Published:Updated:

SME கைடுலைன்!

உற்பத்தியைப் பெருக்க நான்கு வழிகள்! படங்கள்: பா.காளிமுத்து

ச.ஸ்ரீராம்

 தொழில் முனைவோர்களின் வெற்றிக்கு...

எஸ்.எம்.இ. துறையில் ஒவ்வொருவருக்கும் ஒவ்வொரு பிரச்னை. சிலர் பொருட்களை உற்பத்தி செய்வதில் கில்லாடிகளாக இருப்பார்கள். ஆனால், தயார் செய்த பொருட்களை விற்பனை செய்ய முடியாமல் திண்டாடிக் கொண்டிருப்பார்கள். இன்னும் சிலர் பொருட்களை விற்பனை செய்வதில் நிபுணர்களாக இருப்பார்கள். ஆனால், பொருட்களை உற்பத்தி செய்ய முடியாமல் திணறுவார்கள்.  

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

இந்த இரு தரப்பினரில் இரண்டாவது வகையான பிரச்னை பல எஸ்.எம்.இ.களுக்கு உண்டு. எஸ்.எம்.இ.கள் தங்கள் உற்பத்தியை எப்படி பெருக்குவது?, இதற்கான வழிகளை சொல்ல முடியுமா? என கோவை தொழில்துறை அமைப்பான கொடிஸியாவின் தலைவர்   ரா.ராமச்சந்திரனிடம்  கேட்டோம். விளக்கமாக எடுத்துச் சொன்னார்.  

''உற்பத்தி என்றாலே அது பொருட்களைத் தயாரித்து விற்பதே எனப் பலர் நினைக்கின்றனர். ஆனால், அதையும் தாண்டி பல விஷயங்கள் உள்ளன. மூலப்பொருட்கள் வாங்கு வதில் தொடங்கி பொருட்களைத் தயாரிப்பது வரை உற்பத்தியில் பல முக்கியமான விஷயங்கள் உள்ளன.

SME கைடுலைன்!

முதலாவதாக, தரமான பொருளை உற்பத்தி செய்ய தரமான மூலப்பொருட்கள் அவசியம். தரமான மூலப்பொருட்கள் எங்கு கிடைக்கிறதோ, அங்கு சென்றுதான் வாங்க வேண்டும். அருகில் கிடைக்கிறது என்பதற்காக தரம் குறைந்த பொருட்களை வாங்கக் கூடாது. வெகுதூரம் சென்று வாங்க வேண்டியிருக்கிறது என்பதற்காக வாங்காமல் விட்டுவிடவும் கூடாது.

இரண்டாது, மூலப்பொருட்களை சரியான விலையில் வாங்க வேண்டும். சந்தையில் பல மூலப்பொருள் விற்பனையாளர்கள் இருப்பார்கள். அவர்களில் நமக்குத் தேவையான தரத்தில், கட்டுப்படியாகும் விலையில் யார் தருகிறார்கள் என்பதைப் பார்த்து வாங்குவது அவசியம். இதற்கு ஒரு சில எளிய வழிகளைப் பின்பற்றலாம். நம்மைப் போலவே தொழில் செய்கிற ஓரிருவர் நம் ஊரில் இருந்தால், நாம் அவரோடு சேர்ந்துகொண்டு, மொத்தமாக மூலப்பொருட்களை வாங்க முயற்சிக்கலாம்.

SME கைடுலைன்!

இதனால் விலை கணிசமாக குறைய வாய்ப்புண்டு. தவிர, அந்தப் பொருட்களை ஒரேநேரத்தில் லாரியிலோ அல்லது ரயிலிலோ கொண்டுவருவதன் மூலமும் பணத்தை மிச்சப்படுத்த முடியும்.

மூன்றாவதாக, நாம் செய்யும் தொழிலில் லேட்டஸ்ட் டெக்னாலஜி யின் அடிப்படையில் பொருட்களை

SME கைடுலைன்!

உற்பத்தி செய்கிறோமா என்று பார்க்க வேண்டும். தொழில்நுட்பம்தான் உற்பத்தியைத் தூக்கி நிறுத்தும் சக்தியாக உள்ளது.

தொழில்நுட்ப மேம்பாடு என்பது ஏறக்குறைய அனைத்து தொழில்முனைவோர்களும் தற்போது அப்டேட் செய்துவரும் விஷயமாக உள்ளது. இதன்மூலமே உற்பத்தியை வெகுவாக அதிகரிக்க முடியும் என்பது மீண்டும் மீண்டும் நிரூபிக்கப்பட்ட விஷயமாக மாறியிருக்கிறது.

நான்காவதாக, உங்கள் தொழிற்சாலையில் திறமை வாய்ந்த தொழிலாளர்கள் இருக்கிறார்களா என்று பாருங்கள். ஒரு தொழிலில் நல்ல திறமையான தொழிலாளர்கள் அமைந்தால் மட்டுமே உற்பத்தியை வெகுவாகப் பெருக்க முடியும்.

தயாரிப்பின் அனைத்து நிலைகளுக்கும் ஏற்றவாறு திறமையான தொழிலாளர்கள் வேலையில் அமர்த்தப்பட வேண்டும்.

ஒருவேளை உங்களிடம் இருக்கும் தொழிலாளர்களிடம் புதிய தொழில்நுட்பம் பற்றியோ அல்லது புதிய நடைமுறைகள் பற்றியோ விழிப்பு உணர்வு குறைவாக இருந்தால், அதனை சரிசெய்ய அவர்களுக்கு திறன் மேம்பாட்டுப் பயிற்சிகளை கொடுப்பது அவசியம். இதற்கு அரசு மற்றும் தனியார் அமைப்புகள் உதவி செய்கின்றன. அந்தப் பயிற்சியினைத் தொழிலாளர்களுக்கு ஏற்படுத்திக் கொடுத்தால், அவர்களது உழைப்பையும் உற்பத்தியையும் பெருக்கும் காரணியாக அமையும்.

இந்த நான்கு முக்கியமான விஷயங் களும் உற்பத்தியைப் பெருக்க பெரிய அளவில் உதவுபவை. என்றாலும், வேறு சில விஷயங்களிலும் நம் கவனத்தைச் செலுத்த வேண்டும். அதாவது, சிக்கனமான உற்பத்தி முறையின் (Lean Manufacturing) மூலம் உற்பத்தியைப் பெருக்க முடியும். நமக்குத் தேவையான விஷயங்களில் மட்டும் தெளிவாகச் சிந்தித்து பணத்தைச் செலவழிப்பதே சிக்கன உற்பத்திமுறையின் அடிப்படை அம்சம்.

SME கைடுலைன்!

மேலும், உற்பத்தியில் மூலப்பொருட்கள் அதிகம் வீணாகாமல் கவனம் செலுத்தவேண்டும். வேலை செய்யும் தொழிலாளர்கள் அதிக ஈடுபாட்டுடன் வேலை செய்யும்போது தானாகவே அவர்களது வேலை மீதான ஆர்வம் அதிகரித்து, உற்பத்தித் திறனும் அதிகரிக்கும்.

கட்டணங்களைக் குறைப்பதன் மூலம், எல்லாவற்றிலுமே தேவையான அளவு மின்சாரத்தை உபயோகிப்பது, நேர மேலாண்மை, உற்பத்தி கொள்ளளவை பராமரித்தல் போன்ற விஷயத்திலும் கவனம் செலுத்திக் குறைக்கும்போது தானாகவே லாபம் சேரத் தொடங்கும். எல்லாவற்றையும் சரியான முறையில் அமைத்து மேம்படுத்தப்பட்ட தொழில்நுட்பத்துக்கு அதற்கெனப் பயிற்சிபெற்ற தொழிலாளர்களை கொண்டு இயக்கும்போது, இயந்திரமும் பழுதாகாமல் பொருட்களும் தொடர்ச்சியான முறையில் சரியான சுழற்சியில் தயாரிக்க முடியும்'' என்றார்.

SME கைடுலைன்!

உற்பத்தியைப் பெருக்க முடியவில்லையே என்கிற பிரச்னை உள்ள எஸ்.எம்.இ.கள். இந்த வழிகளில் கவனம் செலுத்தலாமே!

SME கைடுலைன்!
SME கைடுலைன்!

கோவையை தொடர்ந்து, கடந்த மே 17-ம் தேதி ஈரோட்டில், நாணயம் விகடன் மற்றும் கார்ப்பரேட் கிளினிக் இணைந்து நடத்தும் 'ஃபைனான்ஸ் கிளினிக்’ - சிறு மற்றும் நடுத்தரத் தொழில்முனைவோருக்கான நிதி தொடர்பான சந்தேகங்களுக்கு பதில் அளிக்கும் ஆலோசனைக் கூட்டம் நடந்தது. இதில் நூற்றுக்கும் மேற்பட்ட எஸ்.எம்.இ.கள் கலந்துகொண்டு தங்களது நிதி சம்பந்தப்பட்ட சந்தேகங்களை கார்ப்பரேட் கிளினிக் சிஇஓ-வான ராமகிருஷ்ணனிடம் கேட்டுத் தெளிவு பெற்றனர்.

இந்தக் கூட்டத்தில் வங்கிக் கடன், வெஞ்சர் கேப்பிட்டல், தொழில் மூலதனம் உள்ளிட்ட அனைத்து நிதி பிரச்னைகளையும் தொழில்முனைவோர் எப்படி எதிர்கொள்வது, எப்படி  தீர்வு காண்பது என்பது குறித்து விளக்கம் தந்தார் ராமகிருஷ்ணன்.

அவர் தனது அறிமுக உரையில் முக்கியமான ஒரு விஷயத்தைச் சொன்னார். ''வரியை அதிகமாகக் கட்டவேண்டியிருக்கிறதே என்பதற்காகவே சிலர் தங்கள் தொழிலை விரிவுபடுத்திக்கொள்ளாமலே இருக்கின்றனர். இது தவறு. வரி கட்டுவதன் மூலம் நம் தொழிலின் வளர்ச்சியை வங்கிகளுக்கு எளிதாக எடுத்துக் காட்ட முடியும்'' என்றார் அவர்.

SME கைடுலைன்!

இந்த நிகழ்ச்சியில் கலந்துகொண்ட ஈரோட்டைச் சேர்ந்த ரமேஷ், ''நான் சுண்ணாம்பு தயாரிக்கும் தொழிலை செய்து வருகிறேன். நான் தயாரிக்கும் பொருளை பெரிய நிறுவனங்கள் வாங்கிக்கொள்ளத் தயாராக இருக்கிறது. ஆனால், பொருளை உற்பத்தி செய்வதற்கான மூலதனம் என்னிடம் இல்லை. எனக்கு வங்கிக் கடன் கிடைப்பதற்கு கஷ்டமாக இருக்கிறது. என் பிரச்னைக்கு என்ன தீர்வு?'' என்று கேட்டார்.

இந்தக் கேள்விக்கு பதில் சொன்ன நிதி ஆலோசகர் ராமகிருஷ்ணன், ''நீங்கள் தயாரிக்கும் பொருளுக்கு நிறைய டிமாண்ட் இருப்பதாகவும், பெரிய நிறுவனங்கள் அதை வாங்கிக்கொள்ள தயாராக

SME கைடுலைன்!

இருப்பதாகவும் சொல்கிறீர்கள். அப்படியானால், அந்த நிறுவனங்கள் உங்கள் தயாரிப்புகளை வாங்கிக்கொள்ள தயார் என்கிற பர்ச்சேஸ் ஆர்டரை வாங்கி, அதை வங்கியில் தந்தால், உங்களுக்கு எளிதில் கடன் கிடைக்க வாய்ப்புண்டு.

நீங்கள் தயார் செய்கிற பொருட்கள் விற்பனை ஆகுமா, வங்கி தந்த பணம் மீண்டும் திரும்ப வருமா என்பதை வங்கி நிச்சயம் கவனிக்கும். இந்த நம்பிக்கையைத் தரவேண்டியது தொழில் செய்பவர்களின் கடமை'' என்றார்.

'ஹைட்ரஜனை பயன்படுத்தி மின்சாரம் தயாரிக்கும் தொழில்நுட்பத்தை நான் கண்டுபிடித்து, அதற்கான காப்புரிமையையும் பெற்றிருக்கிறேன். இந்தத் தொழில் நுட்பத்தைப் பயன்படுத்தி,  பல்வேறு இயந்திரங்களைத் தயாரிக்க வேண்டும். எனக்குத் தேவையான முதலீடு எப்படி கிடைக்கும்?'' என்று கேட்டார்  ஈரோட்டைச் சேர்ந்த சௌந்தர்ராஜன்.

''உங்களுக்குத் தேவையான இடம், கருவிகள், தொழிற்சாலை ஆகியவைப் பற்றிய திட்ட அறிக்கையை தயார் செய்து வங்கியை அணுகுங்கள்.

தவிர, இதுமாதிரியான தொழிலுக்கு வங்கிகளுடன், வெஞ்சர் கேப்பிட்டல் போன்ற வேறு சில முதலீடுகளையும் பரிசீலனை செய்யலாம்'' என்று விளக்கம் தந்தார் ராமகிருஷ்ணன்.

இறுதியாக, இந்த கூட்டத்தில் கலந்துகொண்ட அனைத்துத் தொழில்முனைவோர்களும், ''இதுவரை நாங்கள் கட்டணம் கட்டித்தான் இதுமாதிரியான பயிற்சி வகுப்புகளில் கலந்துகொண்டிருக்கிறோம்.

ஆனால், நீங்களோ எந்தக் கட்டணத்தையும் பெறாமல், நிதி தொடர்பான எங்களது எல்லா சந்தேகங்களுக்கும் பதில் சொல்லி வழிகாட்டி இருக்கிறீர்கள். இதற்காக நாணயம் விகடனுக்கு நன்றி. இதேபோல, எங்களுக்கு நீங்கள் தொடர்ந்து உதவ வேண்டும்'' என்று கோரிக்கை வைத்தனர்.

        -மா.அ.மோகன் பிரபாகரன், படங்கள்: ரமேஷ் கந்தசாமி.

SME கைடுலைன்!