Published:Updated:

மினிமம் பேலன்ஸுக்கு அபராதம்...வங்கிகள் நீக்குமா?

ச.ஸ்ரீராம்

சாதாரண மக்களுக்கு நல்லது செய்யும் நோக்கில், மத்திய ரிசர்வ் வங்கி ஓர் அருமையான ஆலோசனையை எல்லா வங்கிகளுக்கும் சொல்லியிருக்கிறது. வங்கிகளில் சேமிப்புக் கணக்கு வைத்திருப்பவர்கள், குறைந்தபட்ச வைப்புத்தொகையைப் பராமரிக்காமல் போனால், எந்த அபராதமும் விதிக்கக் கூடாது என்பதுதான் மத்திய ரிசர்வ் வங்கி சொல்லியிருக்கும் ஆலோசனை.

தற்போது பெரும்பாலான வங்கிகள் குறைந்தபட்ச வைப்புத்தொகையைக் கறாராகப் பராமரிக்க வேண்டும் என்று சொல்லி வருகின்றன. காசோலை வசதியுடன் கூடிய கணக்குகளுக்கு ரூ.1000-மும் காசோலை வசதி இல்லாத கணக்குகளுக்கு ரூ.500-ம் குறைந்தபட்ச வைப்புத்தொகையாக பொதுத்துறை வங்கிகள் நிர்ணயம் செய்திருக்கின்றன. இந்த அளவை எல்லோரும் பராமரிக்க வேண்டும். இல்லாவிட்டால், வங்கி சொல்லும் குறைந்தபட்ச வைப்புத்தொகை, கணக்கில் திரும்ப வைக்கப்படுகிறவரை வாடிக்கையாளர் மீது அபராதம் விதிக்கின்றன பல வங்கிகள். இந்த அபராதம் பொதுத்துறை வங்கிகளில் ஒரு மாதத்துக்கு 30 ரூபாய் என்கிற அளவில் இருக்கிறது.

மினிமம் பேலன்ஸுக்கு அபராதம்...வங்கிகள் நீக்குமா?

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

சாதாரண மக்கள் அவசரச் செலவு காரணமாகத்தான் இந்தக் குறைந்தபட்ச வைப்புத்தொகையை எடுக்கின்றனர். அதையும் எப்போதாவதுதான் செய்கின்றனர். இதற்காக அவர்கள் மீது அபராதம் போட வேண்டுமா? அதற்குப் பதிலாக, அவர்களுக்கு வங்கி அளித்துவரும் சில வசதிகளை நிறுத்தலாமே என்று யோசனை சொல்லியிருக்கிறது மத்திய ரிசர்வ் வங்கி.

ஆனால், மத்திய ரிசர்வ் வங்கியின் இந்த யோசனைக்கு வங்கித் தரப்பில் விரிவான விளக்கம் தருகிறார்கள் அதிகாரிகள். குறைந்தபட்ச இருப்புத்தொகை என்பது ஒரு கணக்கை பராமரிக்க ஆகும் செலவுத்தொகை. ஒரு நயா பைசாவையும் வாங்காமல், ஒரு கணக்கை பராமரிப்பது என்பது எப்படி சாத்தியம்? தவிர, குறைந்தபட்ச இருப்புத்தொகை என்பது வங்கிக்கு வங்கி, நகரம், கிராமம் ஆகியவற்றைப் பொறுத்து மாறுபடுகிறது. இந்த நிலையில் சேவைகளைக் குறைப்பது மட்டும் சரியான தீர்வாக இருக்குமா என்று கேட்கிறார்கள்.

ஆனால், பொதுத்துறை வங்கிகளைப் பொறுத்தவரை, எஸ்பிஐ வங்கியானது சேமிப்புக் கணக்குக்கு எவ்வித அபராதக் கட்டணத்தையும் வசூலிப்பதில்லை. மற்ற வங்கிகள் வாடிக்கையாளரின் கணக்கை பொறுத்து அபராதத் தொகையை விதிக்கின்றன.

குறைந்தபட்ச வைப்புத்தொகையைப் பராமரிப்பதில் பொதுத்துறை நிறுவனங்களைவிட தனியார் வங்கிகள் மிகவும் கறாராக இருக்கின்றன. ஐசிஐசிஐ மற்றும் ஹெச்டிஎஃப்சி வங்கிகள், குறைந்தபட்ச வைப்புத்தொகை குறையும்பட்சத்தில் ஒரு காலாண்டுக்கு 750 ரூபாய் என்ற அளவில் அபராதம் விதிக்கின்றன.

மினிமம் பேலன்ஸுக்கு அபராதம்...வங்கிகள் நீக்குமா?

தனியார் வங்கிகள் ஏன் இவ்வளவு தொகையை அபராதமாக விதிக்கின்றன என்பதற்கு விளக்கம் தந்திருக்கிறார் ஹெச்டிஎஃப்சி வங்கியின் மேலாண்மை இயக்குநர், ஆதித்யா பூரி. ''10,000 ரூபாய் குறைந்தபட்ச வைப்புத்தொகையாக வைத்திருக்கும் ஒருநபர் மூலம் எங்களுக்கு வெறும் 400 ரூபாய் மட்டுமே வருவாய் கிடைக்கிறது. இந்த நிலையில் நாங்கள் ஏடிஎம் சேவை வழங்கவும், காசோலை புத்தகங்கள் போன்ற சேவைகளை வழங்கவும் இந்தத் தொகையை அவர்கள் பராமரிப்பது அவசியமாக இருக்கிறது. இதை மீறும்போது அபராதம் விதித்தால்தான், அவர்களது கணக்கை எங்களால் பராமரிக்க முடியும். அபராதம் விதிக்கக்கூடாது எனும்போது எங்கள் பராமரிப்பு செலவுகளைச் சரிகட்ட குறைந்தபட்ச வைப்புத்தொகையை 30,000 ரூபாயாக உயர்த்தவேண்டிய சூழல் உருவாகியுள்ளது'' என்று சொல்லியிருக்கிறார்.

தற்போதைய நிலையில், மத்திய ரிசர்வ் வங்கி ஓர் அறிவிப்பாகவே இதனை வெளியிட்டுள்ளது. இது குறித்த சாதக, பாதகங்களை இந்திய வங்கிகள் அமைப்பு ஆர்பிஐயிடம் கூடிய விரைவில் எடுத்துச் சொல்லும். அதன்பிறகுதான் இதை நடைமுறைப்படுத்துவதா, வேண்டாமா என்பது குறித்து மத்திய ரிசர்வ் வங்கி முடிவு செய்யும். நல்லதே நடக்கும் என்று நாம் எதிர்பார்ப்போம்!

படம்: ஜெ.வேங்கடராஜ்.