Published:Updated:

மதிப்பு உயர்ந்த ரூபாய்: தொடர்ந்து ஏற்றம் காணுமா?

சே.புகழரசி

கடந்த வாரத்தில் அமெரிக்க டாலருக்கு எதிரான இந்திய ரூபாயின் மதிப்பு கடந்த எட்டு மாதங்களில் இல்லாத அளவுக்கு உயர்ந்தது. இது கடந்த ஆண்டு டிசம்பர் மாதத்தோடு ஒப்பிடும்போது சுமார் 12 சதவிகிதம் அதிகம்.  

இந்த ஏற்றத்துக்கு என்ன காரணம்? இதில் கவனிக்க வேண்டிய விஷயங்கள் என்னென்ன? இந்திய ரூபாய் மதிப்பு உயர்ந்ததால் யாருக்குப் பாதிப்பு?  ரூபாய் மதிப்பு தொடர்ந்து உயருமா? எனப் பல கேள்விகள் வாசகர்களின் மனத்தில். இந்தக் கேள்விகளை இந்தியா சிமென்ட்ஸ் கேப்பிட்டல் நிறுவனத்தின் தலைமை செயல் அதிகாரி கே.சுரேஷிடம் கேட்டோம். விளக்கமாகச் சொன்னார் அவர்.

ஏன் இந்த ஏற்றம்?

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

''கடந்த ஆண்டு நடப்புக் கணக்குப் பற்றாக்குறை காரணமாக வரலாறு காணாத அளவுக்கு இந்திய ரூபாயின் மதிப்பு சுமார் 68.80 வரை சரிந்தது. நடப்புக் கணக்குப் பற்றாக்குறைக்குக் காரணம், தங்கம் மற்றும் கச்சா எண்ணெய் அதிக அளவில் இறக்குமதியானதுதான். அதேசமயம், ஏற்றுமதியும் குறைந்தது. இதையடுத்து தங்கம் இறக்குமதியைக் குறைக்க பல தடைகளைக் கொண்டுவந்தது மத்திய அரசு.

மதிப்பு உயர்ந்த ரூபாய்: தொடர்ந்து ஏற்றம் காணுமா?

பணவீக்கம் காரணமாக மக்களிடையே பணப்புழக்கம் குறைந்ததையடுத்து இறக்குமதி செய்யப்படும் வாகன விற்பனை வெகுவாகக் குறைந்தது. மேலும், இறக்குமதி பொருட்களான எலெக்ட்ரானிக் பொருட்களின் விற்பனையும் குறைந்தது. மொத்தத்தில் இறக்குமதி வெகுவாகக் குறைந்தது.

அதேசமயம், ஏற்றுமதியும் அதிகரித்தது. கடந்த ஆண்டில் நல்ல பருவமழை காரணமாக மகசூல் அதிகரித்து, நறுமணப் பொருட்களின் ஏற்றுமதி இதுவரை இல்லாத அளவுக்கு அதிகரித்துள்ளது. இதனால் மொத்த விலை குறியீடு அதிகரித்தது.

மதிப்பு உயர்ந்த ரூபாய்: தொடர்ந்து ஏற்றம் காணுமா?

மேலும், பணவீக்கமும் கட்டுக்குள் வந்தது. இதனால் நடப்புக் கணக்குப் பற்றாக்குறை குறைந்து, இந்திய பொருளாதாரமும் வளர்ச்சியடைந்து ரூபாயின் ஏற்றத்துக்கு ஒரு காரணமாக மாறியிருக்கிறது.

குறிப்பாக, ரூபாயின் மதிப்பு கடந்த வாரம் எட்டு மாதங்களில் இல்லாத அளவுக்கு உயர்ந்து சுமார் 59.66-ஆகக் காணப்பட்டது. இந்திய பங்குச் சந்தைகளில் அந்நிய நிதி நிறுவனங்கள் முதலீடு செய்வதற்கு இது ஒரு நல்ல வாய்ப்பாக அமைந்தது. ஏனெனில், வளர்ந்துவரும் சந்தைகளில் இந்தியா முக்கிய இடத்தில் இருந்துவருகிறது. மேலும், வரும் நாடாளுமன்ற தேர்தலையடுத்து உறுதியான ஆட்சி அமையும் என்றும், இதனால் இந்திய பொருளாதாரம் மேன்மையடையும் என்றும் வர்த்தகர்கள் மத்தியில் எண்ணம் நிலவி வருகிறது. இதனால், அந்நிய நிதி நிறுவனங்களின் முதலீடு இதுவரை இல்லாத அளவுக்கு அதிகரித்திருக்கிறது.

கவனிக்க வேண்டிய விஷயங்கள்!

நாடாளுமன்றத் தேர்தல்கள் நெருங்கி வருவதையடுத்து, இந்திய பங்குச் சந்தைகளில் முதலீடு செய்யப்பட்டிருந்த அந்நிய நிதி நிறுவனங்களின் முதலீடுகள் திரும்ப எடுக்கப்படலாம். மேலும், தற்போது பல நிறுவனங்களின் பங்குகளில் அந்நிய முதலீடு உச்சவரம்பை எட்டியுள்ளது. அந்நிய நிதி நிறுவனங்களின் முதலீடுகள் வெளியே எடுக்கப்படும்பட்சத்தில் பங்குச் சந்தையில் சரிவு ஏற்படலாம். இதனால், அமெரிக்க டாலருக்கு எதிரான இந்திய ரூபாயின் மதிப்பும் குறையலாம்.

கடந்த ஆண்டு ரூபாயின் மதிப்பு வரலாறு காணாத அளவுக்குச் சரிந்தது. இது நமக்கு ஒருபக்கம் பாதகமாக இருந்தாலும், மக்களிடம் பணப்புழக்கத்தைக் குறைத்தது. இதனால், பல இறக்குமதி பொருட்களின் விற்பனையும் குறைந்தது. ஆனால், ரூபாயின் மதிப்பு அதிகரித்துப் பணவீக்கம் கட்டுக்குள் வரும்போது, மீண்டும் நுகர்வோர் பொருட்களின் இறக்குமதி அதிகரிக்கவே செய்யும். இதனால் நடப்புக் கணக்குப் பற்றாக்குறை அதிகரிப்பதோடு, பணவீக்கமும் அதிகரிக்கும்.

மதிப்பு உயர்ந்த ரூபாய்: தொடர்ந்து ஏற்றம் காணுமா?

மேலும், பணவீக்கத்தில் முக்கியப் பங்கு வகிக்கும் விவசாயப் பொருட்கள் உற்பத்தி வரும் ஆண்டில் எப்படி இருக்கும், பருவநிலை சாதகமாக இருக்குமா என்பது கவனிக்கவேண்டிய விஷயம்.

தற்போது தங்கத்தின் மீது விதிக்கப்பட்டிருக்கும் பல்வேறு கட்டுப்பாடுகள், வரும் நாடாளுமன்றத் தேர்தல் முடிந்து நல்லதொரு ஆட்சி அமையும்பட்சத்தில் தளர்த்தப்படலாம். தங்க கடத்தல்கள் அதிகரித்திருக்கும் இந்த நிலையில், இந்தக் கட்டுப்பாடுகள் தளர்த்தப்படும்போது தங்கம் இறக்குமதி மீண்டும் அதிகரிக்கலாம். இதனால் ரூபாயின் மதிப்பு மீண்டும் மாறலாம்.

யாருக்குப் பாதிப்பு?

ரூபாய் மதிப்பு அதிகரிப்பு நமக்குச் சாதகமான விஷயமாக இருந்தாலும், ஏற்றுமதியாளர்கள் மத்தியில் பெருத்த கவலையை ஏற்படுத்தியுள்ளது. டாலருக்கு எதிரான ரூபாயின் மதிப்பு அதிகரித்து வருவதால் ஏற்றுமதி செய்த பொருட்களுக்கான மதிப்பு குறைவாகக் கிடைக்கும். இதனால் ஏற்றுமதியாளர்களுக்குக் கிடைக்கும் லாபம் குறையும். இந்தியாவைப் பொறுத்தவரை, இறக்குமதியைவிட ஏற்றுமதி அதிகமாகச் செய்யப்பட்டால் மட்டுமே நடப்புக் கணக்குப் பற்றாக்குறையைக் கட்டுக்குள் வைத்திருக்க முடியும்.

மதிப்பு உயர்ந்த ரூபாய்: தொடர்ந்து ஏற்றம் காணுமா?

அதேசமயம், ரூபாயின் மதிப்புக் குறையும்பட்சத்தில் அத்தியாவசிய தேவையான பெட்ரோல், டீசல் போன்ற கச்சா எண்ணெய் சார்ந்த பொருட்களின் விலை அதிகரிக்கும். இதனால் பாதிக்கப்படுவதோ மக்கள் மட்டுமே.

இனி எப்படி இருக்கும்?

இனிவரும் நாடாளுமன்றத் தேர்தலில் நல்லதொரு ஆட்சி அமைந்து பொருளாதாரம் முன்னேற்றமடையும்பட்சத்தில், இந்திய ரூபாயின் மதிப்பு நீண்ட கால நோக்கில் ரூ.58 வரை செல்லலாம். அதேசமயம், மதிப்புக் குறையும்பட்சத்தில் ரூ.60 வரை குறையலாம். இதுவே, குறுகிய கால நோக்கில் ரூபாயின் மதிப்பு அதிகரிக்கும்பட்சத்தில் ரூ.59.50 வரை செல்லலாம். குறையும்பட்சத்தில் ரூ.62 வரை செல்லலாம்.''

ரூபாய் மதிப்பு ஒரு நிலையாக இருந்தால் மட்டுமே, நமது பொருளாதாரம் திட்டமிட்ட முன்னேற்றத்தைக் காணும் என்பதில் சந்தேகமில்லை!