Published:Updated:

SME கைடுலைன்

எஸ்எம்இகளுக்கான மாநில அரசு மானியங்கள்! ச.ஸ்ரீராம்

SME கைடுலைன்

எஸ்எம்இகளுக்கான மாநில அரசு மானியங்கள்! ச.ஸ்ரீராம்

Published:Updated:

தொழில் முனைவோர்களின் வெற்றிக்கு...

சிறு, குறு மற்றும் நடுத்தரத் தொழில்முனைவோர்கள் தொடர்ந்து தொழில் செய்வதற்காக மத்திய, மாநில அரசாங்கங்கள் பலவித மானியங்களை வழங்கி வருகின்றன. எஸ்எம்இகளுக்கு என்னென்ன மானியங்கள் வழங்கப்படுகின்றன, எவ்வளவு தொகை மானியமாகக் கிடைக்கும் என்பது குறித்து தமிழ்நாடு மகளிர் தொழில்முனைவோர் நலச் சங்கத்தின் தலைவி கிருஷ்ணா ராதாகிருஷ்ணனிடம் கேட்டோம்.

‘‘தொழில்முனைவோர்களுக்கு,  தொழிலை தொடங்குவதில் ஆரம்பித்து, தொழிலின் பல்வேறு செயல்பாடு களுக்கும் மத்திய மற்றும் மாநில அரசுகள் மானியங்களை வழங்குகின்றன. பெரும்பாலான எஸ்எம்இகள் இதனை எப்படிப் பயன்படுத்திக் கொள்வது என்று தெரியாமல் இருக்கின்றனர். முதலில், தமிழக அரசாங்கம் தரும் மானியங்களைப் பார்ப்போம்.

குறுந்தொழில் நிறுவனங்களுக்கான மானியம் (Micro Manufacturing Enterprise Subsidy)

ஒட்டுமொத்த விகடனுக்கும் ஒரே ஷார்ட்கட்!

தமிழ்நாட்டில் எந்தப் பகுதியிலும் தொடங்கப்படும் குறுந்தொழில் உற்பத்தி நிறுவனங்களுக்கு 25% முதலீட்டு மானியம் வழங்கப்படுகிறது. இதன்மூலம் ஒரு எஸ்எம்இ அதிகபட்சமாக ரூ.6.25 லட்சம் வரை மானியம் பெற முடியும்.

SME கைடுலைன்

பின்தங்கிய வட்டாரங்களில் அமைக்கப்படும் தொழில் மானியம் (Backward Area / Agro based subsidy)

தமிழகத்தின் குறிப்பிட்ட 251 பின்தங்கிய ஒன்றியங்கள் மற்றும் சிட்கோ / சிப்காட் தொழிற்பேட்டைகளில் தொடங்கப்படும் குறு, சிறு மற்றும் நடுத்தரத் தொழில் நிறுவனங்கள் மற்றும் தமிழகத்திலுள்ள அனைத்து 385 வட்டாரங்களிலும் அமைக்கப்படும் வேளாண் சார் தொழில்களுக்கு 25% முதலீட்டு மானியம் வழங்கப்படுகிறது. இந்தத் திட்டத்தின் மூலம் அதிகபட்சமாக ரூ.30 லட்சம் வரை மானியம் பெறலாம். இதன் விவரங்களை www.indcom.tn.gov.in மூலம் அறியலாம்.

 இந்த மானியத்தில் உள்ள கூடுதல் சலுகைகள்:

25 நபர்களுக்குக் குறைவான அளவில் பணியமர்த்தி உள்ள நிறுவனங் களுக்குக் கூடுதலாக 5% மானியம் கிடைக்கும். இதில் அதிகபட்சம் ரூ.5 லட்சம் வரை மானியம் பெறலாம்.

உற்பத்தித் துவங்கிய முதல் மூன்று ஆண்டுகளுக்கு 20% மின் மானியம் பெறலாம்.

பின்தங்கிய பகுதிகளில் தொழில்கள் ஆரம்பிக்க வழங்கப்படும் நிலத்துக்கு 50 சதவிகிதமும்,  அதிகபட்சமாக ரூ.25,000 வரையும் மானியமாக வழங்கப்படுகிறது.

SME கைடுலைன்
SME கைடுலைன்

ஊக்குவிப்புத் துறை நிறுவனங்களுக்குச் சிறப்பு மூலதன மானியம் (Thrust Sector  Subsidy) ஆயத்த ஆடை, விலைக் குறைக்கும் கட்டுமான பொருட்கள், மாசுக் கட்டுப்பாடு இயந்திரங்கள், வாகன உதிரிபாகங்கள், மருந்து, தோல் மற்றும் தோல் பொருட்கள், சூரிய ஆற்றல் இயந்திரங்கள், ஏற்றுமதிக்கான தங்க வைர நகைகள், மின் மற்றும் மின்னணுப் பொருட்கள், ரப்பர், பிளாஸ்டிக் தயாரிக்கும் உற்பத்தி நிறுவனங்கள் மற்றும் உணவுப் பதப்படுத்துதல், விளையாட்டுப் பொருட்கள் தயாரிக்கும் உற்பத்தி நிறுவனங்கள் ஆகியவற்றுக்கு, மாநிலத்தின் அனைத்துப் பகுதிகளிலும் 25% முதலீட்டு மானியம் வழங்கப்படுகிறது. இதன்மூலம் ஒருவர் அதிகபட்சமாக ரூ.30 லட்சம் வரை மானியம் பெறலாம்.

 மாசற்ற மற்றும் சுற்றுச்சூழலுக்கு உகந்த தொழில்நுட்பத்துக்கான கூடுதல் மூலதன மானியம்! 

மாசற்ற மற்றும் சுற்றுச்சூழலுக்கு உகந்த தொழில் நுட்பத்துக்கான தொழில்முனைவோர் தொடங்கும் எஸ்எம்இ நிறுவனங்களுக்கு இயந்திரத்தின் விலையில் 25% கூடுதல் மூலதன மானியம் வழங்கப்படுகிறது. இந்தத் திட்டத்தின் கீழ் அதிகபட்சமாக ரூ.3 லட்சம் வரை மானியமாகப்  பெறலாம்.

SME கைடுலைன்

புதிய தொழில்முனைவோர் மற்றும் தொழில் நிறுவன மேம்பாட்டுக்கான திட்டம் (NEEDS) படித்த இளைஞர்களைத் தொழில் முனைவோர் ஆக்கும் ‘நீட்ஸ்’ திட்டத்தின் மூலம் திட்ட முதலீட்டில் 25 சதவிகித மூலதன மானியம் வழங்கப்படுகிறது. அதிகபட்ச அளவாக ரூ.25 லட்சம் வரையிலும், மேலும் திட்டத்துக்காகப் பெறப்படும் கடனுக்கான வட்டியில் 3 சதவிகிதத் தள்ளுபடியும் மானியமாக வழங்கப்படுகிறது.

 மின்னாக்கி சாதனத்துக்கு மானியம் (Generator Subsidy)

குறு, சிறு மற்றும் நடுத்தர நிறுவனங் களுக்குத் தேவையான (320KVA-க்கு மிகாத) மின்னாக்கி இயந்திர விலையில் 25 சதவிகிதம் மானியமாக வழங்கப் படுகிறது. அதிகமாக ரூ.5 லட்சம் வரையிலான தொகை மானியமாக வழங்கப்படுகிறது.

SME கைடுலைன்

  குறு, சிறு மற்றும் நடுத்தர நிறுவனங்களுக்கு TIIC வழங்கும் கடன் - 3% வட்டி தள்ளுபடி திட்டம் (MSME Loans from TIIC – 3 % interest subvention)

தமிழ்நாடு தொழில் முதலீட்டுக் கழகத்தில் கடன் பெறும் குறு, சிறு மற்றும் நடுத்தர நிறுவனங்களுக்கு 3% வட்டித் தள்ளுபடி வழங்கப்படும் (உச்சவரம்பு ரூ.30 லட்சம்)’’.

எஸ்எம்இகளுக்கு கிடைக்கும் மானியங்கள் பற்றி மாவட்ட தொழில் மையத்தை அணுகி இன்னும் அதிக விளக்கம் பெற்று, பயன் பெறலாமே!

எஸ்.எம்.இ தொழில்முனைவோர் கவனத்துக்கு...

 உங்களுடைய சந்தேகங்கள் மற்றும் உங்களுக்கான பிரச்னைகள் பற்றிய கேள்விகளுக்கு தொடர்புகொள்ள வேண்டிய இ-மெயில் முகவரி: msme@vikatan.com  குரல்பதிவு மூலமாகவும் உங்கள் கேள்வியை பதிவு செய்யலாம். அதற்கு 044-66802920 என்ற எண்ணுக்கு டயல் செய்யுங்கள். கணினி குரல் வழிகாட்டும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism