Published:Updated:

அஸெட் அலோகேஷன் ஃபண்டுகளில் முதலீடு செய்வது லாபமா?

அஸெட் அலோகேஷன் ஃபண்டுகளில் முதலீடு செய்வது லாபமா?
பிரீமியம் ஸ்டோரி
அஸெட் அலோகேஷன் ஃபண்டுகளில் முதலீடு செய்வது லாபமா?

சொக்கலிங்கம் பழனியப்பன், இயக்குநர், ப்ரகலா வெல்த் மேனேஜ்மென்ட் பி.லிட்.

அஸெட் அலோகேஷன் ஃபண்டுகளில் முதலீடு செய்வது லாபமா?

சொக்கலிங்கம் பழனியப்பன், இயக்குநர், ப்ரகலா வெல்த் மேனேஜ்மென்ட் பி.லிட்.

Published:Updated:
அஸெட் அலோகேஷன் ஃபண்டுகளில் முதலீடு செய்வது லாபமா?
பிரீமியம் ஸ்டோரி
அஸெட் அலோகேஷன் ஃபண்டுகளில் முதலீடு செய்வது லாபமா?

ரண்டு அல்லது அதற்கும் மேற்பட்ட வகையான சொத்துகளில் முதலீடு செய்யும் ஃபண்டுகளைக் கலப்பின ஃபண்டுகள் அல்லது ஹைபிரிட்  ஃபண்டுகள் என்று அழைக்கிறோம். கலப்பின ஃபண்டுகளில் ஓர் உள்வகை, அஸெட் அலோகேஷன் ஃபண்டுகள் ஆகும். இந்த வகை ஃபண்டுகளானது பங்குகள், பாண்டுகள், தங்கம், குறைந்த விலைக்கு ஓரிடத்தில் வாங்கி, அதிக விலைக்கு வேறிடத்தில் விற்கும் ஆர்பிட்ரேஜ், ரியல் எஸ்டேட் என  பல வகைச் சொத்துகளில் முதலீடு செய்கின்றன. அதிகமான அஸெட் அலோகேஷன் ஃபண்டுகள் இரு வகைச் சொத்துகளில், அதாவது பங்குகள் மற்றும் பாண்டுகளில் தங்களது முதலீட்டை வைத்துக்கொண்டு, காலத்துக்கேற்றாற்போல் போர்ட்ஃபோலியோவை மாற்றி அமைத்துக் கொள்கின்றன.

   வித்தியாசம் என்ன?

பேலன்ஸ்டு ஃபண்டுகள், எம்.ஐ.பி, ஈக்விட்டி சேவிங்ஸ் ஃபண்டுகள் போன்ற வற்றுக்்கும், அஸெட் அலோகேஷன் ஃபண்டுகளுக்கும் உள்ள வித்தியாசம் என்ன?

முதலில் குறிப்பிட்ட மூன்று வகை ஃபண்டுகளும் நிரந்தரமான அஸெட் அலோகேஷனை வைத்துக் கொள்கின்றன. ஆனால் அஸெட் அலோகேஷன் ஃபண்டுகள் சந்தையின் நிலைமையைப் பொறுத்து, தங்களது அஸெட் அலோகேஷனை டைனமிக்காக மாற்றி அமைத்துக் கொள்கின்றன. உதாரணமாக,  பேலன்ஸ்டு ஃபண்டுகள், எப்போதும் 65 சதவிகிதத்துக்குக் குறையாமல் பங்கு சார்ந்த முதலீட்டைத் தனது போர்ட்ஃபோலியோவில் வைத்துக்கொள்ளும்; எஞ்சியதைக் கடன் சார்ந்த முதலீடுகளில் வைத்துக்கொள்ளும்.

பங்கு மற்றும் பாண்டுகளில் மட்டும் முதலீடு செய்யும் அஸெட் அலோகேஷன் ஃபண்டுகள், இந்த இரு வகைச் சொத்துகளின் சதவிகிதத்தைச் சந்தையின் மதிப்பீட்டைப் (Valuation) பொறுத்து டைனமிக்காக மாற்றிக்கொள்ளும். சில சமயங்களில் பங்கு சார்ந்த முதலீடு 100 சதவிகிதம்கூட இருக்கலாம்; இன்னும் சில சமயங்களில் அதுவே ஜீரோவாகக்கூட இருக்கலாம்.

அஸெட் அலோகேஷன் ஃபண்டுகளில் முதலீடு செய்வது லாபமா?

   சாதகம் என்ன?

அஸெட் அலோகேஷன் ஃபண்டுகள் யாருக்கு உகந்தது எனப் பார்ப்போம்.

இலக்கை அடைய குறுகிய காலமே இருப்பவர்களுக்கு இந்த வகை ஃபண்டுகள் மிகவும் கச்சிதமாக அமையும். உதாரணமாக, உங்களுக்கு தற்போது 55 வயதாகிறது. மேலும், நீங்கள் இன்னும் மூன்று வருடங்களில் ஓய்வு பெறப் போகிறீர்கள் என்று வைத்துக்கொள்வோம். இப்போது சந்தை உச்சத்தில் இருக்கிறது. இதுபோன்ற சமயத்தில் உங்களின் ஓய்வுக்காலத்துக்கான பணம் அனைத்தும் பங்கு சார்ந்த ஃபண்டுகளில் இருந்தால், சந்தை திடீரெனச் சரியும்பட்சத்தில், உங்களின் செல்வத்தில் பெரிய இழப்பு ஏற்பட வாய்ப்புள்ளது. அதனால் உங்களின் ஓய்வுக்கால வாழ்க்கை பாதிக்கப்படலாம். அதேசமயத்தில், அஸெட் அலோகேஷன் ஃபண்டில் அந்த முதலீடு இருந்தால், சந்தை உச்சத்தில் இருப்பதால் மிகுதியான முதலீடு பாண்டுகளுக்குத் தானாகவே மாறியிருக்கும். சந்தை உச்சத்தில் இன்னும் செல்லச் செல்ல, உங்களின் முதலீடு முழுவதுமாக பாண்டுகளுக்கு மாற்றப்பட்டுவிடும். ஆகவே, உங்களின் ஓய்வுக் கால வாழ்க்கையும் பாதிக்கப்படாது. இதுபோல், உங்களின் ஒவ்வொரு இலக்கையும் பாதுகாப்பாக அடைய அஸெட் அலோகேஷன் ஃபண்டுகள் உதவியாக இருக்கும்.

   பாதகம் என்ன?

இந்த ஃபண்டுகளில் உள்ள பாதகம் என்ன என்று பார்ப்போம்.

காளையின் பிடியில் சந்தை இருக்கும்போது, மேலும் மேலும் உயர்ந்து கொண்டுதான் செல்லும். அதுபோன்ற சமயங்களில், அஸெட் அலோகேஷன் ஃபண்டுகள் மிகவும் குறைவான பங்கு சார்ந்த முதலீட்டையே கொண்டிருக்கும். ஆகவே, இந்த வகை ஃபண்டுகளின் வருமானம் சந்தையைவிட குறைவாகவே இருக்கும். மேலும், இந்த வகை ஃபண்டுகளின் வரியானது, கடன் சார்ந்த திட்டங்களைப் போல் இருக்கும். ஆகவே, மூன்று  வருடங்களுக்குள் ஃபண்டை விற்கும்போது, உங்களது வரி வரம்பில் வருமான வரிச் செலுத்த வேண்டியிருக்கும். அதற்கு மேல் நீண்ட கால ஆதாய மூலதன வரி (பண வீக்கத்துக்கு அட்ஜஸ்ட் செய்த பிறகு 20%) செலுத்த வேண்டியிருக்கும்.

அஸெட் அலோகேஷன் ஃபண்டுகளில் முதலீடு செய்வது லாபமா?



   எவ்வாறு செயல்படுகின்றன?

இந்த வகை ஃபண்டுகள் எவ்வாறு தங்களின் சொத்துகளை ஒதுக்கீடு செய்கின்றன எனப் பார்ப்போம்.

ஒவ்வொரு ஃபண்டும் ஒருவித மாடலை கையாள்கின்றன. சில ஃபண்டுகள் பி/இ (P/E) விகிதத்தை அடிப்படையாக வைத்து, பங்குச் சந்தை குறைந்த மதிப்பில் உள்ளதா அல்லது அதிக மதிப்பில் உள்ளதா என்பதைக் கணக்கிடுகின்றன. இன்னும் சில ஃபண்டுகள் பி/பிவி (P/BV) விகிதத்தை வைத்து, தங்களின் சொத்து ஒதுக்கீட்டை மாற்றுகின்றன.

வேறு சில ஃபண்டுகள் நிஃப்டி குறியீட்டின் யீல்டு மற்றும் 10 வருட இந்திய அரசாங்க பாண்டின் யீல்டு போன்றவற்றை வைத்து, தங்களின் சொத்து ஒதுக்கீட்டை மாற்றுகின்றன. இவை தவிர, வேறுவிதமான மாடல்களையும் அஸெட் அலோகேஷன் ஃபண்டுகள் பயன்படுத்துகின்றன.

   எது சிறந்தது?


மற்றுமொரு கேள்வி முதலீட்டாளர்களுக்கு எழலாம். அஸெட் அலோகேஷன் ஃபண்டுகளில் முதலீடு செய்வது சிறந்ததா அல்லது நாமே அஸெட் அலோகேஷனை செய்து ஒவ்வொரு சொத்திலும் தனியாக முதலீடு செய்துகொள்வது சிறந்ததா?

நேரமும் பணமும் தாராளமாக இருக்கும் பட்சத்தில், நாமே பங்கு சார்ந்த திட்டங்கள், கடன் சார்ந்த திட்டங்கள், தங்கம், ரியல் எஸ்டேட் என தனித் தனியாகப் பிரித்து முதலீடு செய்வது நல்லது. மேலும், பங்கு சார்ந்த திட்டங்களுக்குத் தனியாக முதலீடு செய்யும்போது, ஓராண்டுக்கு மேல் வைத்திருந்தால் வருமான வரியும் வராது. போதுமான நேரம் இல்லாதவர்கள், பணம் கச்சிதமாக இருப்பவர்களுக்கு அஸெட் அலோகேஷன் ஃபண்டுகள் சிறந்த முதலீடாக அமையும்.

அஸெட் அலோகேஷன் ஃபண்டுகளில் முதலீடு செய்வது லாபமா?

   வருமானம் எப்படி இருக்கும்?

நீண்ட காலத்தில் பார்க்கும்போது அஸெட் அலோகேஷன் ஃபண்டுகளின் வருமானம், பங்கு சார்ந்த திட்டங்களைவிடக் குறைவாகவும் அதே சமயத்தில் கடன் சார்ந்த திட்டங்களைவிட அதிகமாகவும் இருக்கும். வளர்ச்சி மற்றும் குறைவான ரிஸ்க் ஆகிய இரண்டுக்கும்  ஆசைப்படுபவர்கள், தங்களது ஆரம்ப காலங்களில் பங்கு சார்ந்த திட்டங்களிலும், இலக்கை அடையக் குறைவான ஆண்டுகளே இருக்கும்போது அஸெட் அலோகேஷன் ஃபண்டுகளிலும் தங்களது முதலீட்டை வைத்துக் கொள்வது சிறந்ததாக அமையும்.

ஐந்து ஆண்டுகளுக்கும் மேலாக நடப்பில் உள்ள சில அஸெட் அலோகேஷன் ஃபண்டுகளைப் பற்றிய சிறிய குறிப்பு, கீழே கொடுக்கப்பட்டுள்ளது.

ஃப்ராங்க்ளின் இந்தியா டைனமிக் பிஇ ரேஷியோ ஃபண்ட் ஆஃப் ஃபண்ட்ஸ் : 2003-ம் ஆண்டு ஆரம்பிக்கப்பட்ட இந்த ஃபண்ட், தற்போது ரூ.779 கோடி மதிப்புள்ள சொத்துகளை  நிர்வகித்து வருகிறது. இதன் ஃபண்ட் மேனேஜர் ஆனந்த் ராதாகிருஷ்ணன் ஆவார். நிஃப்டி குறியீட்டின் பி/இ விகிதத்தை வைத்து இந்த ஃபண்ட் தனது பங்கு மற்றும் கடன் சார்ந்த ஒதுக்கீட்டை மாற்றிக் கொள்கிறது. மார்ச் கடைசியில் இதன் பங்கு சார்ந்த முதலீடு 40% ஆகவும், கடன் சார்ந்த முதலீடு 60% ஆகவும் இருந்தது. இந்த ஃபண்ட் கடந்த 5 ஆண்டுகளில் ஆண்டுக்கு  12.20% வருமானத்தைத் தந்துள்ளது. இதன் பங்கு சார்ந்த முதலீடுகளை ஃப்ராங்க்ளின் இந்தியா புளூசிப் என்ற டைவர்ஸிஃபைடு லார்ஜ்கேப் ஃபண்டிலும், கடன் சார்ந்த முதலீடு ஃப்ராங்க்ளின் இந்தியா ஷார்ட் டேர்ம் இன்கம் பிளான் என்ற ஃபண்டிலும் முதலீடு செய்கிறது. இந்த ஃபண்ட்க்கான வருமான  வரியானது கடன் சார்ந்த ஃபண்டுகளைப் போல் இருக்கும்.

பிரின்ஸிபல் ஸ்மார்ட் ஈக்விட்டி ஃபண்ட்: 2010-ல் ஆரம்பிக்கப்பட்ட இந்த ஃபண்ட், தற்போது ரூ.152 கோடி மதிப்புள்ள சொத்துகளை நிர்வகித்து வருகிறது. கடந்த 5 ஆண்டுகளில் ஆண்டுக்கு  13.97% வருமானம் தந்துள்ளது.  இதன் ஃபண்ட் மேனேஜர் ரஜத் ஜெயின் ஆவார்.

இந்த ஃபண்டும் சந்தையின் பி/இ விகிதத்தை வைத்துத் தனது ஒதுக்கீட்டை மாற்றி அமைத்துக் கொள்கிறது. இந்த ஃபண்டின் வரியானது ஈக்விட்டி ஃபண்டுகளைப் போல் இருக்கும். அதாவது, ஓராண்டுக்கு மேல் வைத்திருக்கையில் வரும் வருமானத்துக்கு வரி எதுவும் செலுத்த வேண்டாம். அதேபோல், கிடைக்கும் டிவிடெண்டுக்கும் வரி  கிடையாது. தற்போது இந்த ஃபண்ட் மாதந்தோறும் டிவிடெண்ட் வழங்கி வருகிறது.

ஹெச்.டி.எஃப்.சி டைனமிக் பிஇ ரேஷியோ ஃபண்ட் ஆஃப் ஃபண்ட்ஸ்: 2012-ம் ஆண்டு ஆரம்பிக்கப்பட்ட இந்த ஃபண்ட், ரூ.19 கோடி மதிப்புள்ள சொத்துகளை நிர்வகித்து வருகிறது. கடந்த 5 ஆண்டுகளில், ஆண்டுக்கு 10.86% வருமானத்தைக் கொடுத்துள்ளது. இதன் ஃபண்ட் மேனேஜர் அனில் பம்போலி ஆவார்.

மேலே கண்ட ஃபண்டுகளைப் போல் இந்த ஃபண்டும் பி/இ விகிதத்தை வைத்தே தனது ஒதுக்கீட்டை அமைத்துக்கொள்கிறது. தற்போது 68% பங்கு சார்ந்த முதலீட்டிலும், எஞ்சியதைக் கடன் சார்ந்த முதலீடுகளிலும் வைத்துள்ளது. இந்த ஃபண்டிலிருந்து வரும் லாபத்துக்குக் கடன் சார்ந்த திட்டங்களின் வருமான வரி உரித்தாகும்.

வரும் காலங்களில் இதுபோன்ற அஸெட்  அலோகேஷன் ஃபண்டுகளை முதலீட்டாளர்கள் அதிகமாக நாடிச் செல்வார்கள் என்பதில் சந்தேகமில்லை.

நாம் மேற்சொன்ன தேவைகள் உங்களுக்கு இருக்கும்பட்சத்தில், நீங்களும் இந்த அஸெட் அலோகேஷன் ஃபண்டுகளில் தாராளமாக முதலீடு செய்யலாம் என்பதில் எந்தச் சந்தேகமும் இல்லை.