Published:Updated:

பணவளக்கலை !

உங்களைப் பணக்காரர் ஆக்கும் தொடர்!

பணவளக்கலை !

உங்களைப் பணக்காரர் ஆக்கும் தொடர்!

Published:Updated:
##~##

 பணம் சம்பாதிக்கத் தேவையான திறமையும் தகுதியும் என்னென்ன என்ற கேள்வி அனைவருடைய மனதிலும் இருக்கும். சுறுசுறுப்பாக இருக்கவேண்டும் என்பார்கள் சிலர். புத்திசாலித்தனத்துடன் இருக்கவேண்டும் என்பார்கள் சிலர். முடிவுவெடுப்பதில் கில்லாடியாய் இருக்கவேண்டும் என்பார்கள் சிலர். எல்லாவற்றுக்கும் மேலாக அதிர்ஷ்டம் வேண்டும் என்பார்கள் சிலர்.

இதில் எந்தத் தகுதி கட்டாயமாக இருக்கவேண்டும். எது கொஞ்சம் முன்னேயும் பின்னேயுமாக இருந்தால் பரவாயில்லை என்றெல்லாம் நம்மில் பலர் தனித்தனியாக பட்டிமன்றங்களை நடத்திக்கொண்டே இருக்கின்றார்கள். அதுவும் தங்களுடன் இருந்த/இருக்கும் ஒருவர் பணம் சேர்த்தார் என்றால் தகுதி விமர்சனங்களும், அதிர்ஷ்டம் குறித்த விவாதங்களுக்கும் அளவே இல்லாமல் இருக்கும்.

ஒட்டுமொத்த விகடனுக்கும் ஒரே ஷார்ட்கட்!

உலகத்தில் மூன்று விதமான மனிதர்களே இருக்கிறார்கள் என்றார் ஒரு அறிஞர். காரியங்களை நிகழ்த்துபவர்கள்; அப்படி நிகழ்கிற காரியங்களைப் பார்த்துக்கொண்டிருப்பவர்கள்; அட, எப்படி இது நடந்தது என்று ஆச்சர்யப்படுபவர்கள்! என்ற மூன்று பிரிவினர்தான் அது என்கின்றார் அந்த அறிஞர். பணம் சம்பந்தப்பட்ட விஷயங்களிலும் இந்த மூன்றுவிதமான மனிதர்களையே பெரும்பாலும் நாம் உலகத்தில் பார்க்க முடிகின்றது.

நம்மைச் சுற்றிலும் இருப்பவர்களில் சிலர் ஐந்து அல்லது பத்து ஆண்டு காலத்தில் சிறுகச் சிறுக பல முயற்சிகளைச் செய்து அதில் வெற்றி பெற்று அதில் வந்த பணத்தை மறுமுதலீடு செய்து வசதிவாய்ப்பை அதிகப்படுத்திக் கொண்டவர்களாக இருப்பார்கள். இவர்களை முயற்சிப்பவர்கள் என்று வைத்துக்கொள்வோம்.

முயற்சிப்பவர்களின் ஒவ்வொரு முயற்சியிலும் கூடவே இருந்து ரிஸ்க் ஏதும் எடுக்காமல், பணரீதியான முதலீடுகளைச் செய்யாமல் அவர்கள் செய்த முழுச் செயல்களுக்கும் எடுத்த ஒவ்வொரு நடவடிக்கைகளுக்கும் ஒரு சாட்சியாக நின்று அவர்கள் வளர்ச்சியை ரசிப்பவர்கள் என்ற சிலரையும் நாம் பார்க்கிறோம். இவர்களை முயற்சிப்பவர்களுக்கு துணை போகிறவர்கள் என்று வைத்துக்கொள்வோம்.

பணவளக்கலை !

ஒவ்வொரு நடவடிக்கையிலும் கூடவே செல்வதுதான் என்றில்லை. முயற்சி செய்பவர் பல நேரங்களில் சுற்றி இருக்கும் நபர்களுடன் தன் முயற்சி குறித்த ஐடியாக்களையும், விவாதங்களை செய்யவும் இந்த இரண்டாவது வகை நபர்களை (முயற்சிப்பவர்களுக்கு துணை போகிறவர்கள்) நாடுவார்கள். இந்த இரண்டு வகையிலுமே இல்லாமல் (முயற்சிப்பவர்களாகவும் இல்லாமல், அவர்களுக்கு துணை போகிறவர்களாகவும் இல்லாமல்) மூன்றாவது வகையாக இருப்பவர்கள், பத்து ஆண்டுகள் கழித்து, 'பாரப்பா, நானும் அவரும் ஒண்ணாத்தான் வேலைசெய்தோம்/தொழில் செய்தோம். இன்னைக்கு அவரோட சம்பாத்தியம் எங்கே! என்னோட சம்பாத்தியம் எங்கே?’ என்று அங்கலாய்ப்பவர்கள் என்ற ஒரு சிலரும் நம்மிடையே இருக்கத்தான் செய்கிறார்கள். இது மூன்றாவது வகை.

பண ரீதியான முன்னேற்றம் என்பது ஒரு தொடர்ச்சியான செயல்பாட்டு விஷயம். ஓவர் நைட்டில்/ஒரு பாடலில் எல்லாம் பணக்காரராவது திரைப்படத்தில் மட்டுமே சாத்தியம். பொதுவாக, நீங்கள் உலகத்தை அளந்தீர்கள் என்றால் குறைந்தபட்சம் ஐந்து வருடத்திலிருந்து பத்து வருட காலகட்டத்தில்தான் பெரும்பான்மையானவர்களின் சம்பாதிக்கும் திறன் வெகுவாக மாற்றத்தைப் பெறுவதைப் பார்ப்பீர்கள். பொதுவாக, சிறிது சிறிதாக எடுக்கப்படும் தொடர் நடவடிக்கைகள் மட்டுமே பணவளத்தினை கூட்டுவதாக அமைகின்றது.

மேலே சொன்ன விதத்தில் மூன்றாவது வகை மனிதராக இது எப்படி நடந்தது என்று ஆச்சர்யப்படும் வகையறாவில் ஒருவர் இருந்தால், இந்த முன்னேற்றம் என்பது அவருடைய கண்ணுக்குப் புலப்படவே புலப்படாது. பணத்தை அடைவதற்காக எடுக்கும் நடவடிக்கைகள் தோல்வி அடையலாம். ஆனால், நடவடிக்கையற்ற பணத்தாசை தோற்றேயாகவேண்டும்

பணவளக்கலை !

என்பதுதான் உலக நியதி.

இதில் நடவடிக்கை என்று குறிப்பிடுவது, ஒவ்வொரு காலகட்டத்திலும் தேவைப்படும் செயல்கள் எனலாம். தொழிலோ/வேலையோ வருமானத்தைப் பெருக்க நடவடிக்கைகள் தொடர்ந்து எடுக்கப்பட்டுக்கொண்டே இருக்கவேண்டும். பணரீதியாக வளமாக இருக்க நம்முடைய நடவடிக்கைகள் எவ்வாறு இருக்க வேண்டும் என்பது அந்தந்த காலத்திற்குக்குத் தகுந்தாற்போல் மாற்றி அமைக்கப்படவேண்டிய ஒன்றாகிறது.

உதாரணத்திற்கு, 1950 அல்லது 60-களில் பிறந்த குழந்தைகளுக்கு வீட்டில் போதிக்கப்பட்ட அடிப்படை விஷயம், நன்றாக படித்து நல்ல மார்க் (60% என்பதே கஷ்டமான காலம் அது!) வாங்கினால் நிச்சயமாக வளமாக வாழலாம் என்பதுதான். வேலையில்லாத் திண்டாட்டம் இருந்த அந்தக் காலத்திலும்கூட பரீட்சையில் பெர்ஃபார்மன்ஸ் இருந்தால் சம்பாத்தியம் உறுதி என்பது கண்கூடாகத் தெரிந்த காரணத்தினால் பெற்றோர்கள் இந்த போதனைகளுடனேயே பிள்ளைகளை வளர்க்க முயன்றார்கள்.

அதேசமயம், 1990-களில் பிறந்த குழந்தைகளுக்கு 99.9 சதவிகிதம் வாங்கினாலேயழிய வாழ்வாதாரத்திற்கு கேரன்டி ஏதுமில்லை என்பதும் கண்கூடு. தற்சமயம் 99.9ஐ வாங்க என்னென்ன செய்யவேண்டுமோ, அதைச் செய்யுமாறு பெற்றோர்கள் சொல்கிறார்கள்.

பொருளாதார வளர்ச்சியின் வேகத்திற்கு ஏற்றாற்போல் எல்லாமே மாறிவிட்டது. படிப்பு என்றால் திறமை என்று நேரடிப் பொருள் இருந்தது அந்தக் காலத்தில். இன்று படிப்பு என்பதற்கும் திறமை என்பதற்கும் இடையே வேறுபாடுகள் இருப்பது கண்டறியப்பட்டு சம்பாத்தியத்தைத் தருவது திறமையாகவும்,  படிப்பு என்பது ஒரு அத்தியாவசியத் தேவையாகவும் மாறி வருகிறது. 2010-களில் பிறந்த குழந்தைகளின் எதிர்காலம் எப்படியிருக்கும் என்று சிந்தித்துப் பாருங்கள்!

இந்தக் கல்விமுறை மாறுதல்கள், சம்பாத்தியத் திற்கான அடிப்படை போதனைகள் என்ப தெல்லாம் சாமானியனுடைய வாழ்க்கையில் ஒரு திட்டத்துடனேயே நடப்பதில்லை. அடிப்படையில் ஒரு மனிதன் உலகத்தில் பிறந்த காலத்தில் இருந்து சம்பாதிக்கும் களத்திற்கு வந்து சேர்வதற்கு முன்னால் வரை எது நல்லது, எது கெட்டது, அவன் எந்தெந்த விஷயங்களுக்கு முக்கியத்துவம் தரவேண்டும், எதைச் செய்யலாம், எதைச் செய்யக்கூடாது என்றெல்லாம் சொல்லித்தரப்பட்டு வளர்க்கப்படுகிறான் என்பதற்கும், அவன் சம்பாதிக்கும் களத்திற்குள் வந்தபின்னர் எது சரி, எது தவறு? என்று அனுபவரீதியாகத் தெரிந்துகொள்வதற்கும் உள்ள வித்தியாசம் குறைவாக இருக்கும் பட்சத்தில்தான் பணரீதியான வெற்றிக்கு வாய்ப்பு அதிகமாக ஆரம்பிக்கிறது.

உதாரணத்திற்கு, உங்கள் வயது என்ன? 20-களில், 30-களில், 40-களில், 50-களில் இருப்பவரா? பணம் சம்பாதிப்பது குறித்த சிந்தனை உங்களுக்கு எந்த வயதில் வந்தது?

பணவளக்கலை !

பணம் தேவை என்பது உங்கள் அனைவருக்கும் ஏறக்குறைய ஒரே வயதில்தான் தெரிந்திருக்கும். தேவையான பணத்தைச் சம்பாதிப்பதற்கான வழிவகைககளைத் தெளிவாகத் தெரிந்துகொண்ட வயதுதான், இன்றைக்கு 50-களில் இருப்பவர்களுக்கு கொஞ்சம் அதிகமாகவும் (உதாரணத்திற்கு 35), 20-களில் இருப்பவர்களுக்கு குறைவாகவும் (உதாரணத்திற்கு 18) இருக்கும். இந்த 17 வருட இடைவெளிக் குறைவு எப்படி வந்தது?  

அதுதான் பொருளாதார வளர்ச்சி செய்த மாயை! படிக்கும்போது படிப்பை மட்டும் கவனி என்று சொல்லி வளர்க்கப்பட்டிருப்பார் 50 வயதுக் காரர். இவர்களில் சிலர் மிக அத்தியாவசியத் தேவைக்குக்கூட பணமில்லாதவர்களே. ஏதாவது ஒரு வகையில் ஊதியத்தைத் தேடிக்கொண்டே படித்திருப்பார்கள். அந்தப் பொருளாதாரச் சூழலில் படித்தவனுக்கே வேலையில்லை என்ற நிலையில் அது மட்டுமே சாத்தியம். அமெரிக்காவில் வேலை செய்துகொண்டே படிக்கிறார்கள் என்று காதில் மட்டுமே கேட்டறிந்த காலம் இது. இன்றைக்கு இந்தியாவிலேயே நம்மைச் சுற்றியே எத்தனையோ மாணவர்கள் வேலை பார்த்துக்கொண்டே படிப்பதைப் பார்க்கிறோம். பணம் என்பது குறித்த புரிதலும், பணம் சம்பாதிக்க எந்த மாதிரியான திறமை வேண்டும் என்ற புரிதலையும் இளம்வதிலேயே இன்றைய இளைஞர்கள் பெற்றுவிடுகிறார்கள். இந்த இளம் வயதுப் புரிதல் பல எதிர்கால வெற்றிக்கு வழி வகுக்கிறது.

பணம் சம்பாதிப்பதற்கான வழிவகைகள் பிறவியிலேயே வருவதில்லை. தனக்குள் இருக்கும் திறமைகளை நேர்படுத்தி ஒரு தொழிலில் செயலாக்கும்போதுதான் சம்பாதிப்பது என்பது சாத்தியமாகிறது.

(கற்றுத் தேர்வோம்)

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism