Published:Updated:

கம்பெனி சட்ட மசோதா...

முதலீட்டாளர்களுக்கு என்ன லாபம்?

கம்பெனி சட்ட மசோதா...

முதலீட்டாளர்களுக்கு என்ன லாபம்?

Published:Updated:
##~##

மத்திய அரசினால் கொண்டுவரப்பட்டுள்ள புதிய கம்பெனி சட்ட மசோதா முதலீட்டாளர்களுக்கு  சாதகமாக இருக்குமா அல்லது பாதகமாக இருக்குமா என இருவேறு கருத்துக்கள் நிலவுகின்றன.

1956-ல் கொண்டுவரப்பட்ட கம்பெனி சட்டத்தில் இதுவரை யில் பெரிய மாற்றங்கள் எதையும் அரசாங்கம் செய்யவில்லை. கடந்த ஆண்டுதான் கம்பெனி சட்ட திருத்த மசோதா கொண்டுவரப்பட்டது. இப்போது நாடாளுமன்றத்தின் இரு அவைகளாலும் ஒப்புதல் அளிக்கப்பட்டு, ஜனாதிபதியின் அனுமதிக்காகக் காத்திருக்கிறது. இந்தப் புதிய சட்டம் விரைவில் நடைமுறைக்கு வரும் சாத்தியம் உள்ள சூழலில், இச்சட்டம் முதலீட்டாளர்களுக்கு எவ்வகையில் சாதகமாக உள்ளது என பங்குச் சந்தை நிபுணர் வி.நாகப்பனிடம் கேட்டோம்.

ஒட்டுமொத்த விகடனுக்கும் ஒரே ஷார்ட்கட்!

புதிய அம்சங்கள்..!

  ''புதிய கம்பெனி சட்ட மசோதா, பழைய கம்பெனி சட்டத்திலிருந்து முற்றிலும் மாறுபட்டுள்ளது என்று சொல்ல முடியாது. என்றாலும், பல விஷயங்களில் மாற்றங்கள் இருக்கிறது. குறிப்பாகச் சொல்லவேண்டும் எனில், சி.எஸ்.ஆர். என்று சொல்லப்படுகிற 'கார்ப்பரேட் சோஷியல் ரெஸ்பான்ஸிபிலிட்டி’,  நிறுவனங்களின் இயக்குநரவையில் பங்குதாரர் அல்லாத சுதந்திரமாகச் செயல்படக் கூடிய தனி நபர்களுக்கென குறிப்பிட்ட அளவு ஒதுக்கீடு, முதலீட்டாளர்களின் நலன்களை உத்தரவாதப்படுத்தும் விதமாக தவறு செய்யும் நிறுவனங்கள் அதன் கணக்குத் தணிக்கை யாளர்கள் மற்றும் இயக்குநர்கள் மீது நடவடிக்கை எடுக்க வாய்ப்பு என பல நல்ல விஷயங்களும் இருக்கவே செய்கின்றன'' என்று ஆரம்பித்தவர், இந்த சட்ட மசோதா  எந்தெந்த வகையில் பங்குச் சந்தை முதலீட்டாளர்களுக்கு சாதகமாக இருக்கும் என்பதையும் குறிப்பிட்டார்.

கம்பெனி சட்ட மசோதா...

நிறுவனத்தின் இயக்குநரவை!

ஏற்கெனவே பங்குச் சந்தையில் பட்டியலிடப்பட்டிருக்கும் நிறுவனங்களுக்கு அறிவுறுத்தப்பட்டு வரும் பல அம்சங்கள் இன்னும் தெளிவாக இதில் சொல்லப்பட்டு இருக்கிறது. நிறுவனத்தின் இயக்குநரவையில் அந்நிறுவனத்தின் பங்குதாரர் அல்லாத தனிநபர், பொதுநலன் கருதி இடம்பெற வேண்டும் எனச் சொல்லப்பட்டிருக்கிறது. குறிப்பாக, மூன்றில் ஒரு பங்கு என்கிற விகிதத்தில் நிறுவனத்தில் முதலீடு செய்யாத தனிநபர் இடம்பெற வேண்டும் என்பது முதலீட்டாளர்களுக்கு சாதகமான விஷயம்.

பொதுவாக, மொத்த இயக்குநர்களும் நிறுவனத்தின் முதலீட்டாளர்களாக இருந்தால், அவர்கள் செய்கிற தவறுகள் வெளியே வருவதற்கு வாய்ப்பு குறைவு. இதுவே, மூன்றாம் நபராக இருக்கும்பட்சத்தில் நிறுவனத்தின் இயக்குநர்கள் செய்யும் தவறுகளைக் கண்டுபிடித்து குறிப்பிட முடியும். இந்த இயக்குநர்களுக்கான பதவிக் காலம் அதிகபட்சமாக 5 ஆண்டுகள். அதிகபட்சமாக இரண்டுமுறை தொடர்ந்து இந்த இயக்குநர்கள் பதவி வகிக்க முடியும்.

ஓர் ஆண்டில் நடந்த எந்த போர்டு மீட்டிங்கிற்கும் ஒரு இயக்குநர் வரவே இல்லை என்றால், அவர் தொடர்ந்து அந்தப் பதவியில் இருக்க முடியாது. வெறும் பேருக்கு இயக்குநராக பல நிறுவனங்களில் இருப்பது என்பது இனி முடியாது. உண்மையான பங்களிப்பு இருந்தால் மட்டுமே இனி தொடர்ந்து இயக்குநராக இருக்க முடியும்.

பெண்களுக்கு..!

குறிப்பிட்ட சில வகை நிறுவனங்களில் குறைந்தபட்சம் ஒரு இயக்குநராவது பெண்ணாக இருக்க வேண்டும் என்கிற முக்கியமான மாற்றமும் தற்போது கொண்டுவரப்பட்டு இருக்கிறது.

ஆடிட்டர்களுக்கு..!

நிறுவனத்தின் ஆடிட்டர்கள் நியமன விஷயத்தில் கொண்டுவரப்பட்டுள்ள மாற்றங்களும் முதலீட்டாளர்களுக்கு பயன்தரக் கூடியவை. நிறுவனத்தின் ஆடிட்டர் தனிநபராக இருக்கும்பட்சத்தில், அதிகபட்சமாக ஐந்து வருடங்கள்தான் தொடர்ச்சியாகப் பணியாற்ற முடியும். ஆடிட் நிறுவனமாக இருக்கிறபட்சத்தில் 5 வருடங்கள் வீதம் இரண்டுமுறை என அதிகபட்சமாக

கம்பெனி சட்ட மசோதா...

10 வருடங்கள் பணியாற்றலாம். இதனால் நிறுவனத்தின் கணக்கு விவரங்கள் அனைத்திலும் வெளிப்படைத் தன்மையை எதிர்பார்க்கலாம்.

ஒரு ஆடிட்டர் செய்த தவறை, இன்னொரு ஆடிட்டர் கண்டுபிடிக்க முடியும். ஒரே ஆடிட்டர் தொடர்ச்சியாக பணியாற்றும்பட்சத்தில் நிறுவனத்துக்கு சாதகமாக கணக்குகளை கையாளும் போக்கு இருக்கலாம் என்னும் குற்றச்சாட்டு இனி எழ வாய்ப்பில்லை. இதனால் நிறுவனத்தின் உண்மையான நிதிநிலை, மதிப்பு மற்றும் செயல்பாட்டை  இனி முதலீட்டாளர்கள் அறிய முடியும்.  

  இயக்குநர்களுக்கான சம்பளம்!

இயக்குநர்களுக்கான சம்பளம் என்கிற விஷயத்தில் நிகர லாபத்தில் 5 சதவிகிதத்திற்கும் அதிகமாக இருக்கக்கூடாது என்கிற கட்டுப்பாடு கொண்டுவரப்பட்டுள்ளது. இதனால் இயக்குநர் களுக்கான செலவு வரம்புக்குள் வரும் என்பதால் நிறுவனத்தின் செலவுகள் கட்டுப்படுத்தப்படும். அதேமாதிரி, நிர்வாகத்தின் உயர் அதிகாரிகளின் மொத்தச் சம்பளம் அந்நிறுவனத்தின் அந்த ஆண்டு நிகர லாபத்தில் 11%-த்துக்கு மேல் இருக்க முடியாது. அப்படி இருந்தால் பங்குதாரர்கள் ஒப்புதலும் மத்திய அரசின் ஒப்புதலும் வேண்டியிருக்கும்.

தவறு செய்தால் நடவடிக்கை!  

நிறுவனத்தின் இயக்குநர்கள், ஆடிட்டர்கள் அல்லது ஆலோசனை தருபவர்கள் என ஏதாவது ஒரு மட்டத்தில் நடந்த தவறுகளால் நிறுவன வளர்ச்சி பாதிக்கப்பட்டுள்ளது என்பதற்கான நியாயமான காரணங்கள் இருந்தால் சம்பந்தப்பட்டவர்கள் மீது நடவடிக்கை எடுக்க இந்த சட்ட திருத்தம் வகை செய்கிறது. குறிப்பாக, டெபாசிட்தாரர்கள் மற்றும் பங்கு முதலீட்டாளர்கள் 100 பேர் கூட்டாகச் சேர்ந்து நியாயமான காரணங்களுக்காக சட்டப்படி நடவடிக்கை குழுவிடம் பரிகாரம் கோர முடியும். இதை 'க்ளாஸ் ஆக்‌ஷன் சூட்’ என அமெரிக்காவில் சொல்வார்கள்.

இதுபோன்ற சில திருத்தங்கள் முதலீட்டாளர் நோக்கில் சாதகமான விஷயங்கள் என்று சொல்ல முடியும். அதேசமயத்தில், சி.எஸ்.ஆர். என்று சொல்லப்படும் 'கார்ப்பரேட் சோஷியல் ரெஸ்பான்ஸிபிலிட்டி’க்கு நிறுவனங் கள் குறிப்பிட்ட தொகையை ஒதுக்க வேண்டும் என்பதில் சரியான தெளிவில்லை. குறைந்தபட்சம் 5 கோடி நிகர லாபம் ஈட்டும் நிறுவனங்கள் 2 சதவிகிதம் இதற்கு நிதி ஒதுக்க வேண்டும் என்கிறது. அதேசமயத்தில், விற்பனை மதிப்பு 1,000 கோடி அல்லது சொத்து மதிப்பு 500 கோடி வைத்திருக்கும் நிறுவனங்களுக்கு இது பொருந்தும் என்கிறது. இந்தக் குழப்பம் தீர்க்கப்பட வேண்டும்.

மேலும், இந்தத் தொகையை நிறுவனங்களே நேரடியாகச் செலவிட்டால் அதற்கு வரிச்சலுகை கிடையாது. ஆனால், பிரதமர் நிவாரண நிதிக்கு ஒதுக்கினால் வரிச்சலுகை உண்டு என்கிற ஒரு விஷயமும் உள்ளது. இது ஒருவகையில் மறைமுகமாக நிறுவனங்களைக் கட்டுப்படுத்துகிற விஷயம். இந்த சட்டதிருத்தத்தை நிறுவனங்கள் நடைமுறைப்படுத்துவதற்கான கால அவகாசம் எவ்வளவு என்பதை இன்னும் தெளிவுபடுத்த வில்லை'' என்று இதன் இன்னொரு பக்கத்தையும் தெளிவாக்கினார் நாகப்பன்.

1956-ல் கொண்டுவரப்பட்ட சட்டத்தை வைத்துக்கொண்டு இவ்வளவு காலத்தை ஓட்டிவிட்டோம். கால மாற்றங்களுக்கு ஏற்ப கொண்டுவரப்படும் சட்டத் திருத்தங்களாவது நிறுவனங்களுக்கும், முதலீட்டாளர்களுக்கும் நல்லதைச் செய்யட்டும் என எதிர்பார்ப்போம்.

- நீரை.மகேந்திரன்.