Published:Updated:

சேமிப்பை அதிகரிக்கும் ஃபைனான்ஷியல் ஆப்ஸ்!

சேமிப்பை அதிகரிக்கும் ஃபைனான்ஷியல் ஆப்ஸ்!

##~##

வரவு, செலவு, சேமிப்பு, கொடுக்கல், வாங்கல் என எல்லாக் கணக்குகளையும் தனித்தனியாக நிர்வகிக்க முடியும்.

இன்றைய நிலையில் ஸ்மார்ட்போன்கள் மனித வாழ்வின் அங்கமாகவே மாறிவிட்டன. ஒருவரைத் தொடர்புகொள்வதற்கு மட்டும்தான் செல்பேசி என்ற நிலை மாறி, இன்று ஸ்மார்ட் போன்கள், கேமரா,  மடிக்கணினியின் பணிகளையும் செய்வதால் மக்களைக் கவர்ந்து வருகின்றன. மக்களின் விருப்பத்துக்கு ஏற்றாற்போலக் குறைந்த விலைக்கு நிறைந்த சேவைகளுடன் ஸ்மார்ட்போன்களைப் போட்டிப் போட்டுக்கொண்டு மொபைல் நிறுவனங்கள் அறிமுகம் செய்து வருகின்றன.

இந்த ஸ்மார்ட்போன்களில் இருக்கும் 'ஆப்ஸ்’ என்று  சொல்லப்படும் அப்ளிகேஷன்கள் ஏராளம். அதில் அனைவருக்கும் பயன் தருவது 'ஃபைனான்ஷியல் ஆப்ஸ்’கள்.

இந்த 'ஃபைனான்ஷியல் ஆப்ஸ்’கள் ஒவ்வொருவரின் வரவு செலவு மற்றும் சேமிப்பு விவரங்களை உள்வாங்கிக்கொண்டு அதை வரைபடங்களுடன் சரியான விகிதத்தில் வெளிப்படுத்துகின்றன. தினமும் ஏதேதோ செலவு செய்துவிட்டு, எதற்காகச் செலவு செய்தோம் என்பது தெரியாமல் தவிப்பவர்களுக்கு இவை மிகவும் உதவியாக இருக்கும்.

இந்த 'ஃபைனான்ஷியல் ஆப்ஸ்’களின் சிறப்பம்சங்கள் என்னென்ன?

  சிறப்பம்சங்கள்!

ஒருவர் தினமும் செய்யும் செலவுகளை இந்த ஆப்ஸில் குறித்துவிடுவதால், எதற்கு எவ்வளவு செலவு செய்திருக்கிறோம் என்பதைத் துல்லியமாகக் காட்டிவிடும். இதனால், தேவையில்லாத செலவுகளைக் குறைத்துச் சிக்கனத்தை அதிகப்படுத்த முடியும்.

சேமிப்பை அதிகரிக்கும் ஃபைனான்ஷியல் ஆப்ஸ்!

வரவு, செலவு, சேமிப்பு, கொடுக்கல், வாங்கல் என எல்லாக் கணக்குகளையும் தனித்தனியாக நிர்வகிக்க முடியும். இதனால், தேவையில்லாத குழப்பங்கள் இருக்காது.

இந்த ஆப்ஸ்களில் பல நாடுகளின் ரூபாய் மதிப்பீடு வசதி இருப்பதால், வசதிக்கு ஏற்றாற்போல அவரவர்களின் வரவு, செலவுச் சேமிப்புக் கணக்குகளின் மதிப்பைக் கணக்கிட்டுக்கொள்ளலாம்.

ஏற்கெனவே செய்துவரும் வரவு செலவுக் கணக்குகள்போக, புதிய கணக்குகளைத் துவங்கி அதுபற்றிய விவரங்களையும் இதில் பதிந்துவைக்க முடியும். வாரத்துக்கு, மாதத்துக்கு, வருடத்துக்கு ஒருமுறை எனத் தங்களின் விவரக் கணக்குகளைக் காலநிலைக்கு ஏற்ப மாற்றிக்கொள்ள முடியும்.

 ஏற்கெனவே உள்ள கணக்குகள், தேவையில்லை என்று நினைத்தால் அதை அழித்துப் பிற்பாடு புதிய கணக்குகளைத் தொடங்கும் வசதியும் இதில் உள்ளது.

பிறர் உங்களின் வரவு, செலவு விவரங்களை எடுத்துப் பார்க்காதபடி பாஸ்வேர்டு லாக் வசதியும் இதில் உள்ளது.

இலவசமாகக் கிடைக்கும் இந்த அப்ளிகேஷன்களை மிக எளிதாகப் பயன்படுத்தலாம்.

இதில் பதிவு செய்திருக்கும் வரவு செலவு சேமிப்பு விவரங்களைக் கூகுள் டிரைவில் பேக்கப் எடுத்து வைத்துக்கொள்ள முடியும்.  தேவைப்படும்போது ப்ரின்ட் அவுட் எடுத்துக்கொள்ளலாம்.

  ஃபைனான்ஷியல் ஆப்ஸ்கள் பலவிதம்!

இந்த ஆப்ஸ்கள் பல பெயர்களுடன் பயன்படுத்தப்பட்டு வருகின்றன. அவற்றில் சில,

 ஃபைனான்ஷியஸ் - எக்ஸ்பென்ஸ் மேனேஜர் (Financius - Expense Manager).
எக்ஸ்பென்ஸ் மேனேஜர் (Expense Manager)
மணி லவ்வர் - எக்ஸ்பென்ஸ் மேனேஜர் (Money Lover - Expense Manager)
 ஃபைனான்ஷிஸ்டோ - எக்ஸ்பென்ஸ் மேனேஜர் (Financisto - Expense Manager)
ஈஸி பட்ஜெட் - எக்ஸ்பென்ஸ் ட்ராக்கர் (Easy budget expense tracker)

இந்த ஐந்து ஆப்ஸ்களில் முதலாவதும், ஐந்தாவதுமாக இருக்கிற ஆப்ஸ்கள் 50 ஆயிரம் முதல் 1 லட்சம் பேர் பயன்படுத்தி வருகிறார்கள். நடுவில் இருக்கிற மூன்று ஆப்ஸ்கள் 5 லட்சம் முதல் 10 லட்சம் பேர் பயன்படுத்தி வருகிறார்கள்.

சேமிப்பை அதிகரிக்கும் ஃபைனான்ஷியல் ஆப்ஸ்!

இதனைப் பயன்படுத்திய வாடிக்கையாளர்கள் இந்த ஆப்ஸ் களுக்கு நட்சத்திரப் புள்ளிகளையும் தந்திருக்கிறார்கள். அதன்படி, ஃபைனான்ஷிஸ்டோ 4.7 நட்சத்திரப் புள்ளிகளைப் பெற்று, முதலிடத்தில் இருக்கிறது. ஆனால், ஈஸி பட்ஜெட் 4.1 நட்சத்திரப் புள்ளிகளை மட்டுமே பெற்றிருக்கிறது.

இந்த ஆப்ஸ்களைப் பயன்படுத்தும் சிலரிடம் பேசினோம். இந்த ஆப்ஸ்கள் செலவுகளைக் குறைப்பதாகச் சொல்கிறார் கோவையைச் சேர்ந்த ஜூலியட் ரூபி.

''கடந்த ஆறு மாதமாக 'ஃபைனான்ஸ் அஸிஸ்டன்ட்’ என்கிற ஆப்ஸை பயன்படுத்துகிறேன். ஒவ்வொரு செலவின்போதும் குறித்து வைக்கவும், அதனை எப்போது வேண்டுமானாலும் எடுத்துப் பார்க்கவும் உதவியாக உள்ளது. மாதந்தோறும் அந்தந்த மாதத்தின் செலவினங்களைச் சதவிகிதத்தில் காட்டிவிடுவதால், ஒவ்வொரு மாதமும் தேவையில்லாதச் செலவினங்களைக் குறைத்துக்கொள்ள முடிகிறது.

சேமிப்பை அதிகரிக்கும் ஃபைனான்ஷியல் ஆப்ஸ்!

ஒருநாள் முழுக்க நாம் எதுவும் பதிவு செய்யவில்லையெனில், அதுவே நினைவுபடுத்தவும் செய்கிறது. அதேபோல, செலவுகள் எல்லை மீறினால்  நம்மை எச்சரிக்கை செய்கிறது. இந்த ஆப்ஸைப் பயன்படுத்த ஆரம்பித்தபிறகு செலவு கணிசமாக குறைந்திருக்கிறது'' என்றார்.

சென்னையைச் சேர்ந்த சுயதொழில் செய்யும் என்.ஹரி, ''இந்த ஆப்ஸ்கள் எனக்குக் கிடைத்த வரப்பிரசாதம்'' என்கிறார்.

''என் தொழில்ரீதியான வரவு செலவு விவரங்களைக் குறித்து வைக்க இந்த ஆப்ஸ்கள் மிகவும் பயனுள்ளதாக இருக்கிறது. இந்த அப்ளிகேஷனைப் பயன்படுத்த ஆரம்பிக்கும்முன் வரவு செலவு கணக்குகளைப் பேப்பரில் குறித்து வைப்பேன். சில சமயங்களில் அந்தத் தாள்கள் காணாமல்போய்க் கஷ்டப்பட்டிருக்கிறேன். ஆனால், இப்போது இந்த ஆப்ஸ்கள் செலவினங்களைக் குறித்து வைத்துக்கொள்ளவும், சரிபார்க்கவும் மிகவும் பயன்படுகிறது. பாஸ்வேர்டு போட்டு பயன்படுத்துவதால் மற்றவர்கள் இதைப் பயன்படுத்தவும் முடியாது. இந்த அப்ளிகேஷன் என்னைப் போன்றவர்களுக்குக் கிடைத்த வரப்பிரசாதம்'' என்றார்.

சேமிப்பை அதிகரிக்கும் ஃபைனான்ஷியல் ஆப்ஸ்!

தனக்கு நிதி மேலாண்மைப் பற்றிக் கற்றுத் தருவதாகச் சொல்கிறார் சத்தியமங்கலத்தைச் சேர்ந்த எஸ்.பாரதிராஜா.  ''நான் ஃபைனான்ஷியல் ஆப்ஸை கடந்த மூன்று மாதங்களாகப் பயன்படுத்தி வருகிறேன். இந்த ஆப்ஸை பயன்படுத்த ஆரம்பித்தபிறகு என் நிதி மேலாண்மை திறன் வளர்ந்திருக்கிறது.  அதுமட்டுமல்லாமல், கிரெடிட் கார்டுகளைக் கொண்டு ஷாப்பிங் மேற்கொள்வதால் அந்தச் செலவினங்களைக் குறித்துவைக்க ஃபைனான்ஷியல் ஆப்ஸ்களைப் பயன்படுத்துவேன். செலவுகள் எல்லை மீறும்போது இந்த அப்ளிகேஷன் எச்சரிக்கைச் செய்வதால், உடனே உஷாராகிவிடுவேன். இதனால் என் செலவுகள் குறைந்து, சிக்கனம் பெருகி சேமிப்பு அதிகரிக்கிறது'' என்றார்.

செலவு எப்படி ஆகுதுன்னே தெரியலை என்று புலம்புகிறவர்கள், முதலில் இந்த ஆப்ஸ்களைப் பயன்படுத்தத் தொடங்கலாமே!

- செ.கார்த்திகேயன்.
கு.அஸ்வின், ஞா.சுதாகர்,
படங்கள்: ஆ.முத்துக்குமார்,
  தி.குமரகுருபரன்.

அடுத்த கட்டுரைக்கு