Published:Updated:

பணவளக் கலை !

டாக்டர் எஸ்.கார்த்திகேயன்

பணவளக் கலை !

டாக்டர் எஸ்.கார்த்திகேயன்

Published:Updated:

 உங்களைப் பணக்காரர் ஆக்கும் தொடர்

நம்மில் பெரும்பாலானோர் எவ்வளவு விரைவாக நம்மால் பணக்காரராக முடியும் என்பதிலேயே ஆவலாக இருக்கிறோம். நீங்கள் நினைக்கும் அளவுக்கு உங்களால் வேகமாகப் பணக்காரராக முடியாது என்று நான் சொன்னால் உங்களுக்குக் கோபம் வரும் இல்லையா? உங்களுக்குத்தான் என்றில்லை, இதேமாதிரி யார் சொன்னாலும்  கோபப்படவே செய்வார்கள்.

ஆனால், நிஜ வாழ்க்கையில் ஒருவர் நினைக்கும் அளவிலான வேகத்தில் அவரால் பணக்காரராக முடியாது என்பதே உண்மை.  ஒருவரின் திறமையைக் கொண்டு எந்த அளவுக்கு வேகமாகச் சம்பாதிக்க முடியுமோ, அதைவிடப் பலமடங்கு வேகமாகச் சம்பாதிக்க முடியும் என்று வேண்டுமானால் சொல்லலாம். ஏனென்றால், மனோவேகம் என்பதற்கு நிஜவாழ்க்கையில் ஈடுதருவது மிகவும் கடினமான ஒன்றாகும்.

ஒட்டுமொத்த விகடனுக்கும் ஒரே ஷார்ட்கட்!

மனத்தின் வேகத்துக்கு எப்படி ஈடுகொடுக்க முடியாதோ, அதேபோல் மனமில்லாவிட்டாலும் பணம் சம்பாதிக்க முடியாது. பணம் சம்பாதிக்க மனமில்லாதவர்கள் இருக்கிறார்களா என்ன என்று கேட்பீர்கள். பணம் சம்பாதிக்க மனமிருக்கும். அதற்கான வழிவகைகளைச் செயல்படுத்துவதற்கு மனமிருக்காது. கொஞ்சம் கடன், கைமாற்று எனப் பணத்தினைப் புரட்டி தம்கட்டி ஒரு வீடு அல்லது இடத்தை வாங்கிப்போடுங்கள் என்று ஒருவரிடம் சொன்னால், அட ஏங்க இதிலெல்லாம் மண்டையை உடைத்துக்கொண்டு கஷ்டப்படவேண்டும். இன்றைக்கு நான் பார்க்கும் வேலை எத்தனை நாளைக்கு நிலைக்கும் என்றே தெரியவில்லை. வருகிற சம்பளம் கைக்கும் வாய்க்குமே போதவில்லை. பேசாமல் உள்ளதைக்கொண்டு நல்லதாக வாழ்ந்துவிட்டுப் போவோம் என்பவர்கள் பணம் சம்பாதிக்க முடியாது.

சரி, பணம் போதவில்லையா? ஒரு பகுதிநேர வேலைக்குப் போங்களேன் என்று சொன்னால், பார்ட்-டைம் வேலை என்ன பணத்தைக் கொட்டியா கொடுக்கப்போகிறது என்பார்கள்.

பணவளக் கலை !

சரி, பார்க்கும் வேலையில் பதவி உயரவேண்டுமெனில், அதற்குத் தேவையான படிப்பைப் படிக்கலாமே என்றால், இந்த வயசுக்கப்புறம் நான் படித்து என்னத்தைக் கிழிக்கப்போகிறேன் என்பார்கள்.

சரி, பகுதிநேரமாக ஒரு சிறிய பிசினஸாவது ஆரம்பியுங்கள். அதில் நல்ல வருமானம் வந்தால் அதை முழுநேர பிசினஸாக மாற்றி செட்டிலாகி நிறையச் சம்பாதிக்கலாமே என்றால் அதெல்லாம் ரிஸ்க். வியாபாரம் சரியாக நடக்கவில்லை என்றால் யார் நஷ்டப்படுவது? என்பார்கள். நான் வேலைக்குப் போய்க் கைநிறைய சம்பாதிக்கிறவன். நான் எப்படி இப்படி ஒரு சின்ன வியாபாரத்தை ஆரம்பிப்பது என்பார்கள்.

இதுபோல எல்லா யோசனைகளுக்கும் சாக்குச் சொல்லும் பேர்வழிகள் பணம் சம்பாதிப்பது மிகவும் கடினம். இவர்கள் பணம் சம்பாதிக்க வேண்டும் என்றால் பெருமுயற்சி எதுவும் எடுக்கவேண்டியில்லாத, கடும் உழைப்புத் தேவைப்படாத, ரிஸ்க் ஏதுமில்லாத, நேர முதலீடோ, பண முதலீடோ எதுவும் தேவைப்படாத, கவலை எதுவுமே படவேண்டியில்லாத ஒரு பணம் சம்பாதிக்கும் வழி என்று ஒன்று இருக்கவேண்டும். அப்படி ஒரு வழி உலகத்தில் இல்லை. அப்படி ஒன்று இருந்தால் அந்த வழியில் மட்டுமே இதுபோன்ற நபர்கள் பணம் சம்பாதிக்க முடியும்.

பணவளக் கலை !

இப்படி எதுவுமே நமக்கு முன்னேற்றத்தைத் தராது, சரிப்பட்டு வராது என்ற எண்ணம் நெஞ்சில் நிறைந்து இருந்தால், நாம் எப்படிப் பணத்தைச் சம்பாதிப்பது என்பதைத்தான் நான் திரும்பத் திரும்ப வலியுறுத்துகிறேன். சிறிய அளவிலான, தொடர்ந்து செய்யக்கூடிய, வெகு சுலபமான சில காரியங்களே பணத்தை ஒருநபருக்குக் கொண்டுவந்து தருவதாக இருக்கும். பணக்காரராவது சுலபமான விஷயம் இல்லை என்றாலும், அந்த வழியில் பயணிக்கச் சுலபமான காரியங்கள் பலவற்றையும் நீங்கள் தேர்ந்தெடுக்கலாம்.

இப்படி மாறுதல்களைக் கொண்டுவர முயற்சிப்பதை விட்டுவிட்டு, நான் ஏன் இப்படிப் பணவசதி இல்லாமல் இருக்கிறேன் என வருத்தப்பட்டுக் கிடப்பதில் அர்த்தமே இல்லை. நீங்கள் இன்றைக்கு இருக்கும் நிலைமைக்கு நீங்களே முழுப்பொறுப்பு. உங்கள் வாழ்க்கையை நீங்கள்தான் இன்றுவரை அமைத்துக்கொண்டீர்கள். இனியும் அமைத்துக்கொள்ளப் போகிறீர்கள். உங்கள் வேலை உங்களுக்குப் பிடிக்கவில்லை என்றால் அதற்கு நீங்கள்தான் பொறுப்பு. இன்றைக்கு நீங்கள் கடனில் மூழ்கியிருக்கிறீர்கள் எனில் அதற்கும் நீங்கள்தான் பொறுப்பு. அட, குண்டாக அதிக எடையுடன் இருக்கிறீர்களா? அதற்கும் நீங்களே பொறுப்பு. நீங்கள் சந்தோஷமாக இல்லையா? அதற்கும் நீங்கள்தான் பொறுப்பு.

இப்படிச் சொல்வதன் மூலம் நீங்கள் உங்களையே குறை சொல்லிக்கொள்ள வேண்டும் என்று நான் சொல்லவில்லை. நீங்கள்தான் பொறுப்பு என்று சொல்கிறேன். உங்களுடைய வாழ்க்கை இன்றுவரை உங்களாலேயே நிர்ணயிக்கப்பட்டு வந்துள்ளது என்று சொல்கிறேன். உங்களுக்கு நீங்கள் இன்று இருக்கும் நிலை பிடிக்கவில்லையா? அதை யார் மாற்றுவார்கள்? நீங்கள்தான் மாற்ற வேண்டும். மாற்றுவதற்கான முதல் நடவடிக்கையை எடுக்கவேண்டும். அந்த நடவடிக்கைகளை எடுக்கத் தயங்கினால், தயக்கத்தைப் போக்குவதற்கு முயலுங்கள். நடவடிக்கைகளை எடுக்கவே முடியாது என்று நினைத்தீர்கள் எனில், பேசாமல் இன்று நீங்கள் இருக்கும் பணரீதியான நிலைமையை மனதார ஏற்றுக்கொண்டுவிட வேண்டியதுதான்.

நீங்கள் இன்று இருக்கும் நிலைக்கு நீங்களே பொறுப்பு என்பதை உணர்ந்துவிட்டால்,  அதற்குத் தீர்வும் நீங்களேதான் என்பதையும் உணர்ந்துகொள்ளுங்கள். என் பெற்றோர்கள் சொத்து சேர்த்துவைக்கவில்லை; என் நண்பர்கள் என்னைக் கைதூக்கிவிடவில்லை; என் மனைவி என் முயற்சிகளுக்குக் கைகொடுக்கவில்லை; என் உறவினர்கள் எனக்கு ஆதரவு காட்டவில்லை; என் முதலாளி என்னை முன்னேறவே விடவில்லை; என் பாஸ் எனக்குப் பெரிய முட்டுக்கட்டையாக இருந்தார் என மற்றவர்கள் மீது பணம் சம்பாதிக்க முடியாததற்கான பழியினைப் போட முயற்சிக்காதீர்கள். பழி போட ஆரம்பிக்கிற நேரத்திலேயே உங்கள் வாழ்க்கையை முடிவு செய்வதற்கான சக்தியை நீங்கள் இழக்க ஆரம்பிக்கிறீர்கள் என்பதைப் புரிந்துகொள்ளுங்கள்.

பணவளக் கலை !

என்னுடைய இன்றைய பணரீதியான நிலைமைக்கு நானே காரணம் என்று ஒப்புக் கொள்வதைவிட, யார் மீதாவது பழிபோடுவதே மிகச் சுலபமான வழி. அதனாலேயே நாம் அனைவரும் இதனைத் தொடர்ந்து செய்கிறோம். உங்களுடைய வளமை. நீங்கள்தான் அதை வளப்படுத்திக்கொள்ள முடியும்.

இதனை மனமார உணர்ந்துகொண்ட நிமிடமே நீங்கள் மாற்றத்தை நோக்கி அடியெடுத்துவைக்க ஆரம்பித்துவிடுவீர்கள். பணரீதியான தோல்வியும் சரி, வெற்றியும் சரி, ஒரேநாளில் யாருக்கும் வந்துவிடுவதில்லை. ஏற்கெனவே சொன்னதைப்போல் தொடர்ந்து செய்துவரும் சிறுசிறு காரியங்களினாலேயே தோல்வியோ, வெற்றியோ வருகிறது என்பதைத் தெளிவாகப் புரிந்துகொண்டு உங்களுடைய பணம் நோக்கிய பயணத்தை உடனடியாக ஆரம்பியுங்கள்.

(கற்றுத் தேர்வோம்)

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism