Published:Updated:

ஜெயிப்பதற்கு சாதாரண திறமைகளே போதும்!

ஜெயிப்பதற்கு சாதாரண திறமைகளே போதும்!
பிரீமியம் ஸ்டோரி
ஜெயிப்பதற்கு சாதாரண திறமைகளே போதும்!

நாணயம் புக் செல்ஃப்

ஜெயிப்பதற்கு சாதாரண திறமைகளே போதும்!

நாணயம் புக் செல்ஃப்

Published:Updated:
ஜெயிப்பதற்கு சாதாரண திறமைகளே போதும்!
பிரீமியம் ஸ்டோரி
ஜெயிப்பதற்கு சாதாரண திறமைகளே போதும்!

புத்தகத்தின் பெயர்: இட்ஸ் நாட் ஹவ் குட் யு ஆர் (It’s Not How Good You Are, It’s How Good You Want to Be)

ஆசிரியர்: பால் ஆர்டென் (Paul Arden)

பதிப்பகம்: பைடன் பிரஸ் (Phaidon Press)

இந்தப் புத்தகத்தை எழுதிய பால் ஆர்டென், சாட்சி அண்ட் சாட்சி என்ற விளம்பர நிறுவனத்தின் கிரியேட்டிவ் பிரிவில் இயக்குநராக இருந்த ஒரு கிரியேட்டிவ் ஜீனியஸ். இவர், விளம்பர நிறுவனத்தின் கிரியேட்டிவ் பிரிவின் தலைவர் என்றாலும், வெற்றி கரமாகச் செயல்படுவது எப்படி என்பது குறித்து இவர் இந்தப் புத்தகத்தில் சொல்லியிருக்கும் பல விஷயங்கள், விளம்பர நிறுவனங்களுக்கு மட்டுமின்றி ஏனைய தொழில்களுக்கும், தனிநபர்களுக்கும் உதவும்படி இருக்கின்றன.    

ஜெயிப்பதற்கு சாதாரண திறமைகளே போதும்!

எது பணக்காரர்களாக மாற்றுகிறது?

நாம் அன்றாடம் காணும் அனைத்து பணக்காரர்களும், பவர்ஃபுல்லான மனிதர்களும் அப்படியொன்றும் பெரிய அளவிலான திறமைகளுடனோ, படிப்பறிவுடனோ, பெரிய ஈர்ப்பு சக்தி கொண்டவர்களாகவோ, அழகானவர்களாகவோ இருப்பதில்லை. அவர்கள் பணக்காரர்களாக மாறுவதற்குக் காரணமாக இருந்தது, தாங்கள் பணக்காரர்களாகவும் பவர்ஃபுல்லான வர்களாகவும் இருக்க வேண்டும் என  அவர்கள் விரும்பியதால்தாம். அதனால், நீங்கள் என்னவாக ஆகவேண்டுமென்று நினைக்கிறீர்களோ, அந்த எண்ணம்தான் உங்களை அதுமாதிரி மாற்றும். இலக்கு இல்லாமல் வாழ்வதென்பது வெற்றிக்கு வழிவகுக்காது என்று சொல்லி ஆரம்பிக்கிறார் இந்தப் புத்தகத்தின் ஆசிரியர்.

எப்படிச் செயல்பட வேண்டும்?

‘சிறந்த விஷயங்களை மட்டுமே ஏற்றுக் கொள்வேன்’ என்று கங்கணம் கட்டிக்கொண்டு  நாம் செயல்படுகிறோம். ஆனால்,  சராசரியான விஷயங்களே உலகத்துக்குப் போதுமானது. நாம் அனைவரும் சிறப்பாகத் திகழ்ந்தால் மட்டுமே ஜெயிக்க முடியும் எனறு தவறாக நினைத்து, அப்படிச் செயல்படுவதற்கான முயற்சிகளை எடுப்பதில் கவனத்துடன் சிந்திக்கிறோமே தவிர, அந்தத் திசையில் செயல்படுவதில்லை.

வெற்றி பெற வேண்டுமானால் இதனை முதலில் நாம் மாற்றியமைத்துக்கொள்ள வேண்டும். நம்முடைய வேலையில் நாம் எந்த அளவுக்குக் கவனமாகச் செயல்பட வேண்டும் என்பதை முதலில் நமக்குள்ளேயே தெளிவுபடுத்திக்கொள்ள வேண்டும். இந்தக் கேள்விக்கு, ‘சிறப்பாகச் செயல்பட வேண்டும், மிகச் சிறப்பாகச் செயல்பட வேண்டும், செயல்படும் துறை அளவில் நம் ஊரில்/நம் நாட்டில் இருப்பவர்களுக்கு நடுவே சிறப்பாகச் செயல்பட வேண்டும், உலகளாவிய அளவில் சிறப்பாகச் செயல்பட வேண்டும்’ என்கிறமாதிரி பல பதில்களை நாம் அடுக்கிக் கொண்டே போகலாம்.

