Published:Updated:

ஃபைனான்ஷியல் தவறுகள்... பளிச் தீர்வுகள்! - 21

ஃபைனான்ஷியல் தவறுகள்... பளிச் தீர்வுகள்! - 21
பிரீமியம் ஸ்டோரி
ஃபைனான்ஷியல் தவறுகள்... பளிச் தீர்வுகள்! - 21

ஆட்டம் காணவைத்த ஆடம்பரம்! சுரேஷ் பார்த்தசாரதி, Founder, Myassetsconsolidation.com Registered Investment Advisor, INA200000878

ஃபைனான்ஷியல் தவறுகள்... பளிச் தீர்வுகள்! - 21

ஆட்டம் காணவைத்த ஆடம்பரம்! சுரேஷ் பார்த்தசாரதி, Founder, Myassetsconsolidation.com Registered Investment Advisor, INA200000878

Published:Updated:
ஃபைனான்ஷியல் தவறுகள்... பளிச் தீர்வுகள்! - 21
பிரீமியம் ஸ்டோரி
ஃபைனான்ஷியல் தவறுகள்... பளிச் தீர்வுகள்! - 21

மெரிக்காவில், சாஃப்ட்வேர் கம்பெனியில் பணிபுரிகிறார் மதன். சில வருடங்களுக்கு முன்பு மதனின் அப்பா இறந்துவிட்டார். மதனின் அம்மா, வங்கியில் உயர் அதிகாரியாகப் பணியாற்றி ஓய்வுபெற்றவர். சென்னை, அண்ணா நகரில் சொந்தமாக வீடு உள்ளது. மதனின் அம்மா அங்கே வசிக்கிறார்.

மூன்றாண்டுகளுக்கு முன்பு, மதனுக்கும் சரண்யாவுக்கும் திருமணம் நடந்தது. சரண்யாவுக்கு சென்னை திருவான்மியூரில் உள்ள சாஃப்ட்வேர் கம்பெனி ஒன்றில் வேலை. ஆண்டுக்கு ரூ.12 லட்சம் சம்பளம் வாங்கினார். திருமணத் தகவல் வலைதளம் ஒன்றின் மூலமாக சரண்யாவைப் பெண் பார்த்து திருமணத்தை நடத்தி வைத்தார் மதனின் அம்மா. சரண்யாவும், மதனும் திருமணமான முதல் மூன்று மாதங்கள் இந்தியா முழுவதும் சுற்றி மகிழ்ச்சியுடன் தேனிலவைக் கொண்டாடினார்கள். மதனுக்கு விடுமுறை முடிந்ததும் மீண்டும் அமெரிக்கா சென்றுவிட்டார். சரண்யாவும் பழையபடி பணிக்குத் திரும்பினார்.

முதல் மூன்று மாதங்கள் வாழ்ந்த வாழ்க்கை மனதில் பசுமையாக பதிந்துகொள்ளவே, “நான்தான் நல்ல சம்பளம் வாங்குகிறேனே... நீங்களும் சென்னையில் வேலை பார்த்து இங்கு வந்துவிட்டால் மகிழ்ச்சியாக வாழலாமே” என, சரண்யா தன் கணவனை நச்சரிக்கத் தொடங்கினார்.

ஃபைனான்ஷியல் தவறுகள்... பளிச் தீர்வுகள்! - 21

அமெரிக்காவின் சொகுசு வாழ்க்கையை விட்டுவர மதனின் மனம் இடம் தரவில்லை. ஆனால், மூன்று மாதங்களுக்கு ஒருமுறை மதன் சென்னைக்கு வந்துவிடுவார். இல்லையென்றால், சரண்யா அமெரிக்கா சென்று வருவார். இப்படியே இரண்டு வருட காலம் ஓடியது. இதனால் செலவுகளும் கட்டுக்குள் அடங்காமல் போனது.

இந்த நிலையில் மதன், சரண்யாவை அமெரிக்கா வந்துவிடும்படி அழைத்தார். உடனே சரண்யாவும் அமெரிக்காவுக்குச் செல்ல ஆர்வமுடன் முயற்சிகளைச் செய்தார். ஆனால், சரண்யாவின் அலுவலகத்தில், அமெரிக்காவில் உள்ள கிளைக்கு மாற்றம் செய்ய வாய்ப்பில்லை என மறுத்து விட்டார்கள். எனவே, வேலையை விட்டுவிட்டு, அமெரிக்கா செல்ல முடிவுசெய்தார். அதற்கு மதனும் சம்மதித்துவிட்டார்.

இந்தச் சூழ்நிலையில் சரண்யா குடியிருந்த வீட்டு உரிமையாளர், தன் வீட்டை விற்க முயற்சிசெய்து வந்தார். இந்த விஷயம் மதனுக்குத் தெரியவர, பிற்காலத்துக்கு உதவும் என நினைத்து அந்த வீட்டை ரூ.40 லட்சத்துக்கு வாங்கிவிட்டார். வாங்கிய வீட்டை வாடகைக்கு விட்டுவிட்டு, சரண்யா அமெரிக்காவுக்குச் சென்றார்.

ஒட்டுமொத்த விகடனுக்கும் ஒரே ஷார்ட்கட்!

ஃபைனான்ஷியல் தவறுகள்... பளிச் தீர்வுகள்! - 21


மனைவி அமெரிக்காவுக்கு வந்ததால், புதிதாக பெரிய வீட்டுக்கு மாறினார் மதன். குடும்பத்துக்குத் தேவையான அனைத்துப் பொருள்களும் பல லட்சம் பணம் செலவுசெய்து வாங்கினார்கள். மதனும், சரண்யாவும் ஆடம்பரமாகச் செலவு செய்ததால், மாதாந்திரச் செலவுகளும் வரவை மீறியதாக இருந்தன. சென்னையில் வாங்கிய வீட்டுக்கு இ.எம்.ஐ தொகையை கஷ்டப்பட்டே செலுத்திவந்தார்கள்.

இந்தச் சூழலில்தான் மேலும் ஒரு சிக்கல் வந்து சேர்ந்தது. மதன் வேலை செய்துகொண்டிருந்த நிறுவனத்தை இன்னொரு பெரிய நிறுவனம் வாங்கியது. புதிய நிர்வாகம் செய்த  சீர்திருத்தங்களில், நிறுவனம் நெருக்கடியில் சிக்கியது. வேறு வழியில்லாமல் ஆள்குறைப்பு செய்தார்கள். இந்த சூறாவளியில் மதனின் வேலை பறிபோனது. அமெரிக்காவிலேயே வேறு வேலைக்கு முயற்சி செய்தும் சரியான வேலை அமையவில்லை.

வேறு வழியில்லாமல் சென்னைக்கே இருவரும் திரும்பிவந்தார்கள். மதன் வேலை பார்த்த நிறுவனத்தில் செட்டில்மென்ட் தொகையாக ரூ.20 லட்சம் தந்தார்கள். சரண்யாவிடமும் 4 லட்சம் ரூபாய் வரை பணம் இருந்தது. மதனுடைய அம்மா வாங்கும் பென்ஷன் ரூ.40 ஆயிரம், அண்ணாநகர் மாடி போர்ஷன் வாடகை ரூ.12 ஆயிரம், திருவான்மியூரில் வாங்கிய வீட்டின் வாடகை ரூ.10 ஆயிரம் என, குடும்பத்துக்கு ரூ.62 ஆயிரம் வருமானம் இருந்ததால், குடும்பச் செலவுகளைச் சமாளித்து வந்தார்கள். இதிலிருந்துதான் இ.எம்.ஐ கட்டியும் வந்தார்கள்.

ஃபைனான்ஷியல் தவறுகள்... பளிச் தீர்வுகள்! - 21

சரியான ஃபைனான்ஷியல் பிளானிங் இல்லாததே தாங்கள் இத்தனை சிக்கலில் சிக்கித் தவிக்கக் காரணம் என்று மதனும், சரண்யாவும் இந்தச் சமயத்தில் புரிந்துகொண்டார்கள். அவர்களுடைய நண்பர் மூலமாக என்னைத் தேடி வந்தார்கள். அவர்களின் நிதி வரலாற்றைத் தெளிவாகச் சொன்னார்கள். எல்லாவற்றையும் கேட்டபின் நான் பேச ஆரம்பித்தேன்.

‘‘நீங்கள் ஏழு வருடங்களாக அமெரிக்காவில் பணியாற்றியும், எந்தவொரு முதலீட்டையும், சேமிப்பையும் ஆரம்பிக்காமல் இருந்திருக்கிறீர்களே, அது எவ்வளவு பெரிய தவறு. நீங்கள் பணிபுரியும் நிறுவனம் ஓராண்டுக்கு மேலாகவே பிரச்னைகளோடுதான் நடந்திருப்பதாகச் சொல்கிறீர்கள். அப்போதே நீங்கள் உஷாராகி, வேறொரு வேலையைத் தேடியிருந்தால் இந்தச் சிக்கலில் இருந்து தப்பித்திருக்கலாமே. அமெரிக்கா உள்ளிட்ட சில நாடுகளில், வேலை போய்விட்டால் 24 மாதங்களுக்குச் செலவுகளைச் சமாளிக்க உதவும் வகையில், ‘அன்-எம்ப்ளாய்மென்ட் இன்ஷூரன்ஸ்’  எடுத்துக்கொள்ளும் வாய்ப்புள்ளது. அதையும் நீங்கள் செய்யவில்லையே. உங்களுக்கு ஏற்கெனவே அண்ணா நகரில் சொந்தமாக வீடு இருந்தும், திருவான்மியூரில் தேவையில்லாமல் வீட்டை வாங்கியது தவறு” என்ற நான், சில ஆலோசனைகளை வழங்கினேன். 

குடும்பச் செலவுகளுக்கு இப்போதைக்குச் சிக்கல் இல்லை என்பதால்,  ஃபிக்ஸட் டெபாசிட்டில் மதன் வைத்துள்ள ரூ.20 லட்சத்தையும் மொத்தமாக மியூச்சுவல் ஃபண்டில் முதலீடு செய்யச் சொன்னேன்.  இருவருக்கும் இங்கே வந்தபிறகும் சரியான வேலை அமையவில்லை. ஒருவேளை பெங்களூரு போன்ற வெளியூர்களில் வேலை அமைந்துவிட்டால், அங்கே செட்டில் ஆவதற்கு பணம் தேவைப்படும் என்பதால், சரண்யா வைத்துள்ள ரூ.4 லட்சத்தை ஃபிக்ஸட் டெபாசிட்டிலேயே வைத்துக்கொள்ளுமாறு அறிவுறுத்தினேன். வெளியூரில் வேலை கிடைக்கும்பட்சத்தில், திருவான்மியூர் வீட்டை விற்றுவிட்டு, வேலை பார்க்கும் இடத்தில் வீடு வாங்கிக்கொள்ளலாம் என்றும் சொன்னேன். மதனின் அம்மாவுக்கு ரூ.5 லட்சத்துக்கு ஹெல்த் இன்ஷூரன்ஸ் பாலிசியும், மதன், சரண்யா இருவருக்கும் சேர்த்து ரூ.5 லட்சத்துக்கு ஹெல்த் இன்ஷூரன்ஸ் பாலிசியும் எடுத்துக்கொள்ளச் சொன்னேன்.

சில மாதங்களுக்குப்பின் சென்னையிலேயே இருவருக்கும் வேலை அமைந்துவிட்டதால், சந்தோஷமாக வாழ்ந்து வருகிறார்கள். குழந்தைகள் பிறந்துவிட்டால் இன்னும் செலவு கூடுதலாகும், பணம் சேர்க்க வேண்டும் என்ற பொறுப்பு வந்துவிட்டதால், இருவரும் சேர்ந்து இப்போது மாதம்  ஒரு லட்சம் ரூபாய் வரை முதலீடுகளைச் செய்ய ஆரம்பித்துவிட்டார்கள்.

வருமானம் உள்ளபோதே ஆடம்பரத்தைத் தவிர்த்து, கொஞ்சமாவது சேர்த்துவைத்தால், சிக்கல் வரும்போது தடுமாறத் தேவையில்லை என்பதை இன்றைய இளவயதினர் கட்டாயம் புரிந்துகொள்ள வேண்டும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism