Published:Updated:

பலவீனமான பொருளாதாரம்... பணம் கொடுத்த பள்ளி மாணவி!

செ.கார்த்திகேயன்

கடந்த செப்டம்பரில் இந்திய ரூபாயின் மதிப்பு வரலாறு காணாத அளவு குறைந்தது. ரூபாய்  மதிப்பு குறைவதைத் தடுக்க நமது மத்திய ரிசர்வ் வங்கி படாதபாடு பட்டது எல்லாருக்கும் தெரியும். கூர்கானில் வசிக்கும் 10 வயது மாணவி லைலா இந்த்ரா ஆல்வாவும் இதைத் தெரிந்துகொண்டார். உடனே, ரிசர்வ் வங்கியின் கவர்னர் ரகுராம் ராஜனுக்கு ஒரு கடிதம் எழுதினார். லைலா எழுதிய அந்தக் கடிதத்தில் ரூபாய் மதிப்பு குறைவதைக் கண்டு வருத்தப்பட்டதோடு,  நாட்டுக்கு தனது பங்களிப்பாக 20 டாலர்களையும்  அனுப்பி இருந்தார். லைலா எழுதிய அந்தக் கடிதத்திலிருந்து...

புதிய யுக்திகளைக் கையாளுங்கள்!

''இந்திய ரூபாயின் மதிப்பு தொடர்ந்து வீழ்ச்சியடைந்து வருகிறது. இந்திய பொருளாதாரம் மிகப் பலவீனமாக இருக்கக் காரணம், பணவீக்கம் மற்றும் நாட்டின் அதிகப்படியான ஊழலும்தான். இந்திய மக்களுக்கு அன்றாட வாழ்க்கையை நடத்துவதற்கே போதுமான பணம் இல்லை. பொருளாதாரம் மிக மோசமான நிலையில் இருப்பதால் மக்கள் இன்னும் ஏழைகளாகவே வாழ்ந்து வருகிறார்கள்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

இந்த இக்கட்டான சூழ்நிலையில் புதிய கவர்னராகப் பதவி ஏற்றிருக்கும் தங்களால்தான் மாற்றியமைக்க முடியும் என்று நம்புகிறேன். நாட்டின் பொருளாதாரத்தை சீர்செய்ய மற்றும் இந்திய ரூபாயின் மதிப்பை உயர்த்த புதிய யுக்திகளைக் கையாண்டு நீங்கள் தீர்வு காண வேண்டும்.

பலவீனமான பொருளாதாரம்... பணம் கொடுத்த பள்ளி மாணவி!

இந்தக் கடிதத்துடன் எனக்கு என் பெற்றோர்கள் பரிசாக வழங்கிய 20 டாலர் தொகையை இந்திய நாட்டுக்காக வழங்குகிறேன். சிறு துளி பெருவெள்ளம் என்பார்கள். எனது  இந்த 20 டாலர் தொகை சிறியதாக இருக்கலாம். ஆனால், இந்திய நாட்டில் உள்ள ஒவ்வொருவரும் நாட்டின் பொருளாதாரம் உயர தங்களாலான உதவியைச் செய்வதற்கான எண்ணைத்தை ஏற்படுத்தும்'' என்று எழுதி இருக்கிறார் லைலா.

அம்மா தந்த ஐடியா!

ரிசர்வ் வங்கியின் கவர்னருக்கு கடிதம் எழுதும் ஐடியா லைலாவுக்கு எப்படி வந்ததாம்?

''ஒருநாள் நாங்கள் அனைவரும் ஆர்பிஐ புதிய கவர்னராக ரகுராம் ராஜன் ஆகப் போவதையும், இதனால் இந்திய ரூபாய்க்கு நிகரான டாலரின் மதிப்பு உயரும் என்றும் பேசிக் கொண்டிருந்தோம். இதைக் கேட்ட லைலா, அடுத்தநாள் பள்ளிக்கு சென்று வீட்டுக்குத்  திரும்பியதும், ''நான் ஆர்பிஐ கவர்னர் ரகுராம் ராஜனுக்கு ஒரு கடிதம் எழுதட்டுமா?'' என்று கேட்டாள். நானும் சரி என்று சம்மதித்தேன். உடனே ஒரு கடிதம் எழுதி, அத்துடன் நாங்கள் அவளுக்காக தந்திருந்த 20 டாலர் தொகையை இணைத்து அனுப்பினாள்'' என்று பெருமை பொங்கச் சொன்னார் லைலாவின் அம்மா ப்ரியா சோமையா ஆல்வா.

ரகுராம் ராஜனின் பதில் கடிதம்!

லைலாவின் இந்த அக்கறைக்கு மரியாதை காட்டும் விதமாக ரகுராம் ராஜன் பதில் கடிதம் ஒன்றை உடனே அனுப்பினார். அதில், ''லைலா,  உனது செயலைக் கண்டு நான் மிகவும் சந்தோஷப்படுகிறேன். நம் நாட்டின் பொருளாதாரம் குறித்து நிலவும் தற்போதைய சூழ்நிலையைச் சமாளிக்கும் அளவுக்கு அந்நிய செலாவணி கையிருப்பு நம்மிடம் இருக்கிறது. அதனால் உன் பெற்றோர் உனக்குப் பரிசாக தந்த 20 டாலரை உனக்கே திருப்பி அனுப்புகிறேன்.

உனக்கு சமயம் கிடைக்கும்போது மும்பை ஆர்பிஐ அலுவலகத்துக்கு வந்து என்னை பார்'' என்று குறிப்பிட்டிருந்தார்.

பின்பு ஒருநாள் ரகுராம் ராஜனின் அழைப்பை ஏற்று, மும்பை  ஆர்பிஐ அலுவலகத்துக்கு வந்து ரகுராம் ராஜனை சந்தித்தார் லைலா. ஆர்பிஐ கட்டடம், பணம், நாணயங்கள் குறித்த செயல்பாடு குறித்த அனைத்தும் அவரை சந்தோஷப்படுத்த, ரகுராம் ராஜனிடம் சில கேள்விகளைக் கேட்டு அதற்கான தெளிவையும் பெற்றார் லைலா.

இருந்தாலும், லைலாவுக்கு ஒரு சின்ன வருத்தம். நாட்டுக்காக  தந்த சிறுபங்களிப்பை கவர்னர் திருப்பிக் தந்துவிட்டாரே என்பதே அது.  

இந்தச் சின்ன வயதில் லைலாவுக்கு நாட்டின் மீதான அக்கறை மிகப் பெரிது!