Published:Updated:

ஹோம் பட்ஜெட்:முதலீட்டில் கவனிக்க வேண்டிய விஷயங்கள்!

பெண்களுக்கான நிதி நிர்வாக வழிகாட்டி! இரா.ரூபாவதி படங்கள்: ஆ.முத்துக்குமார், ப.சரவணகுமார்.

ஹோம் பட்ஜெட்:முதலீட்டில் கவனிக்க வேண்டிய விஷயங்கள்!

பெண்களுக்கான நிதி நிர்வாக வழிகாட்டி! இரா.ரூபாவதி படங்கள்: ஆ.முத்துக்குமார், ப.சரவணகுமார்.

Published:Updated:

சேமிப்பில் நம் பெண்கள் எப்போதும் ராணிகளாகவே இருக்கிறார்கள். தனியாக எந்தத் திட்டமிடலும் இல்லாமலே நம் பெண்கள் ஒவ்வொருவரும் குறிப்பிட்ட அளவு பணத்தைச் சேமிப்பதை எல்லா வீடுகளிலும் பார்க்கலாம். ஆனால், முதலீடு என்று வரும்போது நம் பெண்கள் இரண்டு அடி தள்ளி நிற்பது ஏன் என்பது புரியாத புதிராகவே இருக்கிறது. முதலீடெல்லாம் ஆண்கள் சம்பந்தப்பட்ட விஷயம் என பெண்கள் நினைப்பது ஒரு காரணமாக இருக்கலாம். ''இதற்கான காரணம் என்னவாக வேண்டுமானாலும் இருந்துவிட்டுப் போகட்டும்; ஆனால், பெண்கள் நினைத்தால், முதலீட்டின் விஷயங்களைத் தெளிவாகத் தெரிந்துகொள்ள முடியும்'' என்கிறார் நிதி ஆலோசகர் ஸ்ரீதேவி.

பெண்கள் தெரிந்துகொள்ள வேண்டிய முதலீட்டு விஷயங்கள் பற்றி அவர் முக்கியமான விஷயங்களை எடுத்துச் சொன்னார்.

''பெண்கள் தங்களது குடும்பத்தின் நிதி தொடர்பான விஷயங்களை அவசியம் தெரிந்துவைத்திருக்க  வேண்டும். அதாவது, குடும்பத்தின் வருமானம், செலவு, மீதமுள்ள தொகை எவ்வளவு என்கிற விவரங்களை எல்லாம் தெரிந்துவைத்திருக்க வேண்டும். மேலும், மீதமுள்ள தொகையில் எவ்வளவு சேமிப்பாக மாறுகிறது, எந்த வகையில் அந்தப் பணம் முதலீடு செய்யப்படுகிறது. அதன் மூலம் கிடைக்கும் ஆண்டு வருமானம் என்ன என்பதையெல்லாம் தெரிந்துவைத்திருப்பது அவசியம்.

ஒட்டுமொத்த விகடனுக்கும் ஒரே ஷார்ட்கட்!

ஹோம் பட்ஜெட்:முதலீட்டில் கவனிக்க வேண்டிய விஷயங்கள்!

நிதி தொடர்பான விஷயங்கள் அனைத்தையுமே கணவர் பார்த்துக் கொள்வார் என பெண்கள்   அலட்சியமாக இருக்கக்கூடாது. வேலைக்குப் போவதால், இதெல்லாம் கவனிக்க எனக்கு நேரமில்லை என்று நினைக்கவும் கூடாது. தினப்படி செய்கிற வேலைகளைத் தவறாமல் செய்கிறமாதிரி, முதலீடு குறித்த விஷயங்களையும் தினம்தினம் இல்லாவிட்டாலும் வாரத்துக்கு ஒருமுறையாவது கவனிப்பது அவசியம்.

ஹோம் பட்ஜெட்:முதலீட்டில் கவனிக்க வேண்டிய விஷயங்கள்!

அதாவது, இன்ஷூரன்ஸ் பிரீமியம் செலுத்தும் தேதி, மியூச்சுவல் ஃபண்ட் எஸ்ஐபி தேதி ஆகியவற்றைச் சரியாகத் தெரிந்துகொண்டு, அந்தத் தேதியில் வங்கிக் கணக்கில் பணம் இருப்பதற்குத் திட்டமிடலாம். அந்த முதலீட்டின் மூலமாக எவ்வளவு வருமானம் கிடைத்துள்ளது என்பதைத் தொடர்ந்து கவனித்து கணவருக்குத் தெரியப்படுத்துவது போன்றவற்றைச் செய்தாலே உங்கள் கணவர் முதலீடு குறித்த விஷயங்களை உங்களிடம் பகிர்ந்துகொள்வார்.

பெரும்பாலான ஆண்கள் ஏதாவது சூழ்நிலையில் முதலீட்டை துவங்கி யிருப்பார்கள். அதை அப்படியே மறந்திருப்பார்கள். இதனால் முதலீடு செய்த பணம் நஷ்டம்தான். அல்லது அந்த முதலீடு என்ன ஆனது என்றே கவனிக்காமல் அப்படியே இருக்கும். இந்தப் பணம் அவசர தேவைகளுக்குப் பயன்படாமல் போகும்.

முதலீட்டில் மிக முக்கியமானது, ஆவணம்தான். இது இல்லையென்றால், முதலீட்டை திரும்பப் பெறுவதில் சிக்கல் உருவாகும். எனவே, முதலீடு தொடர்பான அனைத்து ஆவணங்களையும் ஒரே இடத்தில் வைப்பது நல்லது. தவிர, முக்கியமான ஆவணங்களை ஜெராக்ஸ் எடுத்து வைத்துக்கொள்வது சிறப்பாக இருக்கும். ஏனெனில், ஒரிஜினல் ஆவணம் தொலைந்துபோனால்கூட இந்த ஜெராக்ஸை வைத்து முதலீட்டை திரும்பப் பெறலாம். அதேபோல, மியூச்சுவல் ஃபண்ட் முதலீட்டில் அதனுடைய ஃபோலியோ எண், இன்ஷூரன்ஸ் பாலிசியின் எண், டீமேட் கணக்கு விவரம் அனைத்தையும் ஏதாவது ஓர் இடத்தில் குறித்து வைப்பது நல்லது. மேலும், குடும்ப உறுப்பினர்கள், குறிப்பாக, நம் வீட்டில் உள்ள பெரியவர்கள் அனைவரிடமும் இதைப் பகிர்ந்துகொள்வது நல்லது.

தனது குடும்பத்தின் எதிர்காலத் தேவைகள் என்னென்ன என்பதை முதலில் ஒவ்வொரு பெண்ணும்  தெரிந்துவைத்துக்கொள்ள வேண்டும். அந்தத் தேவைகளின் அடிப்படையில் அவர்களது முதலீடு உள்ளதா என்பதைப் பார்க்க வேண்டும். இல்லையெனில், அதை உடனடியாக மாற்றியமைக்க வேண்டும். அதாவது, உங்கள் குழந்தைகளின் உயர்கல்வி தேவைக்கு இன்னும் 15 வருடம் உள்ளது என வைத்துக்கொள்வோம். உங்களுக்குக் கூடுதலாகப் பணம் கிடைக்கும்போதெல்லாம் அதை ஃபிக்ஸட் டெபாசிட்டில் போட்டு வைக்கிறீர்கள் என்றால் அதனால் பெரிய லாபம் எதுவும் கிடைக்காது. அந்தப் பணத்தை ஈக்விட்டி சார்ந்த மியூச்சுவல் ஃபண்ட் திட்டங்களில் முதலீடு செய்து, அதைக் கண்ணும் கருத்துமாகப் பின்தொடர்ந்து வந்தால், நல்ல லாபம் பெற முடியும்.

ஹோம் பட்ஜெட்:முதலீட்டில் கவனிக்க வேண்டிய விஷயங்கள்!

உங்களது அனைத்து முதலீடுகளும் ஒரே இடத்தில், ஒரே வகையில் இல்லாமல் பார்த்துக்கொள்ள வேண்டும். தங்கம், இன்ஷூரன்ஸ் என சிலர் ஒரே வகையான முதலீட்டை வைத்திருப்பார்கள். அப்படி வைத்திருப்பது தவறு. ஏனெனில், இன்ஷூரன்ஸ் திட்டங்கள் 5 - 6% சதவிகிதம்தான் வருமானம் தரும். எனவே, முதலீடு என்பதைப் பிரித்து வைத்துக்கொள்ள வேண்டும். ஒரு குடும்பத்தின் சேமிப்பும் முதலீடும் பாதுகாப்பாக இருக்க வேண்டுமெனில், அந்தக் குடும்பம் போதிய அளவு மருத்துவம் மற்றும் ஆயுள் காப்பீட்டைப் பெற்றிருக்க வேண்டும். இந்த இரண்டும் இல்லாமல் எவ்வளவுதான் முதலீடு செய்தாலும் அதனால் பெரிய பயன் எதுவும் இருக்காது.

உங்கள் கணவரோ அல்லது நீங்களோ செய்யும் எல்லா வகையான முதலீடுகளிலும் நாமினியின் பெயரைக் குறிப்பிடுவது முக்கியம். நீங்கள் ஏற்கெனவே செய்திருக்கும் முதலீடுகளில் நாமினியின் பெயர் குறிப்பிடப்பட்டுள்ளதா என்பதைக் கவனிக்க வேண்டும். மேலும், திருமணத்துக்கு முன் பெற்றோர் அல்லது உடன்பிறந்தவர்களின் பெயர்களை நாமினியாகக் குறிப்பிட்டிருந்தால், திருமணத்துக்குப் பின்  அதைக் கட்டாயம் மாற்றிவிட வேண்டும். அப்போதுதான் அசம்பாவிதங்கள் ஏதாவது நிகழும்போது முதலீட்டை திரும்பப் பெறுவதில் சிக்கல் இருக்காது.

ஹோம் பட்ஜெட்:முதலீட்டில் கவனிக்க வேண்டிய விஷயங்கள்!

சொந்த வீட்டில் இருப்பவர்களுக்கு முகவரி பிரச்னை பெரும்பாலும் இருக்காது. ஆனால் வாடகை வீட்டில் இருப்பவர்களுக்கு இது பிரச்னையாக மாறிவிடக்கூடாது. எனவே, வீட்டை காலி செய்து வேறு வீட்டுக்குப் போகும்போது அந்த முகவரியை அனைத்து முதலீட்டு ஆவணங்களிலும் மாற்றிவிட வேண்டும். மேலும், மாற்றம் சரியாகச் செய்யப்பட்டுள்ளதா என்பதைக் கவனிக்க வேண்டும். எந்த முதலீடாக இருந்தாலும் அதன் மூலம் கிடைக்கும் வட்டி வருமானம் எவ்வளவு என்பதைத் தெளிவாகத் தெரிந்துகொண்டு, அந்த முதலீட்டை தொடர்ந்து மேற்கொள்வதா இல்லையா என்பதை முடிவு செய்யலாம்.

சிலர் தங்க நகைகளை வங்கியில் அடமானம் வைத்து அதன் மூலம் கிடைக்கும் பணத்தைக் கொண்டு வேறு ஒரு முதலீட்டை செய்கிறார்கள். இது தவறான அணுகுமுறை ஆகும். உதாரணமாக, தங்க நகை அடமான கடனுக்கு 12 - 15 சதவிகிதம் வரை வட்டி தரவேண்டியிருக்கும். புதிய முதலீட்டின் மூலம் 15 சதவிகிதத்துக்கு மேல் நமக்கு வருமானம் கிடைத்தால் மட்டுமே இந்த அணுகுமுறையின் மூலம் லாபம் கிடைக்கும். புதிய முதலீட்டில் 10 சதவிகித லாபம் கிடைக்கும்பட்சத்தில் அசலிலேயே இழப்பு ஏற்படும்.

ஹோம் பட்ஜெட்:முதலீட்டில் கவனிக்க வேண்டிய விஷயங்கள்!

இந்த விஷயங்களையெல்லாம் ஆரம்பத்தில் கொஞ்சம் கொஞ்சமாகக் கற்றுக்கொண்டு, கவனித்தாலே போதும், சில ஆண்டுகளில் உங்கள் குடும்பத்துக்கான நிதித் தேவைகளை நீங்களே அருமையாக செய்து முடித்துவிடலாம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism