Published:Updated:

காலத்தே செய்தால் கவலை இல்லை!

பெற்றோருக்கான நிதித் திட்டமிடல்...நிதி ஆலோசனை

பிரீமியம் ஸ்டோரி

கூட்டுக் குடும்ப கலாசாரம் என்பது இன்றைக்கு பல வீடுகளில் இல்லை. எனவே, பெரும்பாலான வீடுகளில்  வயதான பெற்றோர் தனியாகத்தான் வாழ்கிறார்கள். இப்படி தனியாக இருக்கும்போது அவர்களின் தேவைகள் மிக அதிகமாக இருக்கும். இந்த தேவைகளை நிறைவேற்றிக்கொள்ள அவர்கள் தங்கள் பிள்ளைகளையே சார்ந்திருக்க வேண்டிய நிலை உள்ளது. சம்பாதிக்கிற வருமானம் தன் குடும்பச் செலவுகளுக்கே சரியாக இருக்கிறது என்று நினைத்து ஒதுங்கிவிடாமல், தங்களை வளர்த்து ஆளாக்கிய தங்கள் பெற்றோரின் தேவைகளையும் பூர்த்தி செய்வது பிள்ளைகளின் கடமை.

இதற்கான நிதித் திட்டமிடலை பிள்ளைகள் செய்யவேண்டியது அவசியம். பெற்றோர்களுக்கான நிதித் திட்டமிடலை எப்படி செய்யலாம் என்பது பற்றி சொல்கிறார் நிதி ஆலோசகர் யூ.என்.சுபாஷ்.

காலத்தே செய்தால் கவலை இல்லை!

இன்ஷூரன்ஸ்!

பணி ஓய்வுபெறும் பெற்றோருக்கு அவர்களின் பதவிக்கு ஏற்ப குறிப்பிட்ட தொகை கிடைக்கும். இதை வைத்து அவர்களின் இரண்டு அல்லது மூன்று ஆண்டுகளின் தேவைகளை நிறைவேற்றிக் கொள்வார்கள். அதன்பிறகு ஏற்படும் செலவுகளைச் சமாளிக்க பிள்ளைகள் கட்டாயம் திட்டமிட வேண்டும்.

பெற்றோரின் மிக முக்கியமானத் தேவை என்பது மருத்துவச் செலவுகள்தான். இதற்காக நீங்கள் தனியாக எந்த இன்ஷூரன்ஸ் பாலிசியும் எடுக்கத் தேவையில்லை. அவர்கள் பணியில் இருக்கும்

காலத்தே செய்தால் கவலை இல்லை!

போது கட்டாயம் ஏதாவது ஒரு குரூப் ஹெல்த் இன்ஷூரன்ஸ் பாலிசி எடுத்திருப்பார்கள். அதே இன்ஷூரன்ஸ் நிறுவனத்தில் அதே பாலிசியைத் தொடரலாம். பணிபுரிந்த நிறுவனத்திடம் இருந்தும் கடிதம் பெற்றுக்கொடுத்தால், குரூப் பாலிசியைத் தனியாகத் தொடரவும் வாய்ப்பு உள்ளது.

இதில் ஏற்கெனவே உள்ள நோய்களுக்கும் க்ளைம் கிடைக்கும் என்பது கூடுதல் அம்சம். பிரீமியத்தில் எந்த சலுகையும் கிடைக்காது. இந்த பிரீமியத் தொகைக்கு 80டி பிரிவில் கீழ் வருமான வரிச் சலுகை கிடைக்கும். உங்களின் பெற்றோர் மூத்த குடிமக்களாக இருந்தால் வருடத்திற்கு 20,000 ரூபாய்க்கும், மற்றவர்களுக்கு 15,000 ரூபாய்க்கும் வரி விலக்கு கிடைக்கும். ஓய்வுக்காலத்திற்குப் பிறகு அவர்களுக்கு டேர்ம் இன்ஷூரன்ஸ் தேவையில்லை. ஏனெனில் வருமான இழப்பை ஈடுகட்டத்தான் டேர்ம் இன்ஷூரன்ஸ். எனவே, இதற்காக பணத்தை வீணாக்காதீர்கள்.

இன்ஷூரன்ஸ் பாலிசிகளில் சில மருத்துவத் திற்கு மட்டும்தான் க்ளைம் கிடைக்கும். அவர் களின் மற்ற தேவைகளுக்காக நீங்கள் ஒவ்வொரு மாதமும் குறிப்பிட்ட தொகையை ஏதாவது ரிஸ்க் குறைந்த திட்டத்தில் எஸ்.ஐ.பி. முறையில் சேமித்து வைக்கலாம்.

கிஃப்ட்!

பெற்றோரின் பிறந்த நாள், திருமண நாட்களுக்கு ஏதாவது பரிசு தர நினைத்தால் அதற்காக முன்கூட்டியே திட்டமிடுங்கள். அதற்காக எம்.ஐ.பி. (Monthly Income Plan) மூலம் முதலீடு செய்யலாம். இந்தத் திட்டத்தில் டிவிடெண்ட் தொகைக்கு வருமான வரிச் சலுகை கிடைக்கும்.

மேலும், பெற்றோர் பணியில் இருக்கும்போது பி.பி.எஃப். திட்டத்தில் கணக்கு வைத்திருந்தால் அதை அப்படியே தொடரலாம். ஏனெனில், இதில் 8.8 சதவிகிதம் வட்டி வருமானம் கிடைக்கும். இந்தக் கணக்கிலிருந்து தேவைப்படும் பணத்தை வருடத்திற்கு ஒருமுறை எடுத்துக்கொள்ளலாம். இந்தத் தொகைக்கு வரி கிடையாது.

சேமிப்பு!

நீங்கள் நிதி நிறுவனங்களில் வீட்டுக் கடன் வாங்குவதைவிட உங்களின் பெற்றோரிடம் உள்ள பணத்தில் ஒரு பகுதியை கடனாகப் பெறலாம். உங்கள் பெற்றோர் வைத்திருக்கும் பணம் வங்கி ஃபிக்ஸட் டெபாசிட்டில் போட்டால் அதிகபட்சம் 9 முதல் 9.5 சதவிகிதம் வரை வட்டி கிடைக்கும். அதே பணத்துக்கு நீங்கள் 10.5 முதல் 11 சதவிகிதம் வரை வட்டி தரலாம். இந்த வட்டிக்கு உங்களுக்கு வரிச் சலுகை கிடைக்கும். ஆனால், பெற்றோர் வட்டியை வருமானமாகக் காட்டி வரி வரம்பிற்கு மேல் போனால் வரிச் செலுத்த வேண்டியிருக்கும்.  ஒருவேளை நீங்கள் நகைகளை அடகு வைத்து பணத்தைத் தந்திருந்தீர்கள் எனில் உங்களுக்கு வருமான வரிச் சலுகை கிடைக்காது. இப்படி செய்வதன் மூலமாக பெற்றோருக்கு கூடுதல் வருமானமும் கிடைக்கும், உங்களுக்கு வரிச் சலுகையும் கிடைக்கும்.

பிள்ளைகள் சிறுவர்களாக இருக்கும்போது பெற்றோர்கள்தான் கவனிக்கிறார்கள். வயதான காலத்தில் அவர்களை கவனிக்க வேண்டியது நம் கடமை என்பதைப் புரிந்துகொண்டால், அதற்கான திட்டமிடலைச் செய்ய நாம் தயங்க மாட்டோம்!

- இரா.ரூபாவதி.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு