Published:Updated:

SME கைடுலைன் : எந்த ஊரில் என்ன தொழில் வாய்ப்பு?

ச.ஸ்ரீராம்

SME கைடுலைன் : எந்த ஊரில் என்ன தொழில் வாய்ப்பு?

ச.ஸ்ரீராம்

Published:Updated:

தொழில் முனைவோர்களின் வெற்றிக்கு...


முன்பெல்லாம் எஸ்எம்இக்கள் ஏதாவது ஒரு நிறுவனத்தில் தொழில் செய்து அதன்மூலம் கிடைத்த அனுபவத்தில் ஒரு நிறுவனத்தைத் தொடங்குவார்கள். அப்படித் துவங்கும் போது அந்தத் தொழில் பற்றிய நுட்பங் களும், அதற்கான வாய்ப்புகள் பற்றியும் அவர்களுக்குத் தெரிந்திருக்கும். ஆனால் இன்று படித்து முடித்த கையோடு சொந்தத் தொழில் தொடங்க வேண்டும் என்கிற ஆர்வத்தில் பலர் தொழில் செய்ய வந்துவிடுகிறார்கள். ஆனால், ஒவ்வொரு ஊரிலும் இருக்கிற தொழில் வாய்ப்புகள் பற்றி அவர்களுக்கு தெளிவாகத் தெரிவதில்லை. எந்தெந்த ஊரில் என்னென்ன தொழில் வாய்ப்புகள் இருக்கின்றன என சிஐஐ-யின் (CII) சென்னையின் எம்எஸ்எம்இ பிரிவின் ஒருங்கிணைப்பாளர் கோபாலிடம் கேட்டோம். விளக்கமாக எடுத்துச் சொன்னார் அவர்.

‘‘பெரிய அளவில் அனுபவம் எதுவும் இல்லாமல் சிறிய மற்றும் நடுத்தர அளவில் தொழில் தொடங்குவது இப்போது அதிகரித்துவிட்டது. தொழில் முனைவோர்களது ஆர்வமும், அவர் களது திறமையுமே இதற்குக் காரணம். அவர்கள் தொழில் ஆரம்பிப்பது சிறந்த விஷயம்தான். புதிதாக தொழில் தொடங்குபவர்களுக்கான வாய்ப்புகள் என்பது ஒவ்வொரு நகரத்தின்  தேவையைப் பொறுத்தும், அந்த நகரத்தில் உள்ள பெரிய நிறுவனங்களின் வளர்ச்சியைப் பொறுத்தும் மாறும். எனவே, தமிழகத்தில் சில முக்கிய ஊர்களில் உள்ள தொழில் வாய்ப்பு களைப் பற்றி சொல்கிறேன்.

ஒட்டுமொத்த விகடனுக்கும் ஒரே ஷார்ட்கட்!

SME கைடுலைன் : எந்த ஊரில்  என்ன தொழில் வாய்ப்பு?

சென்னை!

இங்கு தொழில் வாய்ப்பு என்பது ஆட்டோமொபைல் தயாரிப்புகளுக்குத் தான் அதிகம் உள்ளது. இங்குத் தயாரிக்கப்படும் தயாரிப்புகள் சர்வதேச அளவில் வரவேற்பைப் பெறுகின்றன.  அது மட்டுமின்றி, இங்கு ஆட்டோ மொபைலுக்கு என தனி கிளஸ்டரும் உள்ளது என்பதால் சிறு மற்றும் குறுந்தொழில் முனைவோருக்கு நல்ல வாய்ப்புகள் கிடைக்கின்றன. சரியான தரத்தில் இங்கு ஆட்டோ மொபைல் துறைக்குத் தேவையான பாகங்களைத் தயாரிப்பவர்களுக்கு என்றுமே தேவை இருந்துகொண்டேதான் இருக்கிறது.

தவிர, சென்னையில் எலெக்ட்ரானிக் பொருட்கள் தயாரிப்புகளும் பெருமள வில் வரவேற்பைப் பெற்றுள்ளன. பெரும்புதூரில் முன்னணி செல்போன் நிறுவனங்கள் மற்றும் எலெக்ட்ரானிக் சாதனங்கள் தயாரிக்கும் நிறுவனங்களும் அதிக அளவில் இருப்ப தால் சென்னையில் எலெக்ட்ரானிக் தொழிலுக்கான வாய்ப்புகள் அதிகரித்துள்ளன.

மேலும், பெரிய தொழில் நிறுவனங் களுக்குத் தேவையான உற்பத்திப் பொருட்களைத் தயாரித்துத் தரும் நிறுவனங்கள் கிண்டி மற்றும் அம்பத்தூரில் இருப்பதால் அந்தத் தொழிலுக்கும் வாய்ப்புகள் அதிகம் உள்ளன.

SME கைடுலைன் : எந்த ஊரில்  என்ன தொழில் வாய்ப்பு?

கோயம்புத்தூர்!

கோயம்புத்தூரைச் சுற்றியுள்ள நகரங்களான திருப்பூர், ஈரோடு ஆகியவற்றில் ஆடை தயாரிப்புகளுக்கு அதிக தொழில் வாய்ப்புகள் உள்ளன. அதோடு தொடர்புடைய தொழில் களான பஞ்சாலை, பின்னலாடை போன்ற தொழில்களுக்கும் நல்ல வாய்ப்புள்ளது.

ஜவுளி தொழில் தவிர, விவசாயம் சார்ந்த தொழில்களான பம்ப் தயாரிப்பு, அதன் பாகங்கள் தயாரிப்பு ஆகியவை பெரிய  அளவில் முக்கியத்துவம் பெறுகின்றன. கோயம்புத்தூரில் இயங்கிவரும் வெட் கிரைண்டர் கிளஸ்டர் மூலம் வெட் கிரைண்டர் தயாரிப்புகளுக்கு வாய்ப்புகள் உருவாகியுள்ளது. சிறு தொழில் முனைவோர்கள் அரசு உதவி யுடனேயே இந்தத் தொழில்களுக்கான வாய்ப்புகளை உருவாக்கிக் கொள்ளலாம்.

மதுரை!

இங்கு உணவு பொருட்கள் மற்றும் சிறுதானிய தயாரிப்புகள் சார்ந்த தொழில்களுக்கான வாய்ப்பு அதிகம் உள்ளது. சிறிய அளவில் ஆரம்பிக்கும் இந்தத் தொழில்களுக்குப் பெரிய முதலீடு தேவைப்படுவதில்லை. அதேசமயம் அதிக லாபம் பார்க்கலாம்.

இந்தத் தொழிலுக்குப் பயிற்சிகளும் அதற்கான விற்பனை வாய்ப்புகளும் எளிதில் கிடைப்பது இந்தத் தொழிலை மேலும் பெருக வாய்ப்பை ஏற்படுத்து கிறது.

திருச்சி!

திருச்சியிலும் பிஹெச்இஎல் நிறுவனம் இருப்பதால் போர்ஜிங் மற்றும் ஃபேப்ரிகேஷன் செய்வதற்கான ஆர்டர்கள் அதிகம் கிடைப்பதால், இந்தப் பகுதிகளில் அதற்கான தொழில் வாய்ப்புகள் அதிகம் காணப்படுகின்றன.

சேலம்!

சேலம் மாவட்டம் உணவுப் பொருட்கள் தயாரிப்பிலும், அதனைப் பயன்படுத்தி தயாரிக்கும் உணவுப் பொருட்களுக்கும் அதிக தொழில் வாய்ப்புகளை வழங்கி வருகிறது. மேலும், சேலம் மாம்பழ உற்பத்திக்கு பிரபலமான ஊராக உள்ளதால் மாம்பழ ஏற்றுமதி என்பது இங்கு முக்கிய தொழிலாக உள்ளது. 

SME கைடுலைன் : எந்த ஊரில்  என்ன தொழில் வாய்ப்பு?

கரூர்!

பின்னலாடை தொழிலுக்கு நல்ல வாய்ப்பை வழங்கி வருகிறது. அருகில் உள்ள ஊர்களிலும் இந்தத் தொழிலுக்கு வரவேற்பு அதிகம் உள்ளதால் இந்தத் தொழில் வாய்ப்புகள் நல்ல லாபத்தைத் தருகிறது. 

ஓசூர்!

SME கைடுலைன் : எந்த ஊரில்  என்ன தொழில் வாய்ப்பு?

இங்கு கனரக வாகனங்களுக்கு கட்டமைப்பு செய்யும் தொழிலில் பெரிய நிறுவனங்கள் இருப்பதால் அதற்கு உதிரிபாகங்கள் தயாரிக்கும் தொழிலுக்கும், பெங்களூரில் அதிக எலெக்ட்ரானிக் நிறுவனங்கள் உள்ளதால், ஓசூரில் எலெக்ட்ரானிக் பொருட்கள் தயாரிப்புக்கும் அதிக வாய்ப்புகள் உள்ளன.

தொழில் வாய்ப்பு அதிகம் உள்ள இடத்தில் தொழில் செய்வதற்கான ஆட்கள் கிடைப்பது தட்டுப்பாடாகவே இருக்கும். எனவே, நல்ல தொழில் திறன்கொண்ட தொழிலாளர்களைத் தேடிக் கண்டுபிடிப்பது கொஞ்சம் சிரமம் மிகுந்த வேலையாகவே இருக்கும். 

ஆக, தொழில் வாய்ப்பையும் கண்டுபிடித்து, அதை செய்வதற்கான ஆட்களையும் நீங்கள் பெற்றுவிட்டால், அந்த தொழிலில் நீங்கள் ஜெயிப்பது நிச்சயம்’’ என்றார் அவர்.
புதிதாக தொழில் தொடங்க நினைக்கும் சிறுதொழில் முனைவோர்கள் இந்த விஷயங்களைக் கவனித்து தொழில் தொடங்கலாமே!

படங்கள்: தே.தீட்ஷித்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism