Published:Updated:

மணி மேனேஜ்மென்ட்! - 20 - பங்குச் சந்தை முதலீடு சூதாட்டமா?

மணி மேனேஜ்மென்ட்! - 20 - பங்குச் சந்தை முதலீடு  சூதாட்டமா?
பிரீமியம் ஸ்டோரி
மணி மேனேஜ்மென்ட்! - 20 - பங்குச் சந்தை முதலீடு சூதாட்டமா?

உங்கள் பணம் உங்களுக்காக உழைக்கட்டும்...சி.சரவணன்

மணி மேனேஜ்மென்ட்! - 20 - பங்குச் சந்தை முதலீடு சூதாட்டமா?

உங்கள் பணம் உங்களுக்காக உழைக்கட்டும்...சி.சரவணன்

Published:Updated:
மணி மேனேஜ்மென்ட்! - 20 - பங்குச் சந்தை முதலீடு  சூதாட்டமா?
பிரீமியம் ஸ்டோரி
மணி மேனேஜ்மென்ட்! - 20 - பங்குச் சந்தை முதலீடு சூதாட்டமா?

ன்றைய நிலையில், பணவீக்க விகிதத்தைத் தாண்டி வருமானம் பெற விரும்பினால், நீங்கள் பங்குச் சந்தையில் நிச்சயம் முதலீடு செய்துதான் ஆகவேண்டும். பொதுவாக, பங்குச் சந்தை முதலீடு என்றவுடன் பலரும் பின்வாங்கு கிறார்கள். காரணம், அதை ஒரு சூதாட்டம் என்று கருதுவதினால்தான். பங்குச் சந்தை முதலீடு என்பது சூதாட்டமல்ல. ஆனால், சில  பெரிய பண முதலைகள் பங்குச் சந்தையில் குறிப்பிட்ட ஒரு நிறுவனத்தின் பங்கினை பெரிய அளவில் வாங்கியோ, விற்றோஅதன் விலையை ஏற்றி இறக்க வாய்ப்புண்டு. இவர்களை எல்லாம் கட்டுக்குள் கொண்டுவர, இந்திய பங்குச் சந்தையை நெறிபடுத்தும் செபி, பல்வேறு நடவடிக்கைகளை எடுத்திருக்கிறது. எனவே, பங்குச் சந்தையை சூதாட்டம் என்று நினைத்து, இனியும் அதிலிருந்து விலகி நிற்கத் தேவையில்லை.

பங்குச் சந்தையில் உள் ஆள் வர்த்தகம் (இன்சைடர் டிரேடிங்) என்பது, அதாவது செயற்கையாக விலையை ஏற்றுவது, முன்பு கண்டுபிடிக்க முடியாத விஷயங்களாக இருந்தன. இன்றைக்குத் தொழில்நுட்ப வளர்ச்சியின் உதவியுடன், இதுமாதிரியான டிரேடிங்கில் ஈடுபடுபவர்களை எளிதில் கண்டுபிடித்து,  அவர்களுக்குத் தண்டனையும் வழங்கப்படுகிறது. மேலும், ஒரு நாளில் நிறுவனப் பங்குகளின் விலை குறிப்பிட்ட அளவு (5% அல்லது 10% ) மட்டுமே ஏற்றம் அல்லது இறக்கம் காண முடியும். ‘சர்க்யூட் லிமிட்’ என்கிற முறையில் பங்குச் சந்தைகள், பங்குகளின் விலையைக் கட்டுப்படுத்தி வருகின்றன.

மணி மேனேஜ்மென்ட்! - 20 - பங்குச் சந்தை முதலீடு  சூதாட்டமா?

முதலீட்டாளர்கள், தாங்கள் முதலீடு செய்யப்போகிற நிறுவனப் பங்கில் சூதாட்டம் நடக்க வாய்ப்பிருக்கிறதா என்பதை அவர்களே தெரிந்து கொள்ள முடியும். பாரம்பர்யம் மிக்க நிறுவனப் பங்குகளை தேர்வு செய்வதன் மூலம்,  சூதாட்டம் நடக்கும் பங்கு களைத் தவிர்க்கலாம்.   எப்படிப் பட்ட பங்குகளில் முதலீடு செய்வது என்கிறீர்களா?

கடந்த 5, 10 ஆண்டுகளில் தொடர்ந்து வருமானம், நிகர லாபம் அதிகரித்துவரும் நிறுவனத்தின் பங்குகளைத்தான் முதலீட்டுக்குத் தேர்ந்தெடுக்க வேண்டும். லாபத்தை முதலீட்டாளர்களுக்குத் தொடர்ந்து டிவிடெண்ட்  ஆகப் பிரித்து வழங்கி வரும் நிறுவனமாகவும் அது இருப்பது முக்கியம். ஒரு நிறுவனத்தின் வருமானம் மற்றும் நிகர லாபம் தொடர்ந்து அதிகரிக்கும்பட்சத்தில், அந்த நிறுவனத்தின் பங்கின் விலையும் நிச்சயம் அதிகரிக்கும்.

 யாரெல்லாம் முதலீடு செய்யலாம்?

பங்குச் சந்தையில் தனிநபர்கள் (18 வயதுக்கு மேல்),  இந்துக் கூட்டுக் குடும்பத்தினர், நிறுவனங்கள்,  கூட்டு நிறுவனங்கள், கூட்டுறவுச் சங்கங்கள் போன்றவை முதலீடு செய்யலாம். 
 
 தேவையான ஆவணங்கள்

அடையாளத்துக்கான ஆதாரம் (பாஸ்போர்ட், பான், ஓட்டுநர் அடையாள அட்டை, வாக்காளர் அடையாள அட்டை, ஆதார் அட்டை), முகவரிக்கான ஆதாரம் (பாஸ்போர்ட், ஓட்டுநர் அடையாள அட்டை, வாக்காளர் அடையாள அட்டை, ஆதார், டெலிபோன் ரசீது, மின் கட்டண அட்டை, ஆதார் அட்டை) தேவைப்படும். மார்பளவு புகைப்படம் இரண்டு தேவைப்படும்.

பங்குச் சந்தையில் முதலீடு செய்ய, பான் எண் அவசியம். முக்கியமாக, டீமேட் கணக்குத் தேவை. இந்த டீமேட் கணக்கு என்பது வங்கிச் சேமிப்பு கணக்குபோல. நீங்கள் வாங்கும் பங்குகள் இதில் வரவு வைக்கப்படும். அடுத்து, பங்கு முதலீட்டுக்காக வங்கி ஒன்றில் டிரேங் கணக்கு ஆரம்பிக்க வேண்டி வரும்.

 முதலீட்டை எப்படி ஆரம்பிப்பது?

செபியிடம் பதிவு செய்த பங்கு புரோக்கர் அல்லது பங்கு புரோக்கர் கீழே செயல்படும் சப்-புரோக்கர் மூலம் முதலீட்டை ஆரம்பிக்கலாம். இவர்கள் பெரிய, சிறிய நகரங்களில் எல்லாம் இருக்கிறார்கள். இந்த புரோக்கர்கள் இந்தியாவின் முன்னணிப் பங்குச் சந்தைகளான என்எஸ்இ, பிஎஸ்இ-ல் உறுப்பினர்களாக இருப்பார்கள். இவர்கள் மூலம்தான் பங்குகளை வாங்கவோ, விற்கவோ முடியும். பங்குச் சந்தை முதலீட்டுக்கு இவர்கள்தான் பொறுப்பு. அந்த வகையில், இவர்கள் லட்சக்கணக்கான ரூபாயை டெபாசிட் கட்டினால்தான் புரோக்கராக முடியும். இப்படி அதிக டெபாசிட் வாங்குவதன் நோக்கம், ஏதாவது சிக்கல் ஏற்பட்டால், முதலீட்டாளர்களுக்கு இழப்பீடு வழங்கதான்.
 
 ஆன்லைன்


இப்போது பங்குச் சந்தையில் முதலீடு செய்ய பங்குத் தரகர் அலுவலகத்துக்குச் செல்லத் தேவை இல்லை. ஆன்லைன் மூலமே முதலீடு செய்ய முடியும். பல முன்னணி பங்குத் தரகு நிறுவனங்கள், முதலீட்டாளர்கள் இருந்த இடத்தில் இருந்தபடியே, பங்குச் சந்தையில் முதலீடு செய்யும் வசதியை ஏற்படுத்தித் தந்திருக்கின்றன.

 முதலீட்டு முறை

குறிப்பிட்ட  துறை சார்ந்த பங்குகளில் மட்டுமே மொத்த முதலீட்டையும் மேற்கொள்ளக்கூடாது. முதலீட்டைப் பிரித்து உங்களுக்குப் பரிச்சயமான 4 அல்லது 5 துறை சார்ந்த நிறுவனங்களின் பங்குகளில் முதலீடு செய்யலாம்.   

மொத்தமாக பங்குச்  சந்தையில் முதலீடு செய்ய வேண்டாம். முதலீட்டுத் தொகையை 3 அல்லது 5 ஆகப் பிரித்து, அதனை 6 மாதம் முதல் ஓராண்டு வரை முதலீடு செய்யுங்கள். அதுவரைக்கும் அந்தத் தொகையைச் சேமிப்புக் கணக்கில் குறைந்த வட்டியில் (4%) போட்டு வைக்காமல், லிக்விட் மியூச்சுவல் ஃபண்டுகளில் (சுமார் 7.5-8% வருமானம்) போட்டு வையுங்கள். பங்குச் சந்தைக்குப் புதியவர் என்றால் சிஸ்டமேட்டிக் இன்வெஸ்ட்மென்ட் ப்ளான் (SIP) என்கிற முறையில் மாதாமாதம் முதலீட்டை மேற்கொள்ளலாம். இப்படி செய்வதன் மூலம் சராசரியாக குறைந்த விலைக்குப் பங்குகளை வாங்க வாய்ப்பிருக்கிறது.

 கவனிக்க வேண்டிய 5 முக்கிய விவரங்கள்

1. சரியான பங்கு புரோக்கரைத் தேர்ந்தெடுப்பது அவசியம். இந்தத் தரகர், செபியிடம் பதிவு செய்திருப்பது அவசியம். நண்பர்கள் அல்லது உறவினர்களுக்குத் தெரிந்த நீண்ட காலமாகச் செயல்படும் புரோக்கரைத் தேர்ந்தெடுப்பது அவசியம். 

2. டீமேட் மற்றும் டிரேடிங் கணக்கை உங்களின் பெயரில் தொடங்குவது முக்கியம். அதைச் செயல்படுத்தும் அதிகாரம் உங்களிடம் மட்டுமே இருக்க வேண்டும்.

3. பங்குச் சந்தை முதலீடு என்பது ரிஸ்க்   கொண்டது. எனவே, உங்கள் ரிஸ்க் எடுக்கும் திறனுக்கேற்ப முதலீடு செய்யுங்கள். பங்குச் சந்தை பற்றிய உங்களின் அறிவுத் திறன், முதலீட்டை பல பங்குகளில் பிரித்து மேற்கொள்வதன் மூலம்     ரிஸ்க்கைக் குறைக்கலாம்.

4. நிறுவனப் பங்குகளில் முதலீடு செய்வதற்கான தொகையை, முன்னணி வங்கிகள் கடனாகத் தருகின்றன. ஆனால், சிறு முதலீட்டாளர்கள் ,கடன் வாங்கி பங்குச் சந்தையில் முதலீடு செய்யக் கூடாது. பங்கின் விலை இறங்கினால், கடனுக்கான வட்டியும் நஷ்டம், பங்கு முதலீடு மூலமும் நஷ்டம் ஏற்படும்.

 வருமான வரி

பங்கு முதலீடு மூலம் கிடைக்கும் டிவிடெண்ட் வருமானத்துக்கு வரி கிடையாது. ஒரு நிதியாண்டில் டிவிடெண்ட் மூலமான வருமானம் ரூ.10 லட்சத்துக்கு மேல் செல்லும்போது 10% வருமான வரி கட்ட வேண்டும்.  இது சிறு முதலீட்டாளர் களுக்குப் பொருந்தாது. பங்குகளை வாங்கி ஓராண்டுக்குள் விற்று லாபம் பார்த்தால், லாபத்துக்குக் குறுகிய கால மூலதன ஆதாயமாக 15% வரி கட்ட வேண்டி வரும். ஓராண்டுக்கு மேல் விற்றுக் கிடைக்கும் லாபத்துக்கு வரி எதுவும் கட்ட வேண்டியதில்லை.

பங்குச் சந்தை முதலீட்டில் கிடைக்கும் லாபத்துக்கு எந்த உத்தரவாதமும் கிடையாது. சில ஆண்டுகளில் 100% கூட லாபம் கிடைக்கும். சில ஆண்டுகளில் நஷ்டம்கூட ஏற்படும். நீண்ட காலத்தில் (15, 20, 25, 30 ஆண்டுகளில்) இந்திய பங்குச் சந்தை 15 சதவிகிதத்துக்கு மேல் வருமானம் தந்திருக்கின்றன. அந்த வகையில் சராசரியாக ஐந்து ஆண்டுகளுக்கு மேல் காத்திருக்க முடியும் என்பவர்கள்தான், பங்குச் சந்தை முதலீட்டைத் தேர்ந்தெடுக்க வேண்டும். 

(முதலீடு பெருகும்)

ஒட்டுமொத்த விகடனுக்கும் ஒரே ஷார்ட்கட்!

ஐபிஓ மட்டுமே லாபமா?

சிலர், புதிதாக பங்கு வெளியீடு (ஐபிஓ) வரும் போதுதான் முதலீடு செய்கிறார்கள். இப்போது அப்படி செய்யத் தேவையில்லை. ஒரு காலத்தில் நிறுவனங்கள் அவற்றின் முக மதிப்பில் பங்குகளை வெளியிட்டபோது, ஐபிஓ மிகவும் லாபகரமாக இருந்தது. இப்போது அப்படி இல்லை, பங்கின் விலை, பிரீமியத்தில் நியமிக்கப்பட்டுதான் ஐபிஓ வருகிறது. எனவே, சந்தையில் சிறப்பாக செயல்பட்டுக் கொண்டிருக்கும் நல்ல நிறுவனப் பங்குகளில் தாராளமாக முதலீட்டை மேற்கொள்ளலாம்.