Published:Updated:

SME கைடுலைன்: எஸ்எம்இகளுக்குப் பயனளிக்கும் அரசுத் திட்டங்கள்!

தொழில் முனைவோர்களின் வெற்றிக்கு... ச.ஸ்ரீராம்

பிரீமியம் ஸ்டோரி

அரசுத் திட்டங்கள் பற்றிய தகவல்கள் எப்போதுமே உரிய மக்களுக்குப் போய்ச் சேருவதில்லை. சிறு, குறு மற்றும் நடுத்தரத் தொழில்களைச் செய்யும் எஸ்எம்இகள் விஷயத்திலும் இதுவே உண்மை. இன்றைய தேதியில் எஸ்எம்இகளின் வளர்ச்சிக்காக மத்திய, மாநில அரசாங்கங்கள் கொண்டு வந்திருக்கும் திட்டங்கள் பற்றி முழுமையாகத் தெரிந்துகொண்டவர்கள் மிகக் குறைவே. எனவே, எஸ்எம்இகளின் வளர்ச்சிக்கு உறுதுணையாக இருக்கும் அரசுத் திட்டங்கள் என்னென்ன என்பது குறித்து சென்னையில் உள்ள அரசின் எம்எஸ்எம்இ மேம்பாட்டு மைய அதிகாரிகளிடம் கேட்டோம். விரிவாக எடுத்துச் சொன்னார்கள்.

‘‘எம்எஸ்எம்இகளுக்குப் பயனளிக்கும் பல திட்டங்களை மத்திய அரசும், மாநில அரசும் கடந்த பல ஆண்டுகளாக செயல்படுத்தி வருகின்றன. இந்தத் திட்டங்களைப் பயன்படுத்தி பயனடைந்த சிறு, குறு மற்றும் நடுத்தரத் தொழில்முனைவோர்கள் பலர்.

இந்தத் திட்டங்களை இரண்டு வகையாகப் பிரிக்கலாம். முதலாவது, புதிய தொழில்முனைவோருக்கான திட்டங்கள்; இரண்டாவது, ஏற்கெனவே தொழில் செய்து வருபவர்களுக்கான திட்டங்கள்.

புதிதாகத் தொழில் தொடங்கும் தொழில்முனைவோருக்கு இரண்டு வகையான திட்டங்கள் இருக்கின்றன. அவற்றை முதலில் பார்ப்போம்.

SME கைடுலைன்: எஸ்எம்இகளுக்குப் பயனளிக்கும் அரசுத் திட்டங்கள்!

தொழில்முனைவோர் மேம்பாட்டுத் திட்டம்!

புதிதாகத் தொழில் துவங்க நினைக்கும் தொழில்முனைவோருக்கு நிதி மேலாண்மை, சந்தைப்படுத்துதல், மனிதவள பயன்பாடு தொடர்பான பயிற்சிகளை இந்தத் திட்டத்தின் மூலம் அரசு அளிக்கிறது. அது மட்டுமின்றி, அவர்களுக்கான தொழில் வாய்ப்புகள் என்னென்ன, எந்தத் தொழில் செய்தால் வெற்றி பெறலாம் என்ற ஆலோசனை களையும் இந்தத் திட்டத்தின் மூலம் அளிக்கப்படுகிறது.

தொழில் திறன் மேம்பாட்டுத் திட்டம்!

தொழில் முனைவோர்களை இரண்டு விதமாகப் பிரிக்கலாம். இந்தத் தொழிலைத்தான் நான் செய்யப் போகிறேன் என்பவர்கள் ஒருவகை. எந்தத் தொழில் செய்வது என்கிற ஐடியா எனக்கு இல்லை என்பவர்கள் இன்னொரு வகை.

முதல் பிரிவில் இருக்கும் எஸ்எம்இ களுக்கு அவர்கள் விரும்பும் தொழில் சம்பந்தப்பட்ட அறிவு, அதற்கான வாய்ப்புகள், அதனைத் தொடங்க எவ்வளவு செலவாகும், அதனை எங்குச் செய்யலாம் என்பது போன்ற அறிவுரை களையும் தருகிறோம்.

இரண்டாவது பிரிவில் இருப்பவர் களுக்கு, என்ன மாதிரியான தொழிலை அவர்களால் செய்ய முடியும், அவர்கள் எப்படி தங்களை அந்தத் தொழிலில் நிலைப்படுத்திக்கொள்ள முடியும் என்பது போன்ற ஆலோசனைகளையும், அவர்களுக்கு உள்ள தொழில்துறை வாய்ப்புகள் குறித்தும் பயிற்சி தருகிறோம்.

இனி ஏற்கெனவே தொழில் முனைவோராக இருப்பவர்களுக்கான திட்டங்கள் பற்றி பார்ப்போம்.
ஏற்கெனவே தொழில் செய்து வருபவர்கள், தாங்கள் செய்யும் தொழிலுக்கு ஏற்பவும், அதன்மூலம் கிடைக்கும் பயன்கள் மூலமாகவும் அவர்களுக்கு ஏற்ற திட்டங்களைப் பயன்படுத்திக்கொள்ள முடியும்.

தேசிய உற்பத்தி போட்டித் திட்டம்!

இந்தத் திட்டத்தின் மூலம் எஸ்எம்இ கள் சந்தைப்படுத்துதல், மேம்பாடு, இன்குபேட்டர்ஸ் தொடர்பாக ஆலோசனை பெறுவது, தங்களது புதிய கண்டுபிடிப்புகளையும், அதற்கான தரச் சான்றுகளையும் பெறுவது போன்ற வற்றுக்கான பயிற்சிகளையும், ஆலோசனைகளையும் பெறலாம்.
அதுமட்டுமின்றி, தொழிநுட்ப ரீதியான மேம்பாடு மற்றும் லீன் உற்பத்தி முறை ஆகியவற்றிலும் அவர்களை மேம்படுத்திக்கொள்ளத் தேவையான அறிவுரைகளும், நிதி உதவிகளும்  இந்தத் திட்டத்தின் மூலம் உருவாக்கித் தரப்படு கிறது. எஸ்எம்இகள் தங்களுக்கு வழங்கப் படும் மானிய வசதிகளையும் இந்தத் திட்டத்தின் மூலம் தெரிந்துகொண்டு பயன்படுத்திக் கொள்ளலாம்.

SME கைடுலைன்: எஸ்எம்இகளுக்குப் பயனளிக்கும் அரசுத் திட்டங்கள்!

கிளஸ்டர் மேம்பாட்டுத் திட்டம்!

இந்தத் திட்டத்தின் மூலம் ஒரு குறிப்பிட்ட பகுதியில் குறிப்பிட்ட தொழிலுக்கு நல்ல வாய்ப்புகள் இருக்கும் போது, எஸ்எம்இகள் குழுக்களாக இணைந்து, ஒரு கிளஸ்டராகச் செயல்படத் தொடங்கலாம். இதன் மூலம் மத்திய, மாநில அரசுகள் அளிக்கும் மானியங்களை தங்களது தொழில் வளர்ச்சிக்கு  பயன்படுத்தலாம். 

கடனுடன் இணைந்த முதலுக்கான மானிய திட்டம்!

இதில் மத்திய அரசும், மாநில அரசும் தொழில் மேம்பாட்டுக்கான மானியங்களை எஸ்எம்இகளுக்கு வழங்கி வருகிறது. அதாவது, தொழிலின் முதலுக்கு மானியங்கள் போக, மீதமுள்ள தொகைக்கு வங்கிக் கடனோடு இணைந்த மானியத்தைப் பயன்படுத்தி, எஸ்எம்இகள் பயன் பெறமுடியும். இந்தத் திட்டத்தில் அரசாங்கமே வங்கிக் கடனுக்குப் பரிந்துரைத்து முதலீட்டுக்கு உதவி செய்கிறது.

உத்தரவாதம் இல்லாமல் ரூ.1 கோடி  வரை கடன் பெறும் சிஜிடிஎம்எஸ்இ (CGTMSE) திட்டத்தைப் பயன்படுத்தி, எஸ்எம்இகள் தங்களது தொழிலுக்குத் தேவையான நிதியைத் திரட்டலாம். இந்தக் கடன் பெற தங்கள் சொத்துக்கள் எதையும் அடமானம் வைக்க தேவை யில்லை. இந்தக் கடன் பற்றிய விவரங்கள் பலருக்கும் தெரியாமல் இருப்பதால்  உத்தரவாதத்துடனான கடனையே பலரும் பெறுகிறார்கள்.

சிறு, குறு மற்றும் நடுத்தரத் தொழில் முனைவோர்களுக்கு உதவும் அரசுத் திட்டங்கள் பற்றி அறிந்துகொள்ள  msmedi-chennai.gov.in என்கிற இணையதளத்தை நாடலாம்'' என்றனர் எம்எஸ்எம்இ மேம்பாட்டு மைய அதிகாரிகள். எம்எஸ்எம்இகள் அரசின் இந்தத் திட்டங்களைப் பயன்படுத்தி தங்கள் தொழிலை இன்னும் வளப்படுத்திக் கொள்ளலாமே!

சென்னையில் நடக்கும் தொழில்முனைவோர் கருத்தரங்கம்!

புதிய தொழில்முனைவோர்களை உருவாக்கவும், ஊக்குவிக்கவும் தொழிற்கூட்டமைப்பு நிறுவனமான சிஐஐ, வரும் நவம்பர் மாதம் 24-ம் தேதி சென்னையில் கருத்தரங்கம் ஒன்றை நடத்தவுள்ளது. இதில் எஸ்எம்இகளும், மாணவர்களும் தங்களது புதிய தொழிலை துவங்குவதற்கான ஐடியாக்களையும் திட்ட அறிக்கையை யும் சமர்ப்பிக்கலாம் என அந்த அமைப்பு சொல்லி இருக்கிறது. சிஐஐ உருவாக்கியுள்ள ciistartupreneurs.com என்ற இணையதளத்தில் புதிய தொழில் சிந்தனைகளை பதிவு செய்யலாம்.

இப்படி பதிவு செய்யப்படும் தொழில் களில் சிறந்தவை சர்வதேச அளவில் நடக்கும் கண்காட்சிக்குத் தேர்வு செய்யப்பட இருக்கிறது. நேரடியாக கடன் வழங்கும் முதலீட்டாளர்களும் எஸ்எம்இகளின் புதிய தொழில் திட்டங்களைப் பார்த்து, அவர்கள் தொழிலில் முதலீடு செய்யவும் வாய்ப்புள்ளது. எஸ்எம்இகள் இந்த வாய்ப்பைப் பயன்படுத்திக் கொள்ளலாமே!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு