Published:Updated:

பங்கு, ஃபண்ட் முதலீடு...

லாபத்தை அதிகரிக்கும் அசெட் அலோகேஷன் சூத்திரம்!சி.சரவணன்

பிரீமியம் ஸ்டோரி
பங்கு, ஃபண்ட் முதலீடு...

பங்குச் சந்தை மற்றும் மியூச்சுவல் ஃபண்ட் முதலீட்டில் அதிக லாபம் பார்க்க சரியான நேரம் எது என்று கேட்டால், சந்தையில் சரியான நேரத்தில் நுழைந்துவிட்டால், சூப்பரான லாபத்தைப் பார்த்துவிடலாம் என பெரும்பாலான முதலீட்டாளர்கள் சொல்வதைப் பார்க்கலாம். ஆனால், நடைமுறையில் இது உண்மை இல்லை என்கிறார் ஃப்ராங்க்ளின் டெம்பிள்டன் இன்வெஸ்ட்மென்ட்ஸ் நிறுவனத்தின் முதன்மை முதலீட்டு அதிகாரி ஆனந்த் ராதாகிருஷ்ணன். எப்படி என்பதை அவரே விளக்கினார்.

‘‘எந்த ஒரு முதலீட்டை மேற்கொள்வதற்கும் நேரம் பார்க்க தேவை இல்லை. சரியான நேரத்தில் சந்தையில் நுழைந்து, சரியான நேரத்தில் வெளியேறினால்தான், நல்ல வருமானம் பார்க்க முடியும்  என்று நினைக் கிறார்கள் 75 சதவிகித முதலீட்டாளர்கள். ஆனால், ஆய்வு ஒன்றின் முடிவுப்படி, முதலீட்டு தொகையை எப்படிப் பிரித்து முதலீடு செய்கிறோமோ, அதன் அடிப்படையில்தான் லாபம் கிடைக்கும் என்று தெரிய வந்துள்ளது. வீடு, மனை போன்ற சொத்து, வங்கி ஃபிக்ஸட் டெபாசிட், தங்கம், நிறுவனப் பங்குகள், மியூச்சுவல் ஃபண்ட் யூனிட்கள் போன்றவற்றில் பிரித்து முதலீடு செய்வதை ஆங்கிலத்தில் ‘அசெட் அலோகேஷன்’ என்பார்கள்.

அதாவது, ஒருவரிடம் ஒரு லட்சம் ரூபாய் இருக்கிறது எனில், அதிலிருந்து எவ்வளவு தொகையை எதில் முதலீடு செய்ய வேண்டும் என்பதைச் சரியாக மேற்கொண்டால்தான் நிறைய லாபம் கிடைக்கும். பங்குச் சந்தை அதிக ரிஸ்க் கொண்டதுதான். அதற்காக அதில் முதலீடே செய்யவில்லை என்றால், அதிக வருமானம் கிடைக்க வாய்ப்பே இல்லை. சந்தையில் நுழையும் நேரம், எதில் முதலீடு செய்வது, எந்த முதலீட்டுக்கு மாற்றுவது, எப்போது முதலீட்டை வெளியே எடுப்பது போன்றவை நேரத்தைப் (Timing) பொறுத்து உள்ளது.
 
ஆனால், முதலீட்டின் மூலம் கிடைக்கும் லாபம் என்பது 91%  அசெட் அலோகேஷனைப் பொறுத்து உள்ளது என ஆராய்ச்சி முடிவுகள் தெரிவிக்கின்றன” என்றவர், ஒரு அசெட் அலோகேஷன் என்பது எப்படி இருக்க வேண்டும் என்பதை விளக்கமாக எடுத்துச் சொன்னார்.

பங்கு, ஃபண்ட் முதலீடு...

சிறப்பான செயல்பாடு அவசியமில்லை!

‘‘முதலீடு செய்பவர் தனது பணத்தில் எவ்வளவு தொகையைப் பங்குச் சந்தையில் / மியூச்சுவல் ஃபண்டில் முதலீடு செய்ய வேண்டும், எவ்வளவு தொகையை ஃபிக்ஸட் டெபாசிட்டில் முதலீடு செய்ய வேண்டும் என்பதை முதலில் முடிவு செய்ய வேண்டும். பங்கோ, ஃபண்டோ அது மிகவும் சிறப்பாகச் செயல்பட்டிருக்க வேண்டும் என்கிற அவசியம் இல்லை.

அதாவது, டாப் பங்குகள் அல்லது டாப் ஃபண்டுகளில்தான் முதலீடு செய்ய வேண்டும் என்கிற கட்டாயம் இல்லை. அசெட் அலோகேஷன் சரியாக இருக்கும் பட்சத்தில், ஓரளவுக்கு நல்ல பங்குகள் அல்லது நல்ல ஃபண்டுகளில் முதலீடு செய்தாலே போதும், நல்ல லாபம் பார்க்க முடியும்.
மியூச்சுவல் ஃபண்ட் என்கிறபோது டிவிடெண்ட் ஆப்ஷன் வேண்டாம். அதில் இடையிடையே லாபத்தின் ஒரு பகுதி வழங்கப்பட்டுவிடுவதால், நீண்ட காலத்தில் கிடைக்கும் தொகை குறைவாகவே இருக்கும். அதனால் நீண்ட கால முதலீடு என்கிறபோது, மியூச்சுவல் ஃபண்டில் குரோத் ஆப்ஷனை பரிந்துரை செய்து வருகிறோம்.

நம் நாட்டைப் பொறுத்தவரையில், பங்குச் சந்தையில் முதலீடு செய்யும் சிறு முதலீட்டாளர்களின் எண்ணிக்கை சுமார் 2 சதவிகிதமாக இருக்கிறது. அசெட் அலோகேஷனில் பங்கு முதலீட்டின் அளவை அதிகரிக்கிற அளவுக்கு லாபமும் அதிகமாக இருக்கும்.

பங்கு, ஃபண்ட் முதலீடு...

எதிர்கால நிதித் தேவைகளை எளிதில் நிறைவேற்றிக் கொள்ள பங்குச் சந்தை முதலீடு மற்றும் பங்கு சார்ந்த மியூச்சுவல் ஃபண்ட் முதலீடு பெரிதும் வாய்ப்பாக இருக்கும். கடந்த ஒன்றரை ஆண்டுகளில் தங்கத்தின் விலை கணிசமாகக் குறைந்துள்ளது. இதே காலகட்டத்தில் பங்குகளின் விலை 50-60 சதவிகிதமாக அதிகரித்துள்ளது.

பேலன்ஸ்டு அப்ரோச்!

முதலீட்டை பொறுத்தவரையில், பேலன்ஸ்டு அப்ரோச் இருந்தால் நல்ல லாபம் பார்க்க முடியும். மேலும், முதலீட்டை 10-15 ஆண்டுகளுக்குத் தொடர்ந்து செய்வது அவசியம். நாட்டின் பொருளாதார வளர்ச்சியில் பங்கேற்கும் நிறுவனங்களின் பங்குகளைத் தேடிப் பிடித்து முதலீடு செய்தால் நல்ல லாபம் பார்க்க முடியும்.

அடுத்து, முதலீடு செய்துள்ள பங்குகளின் விலை வீழ்ச்சி தொடரும் என்கிறபட்சத்தில் அல்லது இனி விலை அதிகம் ஏறாது என்கிறபட்சத்தில் மட்டும்தான் விற்க வேண்டும்” என்ற ராதாகிருஷ்ணன், அசெட் அலோகேஷனில் யார், எவ்வளவு ரிஸ்க் எடுக்க வேண்டும் என்பதைக் குறிப்பிட்டார்.

‘‘அடுத்தது, அசெட் அலோகேஷனில் முக்கிய இடம் வகிப்பது வயது. நம் நாட்டைப் பொறுத்தவரை,  இளம் வயதினரும், வயதானவர்களும் ஒரே போல்தான் முதலீடு செய்கிறார்கள். மேலும், இளம் வயதினர் ரிஸ்க் எடுத்து பங்குச் சந்தையில் அதிக முதலீட்டை மேற்கொள்ள வேண்டும். ஆனால், அவர்கள் அவ்வாறு செய்வதில்லை. இதே தப்பை வயதானவர்களும் செய்கிறார்கள். அவர்கள் வயதாகும் போது பங்குச் சந்தை முதலீட்டை குறைப்பதற்குப் பதில் அதிகரிக்கிறார்கள். வயது அதிகரிக்க, அதிகரிக்க பங்குச் சந்தை முதலீட்டு அளவை குறைக்க வேண்டும்.

பங்கு, ஃபண்ட் முதலீடு...

25-30 வயது!

25-30 வயது வரம்பில் உள்ளவர்கள் அதிக ரிஸ்க் எடுக்கலாம். இந்தக் காலகட்டத்தில்தான் பலரும் புதிதாக வேலைக்குச் சேர்ந்திருப்பார்கள். அல்லது வேலையில் சேர்ந்து ஒரு சில ஆண்டுகளாகி இருக்கும். முதலீட்டை இந்த வயதில் ஆரம்பிக்கும்போது, முதலீட்டுத் தொகை குறைவாக இருந்தாலே போதும். நீண்ட காலத்தில் அது நன்றாகப் பெருகும். இந்த வயதில் பங்குகள் மற்றும் ஈக்விட்டி ஃபண்டுகளில் அதிக முதலீட்டை மேற்கொள்வது நல்லது.

31-35 வயது!

இந்தக் காலகட்டத்தில் கல்யாணமாகி குழந்தைகள் பிறந்திருக்கும். செலவு அதிகரித்திருப்பதற்கு ஏற்ப சம்பளமும் கூடி இருக்கும். சொந்த வீடு வாங்க வேண்டும் என்கிற எண்ணம் துளிர்விட ஆரம்பித்திருக்கும். முழு முதலீட்டையும் ரிஸ்க் அதிகம் உள்ள பங்குகள் மற்றும் ஃபண்டுகளில் மேற்கொள்ளாமல் பாண்டுகள், எஃப்டி ஆகியவற்றிலும் முதலீட்டை மேற்கொள்ள வேண்டும்.

36-45 வயது!

இந்தக் காலகட்டத்தில் குழந்தைகளின் எதிர்காலச் செலவுகளுக்குத் திட்டமிட வேண்டி இருக்கும். நம் நாட்டைப் பொறுத்தவரையில், கல்வி பணவீக்க விகிதம் மிகவும் அதிகம். கல்வி செலவுக்கு நீண்ட காலத்தில் முதலீடு செய்பவர்கள், பங்குகள் மற்றும் ஈக்விட்டி ஃபண்டுகளில் முதலீடு செய்வதன் மூலம் தேவையை ஈடுகட்டிக் கொள்ள முடியும்.

பங்கு, ஃபண்ட் முதலீடு...

46 - 60 வயது!

இந்த வயதிலாவது ஓய்வுக் காலத்துக் கான முதலீட்டை ஆரம்பித்திருக்க வேண்டும். 58-60 வயதில் பணி ஓய்வு பெறும்போது, சம்பள வருமானம் நின்றுபோகும். பென்ஷன் வருவதாக இருந்தால், நிலைமையை ஓரளவுக்குச் சமாளிக்க முடியும். இல்லை எனில், தொகுப்பு நிதி (கார்பஸ் ஃபண்ட்) மூலம் வருமானம் கிடைப்பதற்கான முதலீட்டை முன்னரே ஆரம்பித்துவிட வேண்டும். இன்றைக்கு இந்தியர்களின் சராசரி ஆயுள் என்பது 72-ஆக இருக்கிறது. அதாவது, பணி ஓய்வுக்குப் பிறகு 12 ஆண்டுகள் வாழ்ந்தே ஆகவேண்டிய சூழ்நிலை காணப் படுகிறது. இன்னும் சிலர், வேலையை விட்டபின் 20-25 ஆண்டுகள்கூட வாழ வேண்டி இருக்கும். அப்போது பிள்ளைகளை அதிகம் சார்ந்து இருக்க முடியாது. உடல் உபாதைகள் சேர்ந்து கொள்ளும். எனவே, ஹெல்த் இன்ஷூரன்ஸ் பாலிசி எடுக்கவில்லை என்றால் அதனை இப்போதே எடுத்துக் கொள்வது நல்லது.

15 ஆண்டு கால முதலீடு!

ரிட்டையர்மென்ட் காலத்தில் சுயமாக இருக்க வேண்டிய சூழ்நிலை ஏற்படும். எனவே, 60 வயதில் நிம்மதியாகக் காலம் கழிக்க, இந்த 15 வருட காலத்தில் முதலீட்டை மேற்கொள்வது அவசியம். ரிட்டையர்மென்ட்டுக்குப்பின் முதலீட்டு மீதான ரிஸ்க்கை குறைக்க வேண்டும். புதிதாகச் செய்யும் முதலீடுகளை ரிஸ்க் இல்லாத ஃபிக்ஸட் இன்கம் திட்டங்களில் மேற்கொள்வது நல்லது.

பங்கு, ஃபண்ட் முதலீடு...

 அதேபோல், ஏற்கெனவே செய்துவைத்திருக்கும் முதலீட்டின் ஒரு பகுதியை 60-62 வயதில் பாதுகாப்பான தாகவும், நிரந்தர மாத வருமானம் தருவதாகவும் மாற்றி வைத்துக்கொள்ள வேண்டும். ரிஸ்க் இல்லாத எஃப்டி, பென்ஷன் ஃபண்ட்களில் முதலீடு செய்துகொள்ளலாம். மீதியை எதிர்காலச் சந்ததிக்குக் கொடுப்பதாக இருந்தால் பங்கு / மியூச்சுவல் ஃபண்ட் / ரியல் எஸ்டேட்-ல் முதலீடு செய்து வைக்க லாம்” என்றவர், அசெட் அலோகேஷனில் கவனிக்க வேண்டிய விஷயங்களையும் குறிப்பிட்டார்.

கல்விக் கடன்!

‘‘அசெட் அலோகேஷன் மேற்கொள்ளும்போது ஏற்கெனவே இருக்கும் முதலீடு மற்றும் சொத்துகளின் அடிப்படையில் செய்ய வேண்டும். சொந்த வீடு இருக்கிறவர்கள், வீடு வாங்க என முதலீடு செய்யத் தேவை இல்லை. பிள்ளைகளின் மேற்படிப்புக்கு கல்விக் கடன் வாங்கிக் கொள்ளலாம் எனத் திட்டமிட்டிருப்பவர்கள் பிள்ளைகளின் கல்விச் செலவுக்காக ஓரளவு முதலீடு செய்தால் போதும்” என்றார்.

பங்கு, ஃபண்ட் முதலீடு...

நீண்ட காலத்தில் நல்ல லாபம் பார்க்கும் சூத்திரத்தை தெளிவாக தெரிந்துகொண்டுவிட்டீர்கள். உங்களுக்கான அசெட் அலோகேஷனை உடனடியாக திட்டமிட்டு முதலீட்டைத்  தொடங்கினால் வளமான வாழ்க்கை நிச்சயம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு