Published:Updated:

வேல்யூ இன்வெஸ்டிங்!

வேல்யூ இன்வெஸ்டிங்!

பிரீமியம் ஸ்டோரி
வேல்யூ இன்வெஸ்டிங்!
வேல்யூ இன்வெஸ்டிங்!

வேல்யூ இன்வெஸ்டிங் என்ற தத்துவத்தைச் சொன்ன பெஞ்சமின் கிரஹாம், இன்வெஸ்டிங் குறித்து எழுதிய புத்தகத்தில், அந்தப் புத்தகத்தைப் படிக்கும் முதலீட்டாளர்களுக்கு அது மூன்று விஷயங்களைச் சொல்லித் தரும் என்று சொல்லியிருந்தார். முதலாவதாக, ஒரு முதலீட்டாளர் சந்தையில் முதலீடு செய்யும்போது வர வாய்ப்பிருக்கின்ற, பின்னாளில் சரி செய்துகொள்ளவே முடியாத நஷ்டங்களைப் பெரும்பாலான தருணத்தில் தவிர்ப்பது எப்படி என்று சொல்லித் தரும்.

இரண்டாவதாக, முதலீட்டாளர்கள் தங்கள் முதலீட்டில் தொடர்ந்து லாபம் பெறுவதற்கான வாய்ப்புகளை அதிகரித்துக் கொள்வது எப்படி என்று சொல்லித் தரும். மூன்றாவதாக, முதலீட்டாளர்கள் அவர்களை அவர்களே சரிவரப் புரிந்துகொள்ளாமல் ஏமாந்துபோகின்ற தருணங்களை குறைத்துக் கொள்வது எப்படி என்று சொல்லித் தரும்.

##~##
இதில், பின்னாளில் சரி செய்துகொள்ள முடியாது என்பது சந்தையில் இழந்த, கையிலிருக்கும் பணத்தைக் குறிப்பதாகும். ஒரு ஷேரை வாங்கியபிறகு, அதன் விலை இறங்கி நாம் 'ஹோல்ட்’ செய்து வைத்திருக்கும்போது, சந்தையில் வந்த விலைமாற்றத்தால் ஏற்படும் நஷ்டத்தை நோஷனல் லாஸ் (மனதளவிலான நஷ்டம்) என்கிறோம். ஏனென்றால், இறக்கத்தின் அளவு குறைவாக இருக்கும்போது இதை கொஞ்ச நாள் ஹோல்ட் செய்வோம் என்ற எண்ணம் நம்மிடமிருக்கும். எனவே, அந்த ஷேரை நாம் விற்க மாட்டோம். கையிலேயே வைத்திருப்போம். விற்காத வரை அந்த ஷேரில் இருப்பது மனதளவிலான நஷ்டம் மட்டுமே.

ஆனால், இறக்கத்தின் அளவு அதிகமாக இருக்கும்போது நாம் ஷேரை விற்றுவிடுகிறோம். இந்த அதிகப்படியான இறக்கச் சூழ்நிலை யில் ஷேரை விற்கும் நிலைக்குத் தள்ளப்படுவது எதனால்? அந்த ஷேரை வாங்கும்போது தீர்க்கமாக அலசி ஆராய்ந்து முடிவு எடுக்காததால்தான். தீர ஆராய்ந்து ஒரு தீர்க்கமான முடிவு எடுக்கப் பட்டிருந்தால் விற்கும் எண்ணம் வரவே வராது. இப்படி அதிக விலையில் வாங்கிய ஷேர்கள் வேகமான இறக்கத்தைச் சந்தித்து குறைந்த விலையில் விற்கப்படும்போது அதை 'புக்டு லாஸ்’ (பணத்தை இழந்த வகையில் நஷ்டம்) என்கிறோம்.

வேல்யூ இன்வெஸ்டிங்!

மேலே சொன்ன இந்த மூன்று விஷயங்களும் வேல்யூ இன்வெஸ்டராகத் திகழ நினைக்கும் அனைவருக்கும் மிக மிக முக்கியமான ஒன்றாகும். இவை மூன்றும்தான் சாதாரணமாக எந்த ஒரு முதலீட்டிலும் அடிப்படையான விஷயமாகும். இதனைக் கொஞ்சம் விளக்கமாகப் பார்ப்போம்.

என்னதான் கவனமாக இருந்தாலும் முதலீடு செய்த ஷேரின் விலை அவ்வப்போது சந்தையில் நாம் வாங்கிய விலையைவிட குறைவது என்பது தவிர்க்க முடியாத ஒன்று. எந்த ஒரு நிபுணராலும் இதை முழுமையாகத் தவிர்க்கும் வாய்ப்புகளை சொல்லித் தர முடியாது. அதாவது, நாம் வாங்கியபிறகு ஒரு ஷேரின் விலை நாம் வாங்கிய விலையைவிட எந்தக் காரணம் கொண்டும் இறங்கக் கூடாது என்ற கண்டிஷனை யாராலும் போட முடியாது. ஆனால், இதுபோன்ற வாய்ப்புகளை குறைக்கும் முறையில் முதலீடு செய்ய முடியும். அதற்குண்டான முயற்சிகளை முதலீடு செய்வதற்கு முன்னரே நாம் எடுக்க வேண்டியிருக்கும்.

இந்த தவிர்க்க முடியாத விலை இறக்கம் நம் முதலீடுகளில் அடிக்கடி நடந்தால் நம்மைப் பயம் கவ்விக் கொள்ளும். அவ்வாறு பயம் கவ்விக்கொண்டால் நம்மை நாமே ஏமாற்றிக்கொள்ளும் முயற்சிகளில் நாம் இறங்கிவிடுவோம். அதாவது, சந்தையில் அவ்வப்போது வரும் பெரிய இறக்கங்களைக் கண்டு பயந்து சந்தை இன்னும் மிகவும் மோசமாகப் போய்விடும் என நினைத்து வாங்கிய பங்குகளை நஷ்டத்தில் விற்றுவிட்டு வெளியேறிவிடுவோம். இதுபோன்ற நஷ்டங்கள் மீண்டும் சரிசெய்துகொள்ள முடியாத ஒன்றாகும்.  இந்த சரி செய்துகொள்ள முடியாத நஷ்டத்தைக் குறைப்பது வேல்யூ இன்வெஸ்டிங் முறையாகும்.

எப்போதுமே விலை அதிகம் கொடுத்து வாங்கப்படும் முதலீடுகள் சந்தையின் வாலாட்டைல் குணாதிசயத்தால் பயத்தை உண்டு பண்ணும். பயம் எப்போதுமே துணை தேடும். கூட்டமாக இருந்தால் பரவாயில்லை என்ற தோற்றத்தைப் பயம் கொடுக்கும். கூட்டம் என்ன செய்கின்றது என்பதைப் பார்க்கத் தூண்டும். கூட்டம் என்ன செய்கின்றதோ, அதையே செய்யத் தூண்டும். பங்குச் சந்தையில் பெரும்பான்மையினர் செய்வதை ஒரு முதலீட்டாளர் செய்தால் அது பெரும்பாலான நேரம் தவறானதாக இருக்கும் அல்லது பெருத்த லாபத்தைத் தரும் விதத்தில் இருக்காது.

வேல்யூ இன்வெஸ்டிங்!

இந்தப் பொல்லாத சக்கர வளையத்திலிருந்து வெளியே வருவது எப்படி என்ற கேள்விக்கு விடையை முதலீட்டாளர்களைப் புரிந்துகொள்ளச் செய்வதுதான் கிரஹாமின் முக்கிய குறிக்கோளாக இருந்தது. முதலீட்டாளர்கள் முதலீடு செய்யும் விதத்தை அவர் இரண்டு விதமாகப் பிரித்தார். ஒன்று, தொடர்ந்து பங்குகள் குறித்து ஆராய்ச்சி செய்து, பங்குகள், மியூச்சுவல் ஃபண்டுகள் மற்றும் கடன் பத்திரங்களின் கலவையான போர்ட்ஃபோலியோவை உண்டாக்கி மேனேஜ் செய்வது. இரண்டாவது, ஒரு நிரந்தரமான போர்ட்ஃபோலியோவை உண்டாக்கி அதை அப்படியே விட்டுவிடுவது. இதில், முதலாவது முறையை ஆக்டிவ் இன்வெஸ்டிங் என்பார்கள். இரண்டாவது முறையை பேசிவ் அல்லது டிபென்ஸிவ் முறை என்பார்கள். ஆக்டிவ் முறை மிகவும் த்ரில் நிறைந்தது. பேசிவ் முறை கொஞ்சம் மந்தகதியானது. இந்த இரண்டு முறைகளிலும் உள்ள முக்கியமானதொரு வித்தியாசம், முதலாவது முறை மிகவும் அறிவு சார்ந்த மற்றும் தொடர்ந்து மூளைக்கும் நேரத்திற்கும் அதீத வேலை கொடுக்கும் விஷயமாக இருக்கும். இரண்டாவது முறை உணர்ச்சிகளுக்கு வேலை தரும் (பொறுமை/வெறுப்பு/உற்சாகம்) விஷயமாக இருக்கும்.

காலப்போக்கில் இன்றைக்கு வேல்யூ இன்வெஸ்டிங் என்பது மேலே சொன்ன இரண்டின் கலவையாக மாறிவிட்டது. கிரஹாமின் சித்தாந்தத்திற்கு முழுமையாக ஒத்து வராத விஷயமாக இருந்தாலும் சந்தைகளிலும், பிஸினஸ்களிலும் வரும் வேகமான மாறுதல்கள் இந்த ஆக்டிவ்+பாசிவ் கலவைக்கான தேவையை உண்டாக்கிவிட்டது என்றும் சொல்லலாம்.

வேல்யூ இன்வெஸ்டர் என்பவர் பங்குகள் மிகவும் குறைவான விலையில் கிடைக்கும்போது வாங்கிப்போட்டு அபரிமிதமான விலை கிடைக்கும்போது விற்று காசு பார்ப்பவர் என்று அர்த்தம் கொள்ளலாம் என பலமுறை சொல்லி இருக்கிறேன்.' அதெப்படி சார், எல்லா தடவை யும் குறைந்த விலையில் ஷேரை வாங்கி அதிக விலையில் விற்க முடியும்? எப்பவுமே நம்முடைய கணிப்பு சரியாக இருக்கும் என்று சொல்ல முடியுமா என்ற கேள்வி உங்களுக்கு வரும்.

கணிப்புகளைச் செய்வது எப்படி என்று பார்ப்பதற்கு முன் கணிப்புத்திறனை எப்படி பதப்படுத்திக்கொள்வது என்று நீங்கள் கட்டாயம் தெரிந்துகொள்ள வேண்டும். ஏனென்றால், முதலீட்டில் ரிஸ்க் என்பதே கணிப்புத்திறனின் மீது வைக்கும் நம்பிக்கையில் இருந்துதான் ஆரம்பமாகின்றது. முதலீட்டில் இருக்கும் ரிஸ்க் ஒரு அங்கம் என்றால் உங்கள் கணிப்புத்திறன் பெர்ஃபெக்ட்டாக இருக்கும் என்று நீங்கள் வைக்கும் தவறான அல்லது அளவுக்கு அதிகமான நம்பிக்கையில் இருப்பதும் ஒரு ரிஸ்க்தான். முதலீட்டில் இருக்கும் ரிஸ்க், எந்தவிதமான முதலீடுகளை கையில் வைத்திருக்கின்றீர்கள் மற்றும் நீங்கள் எந்த மாதிரியான இன்வெஸ்டர் என்ற இரண்டின் கலவைதான்.

அது என்ன, எந்த மாதிரியான இன்வெஸ்டர் என்கிறீர்களா? ஒரு முதலீடு குறித்து உங்களுக்கு எவ்வளவு தெரியும் என்று நீங்கள் மனதில் நினைத்துக் கொண்டிருக்கின்றீர்களோ (நம்பிக்கையுடன் இருத்தல்) அந்த அளவுக்கு உண்மையிலேயே உங்களுக்குத் தெரியுமா? உண்மையில் தெரிவதற்கும் மனதில் இருக்கும் நம்பிக்கைக்கும் பெரிய வித்தியாசம் இல்லாதிருத்தல் வேல்யூ இன்வெஸ்டிங்கிற்கு மிக அவசியம். அதேபோல் ஒரு முதலீட்டில் நஷ்டம் வந்தால் நான் இந்த அளவுக்கு வருத்தப்படுவேன் என்று நீங்கள் நினைக்கின்றீர்களோ, அதற்கும் நிஜமாகவே நஷ்டம் வந்த சூழ்நிலையில் நீங்கள் படக்கூடிய வருத்தத்தின் அளவிற்கும் பெரிய வித்தியாசம் இல்லாது இருப்பதும் வேல்யூ இன்வெஸ்டிங்கிற்கு மிக அவசியம்.

உங்கள் நம்பிக்கை சரியாக இருக்கும்பட்சத்தில் சரியான முதலீடுகளைச் செய்து லாபத்தை வளரவிட்டு அறுவடை செய்ய முயற்சிப்பீர்கள். நம்பிக்கை குறைவாக இருந்தால் குறைந்த லாபம் வந்தபோதே விற்றுவிட்டு வெளியே வந்துவிடுவீர்கள். நம்பிக்கை ஓ.கே! வருத்தம் எதற்கு அளவிடப்படுகின்றது என்கிறீர்களா?

நீங்கள் முதலீடு செய்யும்போது நான் 10% நஷ்டம் வரை தாங்குவேன் என்று ஒரு மனக் கணக்கு போடுகின்றீர்கள். 10% போனால் பரவாயில்லை என்று முதலீடு செய்யும்போது நினைக்கின்றீர்கள். ஆனால், நீங்கள் முதலீடு செய்தபின் 10% உண்மையாகவே இறங்கிவிடு கின்றது. பயந்து நடுங்கி, வேர்த்து விறுவிறுத்து இன்னும் இறங்கிவிடுமோ என்ற பயத்தில் நஷ்டத்தை புக் செய்கின்றீர்கள். நம்பிக்கை லாபம் பார்க்க உதவும் என்றால் வருத்தம் நஷ்டத்தை புக் செய்ய வைத்துவிடும். இதனால் தான் வருத்தத்தின் அளவீடும் செய்யப்பட வேண்டும் என்பது முக்கியமான விஷயம்.

(முதலிடுவோம்)

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு