Published:Updated:

வேல்யூ இன்வெஸ்டிங் !

பெஞ்சமின் சொல்லும் முதலீட்டு ஃபார்முலா! டாக்டர் எஸ்.கார்த்திகேயன்

பிரீமியம் ஸ்டோரி
 ##~##

வேல்யூ இன்வெஸ்டிங்கிற்கான வாய்ப்புகளை எப்படி கண்டுபிடிப்பது? எப்போதும் வேல்யூ இன்வெஸ்டிங்கிற்கான வாய்ப்புகள் சந்தையில் இருக்குமா? அல்லது எப்போதாவதுதான் வருமா? என்பதுதான் உங்களுடைய அடுத்த கேள்வியாக இருக்கும். ஏனென்றால், மதிப்பைவிட விலை கீழே போகவேண்டுமென்றால் ஏதாவது அசாதாரண சூழ்நிலை ஒட்டுமொத்த சந்தைக்கும் வந்தாக வேண்டும் போலிருக்கின்றதே என்று நீங்கள் நினைக்கலாம். சென்ற வாரங்களில் நாம் பார்த்த உதாரணங்களில் பெரும்பான்மை அந்த மாதிரியானவையாகத்தானே இருந்தது என்றும் நீங்கள் கேட்கலாம்.  

இன்று உலக அளவில் பெரும் பணம் சம்பாதித்த பங்குச் சந்தை முதலீட்டாளர்கள் சந்தையில் சுனாமி வரும்வேளையில் மட்டுமே முதலீடுகளைச் செய்து லாபம் பார்த்திருக்கக் கூடுமோ என்ற சந்தேகமும் உங்களுக்கு வரலாம்.

மேலும், வேல்யூ இன்வெஸ்டிங் கொள்கைகளை கடைப்பிடிப்பவரும் வேல்யூ இன்வெஸ்டிங் என்றாலே நினைவுக்கு வரக்கூடிய அளவுக்கு அதுகுறித்து பேசுபவருமான வாரன் பஃபெட்டே 'எல்லோரும் பங்குகளை விற்கும்போது வாங்குங்கள்! எல்லோரும் பங்குகளை வாங்கும்போது விற்றுவிடுங்கள்!’ என்றுதானே சொல்லியிருக்கிறார். எல்லோரும் விற்கும் காலம் என்றால் அது 2008 போன்ற சந்தை சுனாமி வரும் காலம்தானே! அதுவரை கையில் இருக்கும் பணத்தை பேங்கில் போட்டுவிட்டு காத்திருப்பதா? என்றுகூட நீங்கள் கேட்கலாம்.

சுனாமி தினம் தினம் வருவதில்லையே! அலைகளும் பேரலைகளும்தானே அன்றாடம் வருகின்றது. பணத்தை சொற்ப வட்டிக்கு பேங்கில் போட்டு சந்தைச் சுனாமிக்கு காத்திருந்து முதலீடு செய்தால் ஒரு சந்தைச் சுனாமிக்கும் மற்றொன்றுக்கும் இடையே உள்ள இடைவெளி மிகவும் நீண்டதாக (வருடக் கணக்கானதாக) இருந்துவிட்டால் வேல்யூ இன்வெஸ்டிங் மூலம் நல்ல லாபம் பார்த்தாலும் சொற்ப வட்டி வாங்கிய காலத்தையும் சேர்த்துப் பார்த்தால் லாப சதவிகிதம் ஒன்றும் பெரிதாக இருக்காதே என்றும் நீங்கள் நினைக்கலாம்.

வேல்யூ இன்வெஸ்டிங் !

சந்தை சுனாமி என்பது சந்தையில் இருக்கும் பெஸ்ட் ஆன பங்குகள் பலவற்றை வேல்யூ இன்வெஸ்டிங்கிற்கு தகுதியான பங்குகளாக்கிவிடும்.  பயத்தில் பலரும் விற்க, நல்ல கம்பெனிகள் தள்ளுபடி விலையில் மதிப்பைவிட வெகு குறைவாக கிடைக்கும். அந்த வாய்ப்புக்கு காத்திருக்கும் ஸ்டைல் ஒரு வகை என்றால், சாதாரண நாட்களிலேயே சந்தையில் தனித்தனி கம்பெனிகள் சில பேரலைகளால் அவ்வப்போது பாதிக்கப்படுவதும் வாடிக்கையான ஒன்றுதான்!  

ஒவ்வொரு தொழிலும், ஒவ்வொரு கம்பெனியும் ஏதாவது ஒரு காரணத்தால் சிறிது காலம் மந்தநிலையைச் சந்திக்கும். அப்படிப்பட்ட நிறுவனங்களில் மீண்டுவரும் தகுதி உள்ள நிறுவனங்களில் முதலீடு செய்தாலே போதும். இப்படிப்பட்ட கம்பெனிகளை கண்டறிவது கொஞ்சம் சிரமம்தான் என்றாலும், கண்டுபிடித்த பின்னால் எந்த மாதிரி அளவீட்டைக்கொண்டு அதில் முதலீடு செய்ய முடிவு எடுக்கலாம்?  

பெஞ்சமின் கிரஹாம் இதற்கு சில அணுகுமுறைகளைச் சொல்லி இருக்கின்றார். அதில் ஒன்றான கரன்ட் அசெட் நெட்-நெட் என்கிற முறையைப் பற்றி பார்ப்போம்.

கரன்ட் அசெட் என்றால் என்ன என்பது உங்கள் அனைவருக்கும் தெரியும். சுலபமாகக் காசாக்கக்கூடிய விஷயங்களையே கரன்ட் அசெட் என்று குறிப்பிடுகின்றோம். ஒரு கம்பெனி மற்றவர்களுக்கு தரவேண்டிய மொத்த தொகையையும் (லயபிலிட்டி) கரன்ட் அசெட்டில் இருந்து கழித்துப் பார்க்க வேண்டும். அவ்வாறு கழித்த பின்னர் வரும் தொகை பாசிட்டிவ்வாக இருந்தால் என்ன அர்த்தம்?

கம்பெனியிடம் இருக்கும் பணம் மற்றும் சுலபமாகப் பணமாக்கக்கூடிய அசெட்களை வைத்தே கம்பெனி தரவேண்டிய கடன் (லயபிலிட்டி) மொத்தத்தையும் அடைத்துவிடலாம் எனில் அது நல்ல கம்பெனி. அதிலும் கம்பெனி தரவேண்டிய கடனுக்கும் போக மீதித்தொகை (பணமாக மாற்றப்பட்ட கரன்ட் அசெட்) ஏதும் இருந்தால் அது சூப்பர் கம்பெனிதான்.  அதாவது, மொத்தமாக பணம் தரவேண்டிய அத்தனை பேருக்கும் பணம் தந்தது போக மீதமிருக்கும் ரொக்கமும், பில்டிங், பிளான்ட், மெஷினரி என பல்வேறு விஷயங்களும், பிராண்ட் போன்ற உள்மதிப்பு உள்ளவையும் கம்பெனியில் மீதமிருக்கும். இந்த கம்பெனிகளை வேல்யூ கம்பெனி என்கிறார் அவர்.

வேல்யூ இன்வெஸ்டிங் !

இன்னமும் ஒருபடி மேலேபோன கிரஹாம், இவ்வாறு லயபிலிட்டிகளை கொடுத்தபின்னர் இருக்கும் தொகையை கம்பெனி வெளியிட்டி ருக்கும் ஒவ்வொரு ஷேருக்கும் எவ்வளவு வருகின்றது என்று வகுத்துப் பார்க்க வேண்டும் என்கிறார்.

உதாரணத்திற்கு, ஒரு கம்பெனியின் கரன்ட் அசெட் 100 கோடி ரூபாய். அதன் லயபிலிட்டிகள் அனைத்தும் சேர்த்தால்

70  கோடி. நெட்-நெட் கரன்ட் அசெட் முறையில் மீதி 30 கோடி வரும். அந்த கம்பெனியின் ஷேர் கேப்பிட்டல் 3 கோடி. ரூபாய் பத்து மதிப்புள்ள 30 லட்சம் ஷேர்கள். இந்த 30 லட்சம் ஷேர்களை கொண்டு நெட்-நெட் முறையில் மீதம் இருக்கும்

30 கோடியை வகுத்தால் ஒரு ஷேருக்கு முறையே 100 ரூபாய் வரும். இந்த கம்பெனி ஷேரின் விலை சந்தையில் 33 ரூபாய்க்குக் கிடைத்தால் அதை  உடனடியாக வாங்கிப்போடலாமே என்பதுதான் கிரஹாமின் வாதம்.

எப்படி என்று கேட்கிறீர்களா? கரன்ட் அசெட்கள் அனைத்தையும் காசாக்கினால் கிடைக்கும் பணம் 100 கோடி. லயபிலிட்டிகள் அனைத்தையும் அந்த 100 கோடியைக்கொண்டு செட்டில் செய்தால் (67 கோடி கடன்,

3 கோடி ஈக்விட்டி)  மீதம் வருவது 30 கோடி. சந்தையில் நீங்கள் அந்தப் பங்குதனை 33 ரூபாய் தந்து வாங்குகின்றீர்கள். நினைவிருக்கட்டும், கம்பெனியில் ஃபிக்ஸட் அசெட்கள் அப்படியே முழுமையாக இருக்கின்றது. கரன்ட் அசெட் மட்டுமே காசாக மாற்றப்பட்டுள்ளது. கரன்ட் அசெட் காசாக மாற்றப்பட்டு லயபிலிட்டியை செட்டில் செய்தபிறகு மீதமிருக்கும் தொகையை மொத்த ஷேர்களுக்கும் பங்கிட்டாலே ஒரு ஷேருக்கு 100 ரூபாய் கிடைக்கும். ஒரு ஷேருக்கு 100 ரூபாய் கிடைக்கக்கூடிய சூழலில் அந்த கம்பெனியின் ஷேர்களை நீங்கள் 33 ரூபாய் தந்துதான் வாங்குகின்றீர்கள். அப்படி 33 ரூபாய் தந்து வாங்கும்போது ஒவ்வொரு ஷேருக்கும் நீங்கள் 100 ரூபாய் அளவுக்கு உரிமையாளராக (கேஷ்) மாறிவிடுகின்றீர்கள்.

இதையும் தாண்டி ஏற்கெனவே சொன்னபடி, கம்பெனியின் ஃபிக்ஸட் அசெட்கள் வேறு அப்படியே இருக்கின்றது. அதன் மதிப்பு மொத்தமும் இலவசமாக உங்களுக்கு வரப்போகின்றது. இச்சூழ்நிலையில் இதுபோன்ற கம்பெனிகளில் முதலீடுகளை கண்ணை மூடிக்கொண்டு செய்யலாம். சந்தை படு ஹீட்டாய் இருக்கும்போது இதுபோன்ற வாய்ப்புகள் கண்ணில் தென்பட வாய்ப்பேயில்லை. கொஞ்சம் பயம் சந்தையில் உலாவும்போதும், கம்பெனிகள் எதிர்பாராத காரணத்தால் செயல்பாட்டில் தீவிர சுணக்கத்தைச் சந்திக்கும்போதும் இதுபோன்ற நிலைக்கு வாய்ப்பு இருக்கின்றது.

(முதலிடுவோம்)

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு