Published:Updated:

செக்டார் அனாலிசிஸ் - ஏற்றம் தருமா எனர்ஜி துறை..?

செக்டார் அனாலிசிஸ் - ஏற்றம் தருமா எனர்ஜி துறை..?

செக்டார் அனாலிசிஸ் - ஏற்றம் தருமா எனர்ஜி துறை..?

செக்டார் அனாலிசிஸ் - ஏற்றம் தருமா எனர்ஜி துறை..?

Published:Updated:
##~##

'எனர்ஜி’ என்பதற்கு தமிழில் திறன் அல்லது ஆற்றல் எனச் சொல்லலாம். நம் தொழிற்சாலைகள் இயங்குவதற்கும், வாகனங்கள் ஓடுவதற்கும், தொழில் வளர்ச்சி முதல் அன்றாட வீட்டுத் தேவைகள் வரை அனைத்தையும் இயக்கும் அடிப்படை சக்தி 'எனர்ஜி’. இந்த சக்தி எதிலிருந்து கிடைக்கிறது என்பதைப் பொறுத்து இத்துறையைப் பின்வருமாறு பிரிக்கலாம்:

1. கச்சா எண்ணெய் அடிப்படையிலான பெட்ரோலியப் பொருட்கள்/இயற்கை எரிவாயு.

2. நிலக்கரி அடிப்படையிலான அனல் மின் சக்தி.

3. நீர் மூலம் கிடைக்கும் புனல் மின் சக்தி.

4. அணுவில் இருந்து கிடைக்கும் அணு மின் சக்தி.

5. காற்றாலை மூலம் மின் உற்பத்தி நிறுவனங்கள்.

நிறுவனங்களின் செயல்பாட்டைப் பொறுத்து, வேறுவகையாகவும் பிரிக்கலாம்; அவை:

1. எண்ணெய் வள/உற்பத்தி நிறுவனங்கள் – 'அப்ஸ்ட்ரீம்’.

2. எண்ணெய் சுத்திகரிப்பு ஆலைகள் – 'டவுன்ஸ்ட்ரீம்’.

3. எண்ணெய் விற்பனை/சந்தைப்படுத்தும் நிறுவனங்கள் – 'டவுன்ஸ்ட்ரீம்’.

4. மின் உற்பத்தி நிறுவனங்கள்.

5. மின் பகிர்மான நிறுவனங்கள்.

6.எண்ணெய்/மின்சாரத் துறைக்குத் தேவையான இயந்திரங்கள்/மூலதனப் பொருட்களைத் தயாரிக்கும் நிறுவனங்கள்.

7. பெட்ரோ கெமிக்கல்ஸ்.

இவற்றில், 'அப்ஸ்ட்ரீம்’ நிறுவனங் களில், எண்ணெய் சுத்திகரிப்புத் துறையை முதலில் அலசுவோம்.

செக்டார் அனாலிசிஸ் - ஏற்றம் தருமா எனர்ஜி துறை..?

இந்த ஆண்டு, ரிலையன்ஸில் ஆரம்பித்து சென்னை பெட்ரோலியம், மங்களூரு ரீஃபைனரி என பெரும்பான்மையான சுத்திகரிப்பு நிறுவனங்களின் பங்குகளும் கீழ் நோக்கிய பயணத்தில் இருக்கின்றன.

பங்குச் சந்தையில் முன்னணிப் பங்கு ரிலையன்ஸ்; ரிலையன்ஸ் இண்டஸ்ட்ரிஸ் பங்குகளின் விலையை எடுத்துக்கொண்டால், இதே ஆண்டு ஜனவரி மாதம் தொட்ட உச்சமான ரூ.950-ல் இருந்து, சுமார் 20% இறங்கி இரண்டே மாதங்களில் ரூ.765-ஐ தொட்டது!  

 ரூ.160-க்கு மேல் வர்த்தகமான சென்னை பெட்ரோலியம், இதே காலகட்டத்தில் 30 சத விகிதத்துக்கு மேல் இறங்கி ரூ.110-க்கும் கீழே வர்த்தகமானது.

 கிட்டத்தட்ட ரூ.70-ஐ தொட்டு வர்த்தகமான மங்களூரு ரீஃபைனரீஸ் பங்குகளோ, சுமார் 30% இறங்கி மார்ச்சில் ரூ.50-க்கும் கீழே சென்று முதலீட்டாளர்கள் மத்தியில் கிலியைக் கிளப்பியது!

ஒருவேளை, கடந்த இரண்டு மாதத்தில் ஒட்டுமொத்த சந்தையும் இறங்கியதால்தான் இப்பங்குகளும் இறங்கியதா? இதே காலகட்டத்தில் சென்செக்ஸின் போக்கு எப்படி இருந்தது எனப் பார்க்கலாம்.

செக்டார் அனாலிசிஸ் - ஏற்றம் தருமா எனர்ஜி துறை..?

20,000-க்கு மேல் வர்த்தகமான மும்பை பங்கு விலைக் குறியீடான சென்செக்ஸ், மார்ச் மாத வீழ்ச்சியில் 18600-க்குக் கீழே வர்த்தகமானது. இது சுமார் 7 சதவிகிதம்  வீழ்ச்சிதானே என்னும்போது ரீஃபைனரி பங்குகளின் விலையில் ஏன் இந்த வீழ்ச்சி? குறைந்த விலையில் கிடைக்கும் இவற்றை வாங்குவதற்கு ஏற்ற தருணமா இது? விரிவாகப் பார்க்கலாம்.

பொதுவாக, சுத்திகரிப்பு நிறுவனங்களின் லாபத்தை நிர்ணயிப்பது அதன் 'க்ராஸ் ரீஃபைனரி மார்ஜின்’ எனச் சொல்லப்படும் ஜி.ஆர்.எம்.தான். கச்சா எண்ணெய்யை வாங்கும் அடக்க விலைக்கும், அது  சுத்திகரிக்கப்பட்டபின் அதில் இருந்து எடுக்கப்படும் பெட்ரோலியப் பொருட்களின் மதிப்பிற்கும் உள்ள வித்தியாசம் இது. இந்த ஜி.ஆர்.எம். அதிகமாக அதிகமாக, இந்நிறுவனங்களின் லாபம் ஈட்டும் தன்மையும் அதிகரிக்கும்.

உதாரணமாக, இப்போது பீப்பாய் ஒன்று 95 அமெரிக்க டாலர்களுக்கு என விற்கும் கச்சா எண்ணெய்யை வாங்கி சுத்திகரித்தபின் அதில் கிடைக்கும் பெட்ரோல், டீசல், கெரசின், கேஸ், விமான எரிபொருள், நாப்தா, ஆகியவற்றை விற்று 105 அமெரிக்க டாலர்களை ஈட்டினால், அதன் ஜி.ஆர்.எம். 10 அமெரிக்க டாலர்கள்.  

இதில், இதர நிர்வாகச் செலவுகள், தேய்மானம், வருமான வரி என 3 அமெரிக்க டாலர்கள் செலவானால், மீதமிருக்கும் 7 டாலர்கள், நிகர ரீஃபைனரி மார்ஜின்.

இந்தியன் ஆயில் கார்ப்பரேஷன், ஹிந்துஸ்தான் பெட்ரோலியம், பாரத் பெட்ரோலியம்  ஆகிய நிறுவனங்களும் எண்ணெய் சுத்திகரிப்பு ஆலைகள் வைத்திருந்தாலும், அவை பெட்ரோலியப் பொருட்களைச் சந்தைப்படுத்தும் 'ஆயில் மார்க்கெட்டிங்’ நிறுவனங்களாகவே பொதுவாகக் கருதப்படுகின்றன.

தனியார் துறையில் ரிலையன்ஸ் இண்டஸ்ட்ரிஸ், எஸ்ஸார் ஆயில் ஆகியவையும், பொதுத்துறை நிறுவனங்களில் மங்களூரு ரீஃபைனரியும் சென்னை பெட்ரோலியமும் 'ஸ்டாண்ட் எலோன் ரீஃபைனரி’-களாக மட்டுமே தனித்துச் செயல்படுபவை; சுத்திகரிப்பது மட்டுமே இவர்கள் வேலை.

அதாவது, இவர்கள் சுத்திகரிக்கும் பெட்ரோலியப் பொருட்களை, இவர்களே சந்தையில் விற்பதில்லை; இந்தியன் ஆயில், பி.பி.சி.எல்., ஹெச்.பி.சி.எல், போன்ற இதர ஆயில் மார்க்கெட்டிங் நிறுவனங்கள் மூலமாகத்தான் சந்தையில் விற்கிறார்கள்.  

இந்த 'ஸ்டாண்ட் எலோன் ரீஃபைனரி’ களுக்கு ஒரு வசதி உண்டு; இவர்கள் உற்பத்தி செய்யும் பொருட்களுக்கு, இறக்குமதி செய்யப்படும் சர்வதேச விலைக்கு நிகரான விலை நிர்ணயம் செய்துகொடுக்க வேண்டும் இவர்களிடமிருந்து அவற்றை வாங்கும் ஆயில் மார்க்கெட்டிங் நிறுவனங்கள்.

செக்டார் அனாலிசிஸ் - ஏற்றம் தருமா எனர்ஜி துறை..?

அதாவது, இறக்குமதி ஆகும் பெட்ரோலியப் பொருளின் அடக்க விலை யோடு, அதன் மீதான காப்பீட்டுத் தொகை, கப்பலில் அதை இந்தியாவுக்கு கொண்டுவந்து சேர்ப்பதற்கான சரக்குப் போக்குவரத்துக் கட்டணம் மற்றும் அதன் மீதான இறக்குமதித் தீர்வை ஆகிவற்றைக் கூட்டி என்ன தொகை வருகிறதோ அதைத் தந்துதான் இவர்களிடம் வாங்கவேண்டும் என்பது விதி.

இதிலிருந்து ஒரு விஷயம் தெளிவு; இறக்குமதித் தீர்வை அதிகரித்தால், அதற்குத் தக்க 'ஸ்டாண்ட் எலோன் ரீஃபைனரிஸ்’க்கு அதிக விலை கிடைக்கும்; ஜி.ஆர்.எம்.-மும் அதிகரிக்கும். மாறாக, இறக்குமதித் தீர்வையோ இதர கட்டணங்களோ குறைந்தால், ஆயில் மார்க்கெட்டிங் நிறுவனங்களிடமிருந்து இவர்களுக்குக் கிடைக்கும் விலை குறைவதோடு ஜி.ஆர்.எம்.-மும் குறையும்.

ரிலையன்ஸ் மாதிரி, வெளிநாடுகளுக்கு ஏற்றுமதி செய்யும் நிறுவனங்கள் இதற்கு விதிவிலக்கு. அவற்றின் லாபம், சந்தை விலையைப் பொறுத்தும், தேவையைப் பொறுத்தும், டாலருக்கு நிகரான ரூபாயின் மதிப்பைப் பொறுத்தும் மாறுபடும்.

சுத்திகரிப்பு ஆலைகளின் ஜி.ஆர்.எம்.-மை நிர்ணயிக்கக்கூடிய மற்றொரு விஷயம், 'நெல்சன் காம்ப்ளெக்ஸிட்டி இண்டெக்ஸ்’ எனும் குறியீடு. ஆலைகளின் செலவுகளை ஒப்பிட்டுத் திறனை ஆய்வதற்காக, 1960-ம் ஆண்டு வில்பர் நெல்சனால் அறிமுகப்படுத்தப்பட்டது. இது அதிகமாக அதிகமாக, ஜி.ஆர்.எம்.-மும் அதிகரிக்கும். எப்படி?

கச்சா எண்ணெய்யை பொதுவாக 'ஸ்வீட்’ க்ரூட் மற்றும் 'சவர்’ க்ரூட் எனப் பிரிப்பார்கள். கச்சா எண்ணெய் இனிக்குமா என்ன..? 0.5 சத விகிதத்துக்குக் கீழே சல்ஃபர் இருந்தால் அதை 'ஸ்வீட்’ க்ரூட் எனவும், அதற்குமேல் அதிகமாக சல்ஃபர் இருப்பின் அதை 'சவர்’ க்ரூட் எனவும் அழைப்பார்கள்.

சல்ஃபர் என்பது தேவையில்லாத விஷயம் என்பதால், கச்சா எண்ணெய்யைச் சுத்திகரிக்கும்போது அதை நீக்க/குறைக்க வேண்டும். சல்ஃபர் அதிகமாக உள்ள 'சவர்’ க்ரூட் எண்ணெய்யைச் சுத்திகரிக்க ஆகும் செலவு அதிகம் என்பதால், அதன் அடக்க விலை பொதுவாகக் குறைவாகவே இருக்கும்.

செக்டார் அனாலிசிஸ் - ஏற்றம் தருமா எனர்ஜி துறை..?

பெரும்பாலும் சுத்தக் குறைவான டீசல் உற்பத்திக்கு இதைப் பயன்படுத்துவார்கள். சுத்திகரிப்பின்போது நீக்கப்படும் சல்ஃபரை விற்பதன் மூலமாக உபரி வருவாயும் கிடைக்கும். சர்வதேச அளவில் முன்னேறிய நாடுகளில் இருக்கும் அளவிற்கு சட்டதிட்டங்களின் கடுமை கொஞ்சம் குறைவு என்பதாலும், இந்தியாவில் பெரும்பாலும் 'சவர்’ க்ரூட் இறக்குமதி செய்யப்படுகிறது. இங்குதான் வருகிறது நெல்சன் காம்ப்ளெக்ஸிட்டி குறியீடு.

நெல்சன் காம்ப்ளெக்ஸிட்டி அதிகமாக அதிகமாக, 'சவர்’ க்ரூட்-ஐ சுத்திகரிக்கும் திறனும் அதிகரிக்கிறது. இதனால் ஜி.ஆர்.எம்.-மும் அதிகரிக்கும். ரிலையன்ஸின் ஜாம்நகர் ரீஃபைனரியின் நெல்சன் குறியீடு 14. ஏனைய ரீஃபைனரிஸின் குறியீடு 10-க்கும் கீழேதான். தரக்குறைவான கச்சா எண்ணெய்யைக்கூட வாங்கி சுத்திகரித்து உயர்தரமான பொருட்களை அதிக விலைக்கு விற்க ஏதுவான ரிலையன்ஸின் திறனையே இது காட்டுகிறது.

சில சமயங்களில் ஏற்கெனவே முந்தைய காலாண்டில் குறைந்த விலையில் வாங்கிய கச்சா எண்ணெய்யின் கையிருப்பு அதிகமாக இருந்தாலும் நடப்புக் காலாண்டில் லாபம் அதிகரிக்கும். அதற்கு மாறாக இப்போது விலை குறைந்த சூழலில், முந்தைய காலாண்டில் அதிக விலை கொடுத்து வாங்கிய கச்சா எண்ணெய்யின் கையிருப்பு அதிகமாக இருந்தால் லாபம் குறையும்; நஷ்டத்திலும் கொண்டுவிடலாம்.

சர்வதேசச் சந்தைகளில் கச்சா எண்ணெய்யின் விலை, இறக்குமதித் தீர்வை உள்ளிட்ட கட்டணங்கள், உற்பத்தித் திறன், சந்தையின் தேவை, ஆகியவற்றை பொறுத்து லாப விகிதங்கள் மாறுபடும் என்பதையே இவையெல்லாம் காட்டுகின்றன.

இத்துறையில் ரிலையன்ஸ் உள்பட பல முக்கியமான பங்குகள் உள்ளன. ஏற்கெனவே சொன்னபடி, பல பங்குகளின் விலையும் சல்லீசாகவே இருக்கிறது. இத்துறையில் எந்தெந்த பங்குகள் எப்படி என்பதை அடுத்த இதழில் சொல்கிறேன்!

(அலசுவோம்)