Published:Updated:

அக்ரி கமாடிட்டி!

செ.கார்த்திகேயன்

அக்ரி கமாடிட்டி!

செ.கார்த்திகேயன்

Published:Updated:

ஏலக்காய் (Cardamom)

குறைவான ஏற்றுமதி தேவையின் காரணமாக, கடந்த வாரம் ஏலக்காய் விலை குறைந்து வர்த்தகமானது. அதிகக் கையிருப்பு மற்றும் புதிய வரத்து அதிகரிப்பு போன்ற காரணங்களாலும் விலையில் பாதகமான சூழ்நிலை உருவாகியுள்ளது.

கடந்த வாரம் செவ்வாய்க்கிழமை அன்று சந்தைக்கு வந்த மொத்த ஏலக்காய் வரத்து 92 டன்கள். அன்றைய தினத்தில் ஒரு கிலோ ஏலக்காயின் சராசரி விலை 741 ரூபாயாக இருந்தது. அதிகபட்ச விலையாக ஒரு கிலோ ஏலக்காய் 1,006 ரூபாயாக வர்த்தகமானது.

ஒட்டுமொத்த விகடனுக்கும் ஒரே ஷார்ட்கட்!

ஸ்பைசஸ் போர்டு ஆஃப் இந்தியா சமீபத்தில் வெளியிட்ட அறிக்கையின்படி, 2014 ஏப்ரல் - ஜூலை மாதங்களில் சிறிய மற்றும் பெரிய அளவிலான ஏலக்காய் ஏற்றுமதி குறைந்துள்ளதாகத் தெரிய வந்துள்ளது. சிறிய அளவு ஏலக்காய் ஏற்றுமதியானது 5% குறைந்து 755 டன்களாக உள்ளது. அதே போல, பெரிய அளவிலான ஏலக்காய் ஏற்றுமதி 17% குறைந்து 115 டன்களாக உள்ளது.
 
கடந்த வாரத்தில் ஏலக்காய் விளையும் கேரள மாநிலத்தின் பல இடங்களிலும், கர்நாடகா மற்றும் தமிழகத்தின் சில இடங்களிலும் அதிக மழைப்பொழிவு காணப்பட்டது.

மஞ்சள் (Turmeric)

தேவை குறைவு, அதிக விளைச்சல், உயரும் வரத்து போன்ற காரணங்களால், கடந்த வாரத்தில் மஞ்சள் விலையானது குறைந்து வர்த்தகமானது. மிக முக்கியமாக, அக்டோபர் கான்ட்ராக்ட் விலை குறைந்து காணப்பட்டது.

ஆந்திரா மற்றும் தமிழகத்தின் சமீபத்திய மழைப்பொழிவு காரணமாக, மஞ்சள் உற்பத்தி அதிகரிக்கும் என்கிற எதிர்பார்ப்பால், கடந்த வாரத்தில் மஞ்சள் வர்த்தக நடவடிக்கைகள் குறைந்தே காணப்பட்டன. தற்போது வட இந்தியாவில் மஞ்சள் தேவை குறைவாக இருந்தாலும், வருகிற வாரங்களில் தேவை அதிகரிக்கும் என்கிற எதிர்பார்ப்பும், ஏற்றுமதி ஆர்டர்களும் அதிகரிக்கும் என்கிற எதிர்பார்ப்பும் மஞ்சள் விலைக்குச் சாதகமான சூழ்நிலையை உருவாக்கும்.

அக்ரி கமாடிட்டி!

இன்றைய நிலையில் ஏற்றுமதி தேவை குறைவாகக் காணப்பட்டாலும், கடந்த ஏப்ரல்-ஜூலை மாதங்களில் 5% அதிகரித்து 27,000 டன்களாகக் காணப்படுகிறது. இது இதற்கு முந்தைய ஆண்டின் இதே காலகட்டத்தில் 25,758 டன்களாக இருந்தது என ஸ்பைசஸ் போர்டு ஆஃப் இந்தியா தெரிவித்துள்ளது.

ஜீரகம் (Jeera)

கடந்த ஏப்ரல் - ஜூலை மாதங்களில் ஜீரகத்தின் ஏற்றுமதி அதிகரித்ததால், கடந்த வாரத்தில் ஜீரகத்தின் கான்ட்ராக்ட் விலை 4% அதிகரித்து வர்த்தகமானது. ஸ்பைசஸ் போர்டு ஆஃப் இந்தியா  சமீபத்தில் வெளியிட்ட தகவல்களின்படி, ஏப்ரல்-ஜூலை மாதங்களில் இந்தியாவின் நறுமணப் பொருட்களின் ஏற்றுமதி அளவு 32% அதிகரித்துள்ளது.

வழக்கம்போல, ஜீரக ஏற்றுமதி நாடுகளான சிரியா மற்றும் துருக்கியில் அரசியல் பதற்றம் நிலவி வருவதால், இந்திய ஜீரகத்துக்கு ஏற்றுமதி ஆர்டர்கள் அதிகரித்துள்ளன. அரசாங்கத்தின் மூன்றாவது அட்வான்ஸ்டு கணக்கீட்டின் படி, 2013-14-ம் நிதி ஆண்டின் அக்டோபர்-செப்டம்பர் மாதத்துக்கான உற்பத்தியானது, 4.56 லட்சம் டன்களாக அதிகரித்துள்ளது. இது அதற்கு முந்தைய ஆண்டின் இதே காலகட்டத்தில் 3.94 லட்சம் டன்களாக இருந்தது. தற்போது விலை குறைந்து காணப்பட்டாலும் தரமான வரத்து, ஏற்றுமதி பெருக்கம் போன்ற காரணங்களால் நடுத்தர காலத்தில் விலை ஏற்றம் வரலாம்.

அக்ரி கமாடிட்டி!

கொத்துமல்லி (Coriander)

கடந்த வாரத்தில் கொத்தமல்லியின் விலை அதிகரித்துக் காணப்பட்டது. இதற்கு மிக முக்கியக் காரணம், தென்னிந்தியாவில் இதன் தேவை அதிகரித்து வருவதுதான். அதுமட்டு மில்லாமல், குறைவான கையிருப்பு, வலுவான ஏற்றுமதி விசாரணை போன்ற காரணங்களும் கொத்தமல்லி யின் விலை ஏற்றத்துக்குக் காரணமாகும்.

2014-ம் ஆண்டு ஏப்ரல்-ஜூலை மாதங்களில் கொத்துமல்லி ஏற்றுமதி யானது 40% அதிகரித்து, 16,000 டன்களாக அதிகரித்துள்ளது. இது இதற்கு முந்தைய ஆண்டின் இதே காலகட்டத்தில் 11,412 டன்களாக இருந்தது என ஸ்பைசஸ் போர்டு ஆஃப் இந்தியா தெரிவித்துள்ளது.

கடந்த வாரத்தில் திங்கள்கிழமை அன்று ராஜஸ்தான் சந்தைக்கு 10,500 பைகள் (ஒரு பை என்பது 40 கிலோ) வந்தன. இது அதற்கு முந்தைய தினத்தைவிட (8700 பைகள்) அதிகம்.

அக்ரி கமாடிட்டி!

சென்னா (Chana)

கடந்த வாரத்தில் விழாக்காலத் தேவை காணப்பட்டதால் விலை அதிகரித்து வர்த்தகமானது. வேளாண் அமைச்சகத்தின் செப்டம்பர் 25-ம் தேதி நிலவரப்படி, காரீஃப் பருவ பருப்பு வகைகள் விதைப்பானது 6.5% குறைந்து, 10.11 மில்லியன் ஹெக்டேர்களாக உள்ளது. இதற்கு முந்தைய ஆண்டின் இதே காலகட்டத்தில், 10.81 மில்லியன் ஹெக்டேர்களாக இருந்தது.

துவரம் பருப்பு, பாசிப் பருப்பு மற்றும் உளுந்து பருப்பு விளைச்சல் முறையே 3.56 மில்லியன் ஹெக்டேர்கள், 2.5 மில்லியன் ஹெக்டேர்கள் மற்றும் 2.15 மில்லியன் ஹெக்டேர்கள் ஆகும். விழாக்காலத் தேவை அதிகரித்துக் காணப்படுவதால் வரும் வாரங்களிலும் சென்னா விலை அதிகரிக்கலாம். அதேசமயம், அதிக வரத்து விலை ஏற்றத்தை ஓரளவு தடுக்கக்கூடும்.
 

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism