Published:Updated:

சன் பார்மா- ரான்பாக்ஸி டீல்!

யாருக்கு லாபம்? ச.ஸ்ரீராம்

சன் பார்மா- ரான்பாக்ஸி டீல்!

யாருக்கு லாபம்? ச.ஸ்ரீராம்

Published:Updated:

ரான்பாக்ஸி - இந்திய மருந்து சந்தையில் பெரும்பகுதியை ஆக்கிரமித்திருக்கும் பெரிய நிறுவனம். இந்தப் பெரிய நிறுவனத்தை மற்றொரு பெரிய மருந்து தயாரிப்பு நிறுவனமான சன் பார்மா நான்கு பில்லியன் டாலர் (ரூபாய் மதிப்பில் சுமார் 24,000 கோடி) கொடுத்து வாங்கியதுதான் இந்த வார ஹாட் நியூஸ்.

என்ன ஆனது ரான்பாக்ஸி நிறுவனத்துக்கு? ஏன் இந்த நிறுவனத்தை விற்றது? இதனால் ரான்பாக்ஸி நிறுவனத்துக்கு லாபமா அல்லது நஷ்டமா என்கிற கேள்விகள் முக்கியமானவை. இந்தக் கேள்வி களுக்கான பதிலைத் தெரிந்துகொள்ளும் முன்பு ரான்பாக்ஸி நிறுவனம் பற்றி ஒரு சில வார்த்தைகள்.

ரான்பாக்ஸி நிறுவனம் 1937-ம் ஆண்டு ரன்பீர் சிங் மற்றும் குர்பாக்ஸ் சிங் ஆகியோரால் ஆரம்பிக்கப்பட்டது. பின்னர், சிங்கின் குடும்பத்தினரால் நடத்தப்பட்டு வந்தது ரான்பாக்ஸி நிறுவனம். 2008-ம் ஆண்டு ஜப்பானை சேர்ந்த டாய்ச்சி  சாங்க்யோ நிறுவனம் ரான்பாக்ஸியின் 34.8 சதவிகித பங்குகளை முதலில் வாங்கியது. பிற்பாடு 20 சதவிகித பங்குகளை ஓப்பன் ஆஃபர் மூலம்  பெற்றது. ரான்பாக்ஸி நிறுவனத்தின் ஒரு பங்கினை ஏறக்குறைய 737 ரூபாய் தந்து வாங்கியது. ஆக மொத்தம் 4.6 பில்லியன் டாலர் தந்து 63.4 சதவிகித பங்குகளை வாங்கியது.

ஒட்டுமொத்த விகடனுக்கும் ஒரே ஷார்ட்கட்!

சன் பார்மா- ரான்பாக்ஸி  டீல்!

ரான்பாக்ஸி நிறுவனத்தின் ஒரு பங்கு ரூ.457-க்கு சன் பார்மா மதிப்பிடப்பட்டுள்ளது அனைவரையும் ஆச்சர்யத்தில் ஆழ்த்தியுள்ளது. உள்ளபடி பார்த்தால், ரான்பாக்ஸி நிறுவனத்தை 3.2 பில்லியன் டாலருக்கு தான் சன் பார்மா வாங்கியுள்ளது. மீதமுள்ள 0.8 பில்லியன் டாலர் ரான்பாக்ஸிக்கு உள்ள கடனை அடைக்க வழங்கப்படுவதாக இரு நிறுவனங்களும் ஒப்பந்தம் செய்து கொண்டுள்ளன. கடைசியாக ரான்பாக்ஸியில் அதிகமான பங்குகளை வைத்திருந்த டாய்ச்சி நிறுவனம் சன் பார்மாவில் 9 சதவிகித பங்குகளைப் பெறும். இதன்மூலம் சன் பார்மாவின் அதிகப் பங்குகளை வைத்திருக்கும் இரண்டாவது மிகப் பெரிய நிறுவனமாக டாய்ச்சி மாறும்.

மேலும், இந்த ஒப்பந்தத்தின் மூலம் அமெரிக்காவில் அதிகம் மருந்துகளை விற்கும் நம்பர்1 இந்திய நிறுவனம் என்ற அந்தஸ்தையும், இந்தியாவின் நம்பர்1 மருந்து உற்பத்தியாளர் என்ற பெருமையையும் சன் பார்மா பெறும். இதன் விற்பனை அளவு இந்திய மார்க்கெட்டில் சுமார் 6,000 கோடி ரூபாயாக அதிகரிக்கும் என்றும் கூறப்படுகிறது.

சன் பார்மா- ரான்பாக்ஸி  டீல்!

மேலும், ஜெனரிக் மருந்து தயாரிக்கும் மிகப் பெரிய இரு நிறுவனங்கள் இணைவதால், மருந்துகள்  தற்போது 5 கண்டங்களில், 65 நாடுகளைச் சென்றடையும். மேலும், உலகின் டாப் 300 பிராண்டுகளில் இந்த நிறுவனங்களின் 31 பிராண்டுகள் இடம்பிடிக்கும். ரான்பாக்ஸிக்கு அமெரிக்க மார்க்கெட்டில் நல்ல வரவேற்பு உள்ளது. அமெரிக்காவில் அதிகம் விற்பனை ஆகும் மருந்துகளில் ரான்பாக்ஸியும் ஒன்று.

ரான்பாக்ஸியில் என்ன பிரச்னை?

சன் பார்மா- ரான்பாக்ஸி  டீல்!

ரான்பாக்ஸி நிறுவனத்தை ஏன் சன் பார்மா நிறுவனத்துக்கு விற்றார்கள் என்பது முக்கியமான கேள்வி. 2013-ல் எஃப்டிஏ எனப்படும் அமெரிக்க உணவு மற்றும் மருந்துப் பொருட்கள் நிர்வாக அமைப்பு, ரான்பாக்ஸியின் இந்திய மருந்து தயாரிக்கும் மையங்கள் சுகாதாரக் குறைபாடுகளுடன் செயல்படுவதாகச் சொல்லியிருந்தது. இந்தியாவில் மட்டும் ஏறக்குறைய 21 இடங்களில் ஆய்வுசெய்துவிட்டுத்தான் எஃப்டிஏ இப்படி சொன்னது. எஃப்டிஏ-வின் இந்த எச்சரிக்கையைத் தொடர்ந்து, ரான்பாக்ஸி நிறுவன பங்குகள் சரியத் தொடங்கின. ரான்பாக்ஸி தனது குறைகளை சரிசெய்துகொள்ளவேண்டும் என எஃப்டிஏ சொன்னதைத் தொடர்ந்து, இந்திய மருந்துப் பொருள் தயாரிக்கும் நிறுவனங்கள் அனைத்தும் சோதனைக்கு உட்படுத்தப்படும்; அவற்றின் தரம் குறித்து ஆய்வு நடத்தப்படும் என இந்திய மருந்துப்பொருள் கட்டுப்பாட்டுக் குழு கூறியுள்ளது.

சன் பார்மா- ரான்பாக்ஸி  டீல்!

  சன் பார்மாவுக்கு லாபம்!  

ரான்பாக்ஸியை சன் பார்மா வாங்கியதன் மூலம் உலக மருந்துப் பொருள் உற்பத்தியாளர் பட்டியலில் சன் பார்மா ஐந்தாவது இடத்தைப் பிடிக்கும் அளவுக்கு உயர்ந்திருக்கிறது. மேலும், வளர்ந்துவரும் மார்க்கெட்டுகளான ரஷ்யா, தென் ஆப்பிரிக்கா, பிரேசில் மற்றும் மலேசிய நாடுகளில் சன் பார்மா தன் மதிப்பையும் விற்பனையையும் கூட்ட முடியும் என்றும் நினைக்கிறது.

சன் பார்மா- ரான்பாக்ஸி  டீல்!

ரான்பாக்ஸியை வாங்கியதில் இப்படி பல விஷயங்கள் பாசிட்டிவாக சொல்லப்பட்டாலும், இந்த டீல் பற்றி சிலர் நெகட்டிவாகவும் பேசவே செய்கின்றனர். அமெரிக்காவின் எஃப்டிஏ-வின் எச்சரிக்கைக்கு உள்ளான ஒரு நிறுவனத்தை சன் பார்மா வாங்குவது சரிதானா என்று கேட்கிறார்கள் சிலர். வம்பை விலை தந்து வாங்குகிறமாதிரி இது உள்ளது என்றும் சொல்கின்றனர். தவிர, ரான்பாக்ஸி நிறுவனத்துக்கு 800 மில்லியன் டாலர் கடன் இருக்கிறது. இது சாதாரண தொகை அல்ல. இந்தக் கடனை கட்டமுடியாமல் தவியாய் தவித்துக்கொண்டிருக்கிறது ரான்பாக்ஸி. இப்போது சன் பார்மா நிறுவனம் இந்தக் கடனையும் சேர்த்தே வாங்கியிருக்கிறது. மிகவும் கஷ்டப்பட்டுதான் சன் பார்மா நிறுவனம் இந்தக் கடனை அடைக்க வேண்டும் என்று சொல்கிறார்கள் சன் பார்மாவின் முதலீட்டாளர்கள் சிலர்.

சன் பார்மாவின் மதிப்பு கூடுமா?

ரான்பாக்ஸியின் ஒரு பங்குக்கு 0.8 பங்கு தருவதாக அறிவித்திருக்கும் சன் பார்மாவின் நிலை என்ன என்பது குறித்து ஏஞ்சல் புரோக்கிங் நிறுவனத்தின் பார்மா ஆராய்ச்சித் துறையின் துணைத் தலைவர் சர்பஜித் கௌர் நங்ராவிடம் கேட்டோம். ''ரான்பாக்ஸியை முழுவதுமாக சன்பார்மா வாங்கியுள்ளதால், 2016-ம் நிதியாண்டில் ஒருங்கிணைந்த சன் பார்மா -ரான்பாக்ஸி நிறுவன விற்பனையில் (சுமார் 31,000 கோடி ரூபாய்) ரான்பாக்ஸியின் விற்பனை 37 சதவிகித பங்களிப்பாக இருக்கும் என எதிர்பார்க்கப்படுகிறது. மேலும், சன் பார்மாவின் இபிஎஸ் 27.2 ரூபாய் என்ற அளவில் இருக்கும் என்று கணிக்கப்பட்டிருக்கிறது. இது எதிர்பார்க்கப்பட்டதைவிடக் குறைவு. சன் பார்மாவின் ரிட்டர்ன் ஆன் ஈக்விட்டி சுமார் 25% எனக் கணிக்கப்படுகிறது.  மேலும், 2016 இறுதியில் சன் பார்மாவின் பணக் கையிருப்பு 20,000 கோடியாக இருக்கும் என்பதால் சன் பார்மா பங்கில் எந்தப் பிரச்னையும் இருக்காது. இந்தப் பங்கின் விலை 661 ரூபாய் வரை செல்லலாம். ரான்பாக்ஸி பங்குகளை வைத்திருப்பவர்கள், அதனைத் தொடரலாம்'' என்றார்.

சன் பார்மா- ரான்பாக்ஸி  டீல்!

தரம் உயரும்!

சில ஆண்டுகளுக்கு முன்பு தனது மருந்து தயாரிப்பு நிறுவனத்தை அமெரிக்காவின் அபாட் நிறுவனத்துக்கு 17,000 கோடி ரூபாய்க்கு விற்றார் அஜய் பிராமல். அதன்பிறகு இந்திய பார்மா துறையில் விற்பனையாகும் மிகப் பெரிய மருந்து கம்பெனி இதுதான். பல சர்ச்சைகளில் சிக்கியுள்ள ரான்பாக்ஸியை சன் பார்மா வாங்கியிருப்பதன் மூலம் தரமான முறையில் மருந்து உற்பத்தி செய்வதற்கான நடவடிக்கைகள் நம் நாட்டில் மேற்கொள்ளப்படலாம். இதனால் உலகச் சந்தைகளில் இந்திய மருந்துப்பொருள் தயாரிக்கும் நிறுவனங்களின் மதிப்பு உயரும் என்று எதிர்பார்க்கலாம்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism