Published:Updated:

உங்களுக்கு நீங்களே நிதி ஆலோசகர் !

வழிகாட்டும் மந்திரங்கள்... தொகுப்பு: செ.கார்த்திகேயன்

உங்களுக்கு நீங்களே நிதி ஆலோசகர் !

வழிகாட்டும் மந்திரங்கள்... தொகுப்பு: செ.கார்த்திகேயன்

Published:Updated:
##~##

இளம்வயதிலேயே சம்பாதிக்கத் தொடங்கி இருக்கும் இன்றைய இளைஞர்களில் பலர் தங்கள் செலவை சரியாக திட்டமிடாமல் ஜாலியாக இருக்கிறார்கள். இன்றைய வாழ்க்கைச் சூழல் அவர்களை அப்படி மாற்றியிருப்பது உண்மை என்றாலும், சம்பாதிக்கிறோம் செலவழிக்கிறோம் என்றில்லாமல் எதிர்காலத்துக்கும் சேமிக்கவேண்டும் என்கிற அக்கறையை வரவழைத்துக்கொள்ளவேண்டிய நேரமிது. எதிர்காலத்துக்கான சேமிப்பை செய்ய நிதி ஆலோசகரின் வழிகாட்டுதல் அவசியம் தேவை. ஆனால், நிதி ஆலோசகரின் வழிகாட்டுதல் இல்லாமலேயே உங்களுக்கான நிதித் திட்டமிடலை நீங்களே செய்துகொள்ள முடியும். இதற்கான ஃபார்முலாக்கள் என்ன? நமக்கான நிதித் திட்டமிடலை நாமே செய்யும்போது கவனிக்கவேண்டியவை என்ன? என்கிற

உங்களுக்கு நீங்களே  நிதி ஆலோசகர் !

ஒட்டுமொத்த விகடனுக்கும் ஒரே ஷார்ட்கட்!

ரகசிய மந்திரங்களை உங்களுக்கு தெளிவாக எடுத்துச் சொல்கிறேன்.

''நிதித் திட்டமிடல் அல்லது நிதி ஆலோசனை என்பது அதிகம் பணம் சம்பாதிப்பவர்களுக்கு மட்டும்தான் என பலரும் நினைக்கிறார்கள். இந்த எண்ணம் சரியல்ல. பணம் சம்பாதிக்கும் அனைவரும் திட்டமிட்டு செலவு செய்வது அவசியம். அதற்கு நிதித் திட்டமிடல் என்பதும் முக்கியம். உதாரணத்திற்கு, மாதம் 15,000 ரூபாய் சம்பாதிக்கும் ஆட்டோ டிரைவருக்கும் நான் நிதி ஆலோசனை தந்திருக்கிறேன். மாதம் இரண்டு லட்சம், மூன்று லட்சம் என்று சம்பாதிப்பவர்களுக்கும் நிதி ஆலோசனை சொல்லி இருக்கிறேன். ஆக, பணத்தைக் கையாளும் அனைவருமே நிதித் திட்டமிடலை செய்துகொள்வது அவசியம்.

நிதித் திட்டமிடலை தொடங்கும்முன்!

* நிதி சம்பந்தப்பட்ட விஷயங்களை, நடக்கும்போது பார்த்துக்கொள்ளலாம் என்று அஜாக்கிரதையாக இருக்கக்கூடாது. முன்னதாக திட்டமிடுவது அவசியம். தாமதமாகச் சேமிக்க ஆரம்பித்தால், அதன் மூலம் கிடைக்கும் வருமானம் குறைவாகவே இருக்கும்.

* நாம் உழைத்து சம்பாதிக்கும் பணத்தை நமக்காக உழைக்கச் செய்ய வேண்டும். இதற்கு சரியான முதலீட்டுத் திட்டங்களைத் தேர்வு செய்யவேண்டும்.

உங்களுக்கு நீங்களே  நிதி ஆலோசகர் !

* ஒருவருக்கு திடீரென்று ஏற்படும் அசம்பாவிதங்களால் அவரது குடும்பமும், குடும்ப உறுப்பினர்களின் எதிர்கால வாழ்க்கையும் பாதிப்படையாமல் இருப்பதற்கான பாதுகாப்பை முன்னதாகச் செய்துவைக்கவேண்டும். இந்த இடத்தில்தான் ரிஸ்க் மேனேஜ்மென்ட் என்பது முக்கியமான விஷயமாக மாறுகிறது.

* வருமானத்தைப் பெருக்க குறுக்குவழிகள் எதுவும் கிடையாது. நீண்டகால அடிப்படையில் வருமானத்தைப் பெருக்க, நிதி ஒழுக்கமும் பொறுமையும் மிக அவசியம்.

* பங்குகளை வாங்குவது அல்லது விற்பதை சொந்த அறிவை அடிப்படையாக வைத்து செய்யவேண்டுமே ஒழிய, யாரோ சொல்வதைக் கேட்டு செய்யக்கூடாது.

* ஒருவரது போர்ட்ஃபோலியோவில் அசெட் அலோகேஷன் என்பது மிக முக்கியமான விஷயம் ஆகும்.

* ரிஸ்க் என்பது மாறுதலுக்கு உரியது. தேர்வு செய்யும் முதலீட்டுத் திட்டத்தில் அதிக ரிஸ்க் இருந்தால், கிடைக்கும் வருமானமும் அதிகமாகவே இருக்கும். ரிஸ்க் குறைவாக இருந்தால் வருமானமும் குறைவாகவே இருக்கும். ரிஸ்க் குறைவாக இருந்து, அதிக வருமானம் வரவேண்டும் என்று நினைக்கக் கூடாது.

* கிடைக்கும் வருமானத்தை வைத்து மறுமுதலீட்டை தொடரலாம். ஆனால், கவனத்தோடு இதை செய்யவேண்டும்.

* தேர்வு செய்யும் முதலீடானது பணவீக்க விகிதத்தைவிட அதிக வருமானம் தரக்கூடியதாக இருக்கவேண்டும்.

உங்களுக்கு நீங்களே  நிதி ஆலோசகர் !

* குடும்பத்தின் நிதி நிலைமையின் அடிப்படை யில் இப்போது நாம் எந்த இடத்தில் இருக்கிறோம், நமக்கு இன்னும் என்னென்ன தேவை, அதை எப்படி, எந்த வழியில் அடைவது, அதற்காக நாம் எடுக்கும் முயற்சிகளை (முதலீடுகள்) தொடர்ந்து எப்படி பின்பற்றுவது என்கிற கேள்விகளை எழுப்பி அதற்கான பதிலை பெறுவதன் மூலம் உங்களை தயார்படுத்திக்கொள்ள வேண்டும்.

முதலீடுகளை முன்னதாகவே ஆரம்பியுங்கள்!

எதிர்கால தேவைகளுக்காக முதலீடு செய்ய வேண்டும் என்று நினைத்தால், அதை தள்ளிப் போடாமல் உடனே தொடங்குவதுதான் சரி. ஏன் என்பதை ஓர் உதாரணத்துடன் சொல்கிறேன்.

மோகன் என்பவர் தனது முப்பதாவது வயதில் மாதம் 4,000 ரூபாயை 12 சதவிகிதம் வருமானம் எதிர்பார்க்கக்கூடிய மியூச்சுவல் ஃபண்டுகளில் தனது ஓய்வுக்காலம் வரை (30 ஆண்டுகள்) முதலீடு செய்தார். ஆனால், ரோகன் என்பவர் 10 ஆண்டுகள் காலதாமதமாக தனது 40 வயதில் அதே ஃபண்டில் அவருடைய ஓய்வுக்காலம் வரை (20 ஆண்டுகள்) மாதம் 6,000 ரூபாயை முதலீடு செய்கிறார்.

இருவரும் செய்த மொத்த முதலீட்டுத் தொகை 14,40,000 ரூபாய். ஆனால், மோகனுக்கு கிடைத்த  வருமானம் 140 லட்சம் ரூபாய்; ரோகனுக்கு கிடைத்தது வெறும் 60 லட்சம் ரூபாய். பத்து ஆண்டுகளில் 80 லட்சம் ரூபாய் வித்தியாசம். இதற்குதான், முதலீடுகளை முன்னதாகவே ஆரம்பியுங்கள் என்று சொல்கிறேன்.

அவசரத் தேவைக்கான பணம்!

சம்பாத்தியம் பெறும் ஒருவர் மூன்று அல்லது ஆறு மாத கால குடும்பச் செலவுகளை சமாளிக்கிற மாதிரியான தொகையை முன்னதாகவே சேமித்து வைத்துக்கொள்ளவேண்டும். எதிர்பாராமல் ஏற்படும் அசம்பாவிதங்களால் ஒருவருக்கு வேலை பறிபோனாலோ அல்லது வேலைக்குச் செல்ல முடியாத நிலை ஏற்பட்டாலோ குடும்பத்தின் பொருளாதாரம் பாதிக்கப்படாமல் இருக்கவே இந்த அவசரகால நிதி என்பதை அனைவரும் மனதில்கொள்வது அவசியம். உதாரணத்திற்கு, ஒருவர் மாதம் 25,000 ரூபாய் சம்பாதிப்பவராக இருந்தால், 75,000 முதல் 1.5 லட்சம் ரூபாய் வரையிலான பணத்தை அவசரகால நிதியாக சேமித்து வைக்கவேண்டும். இந்தப் பணத்தை கையில் வைத்துக்கொள்ளாமல் லிக்விட் ஃபண்டுகளிலோ அல்லது வங்கி சேமிப்புக் கணக்குகளிலோ போட்டு வைப்பது நல்லது. தேவைப்படும்போது பணத்தை எடுத்துக் கொள்ளலாம். சேமிப்பில் இருக்கும்வரை வருமானமும் கிடைக்கும். அரசு வேலையில் பணியாற்றுபவர்கள் மூன்று மாதத்திற்கு குடும்பத் தேவையான அவசரகால நிதியையும், தனியார் மற்றும் சொந்தமாக தொழில் செய்பவர்கள் ஆறு மாத அவசரகால நிதியையும் சேமித்து வைத்துக்கொள்ளவேண்டும்.

உங்களுக்கு நீங்களே  நிதி ஆலோசகர் !

இந்த அவசரகால நிதி சேமிப்பைத் தொடர்ந்து அதிகரித்து வரவேண்டும். காரணம், இன்றைய நிலையில் மாதம் ஒருவரின் குடும்பச் செலவு 30,000 ரூபாய் என கொண்டால், அவரது குடும்பச் செலவு அடுத்த ஐந்து ஆண்டுகளில் 40,000 ரூபாயாகவும், 15 ஆண்டுகளில் 71,800 ரூபாயாகவும், 20 ஆண்டுகளில் 96,200 ரூபாயாகவும் உயர்ந்திருக்கும். இதை சமாளிக்கவே அவசரகால நிதி சேமிப்பையும் அதிகப்படுத்தச் சொல்கிறேன்.

அதுமட்டுமல்லாமல் இன்றைய நிலையில் ஒரு லட்சம் ரூபாயை வைத்து ஒரு லட்சம் மதிப்புள்ள பொருளை வாங்க முடியும். ஆனால், அடுத்த ஐந்து ஆண்டுகளுக்குப் பிறகு ஒரு லட்சத்தைப் பயன்படுத்தி இன்றைய நிலையில் 74,700 ரூபாய் மதிப்புள்ள பொருளையும், அடுத்த 15 ஆண்டுகளுக்குப் பிறகு 41,700 ரூபாய் மதிப்புள்ள பொருட்களையும், 20 ஆண்டுகளுக்குப் பிறகு 31,000 ரூபாய் மதிப்புள்ள பொருட்களையே வாங்க முடியும். அந்த அளவிற்கு பொருட்களின் விலையும் அதிகரித்திருக்கும்.

ரிஸ்க் மேனேஜ்மென்ட்!

குடும்பத்தின் முக்கியமான பொறுப்பில் இருக்கும் ஒருவருக்கு திடீரென அசம்பாவிதம் ஏற்பட்டால், அந்தக் குடும்பத்தின் நிலைமை என்னவாகும் என்று கொஞ்சம் யோசித்துப் பாருங்கள். அந்த நிலைமையை சமாளிக்க, ஏற்கெனவே இருக்கும் கடன், குடும்பத்தின் எதிர்கால தேவைக்கான தொகை, குடும்பத்தின் மாதச் செலவு (மனைவியின் ஆயுட்காலத்தைக் கருத்தில்கொள்ள வேண்டும். தனிநபராக இருந்தால் அவரின் வருமான விகிதத்தைக் கருத்தில்கொள்ள வேண்டும்) இந்த மூன்று காரணிகளையும் கூட்டினால் எவ்வளவு வருகிறதோ, அந்தத் தொகைக்கு கட்டாயமாக டேர்ம் இன்ஷூரன்ஸ் எடுத்துக்கொள்ள வேண்டும்.

உங்களுக்கு நீங்களே  நிதி ஆலோசகர் !

உதாரணத்திற்கு, 30 வயதுள்ள ஒருவருக்கு மாதச் செலவு 25,000 ரூபாய். அவருக்கு கடன் 10 லட்சம் ரூபாய் இருக்கிறது. அவரது எதிர்கால தேவைகளுக்கு (குழந்தைகளின் திருமணம், கல்வி போன்றவை) 13 லட்சம் ரூபாய் தேவை என்று எடுத்துக்கொண்டால் அவர் மொத்தமாக 70 லட்சம் ரூபாய்க்கு டேர்ம் இன்ஷூரன்ஸ் எடுக்கவேண்டும்.  அல்லது நாம் எடுக்கவேண்டிய டேர்ம் இன்ஷூரன்ஸுக்கான கவரேஜை இப்படியும் நிர்ணயம் செய்துகொள்ளலாம். 30 வயதுள்ள ஒருவரின் வருடாந்திர வருமானத்தைப்போல 12-15 மடங்கு அளவு டேர்ம் இன்ஷூரன்ஸ் எடுக்கவேண்டும். 50 வயதானவர் எனில் 6-8 மடங்கு இன்ஷூரன்ஸ் எடுத்துக்கொள்ள வேண்டும்.

டேர்ம் இன்ஷூரன்ஸைப்போலவே, ஹெல்த் இன்ஷூரன்ஸும் முக்கியம். குடும்பத்தில் 0-20 வயது வரை உள்ளவர்களுக்கு தனியாக ஒரு லட்சம் ரூபாய்க்கும், 20-30 வயது வரை உள்ளவர்களுக்கு மூன்று லட்சம் ரூபாய்க்கும், 30-40 வயது வரை உள்ளவர்களுக்கு ஐந்து லட்சம் ரூபாய்க்கும், 40-60 வயது வரை உள்ளவர்களுக்கு ஏழு லட்சம் ரூபாய்க்கும் மற்றும் 60 வயதுக்கு மேல் உள்ளவர்களுக்கு

10 லட்சம் ரூபாய்க்கும் ஹெல்த் இன்ஷூரன்ஸ் பாலிசி எடுப்பது அவசியம். அல்லது குடும்ப உறுப்பினர்களுக்கு மொத்தமாக ஃபேமிலி ஃப்ளோட்டர் பாலிசியை தேவையான அளவுக்கு எடுத்துக்கொள்ளலாம். இதனால், கட்டும் பிரீமியம் குறையும். அதற்கு தகுந்தாற்போல பாலிசி க்ளைம் செய்வதில் விதிமுறைகள் மாறும்.

உங்களுக்கு நீங்களே  நிதி ஆலோசகர் !

அசெட் அலோகேஷன்..!

ஒருவர் அவரது வயதை வைத்து பங்குச் சந்தையில் எவ்வளவு முதலீடு செய்யலாம், கடன் சந்தையில் எவ்வளவு முதலீடு செய்யலாம் என்பதைக் கணக்கிட ஓர் எளிய ஃபார்முலா இருக்கிறது.

100-லிருந்து ஒருவரின் வயதைக் கழிக்கும்போது கிடைக்கும் மீதி அளவு பங்குச் சந்தையில் முதலீடு செய்யலாம். வயது அளவுக்கு கடன் சந்தைக்கு முதலீடு செய்யலாம். இதே ஒருவருக்கு 45 வயது எனில் 45 சதவிகிதம் கடன் சந்தையிலும்,

55 சதவிகிதத்தை பங்குச் சந்தையிலும் முதலீடு செய்யலாம். இந்த அளவு தாண்டி செய்யப்படும் முதலீடு பாதகமாகவே அமையும்.

ரூல் ஆஃப் 72

செய்யும் முதலீடு எப்பொழுது இரட்டிப்பாகும் என்பதைக் கணக்கிடும் சூத்திரம் இது. நாம் செய்திருக்கும் முதலீடு தற்போது 8% வருமானம் கொடுத்துக்கொண்டிருக்கிறது என்றால், ரூல் 72-ஐ எட்டால் வகுக்கும்போது கிடைக்கும் மதிப்பு ஒன்பது. ஆக, ஒன்பது ஆண்டுகளில் அந்த முதலீடானது இரட்டிப்பாகும். இதே நாம் செய்திருக்கும் முதலீடு 13% வருமானம் கொடுத்துக்கொண்டிருக்கிறது எனில், அந்த முதலீடானது  சுமார் ஆறு ஆண்டுகளில் இரட்டிப்பாகும் என்கிறது ரூல் ஆஃப் 72.

உங்களுக்கு நீங்களே  நிதி ஆலோசகர் !

வீடு மற்றும் கார் வாங்கும்போது..!

ஒருவரது வசதிக்குத் தகுந்தாற்போலவும், தேவைக்குத் தக்கபடியும்தான் வீடு வாங்கிக்கொள்ள வேண்டும். முதலீட்டு கண்ணோட்டத்திலும், தேவைக்கு அதிகமாகவும் கடன் வாங்கி வீட்டை வாங்குவதன் மூலம் பாதிப்பு அதிகமே. ஒரு குடும்பத்தின் ஆண்டு வருமானத்தைவிட வீட்டின் மதிப்பு இரண்டு அல்லது மூன்று மடங்கு அதிகமாக இருக்கலாம். உதாரணத்திற்கு, கணவன் - மனைவி இருவரின் ஆண்டு வருமானம் 20 லட்சம் ரூபாயாக இருந்தால் 40 - 60 லட்சம் ரூபாய் வரை வீட்டின் மதிப்பு இருப்பது நல்லது. வசதிகள் இருக்கும்பட்சத்தில் இந்த விதிமுறையைத் தாண்டி வீட்டின் மதிப்பு இருப்பதில் தவறில்லை. அதேசமயம், ஒருவரின் மாத வருமானத்தில் 36 சதவிகிதம்தான் இ.எம்.ஐ. கட்டக்கூடிய அளவுக்கு வீட்டுக் கடன் இருக்கவேண்டும். இதைத் தாண்டி இ.எம்.ஐ.-ன் மதிப்பு அதிகமாக இருந்தால் சிக்கல்தான்.

உங்களுக்கு நீங்களே  நிதி ஆலோசகர் !

வீடு வாங்கிவிட்டால், அடுத்து கார் வாங்க வேண்டும் என்கிற ஆசை எல்லோருக்கும் வரும். ஆனால், வீடு வாங்குவது வேறு, கார் வாங்குவது வேறு. வீட்டின் விலை பெரும்பாலும் குறையாது. ஆனால், காலையில் 10 லட்சம் ரூபாய் தந்து வாங்கிய காரின் மதிப்பு மாலையில் 8-9 லட்சம் ரூபாயாகவே இருக்கும். அடுத்த ஐந்து ஆண்டுகளில் அதனின் மதிப்பு ஐந்து லட்சத்திற்கும் குறைந்துவிடும். பத்து ஆண்டுகளில் அதிகபட்ச விலையாக மூன்று லட்சம் ரூபாய்க்கு அந்த காரை விற்க முடியாது. ஆக, பத்து ஆண்டுகளில் ஏற்படும் நஷ்டம் ஏழு லட்சம் ரூபாய். இதற்கு இடையில் பெட்ரோல், டிரைவர் சம்பளம், பராமரிப்புச் செலவு என கார் வாங்கிய தொகையைவிட அதிகமான தொகை செலவு செய்யவேண்டி இருக்கும்.

கார் வாங்கும்போது கவனிக்கவேண்டிய ஃபார்முலா என்னவெனில், ஒருவரின் ஆண்டு வருமானத்தில் 50 சதவிகிதத்திற்கு மேல் கார் விலை இருக்கக்கூடாது. பழைய கார் வாங்கினாலும், அது நல்ல தரத்தில் இருக்க வேண்டும். புதிதாக கார் வாங்கினாலும் அதை பத்து ஆண்டுகளாவது பயன்படுத்துவது அவசியம். கார் கடன் வாங்கி கார் வாங்குவதாக இருந்தால் 20:4:10 என்கிற விகிதத்தில்தான் கடன் அளவு இருக்கவேண்டும். அதாவது, முன்பணம் 20%; கடன் கட்டும் காலம் நான்கு ஆண்டுகள்; 10%-க்கும் குறைவான வட்டி.

ஓய்வுக்காலத்திற்காக எவ்வளவு பணம்?

இந்தியாவில் ஒருவரின் ஆயுட்காலமாக கணக்கிடப்பட்டிருக்கும் சராசரி வயது 80. ஆனால், ஒருவர் வேலையில் இருந்து ஓய்வு பெறும் வயது 60. மீதி இருக்கும் 20 ஆண்டுகளுக்கு அவர் யாரையும் சார்ந்து வாழாமல் இருக்கவே இந்த ஓய்வுக்காலத்திற்காக சேமிக்கும் நிதியானது உதவி செய்யும்.

ஒருவரின் வயது முப்பது என்றால், இன்றைய நிலையில் இருக்கும் மாதச் செலவுத் தொகையைவிட, அவரது ஓய்வுக்காலத்தில் அவருக்கு 10-20 மடங்கு அதிகமாக தொகை தேவைப்படும் (பணவீக்க விகிதம் 6-8%). அதனால், சம்பாதிக்கும் ஒவ்வொருவரும் இன்றிலிருந்து மாதாந்திர சேமிப்புத் தொகையில் குறைந்தபட்சம் 10% அதிகபட்சம் 25% தொகையை ஓய்வுக்காலத்திற்காக சேமிப்பது அவசியம். ஓய்வுக்காலத்திற்கு முன்னதாகவே விருப்ப ஓய்வு பெற விரும்புபவர்கள் குறைந்தபட்சம் 20% தொகையை முதலீடு செய்யவேண்டும். வருமானம் உயரும்போதெல்லாம் செய்யும் முதலீடுகளிலும் அதிகமாக பணத்தை முதலீடு செய்வது அவசியம். இது அனைத்து முதலீடு களுக்கும் பொருந்தும்.  

போர்ட்ஃபோலியோவின் வெற்றி !

அசெட் அலோகேஷன் - 91.5%!

உங்கள் முதலீடுகளை எப்படி பிரித்து முதலீடு செய்யவேண்டும் என்று திட்டமிடுகிறீர்களோ, அதுதான் உங்கள் போர்ட்ஃபோலியோவுக்கு வெற்றி தேடித் தரும். ஒருவர் தனது முதலீடுகளை பங்குச் சந்தை, கடன் சந்தை, ரியல் எஸ்டேட், ஆர்ட், தங்கம், மியூச்சுவல் ஃபண்டுகள், கமாடிட்டி என பிரித்து முதலீடு செய்வது உங்களுடைய போர்ட்ஃபோலியோவிற்கு 91.5% சரியான வெற்றியைத் தேடித்தரும்.

முதலீட்டுத் திட்டங்களைத் தேர்வு செய்வது - 4.60%!

அசெட் அலோகேஷனை சார்ந்து எந்த மாதிரியான முதலீட்டுத் திட்டங்களை தேர்வு செய்கிறீர்கள் என்பது முக்கியம். உதாரணத்திற்கு,  மியூச்சுவல் ஃபண்ட் என்றால் அவர்களின் ரிஸ்க் எடுக்கும் திறனை வைத்து பங்கு சார்ந்த ஃபண்டுகளில் முதலீடு செய்வதா அல்லது கடன் சந்தை சார்ந்த ஃபண்டுகளில் முதலீடு செய்வதா அல்லது இரண்டும் கலந்த பேலன்ஸ்டு ஃபண்டுகளில் முடிவு செய்வதா என முடிவெடுப்பது. தங்கத்தில் முதலீடு செய்வதாக இருந்தால், கோல்டு இ.டி.எஃப். அல்லது இ-கோல்டு போன்ற திட்டங்களைத் தேர்வு செய்வதா என்பது உங்களுடைய போர்ட்ஃபோலியோவிற்கு 4.6% சரியான வெற்றியைத் தேடித்தரும்.

மார்க்கெட் டைமிங் - 1.80%

எந்த நேரத்தில் எதில் முதலீடு செய்தால் அதிக லாபத்தை நம்மால் சம்பாதிக்க முடியும் என்பதிலும், சரியான சந்தை நேரத்தைக் கடைப்பிடிப்பதிலும் 1.80%-தான் உங்களின் போர்ட்ஃபோலியோவின் வெற்றி இதை சார்ந்திருக்கும்.

மற்றவை - 2.10%

அரசியல், நாட்டின் பொருளாதாரச் சூழல், சந்தையைப் பாதிக்கக்கூடிய செய்திகள் 2.10% உங்களின் போர்ட்ஃபோலியோவிற்கு வெற்றியைத் தேடித்தரும்.

மேலே சொன்ன அனைத்து விஷயங் களையும் ஆராய்ந்து பார்க்கும்போது, போர்ட்ஃபோலியோவின் வெற்றி என்பது பெரும்பாலும் அசெட் அலோகேஷனை பொறுத்துதான் அமையும்.

முதலீடுகளும், ரிஸ்க் அளவும்!

மேலே காண்பிக்கப்பட்டுள்ள அட்டவணை யில் முதலீட்டு வகைகள், அதிலிருந்து எவ்வளவு வருமானத்தை எதிர்பார்க்கலாம், அந்த முதலீட்டுத் திட்டங்களுக்கு வரிச் சலுகை இருக்கிறதா இல்லையா, முதலீட்டுத் திட்டங்களில் உள்ள ரிஸ்க் அளவு எவ்வளவு என்பது சொல்லப்பட்டிருக்கிறது. இதை ஒருவர் நன்கு மனதில் நிறுத்திக்கொள்வதன் மூலம் அவருக்குத் தேவையான முதலீட்டுத் திட்டங்களை அவரின் ரிஸ்க் எடுக்கும் திறனைப் பொறுத்து தேர்வு செய்துகொள்ள முடியும்.

ஆக, உங்களுக்கு நீங்களே எப்படி நிதித் திட்டமிடல் செய்துகொள்வது என்று சொல்லி விட்டோம். இனி இதன்படி நடக்க ஆரம்பிப்பதை நீங்கள்தான் செய்யவேண்டும்.