இவற்றில் நாம் எதை அடைய வேண்டும் என்பதில் முதலில் நாம் தெளிவாக இருக்க வேண்டும். இதில் எந்த நிலையை அடைய வேண்டுமானாலும் திறமை நமக்கு உதவலாம். ஆனால், அது மட்டுமே நம்மை ஓரளவுக்குமேல் எடுத்துச் செல்லாது. அதற்குத் தேவையான உழைப்பை நாம் கொடுக்க வேண்டும்.

ஏன் வெற்றி பெற முடியவில்லை?


நாம் எல்லாருக்குமே சிறப்பானவர்களாக மாற வேண்டும் என்கிற எண்ணம் நமக்குள் இருக்கலாம்.  ஆனால், அதற்குத் தேவையான தியாகங்களைச் செய்ய நாம் தயாராக இருப்பதில்லை. நாட்டில் பலர் நல்லவர்களாக இருக்கின்றனர். ‘என் பணியிடத்தில் நான் ரொம்ப நல்லவனாக இருக்கிறேன். எல்லோருக்கும் என்னைப் பிடிக்கிறது. ஆனாலும், என்னால் வெற்றி பெற முடிவதில்லை’ என்று பலரும் சொல்வார்கள். திறமைக்கும், அனைவருக்கும் என்னைப் பிடிக்கும் என்பதற்கும் இருக்கிற வித்தியாசத்தை அவர்கள் புரிந்துகொள்வதில்லை. திறமையானவர்களாக மாறுவது எப்படி என்கிற விடையைத் தேடித்தான் அனைவரும் அலைகிறார்களே தவிர, அது உடனடியாக நடக்காது என்பதை அவர்களே புரிந்துகொள்ள மறுக்கிறார்கள்.

நாம் என்னதான் முயற்சி செய்வதாலும், அந்த முயற்சியில் தோல்வியடைந்து, அதிலிருந்து படிப்பினைகளைப் பெறுவதால் மட்டுமே திறமையை வளர்க்க முடியும் என்று முதலில் நீங்கள் புரிந்துகொள்ள வேண்டும் என்கிறார் ஆசிரியர்.

இலக்கை நிர்ணயித்துக்கொள்ளுங்கள்

முதலில் உங்களுடைய தற்போதைய தகுதி மற்றும் திறமைகளையெல்லாம் பற்றிக் கவலைப்படாமல், அதையெல்லாம் தாண்டிய தொரு இலக்கை நிர்ணயம் செய்யுங்கள் என்று சொல்லும் ஆசிரியர், இந்த உலகத்தில் எதுவும் முடியாதது இல்லை என்பதை நினைவில் வையுங்கள் என்கிறார்.  பின்னாளில் உலகப் புகழ் பெற்ற பாடகி ஒருவர்,  பள்ளி மாணவியாக இருந்தபோது, மக்கள் மத்தியில் மிகவும் பிரசித்தி பெற்ற மாடலிங்காக எதிர்காலத்தில் ஆக விரும்பியதாக ஒரு நேர்காணலில் சொன்னதை இங்கே நினைவுபடுத்துகிறார் ஆசிரியர். இது கேட்பதற்குச் சிரிப்பாக இருந்தாலும், அந்த நினைப்பே அவரைப் பிற்காலத்தில் உலகப் புகழ் பெற்றவராக மாற்றியது என்கிறார் ஆசிரியர். 

ஒட்டுமொத்த விகடனுக்கும் ஒரே ஷார்ட்கட்!

ஜெயிப்பதற்கு சாதாரண திறமைகளே போதும்!



அதேபோல், உங்களுடன் பள்ளிக்கூடத்தில் படிக்கும்போது அதிபுத்திசாலியாக இருந்தவர்கள் பலரும், வாழ்வில் பெரிய அளவில் சாதித்ததில்லை என்பதை உணர்ந்திருக்கிறீர்களா என்று கேட்கிறார் ஆசிரியர். ஏனென்றால், பள்ளிக் கூடத்தில் நீங்கள் படிப்பதெல்லாம்  உண்மைகள் (facts).  இவற்றை யாரால் அதிகளவில் நினைவில் வைத்துக்கொள்ள முடிகிறதோ, அவர்களே நல்ல மதிப்பெண்களைப் பெறும் நபராகிறார்கள்.  பள்ளிப்படிப்பில் தோல்வியடைபவர்கள் உண்மைகளில் ஈடுபாடில்லாதவர்கள். அந்த உண்மைகள் அவர்களை ஈர்ப்பதில்லை. அவற்றை நினைவில் வைத்துக்கொள்ள முடியாததால், அவர்கள் முட்டாள்களல்ல. நினைவில் வைப்பதில் கைதேர்ந்தவர்கள், அந்தக் கலை தரும் பரிசான மதிப்பெண்களைக் காட்டி வேலைக்குப் போய்விடுகின்றனர். அப்படி வேலைக்கு வரும் கூட்டத்தில் யார் ஜெயிக்கின்றனர் என்று பார்த்தால், அங்கேயும் புதுப்புது இலக்குகளை வகுத்துக்கொண்டு அதை நோக்கி அயராது செல்ல முயல்பவர்களே என்கிறார் ஆசிரியர்.

தெரிந்ததைப் பகிருங்கள்


அடுத்து, ஆசிரியர் சொல்வது மற்றவர்களிடம் வாழ்த்துகளைப் பெறுவதைவிட குறைகளைக் கேட்டுப்பெறுவதே முன்னேற்றத்துக்கான வழிகளைக் கொண்டுவரும் என்பதையே. ஏனென்றால், குறைகளும் விமர்சனங்களுமே நம்மை மேம்படுத்திக்கொள்ள உதவும் என்பதுதான். பள்ளிக் கூடத்தில் உனக்குத் தெரிந்ததை மற்றவர்களிடம் சொல்லாதே. அவர்கள் உன்னைவிட முந்திச் சென்றுவிடுவார்கள் என்று சொல்லி வைத்ததாலோ என்னவோ, பணியிடத்திலும் நமக்குத் தெரிந்ததை அடுத்த வர்களுக்குச் சொல்லித் தர மறுக்கிறோம் அல்லது தெரிந்ததைத் தெரியாது என்று சொல்லி மறைக்கிறோம். அதை முழுமையாகத் தவிருங்கள்.

நீங்கள் யோசித்துச் சொல்லும் ஒரு ஐடியா, பொதுவான ஓர் அறிவுசார் விஷயமேயாகும். அதனால் எந்தவொரு ஐடியாவுக்கும் உரிமை கொண்டாடாதீர்கள்.  ஐடியாவைத் தேக்கி வைக்க ஆரம்பித்தீர்கள் என்றால், இறுதியில்  நீங்கள்தான் தேங்கிப்போவீர்கள் என்று எச்சரிக்கிறார் ஆசிரியர்.

வேலை போய்விடுமோ என அஞ்சாதீர்கள்


வேலையைவிட்டு நீக்கிவிடுவார்கள் என்று ஒரு போதும் பயந்துகொண்டே செயல்படாதீர்கள். அப்படி வேலையைவிட்டு நீக்கினால், அந்த வேலை உங்களுக்கு லாயக்கற்றதல்ல என்றுதான் அர்த்தமே தவிர, வேறொன்றுமில்லை. நானும் ஐந்துமுறை வேலையைவிட்டு அனுப்பப்பட்டு இருக்கிறேன். ஒவ்வொரு முறை நான் வேலையை விட்டு நீக்கப்பட்டபோதிலும் என்னுடைய பணிரீதியான வாழ்க்கையின் போக்கு உயர்ந்ததே தவிர தாழவில்லை என்கிறார் ஆசிரியர்.

விளம்பர உலகத்தில் மிக முக்கியமானதொரு விஷயம், விளம்பரத்துக்கான ஆர்டரைத் தருபவர் எதை விரும்புகிறாரோ, அதைத் தரவேண்டியது என்பதாகும். ‘நான் விளம்பர நிறுவனத்தைச் சார்ந்தவன். எது மக்களால் விரும்பப்படும் என எனக்குத் தெரியும்’ என்று நினைக்காதீர்கள்’’ என்று எச்சரிக்கிறார் ஆசிரியர்.

அதேபோல், உங்களுடைய (விளம்பரம் டிசைன் செய்ய சொல்லும் நிறுவனம்) வாடிக்கையாளர், விளம்பரத்தின் மூலம் என்ன சொல்ல நினைக்கிறார் என்பதை நாடிப் பிடித்துப் பார்க்கத் தெரிந்து கொண்டு, அதை ஒரே வரியில் விளம்பரத்தில் கொண்டு வந்துவிடுங்கள். அந்த ஒற்றை வரிதான் உங்களுக்கு விளம்பர ஆர்டர்களைக் கொண்டு வந்து குவிக்கும் என்று அடித்துச்சொல்கிறார் ஆசிரியர்.

விளம்பர நிறுவனம் குறித்து எழுதப்பட்டிருந் தாலும், இந்தப் புத்தகத்தில்  சொல்லப்பட்டிருக்கும் கருத்துக்கள், பணியாளர்கள் மற்றும் தொழில் முனைவோர்கள் என அனைவருக்கும் பயனுள்ளதாக இருக்கும்!

- நாணயம் டீம் 

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism