Published:Updated:

புதுமைகளை லாபமாக்கும் விதிகள்!

ஒட்டுமொத்த விகடனுக்கும் ஒரே ஷார்ட்கட்

Use App
புதுமைகளை லாபமாக்கும் விதிகள்!
புதுமைகளை லாபமாக்கும் விதிகள்!

நாணயம் லைப்ரரி!

பிரீமியம் ஸ்டோரி
புதுமைகளை லாபமாக்கும் விதிகள்!

புத்தகத்தின் பெயர் : மானிடைசிங் இன்னோவேஷன் (Monetizing Innovation)

புதுமைகளை லாபமாக்கும் விதிகள்!



ஆசிரியர் : மாதவன் ராமானுஜம் மற்றும் ஜியார்க் டேக்

பதிப்பாளர் :
Wiley

புதிய பொருள்களைக் கண்டுபிடிப்பது என்பது தொழிலில் நிலைத்து நிற்க நிறுவனங்கள் தொடர்ந்து செய்ய வேண்டிய ஒரு விஷயமாகவே இருக்கிறது. மாதவன் ராமானுஜம் மற்றும் ஜியார்க் டேக் இணைந்து எழுதிய ‘மானிட்டைசிங் இன்னோவேஷன்’ என்னும் இந்தப் புத்தகம், புதுமையான பல கண்டுபிடிப்புகளை லாபகரமாக மாற்றுவது எப்படி என்பதைச் சொல்லித் தருகிறது.

நிறுவனங்கள் தங்களுடைய நீண்ட பயணத்தில் வெற்றி பெற இன்னோவேஷனே உதவும் என்று நினைத்து, புதிய தயாரிப்புகளைக் கண்டுபிடிக்கப் பெரிய அளவில் செலவு செய்கின்றன. ஆனால், இந்த நிறுவனங்களின் நோக்கம் நிறைவேறுகிறதா என்பதுதான் முக்கியமான கேள்வி.

இன்னோவேஷன் என்கிற புதுமை படைத்தல் மூலம் லாபம் பார்ப்பது எப்படி என்பதைச் சொல்வதற்காகவே இந்தப் புத்தகம் எழுதப்பட்டுள்ளது. இந்தப் புத்தகத்தில் சொல்லப்பட்டுள்ள விஷயங்கள், உலக அளவில் 10,000-த்துக்கும் மேற்பட்ட புராஜெக்டுகளில் நடைமுறைப்படுத்தப்பட்ட அனுபவங்களைக் கொண்டது என்பது ஒரு தனிச்சிறப்பு.

பொதுவாக, பொருள்களை வாங்க நினைக்கும் வாடிக்கையாளர்களை நான்கு வகையாகப் பிரிக்கலாம். முதலாவது, எத்தனை சிறப்பான விஷயங்கள் உங்கள் தயாரிப்பில் இருந்தால் எனக்கென்ன... விலையைச் சொல்லுங்கள். அதுதான் நான் வாங்குவதா அல்லது வேண்டாமா என்பதை முடிவு செய்யும் விஷயம் என்று சொல்லும் வகை.  இரண்டாவது, உங்கள் தயாரிப்பில் என்ன இருக்கிறது என்றெல்லாம் கவலையில்லை. விலையைப் பற்றியும் கவலையில்லை. ஆனால், உடனே வேண்டும் என்னும் ரகம். மூன்றாவது வகை... பொருள் கிடைத்தால் போதும்; சர்வீஸ், உதிரிப்பாகங்கள் பற்றிக் கவலை இல்லை என்பதே. நான்காவது ரகம்... தரம், சர்வீஸ், ஸ்பேர்கள் கிடைத்தல், சரியான சமயத்தில் கிடைத்தல் என எல்லா விஷயங்களிலும் கறாராகப் பேசும் கூட்டம். இவர்களும் விலையைப் பற்றிக் கவலைப்படாத வர்கள்.

இப்படி நான்கு வகை வாடிக்கையாளர்கள் இருக்க, பொத்தாம்பொதுவாக ஒரு சிலரிடம் கேட்டுவிட்டு  நிறுவனம், உற்பத்தி மற்றும் விலை முடிவுகளை எடுப்பது தோல்வியையே தரும். 

பொருள்களின் கட்ட மைப்பு மற்றும் பல்வேறு வசதிகளை ஒன் றிணைத்துத்  தருவது என்பது அடுத்து கவனிக்க வேண்டிய விஷயம். கட்டமைப்பு என்பது எந்தெந்தச் செயல்பாட்டு வசதிகளை  நிறுவனத்தின் தயாரிப்புகள் கொண்டி ருக்கின்றன என்பதைக் குறிக்கிறது. ஒன்றிணைத்துத் தருதல் என்பது நிறுவனத்தின் தயாரிப்புடன் பல்வேறு வசதிகளை இணைத்துத் தருவதைக் குறிப்பதாகும்.

அடுத்தபடியாக, விலையைத் தாண்டிச் சிந்திப் பது. இதற்கு மிஷ்லின் டயர் நிறுவனத்தை ஆசிரியர் உதாரணமாகக் காட்டுகிறார்.

ட்ரக்குகளுக்கான டயர்களின் சந்தையில் போட்டி அதிகமாகிய காலகட்டத்தில் ‘டன் கிலோமீட்டர்” என்ற விலை நிர்ணயமுறையை அறிமுகப்படுத்தியது மிஷ்லின். டயர்களுக்கான விலை அது ஓடும் கிலோமீட்டரால் நிர்ணயிக்கப்பட்டது. ஓடும் கிலோமீட்டருக்கு இவ்வளவு என்று நிர்ணயிக்கப்பட்டு வசூலிக்கப் பட்டது. ட்ரக் உரிமையாளர்களிடத்தில் இது பெரிய வரவேற்பைப் பெற்றது. டயர் உழைக்கவில்லை என்றால் ட்ரக் உரிமையாளருக்குக் குறைந்த செலவு. அதிகம் உழைத்தால் மிஷ்லினுக்கு அதிக வரவு. பொருளாதாரம் சூப்பராக இருந்து ஓட்டமும் அதிகமாக இருந்தால் சீக்கிரமே வருமானம். பொருளாதாரம் மந்தமாக இருந்து ஓட்டம் குறைவாக இருந்தால் ட்ரக் உரிமையாளருக்குக் குறைந்த செலவு. இது ட்ரக் உரிமையாளர்களிடத்தில் நல்லதொரு வரவேற்பைப் பெற்ற திட்டமாக இருந்தது. இது போல், விலை நிர்ணயத்துக்கு பல வழிகள் இருக்கின்றன. சந்தா முறை, சூழலுக்கேற்ப மாறும் விலை, டிமாண்டுக்கேற்ற ஏல விற்பனை முறை, உபயோகத்துக்கேற்ப பணம் தரும் முறை, ஆரம்பச் சேவைகளை இலவசமாக மேற்கொண்டு, சிறப்புச் சேவைகளைப் பணம் கட்டியும் பெறும்  முறை என பல்வேறு விலை நிர்ணயம் செய்யும் தந்திரங்கள் இருக்கின்றன. இவற்றை தனித்தனியாகவோ அல்லது ஒன்றோடொன்று இணைத்தோ செயல்படுத்த லாம்.

புதிய தயாரிப்புகள் குறித்து ஏற்பாடுகள் செய்வதற்கு முன்னாலேயே ஒரு பிசினஸ் அனுபவமாக அதை நிலைப்படுத்திப் பார்க்க வேண்டும். அதாவது, வாடிக்கையாளர்கள் பக்கம் இருந்துகொண்டு இந்த ஐடியா எந்தளவுக்கு அவர்களால் வரவேற்கப்படும். எவ்வளவு பணம் வரும், எந்த அளவுக்கு லாபமாக இருக்கும் எனப் பல விஷயங்களையும் உள்ள டக்கிய பிசினஸ் அனுபவமாக அதை  உருவாக்கிப் பார்க்க வேண்டும். இதற்கொரு உதாரணமாக ‘மான்ஹெய்ம்’ எனும் உபயோகித்த கார்களை ஏலம் விடும் உலகத்தின் மிகப் பெரிய நிறுவனத்தில் நடந்த நிகழ்வை ஆசிரியர் குறிப்பிடுகிறார்.

வாடிக்கையாளர்கள் உபயோகித்த கார்களை டீலர்களுக்கு ஏலம் மூலம் விற்கும் நிறுவனம் இது. ஏல வசதி என்பது மட்டுமில்லாமல் கடன் தருதல், ரிப்பேர், டீலர்கள் நடுவில் விற்று வாங்குவதற்கு உதவுவது, கார்களை ஓரிடத்திலிருந்து மற்றொரு இடத்துக்குக் கொண்டு போய்ச் சேர்த்தல் என்பது போன்ற சேவைகளையும் வழங்கி வந்தது. இதையும் தாண்டி புதியதாக ஏதாவது ஒரு சேவையை வழங்குவதற்கான முயற்சியைச் செய்யும்போது வந்ததுதான் இந்த ஐடியா.

கார்களை ஏலம் எடுத்த டீலர் ஒரு குறிப்பிட்ட தொகையைக் கூடுதலாகச் செலுத்திவிட்டுச் சென்றால் ஒரு குறிப்பிட்ட நாள்களுக்குள் காரை வேண்டாமென்றால் திருப்பித் தந்துவிடும் வசதிதான் அது. இதற்கு எப்படி வரவேற்பு இருக்கும், ரிஸ்க்குகள் என்ன, எந்த அளவுக்கு வியாபாரம் இருக்கும், செலவுகள் என்ன, வாடிக்கையாளரின் பார்வையில் இந்த வகை வசதிக்கு எந்த அளவுக்கு மதிப்பு இருக்கும் என்பதையெல்லாம் ஒரு பிசினஸ் அனுபவமாக நிறைய டீலர்களிடம் கலந்தாலோசித்து, பின்னர் ‘டீல் ஷீல்ட்’ எனும் திட்டம் அறிமுகப் படுத்தப்பட்டது. டீலர்களி டம் கலந்தாலோசிக்கும்போது சில வகை கார்களுக்கு மட்டுமே இந்தத் திட் டதில் வரவேற்பும், குறைந்தபட்சமாக கார்களைத் திருப்பித் தர 21 நாள்கள் கால அவகாசமும் இருந்தால் நல்லது என்று தெரியவந்தது. 21 நாள்களில் கார்களில் ஏதேனும் ரிப்பேர்கள் வந்துவிட்டால் அதற்கு ஏல நிறுவனமே பொறுப்பேற்க வேண்டும். எத்தனை கார்கள் இந்த முறையில் டீலர்களால் எடுத்துச் செல்லப்படும் என்பதை வைத்தே இதுபோன்ற எதிர்பாராத செலவுகளைத் தாண்டி இந்த ஐடியா லாபம் தரும் என்பது வேறு இருந்தது.

இவற்றையெல்லாம் உள்ளடக்கிய ஒரு பிசினஸ் கேஸ் ஸ்டடியாக இந்தத் திட்டம் ஆராயப்பட்டு, பின்பு அறிமுகப்படுத்தப்பட்டது. 2012-ல் அறிமுகப்படுத்தப்பட்ட இந்தத் திட்டம், இன்றைக்கு 21  நாள்கள் அல்லது 500 கிமீ ஓட்டம் என்ற இரண்டில் குறைந்தபட்ச அளவீட்டில் செயல்பட்டு வருகிறது. 2015-ம் ஆண்டில் பல பில்லியன் டாலர் அளவிலான கூடுதல் தொகை டீல் ஷீல்டுக்கான தொகையின் லாபமாக இந்த நிறுவனத்தால் பெறப்பட்டது என்பது குறிப்பிடத்தக்கது. பிசினஸ் கேஸ் என்பது உண்மையாகவே இது சாத்தியமான யோசனையா என்பதை வெளி ஆளாக இருந்து பார்த்து ஆராய்வதைக் குறிப்பதாகும்.

வெறுமனே இன்னோவேஷன் செய்துவிட்டால் மட்டும் போதாது. இன்னோவேஷன் மட்டுமே உங்களுடைய தயாரிப்பின் தரம் குறித்துப் பேசாது. நீங்கள் அந்த இன்னோவேஷனின் மகத்துவம் குறித்துச் சரியான விளம்பரங்களையும் செய்ய வேண்டியிருக்கும் என்பதை மறந்துவிடாதீர்கள் என்கிறார் ஆசிரியர். அதேபோல் தடாலடி விலை மாற்றங்களை உங்கள் தயாரிப்புகளுக்குக் கொண்டு வந்துவிடாதீர்கள். அதுவும் அறிமுகம் செய்து சிறிது நாள்கள் கழித்து விற்பனை சற்றுக் குறைய ஆரம்பிக்கும் நிலையில் விலையைக் குறைக்கிறேன்  என்று இறங்கிவிடாதீர்கள். அறிமுகப்படுத்தப்பட்ட காலகட்டத்தில் இருந்தே உற்சாகம் வழிந்து விற்பனை தடுமாறும், எல்லோரும் விலையைக் குறைத்தால் விற்பனை நிமிர்ந்துவிடும் என்பார்கள். நிர்ணயிக்கப்பட்ட விலை என்பது ஒரு  நேர்மை சம்பந்தப்பட்டது. விலை நேர்மை குறைந்தால், லாபம் குறையும் என்பது மட்டுமில்லை. வாடிக்கையாளர்கள் உங்கள் நிறுவனத்தின் மீது வைத்திருக்கும் நம்பிக்கைக்கும் அது குந்தகம் விளைவிக்கும் என்கிறார் ஆசிரியர்.

இன்னோவேஷன் செய்பவர்கள் விலையை இறக்கி விற்பனை செய்யும் விளையாட்டில் மட்டும் ஈடுபடவே கூடாது. ஏனென்றால், அது மிக மோசமான வழுக்கும் பாறை. விலை இறக்கி விளையாடும் விளையாட்டில் குறைந்த உற்பத்திச் செலவு இருக்கும் நிறுவனங்களால் மட்டுமே ஜெயிக்க முடியும் என்று சொல்லி முடிக்கிறார் ஆசிரியர்.

வெற்றி பெற்ற பல நிறுவனங்களின் கதை இதில் சொல்லப்பட்டிருக்கிறது. புதுமை படைப்பதன் மூலம் ஜெயிக்க நினைக்கும் தொழில்முனைவோர்கள் இந்தப் புத்தகத்தை ஒருமுறை படிக்கலாம்.

- நாணயம் டீம்


(குறிப்பு: இந்தப் புத்தகம் ஆன்லைன் ஷாப்பிங் வெப்சைட்களில் விற்பனைக்குக் கிடைக்கும்.)
 

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு