Published:Updated:

எங்கள் அடுத்த இலக்கு இண்டஸ்ட்ரிதான்..!

வா.கார்த்திகேயன். படங்கள்: பா.கார்த்திக்.

எங்கள் அடுத்த இலக்கு இண்டஸ்ட்ரிதான்..!

வா.கார்த்திகேயன். படங்கள்: பா.கார்த்திக்.

Published:Updated:

சிறப்புப் பேட்டி

##~##

ஸ்ரீராம் குழுமத்தின் நிறுவனத் தலைவர் ஆர்.தியாகராஜனுடன் பேசுவதே ஓர் அனுபவம்தான். சுமார் 60 ஆயிரம் கோடி ரூபாய் டேர்னோவர் கொண்ட ஸ்ரீராம் குழுமத்தை உருவாக்கியவர் என்றாலும் அவரிடம் அந்த பந்தா எதுவும் இல்லை. தவிர, அவருக்கு இப்போது எழுபத்தைந்து வயதுக்கு மேல் ஆகிவிட்டாலும், இருபத்தைந்து வயதுக்குரிய சுறுசுறுப்புடன் தன் குழும நிறுவனங்களின் பிஸினஸ் பற்றி பேசுகிறார்.

ஒட்டுமொத்த விகடனுக்கும் ஒரே ஷார்ட்கட்!

இந்த வயதிலும் புதிய தொழில் வாய்ப்புகளைப் பற்றி தீவிரமாக யோசித்து வருகிறார். சமீபத்தில் பத்ம பூஷன் விருது பெற்ற ஸ்ரீராம் குழுமத்தின் நிறுவனத் தலைவர் ஆர்.தியாகராஜனைச் சந்தித்தபோது, தன்னுடைய நீண்டகால பிஸினஸ் அனுபவங்களை நாணயம் விகடன் வாசகர்களுக்காகப் பகிர்ந்துகொண்டார். அதிலிருந்து...

?உங்களுடைய முதல் பிஸினஸ் சிட் ஃபண்ட்தான். எதற்காக சிட் ஃபண்ட் ஆரம்பித்தீர்கள்.? ஏதாவது காரணம் இருக்கிறதா?

''நான் நியூ இந்தியா அஷ்யூரன்ஸ் நிறுவனத்தில் வேலை செய்துகொண்டிருந்தேன். அப்போது என்னுடைய நண்பர் ஏ.வி.எஸ். ராஜா பிஸினஸ் ஆர்வத்தில் இருந்தார். அன்றைய தேதியில் சுதர்சன் சிட் ஃபண்ட் என்கிற நிறுவனம் பிரபலமாக இருந்தது. எனவேதான் சிட் ஃபண்ட் பிஸினஸ் ஆரம்பித்தோம். பத்து பிஸினஸைத் தேர்வு செய்து அதில் இந்த பிஸினஸ் சரியாக இருக்கும் என்று திட்டமிட்டு இதை ஆரம்பிக்கவில்லை. இதுமட்டுமல்லாமல், இன்னும் சிலருக்கு பிஸினஸ் ஆலோசனைகள் செய்துகொண்டிருந்தேன். எனக்கு ஆர்வமும் இருந்தது; அதற்கான அறிவும் இருந்தது. மேலும், இந்த ஆலோசனை வழங்க நான் எந்த பணமும் வாங்கவில்லை. அதனாலும் என்னிடம் நண்பர்கள் வந்தார்கள் என்று நினைக்கிறேன்.''

?பணம் வாங்காமல் ஏன் செய்தீர்கள்?

''முதல் விஷயம், நான் ஒரு நிறுவனத்தில் வேலை செய்துவரும்போது, இன்னொரு இடத்தில் பணம் வாங்குவது தவறு என்பது என் எண்ணம். இரண்டாவது, பிஸினஸ் ஆலோசனைச் சொல்வது எனக்குப் பிடித்திருக்கிறது. மூன்றாவது, ஓரளவுக்கு வசதியான குடும்பத்தில் இருந்து வந்ததால் எனக்கு பணம் தேவைப்படவில்லை.

எங்கள் அடுத்த இலக்கு இண்டஸ்ட்ரிதான்..!

ஆனால், இப்போது என்னிடம் வேலை செய்பவர்கள் யாராவது இரண்டாவதாக வேலை செய்யவேண்டும் என கேட்டால், நான் தாராளமாக வேலை செய்யச் சொல்வேன். ஒவ்வொருவருக்கும் இரண்டாவதாக ஒரு திறமை இருக்கும்போது ஏன் என்னால் அது வீண்போகவேண்டும்?''

?உங்களது ஆரம்பகால வாழ்க்கை..?

''தஞ்சாவூர் ஜில்லாவில் பிறந்தேன். கொஞ்சம் வசதியான விவசாய குடும்பம்தான். இருந்தாலும் என் அப்பா என்னை விவசாயத்துக்கு வரவேண்டாம் என்று சொல்லிவிட்டார். சென்னையில் எம்.ஏ. கணிதமும், கொல்கத்தாவில் இந்தியன் ஸ்டாடிஸ்டிகல் இன்ஸ்டிடியூட்டில் மேற்படிப்பும் முடித்தேன். முடித்தவுடனே எனக்கு வேலை கிடைத்துவிட்டது.''

?எப்படி டிரான்ஸ்போர்ட் பிஸினஸில் இவ்வளவு சிறப்பாகச் செயல்பட முடிந்தது.?

எங்கள் அடுத்த இலக்கு இண்டஸ்ட்ரிதான்..!

''அந்த காலத்தில் வங்கிகள், லாரி உரிமையாளர் களுக்கு கடன் கொடுக்கமாட்டார்கள். அவர்கள் அதிக வட்டி கொடுக்கத் தயாராக இருந்தாலும், கடன் கொடுக்க எந்த வங்கியும் முன்வரவில்லை. அந்த இடத்தை நாங்கள் நிரப்ப நினைத்தோம்.

மேலும், வண்டி பிணையாக இருக்கும்பட்சத்தில் கடனைத் திரும்ப கட்டிவிடுவார்கள் என்று நம்பினேன். இதை எங்களால் சிறப்பாகச் செய்ய முடிந்ததினால்தான் எங்களது டெபாசிட்தாரர்களுக்கு அதிக வட்டி தரமுடிந்தது. வங்கி தரும் வட்டி விகிதத்துக்கும், நாங்கள் தரும்  வட்டி விகிதத்துக்கும் 3 சதவிகிதம் வித்தியாசம் இருந்தது.

மேலும், நேரடியாக மோட்டார் நிறுவனங்களைச் சந்திதோம். எந்தவிதமான சிபாரிசும் இல்லாமல் நேரடியாக டாடா நிறுவன உயரதிகாரிகளைச் சந்திதோம். லாரி தொழில் வளரவேண்டுமானால் அவர்களுக்குக் கடன் கிடைக்கவேண்டும். அவர்களுக்குக் கடன் கொடுப்பதை நாங்கள் பார்த்துக்கொள்கிறோம். நாம் இருவரும் ஒப்பந்தம் போட்டுக்கொள்ளலாமா என்று கேட்டோம். அவர்களுக்கும் எங்கள் திட்டம் பிடித்திருந்தது.

அதன்பிறகு அசோக் லேலாண்ட் நிறுவனத்திடம் ஒப்பந்தம் போட்டோம். எங்கள் நிறுவனத்தில் அவர்களுக்கு 15 சதவிகிதப் பங்குகளைக் கொடுத்தோம். அதாவது, எங்கள் நிறுவனத்தில் அவர்கள் முதலீடு செய்தார்கள். அவர்கள் நிறுவனத்தில் இருக்கும் இயக்குநர்களை எங்கள் நிறுவனத்தின் போர்டுக்கு அழைத்துவந்தோம். இது எங்களுக்கு மேலும் வலிமையைக் கொடுத்தது.''

?உங்களது மியூச்சுவல் ஃபண்ட் பிஸினஸ் என்ன ஆனது?

''1998-99-ம் காலகட்டத்தில் ஃபைனான்ஸ் நிறுவனங்கள் என்றாலே கொள்ளை அடிப்பவர்கள் என்ற நினைப்பு மக்களுக்கு வந்துவிட்டது. அந்தச் சமயத்தில் ரெகுலேட்டர் அதிக விதிகளைக் கொண்டு வந்துகொண்டே இருந்தது. அதனால், அந்த பிஸினஸில் அதிக கவனம் செலுத்துவதை நிறுத்திவிட்டோம். புதிய ஃபண்டுகள் எதுவும் கொண்டு வரவில்லை. இருந்தாலும், எங்களிடம் அதற்கான லைசென்ஸ் இருந்தது. அதை 'செபி’யிடம் திருப்பிக் கொடுக்க செல்லும்போது, அங்கிருக்கும் முக்கிய அதிகாரிகள் சிலர், உங்களைப் போன்ற நிறுவனங்கள் ஏன் விலக வேண்டும், தொடரலாமே என்று சொன்னார்கள்.

சரி, ஆரம்பிக்கலாம் என்றால், இந்த ஆவணம், அந்த ஆவணம் என்று கேட்டுக் கொண்டிருக் கிறார்கள். அதற்கான வேலைகள் செய்துவருகிறோம். இந்த ஆண்டு இறுதிக்குள் மீண்டும் ஆரம்பித்துவிடுவோம் என்று நினைக்கிறேன்.''

?புதிய வங்கிகளுக்கான விதிமுறையை ரிசர்வ் வங்கி அறிவித்திருக்கிறது. வங்கி ஆரம்பிக்கும் திட்டத்தில் நீங்களும் இருப்பதாகப் பேச்சு இருக்கிறதே?

''ஆரம்பிக்கும் எண்ணத்தில்தான் இருக்கிறோம். ஆனால், இப்போதைக்கு அது சரிப்பட்டுவருமா என்று தெரியவில்லை. ரிசர்வ் வங்கியை அணுகியபோது, அவர்கள் எங்களிடம் இருக்கும் ஸ்ரீராம் சிட்டி யூனியன் ஃபைனான்ஸ் அல்லது ஸ்ரீராம் டிரான்ஸ்போர்ட் ஃபைனான்ஸ் இரண்டில் எதையாவது ஒன்றை வங்கியாக மாற்ற முடியுமா என்று கேட்டார்கள். இது மிகவும் ரிஸ்க்கானது. ரிசர்வ் வங்கி சொல்கிறபடி செய்தால் பழைய பிஸினஸையும் செய்ய முடியாது; வங்கியையும் கவனிக்க முடியாது. தனியாக வங்கி ஆரம்பிக்க லைசென்ஸ் தரும்பட்சத்தில் ஆரம்பிக்கலாம்.''

?ஸ்ரீராம் குழுமம் இப்போது பெரிய நிறுவனம். ஆனால், உங்களின் ஆரம்பகட்டத்தில் என்ன விதமான கஷ்டங்களைச் சந்தித்தீர்கள்?

''நான் எந்த கஷ்டமும்படவில்லை. என்னுடன் வைஸ்யா வங்கியில் வேலை பார்த்த கண்ணன்தான் சிட் ஃபண்ட் நிறுவனத்தைக் கவனித்தார். அவரிடம் போய் கேட்டால்தான் என்ன கஷ்டம் என்று சொல்வார். நான் செய்ததெல்லாம், அவரைக் கண்டுபிடித்தது மட்டுமே. அதோடு என் வேலை முடிந்தது. அவருக்கு வாய்ப்புக் கொடுத்தேன் என்று 'க்ளைம்’ செய்வதுகூட நியாயம் அல்ல. எங்களுக்குத் தேவை அவ்வளவுதான்.''

?உங்களது அனைத்து பிஸினஸ் களையும் நீங்கள் எப்படி பார்த்துக் கொள்கிறீர்கள்.? பிரச்னையை எப்படி சமாளிப்பீர்கள்?

''ஏற்கெனவே சொன்னதுபோல ஒவ்வொரு பிஸினஸுக்கும் ஒருவர் இருக்கிறார். அவர்களைக் கண்டுபிடிப்பது மட்டும்தான் என் வேலை. மேலும், இப்போது ஸ்ரீராம் குழுமத்தில் இருக்கும் நிதி நிறுவனங்களில் முக்கியமான பொறுப்பில் இருக்கும் 32 பேருக்கு சரிசமமான பங்குகள் தரப்பட்டிருக்கிறது. அதனால் அவர்கள் பார்த்துக்கொள்வார்கள்.

நிறைய பிஸினஸ் இருக்கும்போது ஏதாவது ஒரு பிஸினஸ் பிரச்னைக்குரியதாக இருக்கும். சில பிஸினஸ் மிகவும் நன்றாக இருக்கும். உதாரணத்துக்கு, நமக்கு என்றைக்காவது தலை வலிக்கும்; பிறகு ஒருநாள் கால் வலிக்கும். ஒரேநாளில் அத்தனைப் பகுதியும் பிரச்னை செய்வதில்லையே. அதுபோலதான் இதுவும். எதையும் சரி செய்யலாம்!''

?பிஸினஸ் செய்ய நினைக்கும் இளைஞர்களுக்கு நீங்கள் என்ன சொல்ல விரும்புகிறீர்கள்?

''பிஸினஸ் என்பது 'சமூக சேவை’ என்று நினைப்பவர்கள் மட்டும்தான் இப்போதைக்கு பிஸினஸில் வரமுடியும். காரணம், பிஸினஸ் நாளுக்கு நாள் கடினமாகிக்கொண்டே இருக்கிறது. மேலும், நான் யாரிடமும் கைகட்டி நிற்கமாட்டேன் என்ற நினைப்பில் பலர் பிஸினஸில் இறங்குவதாகக் கேள்விப்படுகிறேன். வேலை செய்யும்போது முதலாளிக்கு மட்டும்தான் கைகட்டி நிற்கவேண்டும். ஆனால், பிஸினஸ் செய்பவர்கள் அனைவரிடமும் கைகட்டி நின்றால்தான் வேலை நடக்கும். 58 வயது வரைக்கும் சுயமரியாதையைத் தள்ளிவைத்து விட்டுதான் பிஸினஸுக்கு வரவேண்டும்.

மேலும், எடுத்தவுடனே லாபம் வேண்டும் என நினைக்கவேண்டாம். மற்றவர்கள் கொடுப்பதைவிட நீங்கள் கொஞ்சம் குறைவாக கொடுத்தால்தான் பிஸினஸ் நடக்கும். அப்போது  நஷ்டம் வரத்தான் செய்யும். அந்த நஷ்டத்தை அடுத்தமுறை எப்படிக் குறைப்பது என்று யோசிப்பதுதான் புத்திசாலித்தனமே தவிர, உடனே இந்த பிஸினஸ் நமக்கு சரிப்படாது என்று வேறு பிஸினஸுக்கு சென்றாலும் அங்கும் நஷ்டமே கிடைக்கும் என்பதை மறந்துவிடாதீர்கள். கரும்பு நட்டால் அறுவடைக்கு 10 மாதம் ஆகும், தென்னை நட்டால் சில வருடங்கள் ஆகும். உங்கள் பிஸினஸ் என்ன? உங்களுக்கு என்ன தேவை..? என்பதைத் தெரிந்து பிஸினஸ் செய்யுங்கள்!''

?ஸ்ரீராம் குழுமத்தின் அடுத்த இலக்கு என்ன?

''இனி தொழில் துறையில் (இண்டஸ்ட்ரி) கவனம் செலுத்த முடிவு எடுத்திருக்கிறோம். அதற்கான வேலைகள் நடந்துவருகிறது. ஸ்ரீராம் நிதி நிறுவனங்களில் இருந்து லாபத்தில்

25% தொகையை எடுத்து புதிய டிரஸ்ட் ஆரம்பித்து அதிலிருந்து இண்டஸ்ட்ரியை ஆரம்பிக்க இருக்கிறோம். சிமென்ட், கோக், யூரியா போன்ற பிஸினஸ்களில் இறங்குகிறோம்.''

?இறுதியாக ஒரு கேள்வி. ஸ்ரீராம் சிட் ஃபண்டில் போட்ட பணத்தை எடுப்பது கஷ்டம் என்ற பேச்சு சந்தையில் நிலவுகிறதே?

''இதனால்தான் இவ்வளவு நாள் நாங்கள் பிஸினஸில் இருக்க முடிகிறது. விதிமுறைகளின்படி தான் நாங்கள் செயல்படுகிறோம். எங்களுக்குப் பொறுப்பு அதிகம் என்பதால் எங்களிடமிருந்து பணம் எடுப்பது எளிதல்ல. அதேசமயம், அது முடியாததும் அல்ல!''

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism