கேள்வி - பதில்: பயன்படுத்தாமல் விட்ட டீமேட் கணக்கில் வர்த்தகம் செய்யலாமா?

என்னிடமுள்ள டீமேட் கணக்கினைக் கடந்த ஐந்து ஆண்டுகளாகப் பயன்படுத்தவில்லை. தற்போது அந்தக் கணக்கில் பங்கு வர்த்தகம் செய்ய முடியுமா?

.

விவேக், ராஜபாளையம்

எம்.எஸ்.ஓ.அண்ணாமலை, பங்குச் சந்தை ஆலோசகர்

“நீங்கள் கணக்கு வைத்துள்ள டெபாசிட்டரி பார்ட்டிசிபன்ட்டை (டிபி) அணுகவேண்டும். அவரிடம், உங்களுடைய பான் கார்டு, அடையாளச் சான்று, முகவரி மற்றும் வங்கி விவரங்களைக் கொடுத்து, செலுத்தாமல் விடுபட்ட ஆண்டுப் பராமரிப்புக் கட்டணத்தையும் செலுத்தி, உங்கள் டீமேட் கணக்கினைப் புதுப்பிக்கலாம். இதன்மூலம் ஏற்கெனவே உள்ள கணக்கை மீண்டும் பயன்படுத்தலாம். கடந்த ஐந்து வருடங்களில் பல டிபிக்கள், தங்களுடைய செயல்பாட்டை நிறுத்திக்கொண்டுவிட்டன அல்லது மற்றொரு டிபி-யுடன் இணைந்துகொண்டன. எனவே, நீங்கள் கணக்கு வைத்திருக்கும் டிபி தற்போது இயங்குகிறதா என்பதைத் தெரிந்துகொள்ளுங்கள். அது தெரியாதபட்சத்தில், புதிய டீமேட் கணக்கைத் தொடங்கவேண்டும்.”

தனியார் நிறுவனத்தில் பணிபுரியும் எனது மாதச் சம்பளம் 25,000 ரூபாய். மாதந்தோறும் 5,000 ரூபாயை மியூச்சுவல் ஃபண்டில் முதலீடு செய்யத் திட்டமிட்டுள்ளேன். பத்தாண்டு காலத்தில், நல்ல லாபம் கிடைக்கும் முதலீட்டுத் திட்டங்களைப் பரிந்துரைக்கவும்.

ராஜேஷ்குமார், நாகர்கோவில்

பி.ஆர்.டி.கோவர்தனன் பாபு, நிதி ஆலோசகர்

. “நீங்கள் பத்து ஆண்டுகாலம் முதலீடு செய்யத் திட்டமிட்டுள்ளதால், பின்வரும் ஐந்து வகையான பங்கு சார்ந்த மியூச்சுவல் ஃபண்ட் திட்டங்களில் மாதந்தோறும் 1,000 ரூபாய் முதலீடு செய்யலாம். ஹெச்.டி. எஃப்.சி டாப் 100 ஃபண்ட் (லார்ஜ் கேப்), மிரே அஸெட் எமெர்ஜிங் புளூசிப் ஃபண்ட் (லார்ஜ் & மிட்கேப்), ஃப்ராங்க்ளின் இந்தியா பிரைமா ஃபண்ட் (மிட்கேப்), கோட்டக் ஸ்டாண்டர்டு மல்டிகேப் ஃபண்ட் மற்றும் ஆக்ஸிஸ் ஸ்மால்கேப் ஃபண்ட். இந்தத் திட்டங்களில் குரோத் ஆப்ஷனைத் தேர்வு செய்தால், பத்து ஆண்டு காலத்தில் நல்ல லாபம் கிடைக்கக்கூடும்.”

ரூ.5,000, ரூ.3,000 பிரீமியம் கட்டும் இரண்டு ஆயுள் காப்பீட்டு பாலிசிகளை எடுத்திருக்கிறேன். இவற்றின்மூலம் அதிக வருமானம் கிடைக்காது என்றும் மணிபேக் பாலிசிக்கு மாறும்படியும் நண்பர்கள் கூறுகிறார்கள். நான் வைத்திருக்கும் பாலிசிகளை ஒப்படைத்துவிட்டு, புதிய பாலிசிகளை வாங்கினால், கூடுதல் வருமானம் பெற வாய்ப்புள்ளதா? கீர்த்தனா, திருச்சி

ஸ்ரீதரன், வெல்த்லேடர்

“நீங்கள் எடுத்திருப்பது எண்டோவ்மென்ட் பாலிசி என்பது உங்கள் கேள்விமூலம் தெரிகிறது. எண்டோவ்மென்ட் பாலிசியைப் பொறுத்தவரை, 4 - 6% வருமானமே கிடைக்கும். மேலும், இந்த வகையான பாலிசிகளை சரண்டர் செய்யும்போது அதிக அளவில் பண இழப்பு ஏற்படும் என்பதால், இவற்றைத் தொடர்வதே உத்தமம். இந்த பாலிசியை சரண்டர் செய்துவிட்டு, மணிபேக் பாலிசியை எடுத்தால், இழப்பீடு அதிகமாகுமே தவிர, லாபம் தராது. மணிபேக் பாலிசிகளின் வருமானம் 2 - 4% மட்டுமே இருக்கும் என்பதால், தற்போதுள்ள பாலிசியைத் தொடருங்கள்.”

10 லட்சம் ரூபாய் மதிப்பில் கடந்த 2006-ம் ஆண்டில் கட்டிய எனது வீட்டை, தற்போது 40 லட்சம் ரூபாய்க்கு விற்க உள்ளேன். வீட்டுமனை, மனைவியின் பெயரில் உள்ளது. அதில் வீடு கட்டும்போது எனது சேமிப்பு மற்றும் நகையை விற்று 5 லட்சம் ரூபாயும், எனது பெயரில் வங்கிக் கடனாக வாங்கிய 5 லட்சம் ரூபாயும் செலவிட்டிருந்தேன். வங்கிக் கடன் முடிந்துவிட்டது. தற்போது விற்று வரும் தொகைக்கு நீண்டகால மூலதன ஆதாய வரி செலுத்த வேண்டுமா? விக்னேஷ் குமார், கோயம்புத்தூர்

வி.எஸ்.சரண்சுந்தர், சார்ட்டர்டு அக்கவுன்டன்ட்

. “நிச்சயமாக. வங்கிக் கடன் நீங்கள் வாங்கியதாக இருந்தாலும், மனை உங்கள் மனைவியின் பெயரில் இருப்பதால், அந்த வீடு அவருக்கு உரியதாகவே கருதப்படும். எனவே, நீண்டகால மூலதன ஆதாயம் உங்கள் மனைவியின் வருமானத்தில் சேர்க்கப்படும்.”

என் வயது 32. எனது மாதச் சம்பளம் 35,000 ரூபாய். திருமணமாகி இரண்டு குழந்தைகள் இருக்கிறார்கள். கடந்த ஐந்து ஆண்டுகளாக பங்குச் சந்தையில் மாதம் 15,000 ரூபாய் முதலீடு செய்கிறேன். நான் பங்குச் சந்தையில் அதிக அளவில் முதலீடு செய்வதாக நண்பர்கள் அச்சுறுத்து கிறார்கள். நான் செய்வது சரியா?

மணிமாறன், சென்னை

தி.ரா.அருள்ராஜன், பங்குச் சந்தை நிபுணர்

“உங்கள் வயதைக் கணக்கில் வைத்துப் பார்த்தால், பங்குச் சந்தையில் இவ்வளவு சீக்கிரம் முதலீடு செய்வது நல்ல விஷயமே. இந்த முதலீட்டைக் குறைந்தபட்சம் பத்து ஆண்டுகள் தொடரத் திட்டமிடவேண்டும். ஒவ்வொரு மாதமும் தொடர்ந்து முதலீடு செய்வதால், பங்குச் சந்தையில் ஏற்படும் இறக்கத்திலும் முதலீடு செய்யும் நபராகவே நீங்கள் இருப்பீர்கள். இதனால், உங்களுடைய சராசரி வாங்கும் விலை குறைந்துகொண்டே போகும். நீண்டகால அடிப்படையில் பங்குச் சந்தை ஏறுமுகமாகவே உள்ளதால், அடுத்த 10-15 வருடங்கள் பங்குச் சந்தையில் முதலீடு செய்யுங்கள். உங்கள் 45-வது வயதில் ஒருபகுதியைக் கடன் பத்திர முதலீட்டுக்கு மாற்றுங்கள். அப்போது அதே நண்பர்கள் உங்கள் முதலீட்டின் மதிப்பைப் பார்த்து, வியந்து பாரட்டுவார்கள்.”

திருமணமாகி மூன்று ஆண்டுகளாகிறது. தற்போது குழந்தைப்பேறுக்காக மருத்துவ ஆலோசனை, சிகிச்சைகள் எடுத்து வருகிறேன். இதற்கான செலவுகளுக்கு ஹெல்த் இன்ஷூரன்ஸ் பாலிசியில் க்ளெய்ம் செய்ய முடியுமா?

மலர்விழி, மதுரை

பி.மனோகரன், இன்ஷூரன்ஸ் ஆலோசகர்

. “குழந்தைப்பேறு இல்லை என்பது நோயில் சேராது. அது ஒரு குறை பாடுதான். நோய் என்றால், அதை படிப்படியாகக் குணப்படுத்துவதை நம்மால் அறியமுடியும். ஆனால், மகப்பேறு இன்மை குறைபாட்டுக்கான சிகிச்சை அப்படியானதல்ல. எனவே, இதற்கான சிகிச்சைக்கு க்ளெய்ம் செய்ய முடியாது.”

எனது இந்து கூட்டுக் குடும்பச் சொத்தை (HUF) அதிகரிக்க விரும்புகிறேன். எந்த வகைகளில் அதிகரிக்கலாம், அதிலிருந்து வருமானத்தை எப்படி உருவாக்குவது?

ராஜேந்திரன், திருப்பரங்குன்றம்

கே.ஆர்.சத்யநாராயணன், ஆடிட்டர்

. “இந்து கூட்டுக் குடும்பச் சொத்து என்பது அன்பளிப்பு, உயில், பூர்வீகச் சொத்து, கூட்டுக் குடும்பச் சொத்தை விற்பதால் கிடைப்பது, கூட்டுக் குடும்பத்தில் உள்ள அனைவரும் பங்களிப்பு செய்வதன் மூலம் உருவாக்கப்படுகிறது. இந்தச் சொத்தை `இந்து கூட்டுக் குடும்பம்’ என்ற பெயரிலேயே வைப்புநிதித் திட்டத்தில் முதலீடு செய்வது அல்லது அந்தச் சொத்தை இந்து கூட்டுக் குடும்பச் சொத்தாகவே காட்டி மற்றவர்களின் பயன்பாட்டுக்குக் கொடுத்து வருமானம் ஈட்டுவது மூலம் இந்தச் சொத்தை அதிகரிக்கச் செய்யலாம். இந்தச் சொத்தை வருமான வரிக் கணக்குத் தாக்கலில் தனித்துக் காட்ட வேண்டும். செய்யப்படும் வரிச் சேமிப்பு முதலீடு மற்றும் செலவுக்கு வருமான வரிச் சட்டம் 80சி பிரிவின்படி வரிக்கழிவு உண்டு.

ஒரு நிறுவனம் தனது பங்குகளைத் திரும்பப் பெறுகிறது (பைபேக்) எனில், அந்த நிறுவனத்தின் செயல்பாடு சரியில்லை என்று அர்த்தமா?

சிராஜுதீன், ராமநாதபுரம்

ஏ.ஆர். வாசுதேவன், மண்டல மேலாளர், சிடிஎஸ்எல் “பொதுவாக, மூலதனச் சந்தையில் தங்களது செயல்பாட்டைக் குறைத்துக் கொள்ளும் நோக்கத்துடன் தங்கள் பங்குகளை ஒரு நிறுவனம் திரும்பப் பெறும். இதன்மூலம் லாப வரம்பு அதிகரிக்கும். மேலும், விநியோகிக்கும் பங்குகளின் எண்ணிக்கையைக் குறைக்கும்போது முதலீட்டாளர்களுக்கு வரும் வருமானம் அதிகரிக்கக்கூடும். முதலீட்டாளர் களுக்கு போனஸ் பங்குகள் தருவதற்குப் பதிலாக, பங்குகளைத் திரும்பப் பெறும்போது, வர்த்தகத்தில் இருக்கும் பங்குகளின் எண்ணிக்கைக் குறைவதால் பங்கு விலை அதிகரிக்கும். அது முதலீட்டாளர்களுக்குப் பயனளிப்பதாக இருக்கும்.”

தொகுப்பு: தெ.சு.கவுதமன்

. கேள்விகளை அனுப்புகிறவர்கள் தங்கள் செல்போன் எண்ணையும் குறிப்பிடவும்.

அனுப்ப வேண்டிய முகவரி: கேள்வி-பதில் பகுதி, நாணயம் விகடன், 757, அண்ணாசாலை, சென்னை-2. nav@vikatan.com

விகடன் லேட்டஸ்ட்

கேள்வி - பதில்: பயன்படுத்தாமல் விட்ட டீமேட் கணக்கில் வர்த்தகம் செய்யலாமா?

தெ.சு.கவுதமன்