Published:Updated:

வேல்யூ இன்வெஸ்டிங் - 24

வேல்யூ இன்வெஸ்டிங் - 24

வேல்யூ இன்வெஸ்டிங் - 24

வேல்யூ இன்வெஸ்டிங் - 24

Published:Updated:
வேல்யூ இன்வெஸ்டிங் - 24
##~##
வே

ஒட்டுமொத்த விகடனுக்கும் ஒரே ஷார்ட்கட்!

ல்யூ இன்வெஸ்டிங் என்றால் என்ன என்பதைப் பற்றியும், முதலீட்டாளர் நடுவே நிலவும் பல்வேறுவிதமான எண்ணங்கள் மற்றும் கருத்துக்களையும் இந்தத் தொடரில் அலசினோம். எது வேல்யூ இன்வெஸ்டிங், எது வேல்யூ இன்வெஸ்டிங் இல்லை, எந்த கம்பெனி வேல்யூ இன்வெஸ்டிங்கிற்கு உகந்தது, எது அதற்கு சரிப்பட்டு வராதது என்றும் விளக்கமாகப் பார்த்தோம்.

வேல்யூ இன்வெஸ்டிங் சித்தாந்தத்தை முழுமையாக உபயோகித்து முதலீடு செய்யும் வாரன் பஃபெட் பல்வேறுவிதமான வேல்யூ இன்வெஸ்டிங் குறித்த சிந்தனை களையும் அவர் அதைச் செயலாக்கும் விதத்தையும் சொல்லியிருக்கின்றார். சிறந்த முதலீட்டாளராக விரும்பும் ஒருவர் குறுகியகால அளவீட்டில் சந்தை எப்படி இருக்கும் என்பதைக் கணிக்க முயற்சிக்கவே கூடாது என்பதைத் திட்டவட்டமாகக் கூறியுள்ளார்.

குறுகியகாலத்தில் சந்தை எப்படியிருக்கும் என்ற கணிப்பு ஒரு முதலீட்டாளரைப் பொறுத்தவரை, விஷத்தைப் போன்ற ஒன்று. குறுகியகால கணிப்பு என்ற விஷத்தைக் குழந்தைகளுக்கு எட்டாத உயரத்தில் பத்திரமாக, நாம் வீட்டில் எலி மருந்து, கரப்பான் பூச்சி மருந்துகளைப் பூட்டி வைக்கின்றோமோ, அவ்வாறு பூட்டி வைக்க வேண்டும்.

ஏனென்றால், வயது முதிர்ந்திருந்தபோதும் முதலீட்டாளராகிய நாம் அடிக்கடி குழந்தைகளைப்போல் நடந்துகொள்ள எத்தனிப்போம் என்று சொல்லியுள்ளார். குறுகியகாலத்தில் சந்தையின் போக்கு எப்படியிருக்கும் என்ற கணிப்பு அவ்வளவு மோசமான விஷயம் என்பதை முதலீட்டாளராகிய நீங்கள் நிச்சயம் புரிந்துகொள்ள வேண்டும்.

முதலீட்டாளராக நம்முடைய அன்றாட வாழ்க்கையில் நாம் எதிர்கொள்ளும் முக்கிய விஷயம் (டிவி, பத்திரிகை, நண்பர்கள்...) இதுவாகத்தான் இருக்கும். சந்தை நாளை எப்படியிருக்கும், அடுத்த மாதம் எப்படியிருக்கும் என்பதுதான் நம்முடைய பேச்சாகவும், எதிர்பார்ப்பாகவும் இருக்கும். டிரேடர்களாக இருந்தால் இதுபோன்ற எதிர்பார்ப்புகளும், கவனங்களும் உதவியாக இருக்கும். முதலீட்டாளர்களாக இருக்கும்பட்சத்தில் இந்த எண்ணமும் எதிர்பார்ப்பும் உபத்திரவமாக முடியும்.

வேல்யூ இன்வெஸ்டிங் - 24

மனிதர்களாகிய நாம் பெரும்பான்மை யாக உணர்ச்சிகளுக்கு கட்டுப்பட்ட நடவடிக்கைகளைக் கொண்டவர்களாகத் திகழ்கின்றோம். முதலீட்டில் உணர்ச்சிக்குக் கட்டுப்படாமல் அறிவுசார் விஷயங்களுக்குக் கட்டுப்பட்டால் மட்டுமே லாபம் பார்க்க முடியும் என்பதும் வேல்யூ இன்வெஸ்டிங்கின் சாராம்சம்.

முதலீட்டில் என்ன உணர்ச்சி என்று நீங்கள் கேட்கலாம். கொஞ்சம் விரிவாகப் பார்த்தால் அது என்ன என்று உங்களுக்குப் புரியும். பொதுவான மனித குணம் என்னவென்றால், நமக்குப் பிடித்த ஒரு பொருளைப் பற்றி நமக்குப் பிடித்தவாறே நம்பிக்கொள்வது. அதைச் சுற்றி எத்தனை விஷயங்கள் வெளிப்படையாகத் தெரிந்தாலும் அதையெல்லாம் மறந்து நமக்குப் பிடிக்கின்றது என்பதற்காக அதில் உள்ள பாசிட்டிவ் விஷயங்களை மட்டுமே ஆதரித்துப் பேசுவது.

உதாரணத்திற்கு, நம் பிள்ளை களிடமோ, நம் கீழ் வேலை பார்க்கும் நமக்குப் பிடித்தமான ஒருவரிடமோ வெளிப்படையாகத் தெரியும் அளவிற்கு குறைகள் சில இருந்தாலும் அவர்களைப் பிடித்திருப்பதால்தான் அவர்களுடைய பாசிட்டிவ் சைடை மட்டுமே மனதில் நிறுத்தி அவர்கள் சிறு தவறுகள் செய்யும் போதெல்லாம் தண்டனை கொடுக்காமல் இருக்கின்றோம் என்கிறது சைக்காலஜி.

இந்த லாஜிக்கை நாம் ஸ்டாக் மார்க்கெட்டிலும் செயல்படுத்திவிடுகின்றோம். நமக்குப் பிடித்த கம்பெனியை வாங்கிப்போட்டுவிடுகின்றோம். நம் கையில் தாத்தா விட்டுப்போன இடத்தை விற்று வந்த பணம் புரளுவதால் நாடே நம்மைப்போல் சுபிட்சமாக இருக்கின்றது என்று நினைத்துக் கொண்டு, அதனால் பொருளாதாரம் குறித்த எந்த குறியீட்டையும் பார்க்காமல் சந்தை ஏறும் என்று நினைத்து முதலீடு செய்கின்றோம். சில சமயம் முதலீடு செய்யவேண்டும் என்ற ஆர்வத்தை மட்டுமே முதலீடாக வைத்து அறிவுசார் விஷயங்களை மறந்து முதலீடு செய்கின்றோம். இது அனைத்துமே தவறு என்பதுதான் வேல்யூ இன்வெஸ்டிங் சித்தாந்தம்.

சரி, இப்படி உணர்ச்சிவசப்பட்டு அந்தப் பங்கை வாங்கிவிட்டோமே? அந்த ஷேர் கொஞ்சநாள் இருந்துவிட்டுப் போகட்டும் என்று நினைப்போமா என்றால் இல்லை. ஏற்கெனவே நம்முடைய முதலீட்டு முடிவு ஆராய்ந்து எடுக்கப்படாமல் உணர்ச்சி வசப்பட்டு எடுக்கப்பட்டிருப்பதால் இது (ஏற்கெனவே செய்திருக்கும் முதலீடு) சரிப்பட்டு வராது என்ற முடிவையும் உடனடியாக எடுத்துவிடுவோம். ஏனென்றால் உடனடியாக விலை ஏறும் என்ற எமோஷனலாக நாம் முடிவு எடுத்தோம். அப்படி எடுக்கப் பட்ட முடிவுக்கு மாறாக சந்தை இறங்க ஆரம்பிக்கும்போது ஏன் இறங்குகின்றது என்பதற்கான காரண காரியங்கள் நம் மூளைக்கு எட்டிவிடும். மூளை நாம் எமோஷனலாக எடுத்த முடிவு தவறு என்பதை உடனுக்குடன் புரிந்துகொண்டு வாங்கிய ஷேரை உடனடியாக நஷ்டத்தில் விற்கச் சொல்லி அதைச் செயலாக்கியும் விடும்.

இதையெல்லாம் தாண்டி மனித இயல்பு என்பதே மிகவும் குறுகியகால அடிப்படையில் (ஷார்ட் டேர்ம் ஓரியன்டேஷன்) செயல்படுவ தேயாகும். ஏனென்றால், தற்சமயம் நம்முன்னே இருக்கும் விஷயங்களை அலசிப்பார்த்து, ஷார்ட் டேர்மில் என்ன நடக்கும் என்று சுலபமாகக் கண்டுபிடித்து விடலாம் என்ற எண்ணம் நம்மிடையே எப்போதும் மேலோங்கி நிற்கின்றது. லாங் டேர்மில் என்னவாகும் என்று நினைத்தால் அதற்கு ஏகப்பட்ட டேட்டாக்களை தேடிப் போகவேண்டும். ஷார்ட் டேர்ம் டேட்டாக்கள் கண் முன்னே நின்று நர்த்தனமாடும்போது லாங் டேர்ம் டேட்டாவை தேடிப்போக மனது விடாது.

காலண்டரில் நான்கு மூன்று மாதத்தைக் கூட்டினால் வருவது ஒரு வருடம். ஆனால், சந்தையைப் பொறுத்தவரை, பல ஷார்ட் டேர்ம்களை கூட்டினால் வருவது லாங் டேர்ம் அல்ல என்பதை நீங்கள் தெளிவாகப் புரிந்துகொள்ள வேண்டும். ஏனென்றால் மேலே சொன்ன லாஜிக்கின்படி, ஒவ்வொரு ஷார்ட் டேர்மிலும் நீங்கள் வாங்கி விற்று உங்களுடைய நஷ்டத்தை புக் செய்திருக்க அதிகபட்ச வாய்ப்புகள் இருக்கின்றது. அப்படி ஒவ்வொரு ஷார்ட் டேர்மிலும் நஷ்டப்பட்டால் பல ஷார்ட் டேர்ம் நஷ்டங்களை ஒன்றாகச் சேர்த்தால் வருவது பெரியதொரு நஷ்டம்தானே தவிர வேறொன்றுமில்லை.

ஷார்ட் டேர்ம் உந்துதலிருந்து வெளியே வருவது ஒன்றும் சாமான்யமான காரியமில்லை. நமக்குப் பிடித்ததை நம்புவது மற்றும் அளவுக்கு மீறிய தன்னம்பிக்கை (ஓவர் கான்பிடன்ஸ்) என்ற இரண்டிலிருந்தும் பெரும்பான்மை யான முதலீட்டாளர்களால் தப்பிக்க முடிவதில்லை. அதிலும் ஓவர்கான்பிடன்ஸ் நல்ல தரமான முதலீட்டு முடிவுகளை எடுக்கக் கூடிய முதலீட்டாளர்களைக்கூட சில சமயம் தடுமாற வைத்துவிடும். ஓவர்கான்பிடன்ஸ் பல சமயம் முக்கியமான விஷயங்களைக் கவனிக்காமல் செயல்பட  வைத்துவிடும். இப்படி முக்கிய விஷயங்களைக் கவனிக்காமல் செயல்படும்போது நஷ்டம் வரும். நஷ்டம் வந்தவுடன் உணர்ச்சிகள் முதலீட்டை கன்ட்ரோல் செய்ய ஆரம்பிக்கும். விட்டதைப் பிடிக் கின்றேன் பேர்வழி என்று நிலைமை இன்னமும் மோசமாகும் என்பதுதான் வேல்யூ இன்வெஸ்டிங் அல்லாத பாதை. அதிலும் இன்டர்நெட் யுகத்தில் இந்த ஓவர்கான்பிடன்ஸ் வருவதற்கு அதிகபட்ச வாய்ப்புகள் இருக்கின்றது. ஏனென்றால், இன்டர்நெட்டில் இருக்கும் பல தகவல் களை சரிபார்க்க முடியாமல் நம்பிக்கையின் அடிப்படையில் செயல்பட ஆரம்பிக்கிறோம்.

பீட்டர் லின்ச் என்ற ஃபண்ட் மேனேஜர், முதலீட்டாளர்களின் தொடர்ந்து மாறிக் கொண்டே இருக்கும் மனநிலை குறித்து தெளிவாகச் சொல்லியுள்ளார். 'முதலீட்டாளர் என்பவர் பொருளாதார நலிவு ஏற்பட்டு சந்தை கீழே போகும்போதும் மிகவும் கவலையும் அக்கறையும் கொள்கின்றார். நல்ல பங்குகளை அதன் மதிப்பைவிட குறைந்த விலையில் மலிவாக வாங்க வாய்ப்பு கிடைக்கும்போதுகூட கவலையாலும் பயத்தாலும் அதை வாங்கத் தவறுகின்றார். பொருளாதார நிலை சீரடைந்து சந்தை மேலேபோக ஆரம்பிக்கும்போது கொஞ்சம் நிதானித்து தொடர்ந்து ஏறுகின்ற நிலைக்கு வந்ததை உறுதி செய்தபின்னர் அவர் பங்குகளை வாங்குகின்றார். அவர் வாங்கிய பின்னரும் பங்குகளின் விலை தாறுமாறாக ஏற ஆரம்பிக்கும்போது என்னே எனது திறமை! என்று தன்னைத்தானே மெச்சிக்கொள்வ’தாகச் சொல்கிறார்.

இந்தச் சூழ்நிலையில் கையிலிருக்கும் கம்பெனியின் உண்மை மதிப்பு என்ன? அது சந்தையில் விற்கும் விலை சரிதானா என்று சரிபார்த்துக்கொண்டேயிருக்க வேண்டும். ஆனால், நான் வாங்கிய ஷேரின் விலை மேலே மேலே போகின்றதே என்று சந்தோஷத்தில் திளைக்கின்றார். சந்தை வேகமாக இறங்க ஆரம்பிக்கும்போது அய்யய்யோ என்று எகிறிக் குதித்து, அப்போதுள்ள சூழ்நிலைக்கு அடிமையாகி வாங்கிய விலையைவிட குறைவான விலையில் பங்கை விற்று நஷ்டத்தை புக் செய்கின்றார்.

தாறுமாறாக இறங்கும்போது கவலை கொண்டு செயல்படாமல் இருத்தல், தாறுமாறாக ஏறும்போது இறுமாப்புகொண்டு செயல்படாமல் இருத்தல் என்ற இரண்டும்தான் பெரும்பான்மையான நேரத்தில் நஷ்டத்தையோ அல்லது குறைந்த லாபத்தையோ தருகின்றது. இதைக்கொஞ்சம் மாற்றி சந்தை தாறுமாறாய் இறங்கிக்கிடக்கும் வேளையில் மதிப்பைவிட குறைவான விலையில் கிடைக்கும் பங்குகளை வாங்கிப்போட்டும், தாறுமாறாக ஏறும்போது மதிப்பைவிட அதிக விலையில் கிடைக்கும் பங்குகளை விற்றுவிட்டும் இருப்பவர்தான் வேல்யூ இன்வெஸ்டர்.

இதை எழுதவும் படிக்கவும் சுலபமாக இருந்தாலும் நடைமுறைப்படுத்துவதற்கு நல்ல திடமான மனநிலையும் பயிற்சியும் நிச்சயமாக வேண்டும்.

வேல்யூ இன்வெஸ்டிங் என்றால் என்ன என்று நான் உங்களுக்குச் சொல்லிவிட்டேன். அதைப் பயிற்சி செய்வது என்பது உங்களிடத்தில்தான் இருக்கின்றது. செய்துவிடுவீர்கள் என்று நம்புகின்றேன்!

(முற்றும்)

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism