Published:Updated:

உஷார்... அடுத்தவரின் பணத்தை உங்கள் வங்கிக்கணக்கில் டெபாசிட் செய்கிறீர்களா..?!

`ஒருவரின் வங்கிக் கணக்குக்கு வரும் பணமெல்லாம் எப்போது வேண்டுமானாலும் வருமான வரித் துறையால் கண்காணிக்கப்பட்டு கேள்வியெழுப்பப்படலாம். அதேபோல், வருமான வரித்தாக்கலின்போதும் ஒருவரது வங்கிக்கணக்கு முழுமையாக ஆய்வுசெய்யப்படும்.’

உஷார்... அடுத்தவரின் பணத்தை உங்கள் வங்கிக்கணக்கில் டெபாசிட் செய்கிறீர்களா..?!
உஷார்... அடுத்தவரின் பணத்தை உங்கள் வங்கிக்கணக்கில் டெபாசிட் செய்கிறீர்களா..?!

ணமதிப்பிழப்பு நடவடிக்கைக்குப் பிறகு வங்கி மூலமாகவும் ஆன்லைன் மூலமாகவும் பணப்பரிமாற்றம் அதிகரித்து வருகிறது. பெரும்பாலான மக்கள், புதிதாக வங்கிக் கணக்கு தொடங்கி அதன் வழியே பணப்பரிமாற்றம் செய்யத் தொடங்கியிருக்கிறார்கள். இந்தப் பணப்பரிமாற்றம் நம்முடைய மாதச் சம்பள அளவிலோ அல்லது நாம் செய்யும் தொழிலின் சராசரி வருமான அளவிலோ இருக்கும்வரை சிக்கல்கள் எழ வாய்ப்பில்லை. அது நம் வருமான வரம்பை மீறும்போதுதான் தேவையற்ற சிக்கல்களைச் சந்திக்கும் சூழல் ஏற்படக்கூடும்.

நமது டூவீலரில் இன்னொருவருக்கு லிஃப்ட் கொடுப்பதுபோல, வங்கிவழி பணப்பரிமாற்றத்தில், இன்னொருவருக்கு உதவி செய்து சிக்கலில் மாட்டவும் வாய்ப்புள்ளது. நமது உறவினர்களுக்கோ நண்பர்களுக்கோ உதவும்நோக்கில் அவர்கள் தரும் பணத்தை நம் வங்கிக் கணக்கில் போட்டு, இன்னொரு நபருக்குப் பரிமாற்றம் செய்யும் உதவியைப் பலரும் செய்வதுண்டு. அதேபோல நெருங்கிய உறவினர்களின் கையிருப்புப் பணத்தைச் சிறிது காலத்துக்குத் தங்களது வங்கிக் கணக்கில் போட்டுவைத்து பின்னர், அவர் கேட்கும்போது எடுத்துத் தருவதும் உண்டு. இவை அனைத்துமே அவசர உதவி என்ற வகையில் மறுப்புச் சொல்ல முடியாமல் செய்யப்படும் உதவிகள். ஆனால், வங்கி வழி பணப்பரிமாற்ற நடைமுறையில் இது தவறான பழக்கம். வங்கியில் டெபாசிட் செய்யப்படும் பணம் அனைத்துக்கும் வரவுக்கான ஆதாரம் இருக்க வேண்டியது அவசியம். 

ஒருவரின் வங்கிக் கணக்குக்கு வரும் பணமெல்லாம் எப்போது வேண்டுமானாலும் வருமானவரித் துறையால் கண்காணிக்கப்பட்டுக் கேள்வியெழுப்பப்படலாம். அதேபோல், வருமான வரித்தாக்கலின்போதும் ஒருவரது வங்கிக்கணக்கு முழுமையாக ஆய்வுசெய்யப்படும். அதில் சந்தேகப்படும்படியாக அதிகப்படியான தொகை டெபாசிட் செய்யப்பட்டது தெரிந்தால், அதுகுறித்து கேள்விகள் எழுப்பப்படலாம். ஏற்கெனவே சில மாதங்களுக்கு முன், வங்கியில் சராசரி வருமானத்துக்கு அதிகமான தொகையை டெபாசிட் செய்தவர்களின் வங்கிக் கணக்குகள் கணக்கெடுக்கப்பட்டன. அதன்படி 23 லட்சத்துக்கும் மேற்பட்ட வங்கிக் கணக்குகளின் டெபாசிட்டுகள் சந்தேகத்துக்குரியவை எனக் கண்டறியப்பட்டன. அவர்களது வருமானம் குறித்து விளக்கமளிக்கும்படி கடிதம் அனுப்பப்பட்டன. அதன் பிறகு, பெரும்பாலானவர்கள் வருமான வரித் தாக்கல் செய்தனர்.

இதில், இன்னொருவிதமான சிக்கலை ஒருவர் சந்தித்தார். அவர் வருமான வரித்தாக்கல் செய்தபோது அவரது வங்கிக் கணக்கில், அதிகப்படியான தொகையை அடிக்கடி டெபாசிட் செய்ததும், திரும்ப எடுத்ததும் தெரியவந்தது. குறைந்தபட்சமாக ரூ.2.11 லட்சத்திலிருந்து அதிகபட்சம் ரூ.98 லட்சம் வரை அவர் டெபாசிட் செய்திருந்தார். இப்படியாக அவரது வங்கிக் கணக்கில் டெபாசிட் செய்திருந்த மொத்த தொகை ரூ.1.35 கோடியாக இருந்தது. இதையடுத்து டெபாசிட் செய்யப்பட்ட அதிகப்படியான தொகைக்கான நிதி ஆதார விவரங்களை அவரிடம் வருமான வரித்துறை கேட்டது. அதற்கு அவர் சமர்ப்பித்த ஆதாரச் சான்றுகள் திருப்தியளிக்காததால், அவரது வங்கிக்கணக்கில் டெபாசிட் செய்யப்பட்ட தொகை அனைத்துமே அவரது வருமானம் என்ற முடிவுக்கு வந்ததோடு, அந்தத் தொகைக்கு வருமான வரி கட்டும்படி உத்தரவிட்டது. இதைச் சற்றும் எதிர்பாராத டெபாசிட்தாரர் அதிர்ச்சியடைந்துவிட்டார்.

இந்த விவகாரம் குறித்து அவர் வருமான வரித்துறை தீர்ப்பாயத்தில் முறையிட்டார். தனது டெபாசிட்டுகளுக்கான பண வரவு ஆதாரங்களையும் சமர்ப்பித்தார். அவற்றைச் சரிபார்த்த தீர்ப்பாயம், அந்தப் பணம் முறையான வழியில்தான் டெபாசிட் செய்யப்பட்டுள்ளது எனத் தீர்ப்பளித்தது. அதன் பிறகுதான் அவர் நிம்மதிப் பெருமூச்சுவிட்டார்.

வங்கி வழியாகப் பணப்பரிமாற்றம் செய்யும் அனைவருமே இந்தச் சம்பவத்தை ஒரு பாடமாகக் கொள்ள வேண்டும். இன்னொருவருக்கு உதவி செய்வதாக நினைத்து தமது வங்கிக்கணக்கின் வழியாக இன்னொருவரின் பணத்தைப் பரிமாற்றம் செய்ய உதவி செய்வது வீண் மன உளைச்சலையும் அலைச்சலையும் அளிக்கக்கூடும்.