரம்பி வழியவே செய்கிறது. 

ஆனால், தங்கம் விலை அதிகமாக இருக்கிறதே, இந்த விலையில் வாங்குவது சரியா, விலை இன்னும் குறையுமா அல்லது உயருமா என ஒவ்வொருவரின் மனதில் பல கேள்விகள். இந்தக் கேள்விகளுக்கான பதிலைப் பார்ப்போம்.

ஏற்றத்தில் தங்கம்... இப்போது வாங்கினாலும் லாபமா?

  தங்கமும் அமெரிக்க டாலரும்

தங்கத்தின் விலையானது சர்வதேச சந்தையில் தான் நிர்ணயம் ஆகிறது, அதுவும் அமெரிக்க டாலர் மதிப்பின் அடிப்படையில். சர்வதேச சந்தையில் தங்கம் விலை ஏறியிறங்குவதுடன், டாலர் மதிப்பின் ஏற்ற இறக்கத்துக்கேற்ப நம் நாட்டில் தங்கத்தின் விலை மாறும். தங்கத்தின் இப்போதைய விலையைப் புரிந்துகொள்ளவும், எதிர்காலத்தில் அதன் விலை எப்படியிருக்கும் என்பதை சரியாகக் கணிக்கவும் வேண்டுமெனில், முதலில் அமெரிக்க டாலர் மதிப்பின் ஏற்ற இறக்கம் பற்றிக் கொஞ்சமாவது தெரிந்துகொள்வது அவசியம்.

கடந்த ஒரு மாத காலமாக அமெரிக்க டாலரின் மதிப்பு தொடர்ந்து அதிகரித்து வருவதால், தங்கத்தின் விலை நெருக்கடிக்கு உள்ளாகியிருக்கிறது. ஆனாலும், தங்கத்தின் விலை பெரிய அளவில் குறையாமல், ஒரு டிராய் அவுன்ஸ் (சுமார் 31 கிராம்) தங்கம் 1,250 டாலர் என்கிற அளவில் வர்த்தகமாகி வருகிறது.

அமெரிக்க டாலரானது உலக நாடுகளின் முக்கிய கரன்சிகளுக்கு எதிராக வலுவடைந்து வருவதால், தங்கத்தின் விலை சர்வதேச சந்தையில் அவ்வப்போது சரிந்தாலும், அதிலிருந்து மீண்டு எழுவதற்கு முக்கிய காரணம், அமெரிக்க ஃபெட் (US Fed)தான். நம் நாட்டில் வங்கிகளுக்கெல்லாம் தலைமை வங்கியாக ரிசர்வ் வங்கி இருக்கிற மாதிரிதான் அமெரிக்க வங்கிகளுக்கு இந்த ஃபெட்  இருக்கிறது.

சென்ற வருடத்தில், வட்டி விகிதங்களை உயர்த்துவதில் அமெரிக்க ஃபெட் காலம் தாழ்த்தி வந்த, பிரெக்சிட் நிகழ்வுகள், அமெரிக்க அதிபரின் நடவடிக்கைகள் போன்றவை தங்கத்தின் விலை கீழ் நோக்கிச் செல்லாமல் தடுத்து நிறுத்தின.

அமெரிக்க ஃபெடரல் வங்கி, 2015 டிசம்பரில் முதல் முறையாக வட்டி விகிதத்தை 0.25% உயர்த்தியது. அப்போது தங்கம் விலை 1,049.40 டாலர்களாக சரிந்தது. அதன்பிறகு தொடர்ச்சியாக ஏழு மாதங்களில் தங்கம் விலை தொடர்ந்து அதிகரித்து, 1,250 டாலரைத்  தொட்டது. 2017 மார்ச் மாதத்தில், வட்டி உயர்வுக்கு முன்பாக 1,200 டாலரையொட்டிக் குறைந்ததும், மீண்டும் வட்டி விகித அறிவிப்பு வெளியானபின் தங்கம் விலை 50 டாலராக அதிகரிக்கவும் செய்தது.  

  அமெரிக்க ஃபெட்டும் வட்டி விகிதமும்

நம்மூர் ரிசர்வ் வங்கியானது அவ்வப்போது வட்டி விகிதங்களை மாற்றி அமைக்கிற மாதிரி, அமெரிக்க ஃபெட்டும் அவ்வப்போது வட்டி விகிதங்களை மாற்றுவது வழக்கம். 2004 முதல் 2006 வரையிலான காலத்தில் 1 சதவிகிதமாகக் குறைந்து காணப்பட்ட வட்டி விகிதத்தைத் தொடர்ச்சியாக 17 முறை கொஞ்சம், கொஞ்சமாக அதிகரித்தன் மூலம் 5% வரை வட்டி விகிதம் உயர்ந்தது. வட்டி விகிதம் உயர்ந்ததைத் தொடர்ந்து, சர்வதேச சந்தையில் தங்கத்தின் விலையும் படிப்படியாக உயர்ந்தது. அதாவது, 2004-ல் 396 டாலர்களாக வர்த்தகமான ஒரு அவுன்ஸ் தங்கம், 2006 மத்தியில் 700 டாலர்களாக உயர்ந்தது.

பொதுவாக அமெரிக்க ஃபெட், வட்டி விகிதத்தை உயர்த்தும்போது, தங்கத்தின் விலை குறையும் என்பார்கள். ஆனால், கடந்த கால சரித்திரத்தைப் பார்த்தால், அமெரிக்காவில் வட்டி விகிதத்தை உயர்த்தியபோதெல்லாம் தங்கத்தின் விலை அதிகரிக்கவே செய்திருக்கிறது.  

2006-க்குப் பிறகு அமெரிக்க ஃபெட் படிப்படியாக வட்டி விகிதத்தை வெகுவாகக் குறைத்ததால்,  டாலரின் மதிப்பு சரிந்தது. இதனால் சர்வதேச சந்தையில் 2006-க்குப் பிறகு தங்கம் தொடர் விலையேற்றத்தைச் சந்தித்தது.

டாலரின் மதிப்பு சரிகிறது அல்லது உயர்கிறது என்பதை எதை வைத்துச் சொல்கிறார்கள்?

  அமெரிக்க டாலர் இண்டெக்ஸும் தங்கம் விலையும்


அமெரிக்க டாலரின் மதிப்பு உயர்வது அல்லது இறங்குவது என்பது டாலர் இண்டெக்ஸின் ஏற்ற இறக்கத்தைப் பொறுத்தது. அமெரிக்க டாலருக்கும், அமெரிக்கா அதிகம் வர்த்தகம் செய்யும் ஆறு முக்கிய நாடுகளின் கரன்சிகளான ஐரோப்பிய யுரோ, ஜப்பானிய யென், கனடாவின் டாலர், பிரிட்டிஷ் பவுண்ட், சுவீடன் க்ரோனா, சுவிட்சர்லாந்தின் ஃப்ரான்க் ஆகியவற்றுக்கான விகிதாசாரமே டாலர் இண்டெக்ஸ் ஆகும். 
      
1973-ல் 100 புள்ளிகள் என்கிற அடிப்படை மதிப்பில் ஆரம்பமானது இந்த இண்டெக்ஸ். தங்கத்தின் விலைக்கும், இந்த டாலர் இண்டெக்ஸுக்கும் நெருங்கிய தொடர்பு உள்ளது என்பதை பக்கம் 11-ல் உள்ள வரைபடத்தைப்  பார்த்தாலே தெளிவாகப் புரியும்.

2011-ம் ஆண்டு டாலர் இண்டெக்ஸ் 75 புள்ளிகளுக்குக்  குறைவாகவும், தங்கம் விலை 1,800 டாலருக்கு மேலாகவும் இருந்தது. அதேசமயம், 2013-க்குப் பிறகு டாலர் இண்டெக்ஸ் படிப்படியாக அதிகரித்து, 100 என்கிற இலக்கத்துக்கு வந்தபோது தங்கத்தின் விலை 1,100 டாலருக்குக் குறைந்தது. ஆக, டாலர் இண்டெக்ஸ் அதிகரித்தால், தங்கம் விலை குறைவதும், டாலர் இண்டெக்ஸ் குறைந்தால்,  தங்கம் விலை அதிகரிப்பதுமாக இருக்கிறது.

ஏற்றத்தில் தங்கம்... இப்போது வாங்கினாலும் லாபமா?

  தங்கத்தின் விலையும் ஃபெட்டின்  வட்டி விகிதமும்

டாலர் மதிப்பின் ஏற்ற இறக்கம் மட்டுமல்ல, தங்கத்தின் விலைக்கும், அமெரிக்க ஃபெட்டின்  வட்டி விகிதங்களுக்குமே நெருங்கிய தொடர்பு  உண்டு என்பதை பக்கம் 12-ல் உள்ள வரைபடத்தின் மூலம் தெரிந்துகொள்ளலாம்.

2006-ம் ஆண்டுக்குப் பிறகு வட்டி விகிதங்கள் பூஜ்யம் சதவிகிதத்தைவிடக் கொஞ்சம் அதிகமாக இருந்தபோது, தங்கத்தின் விலை உச்சத்தை அடைந்தது.  வட்டி விகிதம் உயரும் என்கிற செய்தி வெளியான பிறகு தங்கம் விலை சரிந்துள்ளதையும், தற்போது வட்டியை உயர்த்துவதில் அவசரம் காட்டாமல் அவ்வப்போது ஒத்திப்போடுவதால், தங்கத்தின்  விலை மெதுவாக ஏற்றம் பெறுவதையும் பார்க்க முடிகிறது.

  இனி தங்கம் விலையேறுமா?

அமெரிக்க ஃபெடரல், கடந்த 15 மாதங்களில் மூன்று முறை வட்டியை உயர்த்தியுள்ளது. இந்த வருடத்தில் இன்னும் இரண்டு முறை வட்டி விகிதத்தை உயர்த்தத் திட்டமிட்டுள்ளதாகவும் தகவல்கள் வெளியாகியுள்ளன. ஆனால், இந்த முறை வட்டி விகிதத்தை உயர்த்துவதில் அமெரிக்க ஃபெடரல் மிக நிதானமாக நடந்துகொள்கிறது. அவசரப்பட்டு வட்டி விகிதத்தை உயர்த்தாமல், நீண்ட காலத்தில் படிப்படியாக வட்டி விகிதத்தை அதிகரிக்க முடிவெடுத்துள்ளது.

ஏற்றத்தில் தங்கம்... இப்போது வாங்கினாலும் லாபமா?



மேலும், 2019-ம் ஆண்டுக் கடைசியில் வட்டி விகிதமானது சுமார் 3% என்கிற அளவில் இருக்கும் எனப் பரவலாக எதிர்பார்க்கப்படுகிறது. எனவே, தற்போதைய நிலையில், வட்டி விகித உயர்வினால் டாலரின் மதிப்பு மேலும் அதிகரிக்க வாய்ப்பில்லா விட்டாலும், உடனடியாக பெரிய அளவில்  குறைவதற்கும் வாய்ப்பில்லை என்றே சொல்லலாம்.

இங்கு முக்கியமாகக் கவனிக்க வேண்டிய விஷயம், டாலர் மதிப்பு அதிகரிக்கும்போது, அமெரிக்காவின் ஏற்றுமதி பாதிப்புக்குள்ளாக வாய்ப்புண்டு என்பதைத்தான். இதனால் ஏற்றுமதி செய்யும் நிறுவனங்களின் செயல்பாடுகள் மற்றும் அதன் நிகர லாபம் குறைவதற்கு வாய்ப்புகள் இருக்கின்றன. இதன் பக்கவிளைவுகளாக, அமெரிக்காவில் பங்குச் சந்தைகள் இறக்கம் காணலாம்.

தவிர, 2009-ம் ஆண்டு தொடங்கி இன்றுவரை அமெரிக்கப் பங்குச் சந்தைகள், குறிப்பாக எஸ் அண்ட் பி 500 குறியீடு, மூன்று மடங்கு அதிகரித்துள்ளது. பெரிய இறக்கம் எதுவும்  இல்லாமல், தொடர் ஏற்றத்தை மட்டுமே அமெரிக்க பங்குச் சந்தை சந்தித்து வருகிறது. பங்குச் சந்தைகள் சரியும்பட்சத்தில் அமெரிக்க டாலரின் மதிப்பும் குறையும் என்பதே பலரது கணிப்பு. 

  இந்தியாவின் இறக்குமதி


2016 பிப்ரவரியில் நம் நாட்டின் தங்க இறக்குமதி 27 டன்னாகக் காணப்பட்டது. வருடாந்திர அடிப்படையில் பார்க்கும்போது,  2017 பிப்ரவரியில் தங்க இறக்குமதி 82% அதிகரித்து, 50 டன்களாக உயர்ந்து காணப்பட்டது.

2015-16-ம் நிதி ஆண்டின் முழுமைக்குமான இறக்குமதி 968 டன்னாகக் காணப்பட்டது. அதேசமயம், 2016 -17-ம் நிதி ஆண்டில், ஏப்ரல் முதல் பிப்ரவரி வரையிலான காலத்தில் 560 டன்னாகக் குறைந்துள்ளது.

  தங்கத்தின் விலையேற்றத்தைத் தடுக்கும் காரணிகள்


இன்றையச் சூழ்நிலையில், சர்வதேச மற்றும்  உள்நாட்டு அளவில்  தங்கத்தின் விலையேற்றத்தைத் தடுக்கும் சில காரணிகளைப்  பார்ப்போம்.

1. டாலரின் மதிப்பு அதிகரிப்பதால், தங்கத்தின் விலை சர்வதேச அளவில் உயர்வது தற்காலிகமாகத் தடுக்கப்பட்டிருக்கிறது. ஆனால், டாலரின்  மதிப்பு தொடர்ந்து உயருமா என்பது சந்தேகமே.  

2. உலக அளவில் மத்திய வங்கிகள், தங்கத்தின் மீதான முதலீடுகளைக் குறைத்து வருகின்றன.  2015-ம் ஆண்டைக் காட்டிலும் 2016-ல் உலக அளவில் உள்ள மத்திய வங்கிகளின் முதலீடுகள் 33% குறைந்துள்ளன. 

3. நம் நாட்டைப் பொறுத்தவரை, பணமதிப்பு நீக்கம்  காரணமாக பணப்புழக்கம் குறைந்துள்ளது. தங்கம் என்பது இதுவரை ரொக்கமாகப் பணம் கொடுத்து வாங்கப்பட்டது. மத்திய அரசாங்கம் இப்போது எடுத்துவரும் சில நடவடிக்கைகளால், தங்கம் விற்பனையில் தொய்வு ஏற்பட்டுள்ளது.

4. மத்திய அரசாங்கம் இப்போது அடிக்கடி தங்கப் பத்திரங்களை வெளியிட்டு வருகிறது. இதில் மக்கள்  முதலீடு செய்வதால், ஆபரணத் தங்கத்தின் விற்பனை, குறைய வாய்ப்புள்ளது.

ஏற்றத்தில் தங்கம்... இப்போது வாங்கினாலும் லாபமா?

  தங்கத்தின் விலை உயர்வுக்கானக் காரணிகள்

1. அமெரிக்க அதிபர் டொனால்ட் ட்ரம்ப் எடுக்கும் நடவடிக்கைகளை உலக அளவில் முதலீட்டாளர்கள் கூர்ந்து கவனித்து வருகின்றனர்.  உதாரணமாக,  சமீபத்தில் சுகாதாரத் துறை சார்ந்த மசோதாவானது அமெரிக்க நாடாளுமன்றத்தில்  நிறைவேற்ற முடியாமல் போனது. இது டொனால்ட் ட்ரம்ப் தலைமை யிலான புதிய ஆட்சிக்கு மிகப் பெரிய பின்னடைவாகப் பார்க்கப்படுகிறது. இதனால் வருங்காலத்தில், அமெரிக்க பொருளாதாரத்தின் வளர்ச்சியில் ஒருவித நிச்சயமற்ற தன்மை நிலவும் என முதலீட்டாளர்கள் கருதுகின்றனர். இதனால்,  தங்கத்தின் விலை இனி உயரும் என்று எதிர்பார்க்கலாம்.  

2. ஐரோப்பிய ஒன்றியத்திலிருந்து   பிரிட்டன் வெளியேறிவிட்டாலும் அதனால் ஏற்படப் போகிற பாதிப்புகள் எப்படிப்பட்டவையாக இருக்கும் என்பது நீறுபூத்த நெருப்பாகவே இருக்கிறது. இந்தப் பாதிப்புகள் அடுத்தடுத்து வெளிப்படும்போது சர்வதேச அளவில், பங்குச் சந்தைகள் இறக்கம் காணும். அப்போது தங்கமானது பாதுகாப்பான முதலீடாகக் கருதப்பட்டு, அதில் அதிகமான பணம்  முதலீடாகும். இதனால் தங்கம் விலை உயர வாய்ப்புண்டு. 

3. சீனா, தனது அந்நியச் செலாவணி அதிக அளவில் வெளியேறுவதைத் தடுக்க, கடந்த நவம்பர் முதல் பல்வேறு கட்டுப்பாடுகளை அமல்படுத்தியுள்ளது. இதனால் சர்வதேச விலையைவிட 15 முதல் 20 டாலர் வரை அதிக விலை தந்து, தங்கத்தை  இறக்குமதி செய்துவருகிறது. இந்த பிரீமியமும் மூன்று வருடத்தின் அதிகபட்ச விலை என்பது குறிப்பிடத்தக்கது.

4. 2009-ம் ஆண்டுக்குப் பிறகு, 2016-ல் முதல்முறையாக உலக அளவில் உள்ள கோல்டு இடிஎஃப் ஃபண்டுகளில் முதலீடுகள்  அதிகரித்துள்ளன. 2009-ல் கோல்டு இடிஎஃப்-ல் முதலீடு செய்யப்பட்ட தொகை, 646 டன் தங்கத்துக்கு ஒப்பானதாக இருந்தது. ஆறு வருடங்களுக்குப் பிறகு, சென்ற வருடத்தில் 532 டன் அளவுக்கு கோல்டு இடிஎஃப் முதலீடுகள் இருந்தன.

5. அமெரிக்க ஃபெட்  எதிர்பார்த்த அளவுக்குப் பணவீக்கமும் மற்றும் வேலைவாய்ப்பு இலக்குகளும் இருந்தாலும், வட்டி விகிதத்தை உயர்த்துவதில் கடைப்பிடிக்கப்படும் நிதானம் அல்லது தள்ளிப்போடுதல் போன்ற நடவடிக்கைகள், தங்கத்தின் விலையேற்றத்துக்கு மிக முக்கியமான விஷயமாகப் பார்க்கப்படுகிறது. 

   தங்கம் விலை எப்போது உயரும்?

இப்போதைய நிலையில், தங்கத்தின் விலை, சிறிய ஏற்ற இறக்கங்களுடன் வர்த்தகமாகும்.  சர்வதேச சந்தையில் தங்கத்தின் விலையில் பெரிய இறக்கங்கள் வர வாய்ப்பில்லை என்றே எதிர்பார்க்கப் படுகிறது. 

இந்த வருடக் கடைசியில் சர்வதேச சந்தையில், தங்கத்தின் விலையானது அதிகபட்சமாக 1450 டாலர் வரை  செல்ல வாய்ப்பு இருக்கிறது. தங்கத்தின் விலை, 2018-ம் ஆண்டுக்குப் பிறகு பெரிய அளவில் உயரும் என்று எதிர்பார்க்கலாம். எனவே, நீண்ட காலத்துக்கு  தங்கத்தில் முதலீடு செய்ய நினைப்பவர்கள், தங்களிடம் இருக்கும் மொத்தப் பணத்தில் குறிப்பிட்ட அளவுக்கு  இப்போதுள்ள விலையிலும் வாங்கலாம். 

நம்முடைய கலாசாரத்திலிருந்து தங்கத்தை எப்போதுமே பிரித்துப் பார்க்க முடியாது.   மங்களகரமான பொருள் என்பதால், இன்றைக்கும்   தங்கம் வாங்குவதையே பெரும்பாலான பெண்கள் விரும்புகின்றனர். இதனால் தங்கத்தில் முதலீடு செய்வதையே நம் மக்கள் பிரதானமான முதலீடாகக் கருதி வருகின்றனர். மேலும், தங்கத்தில் செய்யும் முதலீட்டை நம் மக்கள் நீண்ட காலத்துக்கு வைத்திருப்பதால், பணவீக்கத்தைத் தாண்டிய வருமானம் கிடைக்கவும் செய்கிறது.

தங்கத்தை நகைகளாக வாங்க விரும்பாதவர்கள், தற்போது மத்திய அரசாங்கம் அவ்வப்போது வெளி யிடுகிற தங்கப் பத்திரங்களாகவோ அல்லது கோல்டு இடிஎஃப் ஃபண்டு களாகவே சிறுகச் சிறுக வாங்கி முதலீடு செய்யலாம். தங்கத்தை எப்படி வாங்கினால் என்ன, தங்கம் தங்கம்தானே!

படம்: சொ.பாலசுப்ரமணியன்

வெள்ளி விலை எப்படியிருக்கும்?

செல்போன், கெமிக்கல் துறைகளில் பயன்படுத்துவது மட்டுமல்லாமல், வானிலை மாறுதல்களால், மாற்று எரிபொருளாக சோலார் செல் தயாரிப்பில் இதன் தேவை அதிகரித்துள்ளது முக்கிய நிகழ்வாகவே பார்க்கப்படுகிறது. இதன் காரணமாக இந்த ஆண்டில் மட்டும் வெள்ளியின் விலை 13% அதிகரித்துள்ளது.

சமீப காலமாக, வெள்ளி உற்பத்தி தொடர்ந்து குறைந்துவருவது, அதன் விலை  மேலும் சரிவதைத் தடுக்கும் என்று எதிர்பார்க்கப்படுகிறது. 2015-ல் வெள்ளி உற்பத்தி சுமார் 2.5% குறைந்து, 886 மில்லியன் அவுன்ஸ்களாக உள்ளன. வரும் ஆண்டுகளிலும் வெள்ளியின் உற்பத்திக் குறையலாம் என்றே சொல்லப்படுகிறது. 

கடந்த மார்ச் மாதத்தில், அமெரிக்க ஃபெட் அறிவித்த வட்டி உயர்வுக்குப்பின், வெள்ளி விலை சர்வதேச சந்தையில் 2.6% அதிகரித்திருக்கிறது. இனிவரும் நாள்களில், வெள்ளி விலை பெரிய அளவில் குறைய வாய்ப்பில்லை. மாறாக, ஏற்றம் காணவே வாய்ப்புகள் அதிகம்.

தங்கப் பங்குகள்!

தங்கத்தில் நேரடியாக முதலீடு செய்வதற்குப் பதில், அந்தத் துறை சார்ந்த பங்குகளை வாங்கி, தங்கத்தில் மறைமுகமாக முதலீடு செய்யலாம். இதற்கு ஒரு சிறந்த உதாரணம், டைட்டன் நிறுவனத்தின் பங்கு. ஆறு ஆண்டுகளுக்கு முன்பு இதில் முதலீடு செய்திருந்தால், இன்றையத் தேதியில் அந்தப் பங்கு எவ்வளவு லாபம் தந்திருக்கும் என்பதை அட்டவணையில் பார்க்க. 

ஏற்றத்தில் தங்கம்... இப்போது வாங்கினாலும் லாபமா?

இந்த அட்டவணையின்படி,  ஒருவர் சராசரி விலையில், ஆறு வருடங்களுக்கு முதலீடு செய்திருந்தால், அவரது மொத்த முதலீடு   1981 ரூபாயாக இருந்திருக்கும். அந்த ஆறு பங்குகளை இன்றைய விலையில், அதாவது ரூ.450-க்கு விற்றால், ரூ.2,700 கிடைக்கும். இதன் மூலம் ரூ.719 (ரூ2,700-1,981) லாபம் கிடைத்திருக்கும். இது மட்டுமில்லாமல், டிவிடெண்டும் கிடைத்திருக்கும். தங்கக் காசுகளாகவோ அல்லது ஆபரணமாகவோ வாங்கியிருந்தால், இவ்வளவு லாபம் கிடைத்திருக்குமா என்பது சந்தேகமே. ஆனால்,  உங்கள் ரிஸ்க் அறிந்து பொறுமையுடன் காத்திருந்தால் மட்டுமே இந்த லாபத்தை நீங்கள் பார்க்க முடியும் என்பதையும் மறந்துவிடக்கூடாது.