Published:Updated:

செக்டார் அனாலிசிஸ்!

வங்கி... வட்டி... லாபம்!

செக்டார் அனாலிசிஸ்!

வங்கி... வட்டி... லாபம்!

Published:Updated:
செக்டார் அனாலிசிஸ்!

ங்கிகளின் மூலப்பொருள் பணம் என்பதையும், அதன் கொள்முதல் விலை குறைவாக இருப்பது நல்லது எனவும் கடந்த இதழில் பார்த்தோம். விலை குறைவாக இருப்பது, நாம் யாரிடமிருந்து கொள்முதல் செய்கிறோம் என்பதைப் பொருத்தே அமையும்.

மூலப்பொருளான பணத்தை வங்கிகள் பொதுமக்களிடமிருந்தும்,  மத்திய ரிசர்வ் வங்கியிடமிருந்தும் கொள்முதல் செய்கின்றன.

நாம் ஃபிக்ஸட் டெபாசிட்டாகவும், சேவிங்ஸ் அக்கவுன்டாகவும், கரன்ட் அக்கவுன்டாகவும் வங்கிகளில்

செக்டார் அனாலிசிஸ்!

வைத்திருக்கும் பணம்தான் முதலாவது வகை. நம்மைப் பொறுத்தவரையில், அது டெபாசிட்தான் என்றாலும், வங்கிகளைப் பொறுத்தவரை திருப்பித் தரவேண்டிய கடன்தான். அதற்கு அவர்கள் நமக்குத் தரும் வட்டிதான் அவர்களின் மூலப்பொருளின் அடக்கவிலை. அது எவ்வளவு?  

கரன்ட் அக்கவுன்டாக இருப்பின் பொதுவாக வட்டி தரப்படுவதில்லை.  சேமிப்புக் கணக்காக இருப்பின் வட்டி மிகக் குறைவு (4%-5%). நீண்டகால/வருங்கால வைப்பு நிதியாக இருப்பின் வட்டிவிகிதம் கொஞ்சம் அதிகம் (8%-9%).  

முதல் இரண்டிலும் இருக்கும் இருப்பு, வாடிக்கையாளர் எப்போது கேட்டாலும் உடனடியாகத் திருப்பிக் கொடுக்கப்படவேண்டிய குறுகிய கால பணம் என்பதால் வட்டி இல்லை அல்லது குறைவு.

ஆக, கரன்ட் அக்கவுன்ட் மற்றும் சேவிங்ஸ் அக்கவுன்ட் அதிகம் வைத்திருக்கும் வங்கிகளுக்கு மூலப்பொருளின் அடக்க விலை குறைவாகத்தானே இருக்கும். இதைக் கணிக்க உதவுவதுதான் 'காஸா’ (CASA – Current Account Savings Account Ratio). அது என்ன காஸா?

ஒரு வங்கியின் கைவசமிருக்கும் மொத்த டெபாசிட்களில் கரன்ட் அக்கவுன்ட் மற்றும் சேவிங்ஸ் அக்கவுன்டின் சதவிகிதம் எவ்வளவு எனச் சொல்வது இந்த ரேஷியோ. இது அதிகமாக அதிகமாக வங்கிக்கு நல்லது. 'காஸா’ அதிகரித்தால் வங்கிக்குக் 'காசா’கக் கொட்டும் என்பது அடுத்த விதி.

வங்கியில் டெபாசிட் அதிகரித்தால் காஸாவும் அதிகரிக்கும் என்பது கிடையாது; ஒரு குறிப்பிட்ட காலாண்டில் அல்லது ஆண்டில் ஒரு வங்கிக்குள் வாடிக்கையாளர்களின் டெபாசிட்கள் அதிகரித்திருப்பது என்பது நல்ல விஷயம்தான், மேலோட்டமாகப் பார்த்தால். ஆனால், அந்த டெபாசிட்கள் எந்த வடிவில் வந்திருக்கின்றன என்பதைப் பொறுத்துதான் வங்கியின் லாபம் அதிகரிக்குமா, இல்லையா எனச் சொல்லலாம்.

பெரும்பான்மையான வரவு எல்லாமே ஃபிக்ஸட் டெபாசிட்களாக இருந்தால் வங்கிக்கு மூலப்பொருளின் விலை அதிகம்தானே! மாறாக, பெரும்பான்மையான வரவு எல்லாம் 'காஸா’வாக இருந்தால், மூலப்பொருளின் அடக்கவிலையும் கணிசமாகக் குறையும்.

ஒரு நடைமுறை உதாரணத்தைப் பார்க்கலாம்; நடப்பு ஆண்டில், செப்டம்பர் மாதத்தோடு முடிவடைந்த காலாண்டில் கரூர் வைஸ்யா வங்கியின் டெபாசிட் வளர்ச்சி 23%. இதில், 'காஸா’ மட்டும் 2% அதிக வளர்ச்சி அடைந்து 22 சதவிகிதமாக அமைந்தது; அவ்வங்கியின் 'நிம்’மும் இதற்கு முந்தைய காலாண்டில்,

2.83 சதவிகிதமாக இருந்தது, இப்போது அதிகரித்து 3.06 சத விகிதமாக உயர்ந்திருக்கிறது.

2010-11-ல் 23 சதவிகிதத்துக்கு மேல் இருந்த இவ்வங்கியின் 'காஸா’, 2011-12ல் 19 சதவிகிதத்தை ஒட்டிக் குறைந்தது. எனவே, அடுத்த காலாண்டிலேயே, 'நிம்’மும் 3 சத விகிதத்துக்குக் கீழே வீழ்ந்தது.

ஆனால், ஒரு நல்ல விஷயம்: இவ் வங்கியின் பெரும்பான்மையான காஸ்ட்லி டெபாசிட்கள் வரும் ஆண்டிலேயே முதிர்வடைகின்றன. இனி புதுப்பிக்கப்படும் டெபாசிட்கள் அனைத்தும் வட்டி குறைவானதாகவே இருக்கும் வாய்ப்போடு, 'காஸா’ சதவிகிதமும் அதிகரிப்பதால், வரும் ஆண்டில் 'நிம்’மும் அதிகரிக்கும் என எதிர்பார்க்கலாம்.

செக்டார் அனாலிசிஸ்!
செக்டார் அனாலிசிஸ்!

'காஸா’ 50 சதவிகிதத்தை ஒட்டி உள்ள வங்கிகள் பாரத ஸ்டேட் வங்கியும் ஹெச்.டி.எஃப்.சி. வங்கியும். மற்ற வங்கிகளெல்லாம் இவற்றுக்கு அருகில்கூட வரமுடியாது. காஸா அதிகமாக உள்ள இதர வங்கிகள் எவை தெரியுமா? பொதுத்துறை வங்கிகளைப் பொறுத்தவரை:

பஞ்சாப் நேஷனல் வங்கி, பேங்க் ஆஃப் பரோடா, கனரா வங்கி, பேங்க் ஆஃப் இந்தியா. தனியார் வங்கிகளைப் பொறுத்தவரை: ஐ.சி.ஐ.சி.ஐ. வங்கி, ஆக்ஸிஸ் வங்கி, கோட்டக் மஹிந்திரா வங்கி, ஃபெடரல் வங்கி.

ஒவ்வொரு வங்கியின் செயல் பாடுகளையும் தனித்தனியாக அளவிட்டு ஒப்பிடக்கூடிய முக்கியமான அளவுகோல்களைப் பார்த்தோம் இதுவரை. பாகுபாடில்லாமல் ஒட்டுமொத்த வங்கித் துறையையும் பாதிக்கக்கூடிய சில அம்சங்களைப் பார்க்கலாம் இனி.

வங்கி - வட்டி: இரண்டும் பிரிக்க முடியாத வார்த்தைகள்; வட்டி விஷயத்தைப் பற்றி பேசுகையில் அதை ஒட்டிய சில வார்த்தைகளையும் கெட்டியாகப் புரிந்துகொள்வதும் அவசியம்.

REPO Rate: அவ்வப்போது வங்கிகளுக்குத் தேவைப்படும் பணத்தை மத்திய ரிசர்வ் வங்கியிடம் இருந்து கடனாகப் பெறும் வசதி உண்டு; அப்படி கடனாகப் பெறும் தொகைக்கு வங்கிகளிடமிருந்து மத்திய ரிசர்வ் வங்கி வசூலிக்கும் வட்டியே 'ரெபோ ரேட்’. 'ரெபோ ரேட்’ குறைந்தால் வங்கிகளுக்குக் கொண்டாட்டம்தான், செலவு கம்மி என்பதால்.  

Reverse REPO Rate : சிலசமயங்களில் வங்கிகளிடம் தேவைக்கு அதிகமாகப் பணம் கையிருப்பு இருக்கலாம்; வெளியில் வட்டிக்குக் கொடுக்க முடியாதச் சூழல் நிலவலாம். அப்போது, ரிசர்வ் வங்கி கையில் அப்பணத்தைக் கொடுத்து வைப்பதே பாதுகாப்பானது எனத் தீர்மானிக்கவும் செய்யலாம். அல்லது ரிசர்வ் வங்கிக்கேகூட ஒருவேளை பணம் தேவையாக இருக்கலாம்; வங்கிகளிடமிருந்து பணத்தைக் கடனாகப் பெறலாம். எப்படி இருப்பினும், வங்கிகள் ரிசர்வ் வங்கியிடம் கொடுத்து வைக்கும் பணத்திற்கு ரிசர்வ் வங்கி கொடுக்கும் வட்டிதான் 'ரிவர்ஸ் ரெபோ ரேட்’.

'ரிவர்ஸ் ரெபோ ரேட்’ அதிகரித்தால்தான் வங்கிகளுக்குக் கொண்டாட்டம், வருவாய் அதிகரிக்கும் என்பதால்.

'சுபிட்சமான’ காலகட்டத்தின் தொடர்ச்சியான 2008-ல் 9 சதவிகிதமாக உச்சத்தில் இருந்தது ரெபோ ரேட்; அப்போது ஏற்பட்ட சர்வதேச பொருளாதாரச் சிக்கலால், தடாலடியாக இறக்கப்பட்டு அடுத்த ஆண்டே (2009-ல்) 4.75 சதவிகிதமாக இறக்கப்பட்டு, பின்னர் இரண்டே ஆண்டுகளில் தொடர்ந்து அதிகரித்து சென்ற ஆண்டு 8.50 சதவிகிதத்தைத் தொட்டது. அதற்குப் பிறகு இப்போது மீண்டும் இறங்குமுகம்தான் (8%).

2009-ல் 3.25 சதவிகிதம் என குறைந்த ரிவர்ஸ் ரெபோ ரேட், இந்த ஆண்டு 7 சதவிகிதத்தைத் தொட்டது.

பொதுவாக, ரெபோ ரேட்டும் ரிவர்ஸ் ரெபோ ரேட்டும் ஒரே திக்கில்தான் பயணிக்கும்; ஏதாவது ஒன்றை அதிகரித்தால் மற்றொன்றும் அதிகரிக்கும், ஒன்றைக் குறைத்தால் மற்றொன்றும் குறையும், பெரும்பான்மையான நேரங்களில். ஆனால், பயணிக்கும் திக்குதான் ஒன்றே தவிர, ரயில் தண்டவாளம்போல ஒரே அளவில் அல்ல. சில நேரங்களில் ஒன்றில் மட்டும் மாற்றம் செய்யப்பட்டு, மற்றொன்றில் எந்த மாற்றமும் இல்லாமல் விட்டிருக்கிறார்கள். அல்லது இரண்டிலும் வெவ்வேறு அளவில் மாற்றங்கள் செய்திருக்கிறார்கள். மேலே உள்ள சார்ட்டை பார்த்தால் புரியும்.

இதுவரை, கடன் கொள்கையை மறுபரிசீலனை செய்யும் ஒவ்வொருமுறையும், ரெபோ ரேட் மற்றும் ரிவர்ஸ் ரெபோ ரேட் என இரண்டு வட்டி விகிதங்களில் ஏற்படும் மாறுதல்களை தனித்தனியே அறிவித்து வந்திருக்கிறது ரிசர்வ் வங்கி. இவற்றைக் கணக்கிட்டு வங்கியின் லாப நஷ்டங்களில் ஏற்படும் மாற்றங்களை யூகிக்க சாமானிய முதலீட்டாளர்களுக்கு சிரமம்தான். வங்கிகளுக்கும் நடைமுறைச் சிக்கல்கள்தான்.

இதை எளிமைப்படுத்தி, இந்தக் குழப்பத்தைத் தீர்க்க ரிசர்வ் வங்கி ஒரு நல்ல ஏற்பாட்டைச் செய்துள்ளது இப்போது. இந்த ஆண்டு முதல், தண்டவாளங்களைப் போல இரண்டும் ஒரே திக்கில் மட்டுமல்ல, ஒரே வேகத்திலும்தான் பயணமாகும்.

இனி ரெபோ ரேட் என்ன என்பதை மட்டுமே ரிசர்வ் வங்கி அறிவிக்கும்; ரெபோ ரேட்டைவிட ஒரு சதவிகிதம் குறைவாக இருக்கும் ரிவர்ஸ் ரெபோ ரேட். அவ்வளவுதான்!

PLR (Prime Lending Rate): பி.எல்.ஆர். என்பது வங்கிகள் தங்களது உயர்தர வாடிக்கை யாளர்களுக்குக் கொடுக்கும் கடன் மீது வசூலிக்கும் வட்டி எனச் சொல்லலாம்; பணம் உறுதியாகத் திரும்பிவரும் என்னும் நம்பிக்கையின் அடிப்படையிலும் வழக்கமான வாடிக்கையாளர் என்னும் அடிப்படையிலும் இப்படி.

BPLR (Benchmark Prime Lending Rate) என்பது வங்கிக் கடன்களில் ஒளிவுமறைவற்ற தன்மையைக் கொண்டுவரும் முயற்சியாக

2003-ம் ஆண்டு அறிமுகமானது இந்த அடிப்படை அளவுகோலான வட்டிவிகிதம். வங்கிகள் அறிவித்த விகிதத்திற்கும் கீழே குறைவாக கடன் கொடுக்க ஆரம்பித்ததன் விளைவு, இந்த நடைமுறை ஜெயிக்கவில்லை.

Base Rate: 2010-ல் இந்தமுறை மாற்றப்பட்டு புதிதாக பேஸ் ரேட் அறிமுகப்படுத்தப்பட்டது. இந்தக் குறைந்தபட்ச வட்டிவிகிதத்தை முன்னரே ஒவ்வொரு வங்கியும் அறிவிக்க வேண்டும். இதற்குக் கீழே கடன் கொடுக்கக் கூடாது.  

இனி, இலகுவாகக் காசாக்கக் கூடிய வகையில் அதிபாதுகாப்பான குறிப்பிட்ட பத்திரங்களில் செய்திருக்க வேண்டிய முதலீடான –

எஸ்.எல்.ஆர்., ரொக்கக் கையிருப்பு சதவிகிதம் –

சி.ஆர்.ஆர்., செயல்படாத/வருவாய் ஈட்டித்தராதச் சொத்துக்கள் – என்.பி.ஏ., ஆகியவற்றின் தாக்கம் வங்கிப் பங்குகளில் எப்படி இருக்கும் என்பதை அடுத்த வாரம் பார்ப்போம்.

(அலசுவோம்)