Published:Updated:

ரிசர்ச் : வேகமெடுக்குமா ஆட்டோ துறை..?

ரிசர்ச் : வேகமெடுக்குமா ஆட்டோ துறை..?

ரிசர்ச் : வேகமெடுக்குமா ஆட்டோ துறை..?

ரிசர்ச் : வேகமெடுக்குமா ஆட்டோ துறை..?

Published:Updated:
##~##

ஒரு நாட்டின் பொருளாதார வளர்ச்சி சக்கரம் மீண்டும் சுழல ஆரம்பித்திருப்பதன் அறிகுறி, வாகன விற்பனை அதிகரிப்பு எனச் சொல்லப்படுவதுண்டு. இறங்குமுகத்திலோ, தேக்க நிலையிலோ இருக்கும் பொருளாதாரம் மறுபடியும் எழ ஆரம்பித்திருப்பதைக் கட்டியம் கூறுவதாகவும் அமைகிறது ஆட்டோ துறையின் வளர்ச்சி. பொருளாதாரம் வளரும்போதுதான் சரக்குப் போக்குவரத்து மற்றும் பயணிகள் போக்குவரத்து அதிகரிக்கும். எனவே, மிக முக்கியமான இத்துறையின் இன்றைய நிலை என்ன என்பதைப் பார்க்கலாம்.  

குறையும் விற்பனை !

கடந்த 15 ஆண்டுகளில் முதல்முறையாக கார் விற்பனை தொடர்ந்து ஆறு மாதங்கள் இறங்குமுகமாக இருந்தது சென்ற ஆண்டுதான். சமீபகாலமாக, விற்பனை சுமார் 10 சதவிகிதத்துக்கு மேல் குறைந்தது என்பது இந்த ஏப்ரலில்தான்.

இந்த தேக்கநிலையிலும்கூட, கடந்த ஏப்ரலில், 1,50,789 கார்கள், 8,43,889 மோட்டார் சைக்கிள்கள், 56,678 ட்ரக்குகள் என 10 லட்சத்திற்கும் மேலான வாகனங்கள் விற்பனையாகியுள்ளன. இதில், பங்குச் சந்தையில் பட்டியலிடப்பட்டுள்ள நிறுவனமான மாருதி சுசூகி இந்தியாவில் மட்டுமே 90,523 கார்களை விற்றுள்ளது! ஸ்விஃப்ட் டீசல் மற்றும் எர்டிகா மாடல்களின் அதிக விற்பனைதான் இதற்குக் காரணம். ஆனால், இந்நிறுவனத்தின் ஏப்ரல் மாத ஏற்றுமதி 33 சத விகிதமாக குறைந்ததைக் கவனிக்கவேண்டும்.

ரிசர்ச் : வேகமெடுக்குமா ஆட்டோ துறை..?

சென்ற ஆண்டு ஏப்ரலில் 5,51,557 பைக்குகளை விற்ற ஹீரோ மோட்டோகார்ப்., இந்த ஆண்டு அதே காலகட்டத்தில் 4,99,113 பைக்குகளை மட்டுமே விற்றது. இது சுமார் 9.50 சதவிகிதம் குறைவு! இதே மாதத்தில் 1,51,181 வாகனங்களை விற்ற டி.விஎஸ். மோட்டார் 5.50 சதவிகித விற்பனை குறைந்து 1,42,794 வாகனங்களையே விற்றது. ஆனால், சென்ற ஏப்ரலில் 1,93,000 வண்டிகளை விற்ற ஹோண்டா மோட்டார்,  நடப்பு ஆண்டில் 29 சதவிகிதம் அதிகரித்து 2,49,000 வண்டிகளை விற்றுள்ளது. 26,944 வாகனங்களை விற்ற யமஹா, இந்த ஆண்டில் 33.3 சதவிகிதம் அதிகரித்து, 35,927 வாகனங்களை விற்றுள்ளது கடந்த ஏப்ரலில். எனவே, பெரிய பிராண்டுகளுக்கு அடி ஒருபக்கமென்றாலும், புதிய பிராண்டுகள் ஜெயிக்கத் துவங்கி இருக்கிறது.  

ஏற்றுமதி மூலமாக வரும் வருவாயில் டாலர் மதிப்பு அதிகரித்ததாலும் அசோக் லேலாண்ட், டாடா மோட்டார்ஸ், மாருதி, ஹீரோ மோட்டோகார்ப்., பஜாஜ், மஹிந்திரா போன்ற ஏற்றுமதி நிறுவனங்களுக்கு ஆதாயம் இல்லாமலில்லை. ஆனால், இது இனியும் தொடருமா என்பது கேள்விக்குறியே. அமெரிக்கப் பொருளாதார வளர்ச்சி இப்போதைக்கு சாதகமாக இருந்தாலும் ஐரோப்பிய பொருளாதாரம் பின்தங்கியே இருக்கிறது.  

சில பிரச்னைகள்..!

ரிசர்ச் : வேகமெடுக்குமா ஆட்டோ துறை..?

அடுத்ததாக, இத்துறையை பாதிக்கக்கூடிய மிக முக்கியமான அம்சம், வாகனக் கடன் மீதான நடப்பு வட்டி விகிதங்கள். இந்தியாவில் விற்கப்படும் கார்களில் ஏறத்தாழ நான்கில் மூன்று, கடன் மூலமாகவே வாங்கப்படுகிறது. ஏனைய வாகனங்களுக்குமே இது பொருந்தும். எனவே, அதிக வட்டி விகிதம் என்பது இத்துறையின் விற்பனை வளர்ச்சிக்கு ஒரு தடைதான். வரும் நாட்களில் இது மாறலாம் என்பதற்கான அறிகுறிகள் இப்போது தெரியத் துவங்கி யிருக்கின்றன.  

வட்டி விகிதங்கள் மூன்று முறை குறைக்கப்பட்டி ருப்பதும், மேலும் குறைக்கப்படலாம் எனும் எதிர்பார்ப்பும் சாதகம். பஜாஜ் ஆட்டோ, ஹீரோ மோட்டோகார்ப் போன்ற நிறுவனங்கள் எக்கச்சக்கமாக ரொக்கக் கையிருப்பு வைத்திருப் பதால் வட்டி விகிதங்கள் மாறுவதால் ஏற்படும் தாக்கத்தில் இருந்து தற்காத்துக்கொள்ள முடிகிறது. ஆனால், டாடா மோட்டார்ஸ், அசோக் லேலாண்ட் போன்ற நிறுவனங்களுக்கு இது சாத்தியமில்லை. வட்டி குறைந்துவரும் இப்போதைய சூழல் இவர்களுக்கு ஏற்றது.

ரூ.100 கோடிக்கு மேல் விரிவாக்கப் பணிகளுக்காக புதிய முதலீடுகளை செய்யும் நிறுவனங்களுக்கென அதிகப்படியான சிறப்பு வரிச் சலுகை சமீபத்திய பட்ஜெட்டில் கொண்டு வரப்பட்டது. இது அசோக் லேலாண்ட் உள்ளிட்ட சில பெரிய நிறுவனங்களுக்கு  நிச்சயம் உதவும்.  

எதிர்காலம் எப்படி?

நடப்பு ஆண்டில் 3 முதல் 4 சதவிகித வளர்ச்சிதான் இருக்கும் என 'சியாம்’ (ஷிமிகிவி - ஷிஷீநீவீமீtஹ் ஷீயீ மிஸீபீவீணீஸீ கிutஷீனீஷீதீவீறீமீ விணீஸீuயீணீநீtuக்ஷீமீக்ஷீs) அமைப்பு கணக்கிட்டிருக்கிறது. அதுவும் அடுத்த காலாண்டில் இருந்துதான். எனவே, வரும் ஆண்டில் பெரிய வளர்ச்சி இருக்காதுஎன்னும் சூழலில், வட்டி விகிதம் குறைப்பு, கச்சா எண்ணெய்யின் விலை ஸ்திரமாக இருப்பது சாதக அம்சங்களாகவும், அதேசமயம் பற்றாக்குறை குறைந்து பொருளாதாரம் மீண்டெழுந்தால்தான் இத்துறை அதிக வளர்ச்சி காணமுடியும். எனினும், நீண்டகால அடிப்படையில் நல்ல பங்குகள் விலை இறங்கினால் நிச்சயம் வாங்கலாம்.

கவனிக்கவேண்டிய பங்குகள்!

நீண்டகால அடிப்படையில் முதலீட்டிற்கு ஏற்ற இத்துறைப் பங்குகள் சிலவற்றை சொல்கிறேன். இவற்றைக் கொஞ்சம் கொஞ்சமாக எஸ்.ஐ.பி. முறையில் வாங்கத் துவங்கலாம்:

உடனே வாங்கவேண்டிய பங்கு: அசோக் லேலாண்ட் விலை இறக்கத்தின்போது வாங்கவேண்டிவை: டாடா மோட்டார்ஸ், மஹிந்திரா அண்டு மஹிந்திரா, பஜாஜ் ஆட்டோ, ஹீரோ மோட்டோகார்ப்.

முதலீட்டுக்கு ஏற்ற, கணிசமான இறக்கத்தில் மட்டுமே வாங்கவேண்டிய பங்கு: டி.வி.எஸ். மோட்டார்.

ஹீரோமோட்டோகார்ப்.:

ரிசர்ச் : வேகமெடுக்குமா ஆட்டோ துறை..?

புதிது புதிதாக வாகனங்கள், உற்பத்தியை அதிகரிக்க விரிவாக்கப் பணிகள், புதிய விளம்பர/வியாபார யுக்திகள் மூலமாக விற்பனையைப் பெருக்கத் திட்டமிட்டிருப்பதோடு, லத்தீன் அமெரிக்கா மற்றும் ஆப்பிரிக்கா உள்ளிட்ட புதிய சந்தைகளில் கால்பதிக்கத் துவங்கியிருக்கிறார்கள். முதன்முறையாக கென்யாவுக்கும் ஏற்றுமதியைத் துவங்கியிருக்கிறார்கள். பங்கு ஒன்று ஈட்டும் லாபத்தோடு ஒப்பிட்டுப் பார்க்கையில், இப்போதைய விலை சரியான விலைதான்.  எனினும், மொத்தச் சந்தையின் போக்கு அடுத்த சில மாதங்கள் இறக்கத்தில் இருக்கலாம் என்பதால், இறக்கத்தில் முதலீடு செய்யலாம்.    

பஜாஜ் ஆட்டோ:

விடுமுறை மற்றும் விழாக்கால விற்பனை கொஞ்சம் அதிகரித்தாலும், மொத்தத்தில், வரும் நாட்களில் சந்தை மெத்தனமாகத்தான் இருக்கும் என நிர்வாகமே கணித்திருக்கிறது. எனினும், ரொக்க கையிருப்பு அதிகம் வைத்திருக்கும் நிறுவனம் என்பதால் சந்தையின் எந்த ஏற்ற இறக்கத்தையும் தாங்கும் சக்தியும் உள்ள நிறுவனம். எனவே, இறக்கத்தில் வாங்கிச் சேர்க்க வேண்டிய ப்ளூ சிப் இது.

மாருதி சுசூகி:

உற்பத்தி பல்கிப் பெருகி சந்தையைப் பரவலாக ஆக்கிரமித்துள்ளபோதும், இன்றும் வெயிட் லிஸ்ட்டில் காத்திருந்து வாங்கவேண்டிய வண்டி ஒன்று உண்டு என்றால், அது மாருதியின் டீசல் ஸ்விஃப்ட்தான்! பெட்ரோல் விலையைவிட டீசல் விலை கணிசமாகக் குறைவாக இருந்தபோது, மாருதியின் டீசல் மாடல்கள் கைகொடுத்தன. சந்தை விலையை ஒட்டிய டீசல் விலை எனும் அரசின் புதிய கொள்கைக்குப்பின் இது மாறலாம். அந்தக் கால அம்பாசிடர் மாதிரி நாடு முழுவதும் சேவை மையங்கள் உள்ள நிறுவனம் இது. ரீசேல் வேல்யூ உள்ள கார்களை அதிகம் உற்பத்தி செய்யும் நிறுவனம். மீண்டும் மீண்டும் வாங்குவோரை வரவைப்பது இதன் தனிபலம். தற்போதைய விலை கொஞ்சம் அதிகம்தான். காத்திருப்பது நல்லது.

மஹிந்திரா அண்டு மஹிந்திரா:

மூன்று சக்கர வாகனங்கள், விவசாயத்திற்கான டிராக்டர்கள், கார்கள், ட்ரக்குகள் என கிட்டத்தட்ட போக்குவரத்துத் துறையில் தவிர்க்க முடியாதவண்ணம் எல்லாத் துறைகளிலும் கால்பதித்திருக்கும் நிறுவனம் இது. திறமையான நிர்வாகம், ஸ்திரமான நிதி நிலைமை என எல்லாவிதத்திலும்  முதலீட்டாளர்களின் போர்ட்ஃபோலியோவிலும் தவிர்க்க முடியாத தரமான பங்கு இது. இறங்கினால் வாங்கலாம். மின்சாரத்தில் இயங்கும் இ20 எனும் புதிய காரை அறிமுகப்படுத்தியுள்ளது. பெட்ரோல் விலையைக் கணக்கில் எடுத்தால், இந்த கார் சில சந்தைகளில் தாக்கத்தை ஏற்படுத்தலாம்.  

டாடா மோட்டார்ஸ்:

குறியீட்டில் உள்ள பங்குகளில் ஒன்று. அவ்வப் போது வர்த்தகம் செய்ய ஏற்ற பங்கு இது.

அசோக் லேலாண்ட்:

பட்ஜெட்டில் அறிவிக்கப்பட்டிருக்கும் திட்டத்தின் அடிப்படையில் நடப்பு ஆண்டில் விற்பனை ஸ்திரமாக இருக்க வாய்ப்பு உண்டு. அந்நியச் செலாவணி ஆதாயங்கள், ஏற்றுமதி என சாதகமான அம்சங்கள் இருந்தாலும், தற்போதைய சந்தை விலை அதிகம் எனச் சொல்ல முடியாது. எனவே வாங்கத் துவங்கலாம்.

(அலசுவோம்)

ஒரு ஸ்வாட் அனாலிசிஸ்!

 பலம்:

ஏனைய துறைகளைப் போலவே வளர்ந்துவரும் நடுத்தட்டு மக்கள், அவர்களின் வாங்கும் சக்தி, நுகர்வு கலாசாரம்.

சாலை வசதிகள், குறிப்பாக ஐ.டி. செழிப்பில் கொழிக்கும் தென்னிந்தியா.

ரூ.100 கோடிக்கு மேல் விரிவாக்கப்பணி களுக்கென செய்யப்படும் முதலீடுகளுக்கு சமீபத்திய பட்ஜெட்டில் தரப்பட்டு இருக்கும் சிறப்பு வரிச் சலுகை.

பலவீனம்:

பெரும்பான்மையான வாகனங்கள் கடன் மூலம் வாங்கப்படுவதால், அதிக வட்டி விகிதம் ஒரு தடைக்கல்.

எக்சைஸ் டூட்டி அதிகரிப்பு

வாய்ப்பு:

வடஇந்தியாவில் வளர்ச்சி விகிதம் அதிகரிக்க ஆரம்பித்திருப்பது.

அதிக எண்ணிக்கையில் இளைஞர்களைக் கொண்ட நம் ஜனத்தொகை, அவர்களது ஆசைகள், கனவுகள்.

அச்சுறுத்தல்:

வளர்ந்து வரும் போட்டி.

பெட்ரோலியப் பொருட்கள் விலை உயர்வு.

சந்தை விலையோடு ஒட்டி இருக்கும்படியான புதிய டீசல் விலைக் கொள்கை.