Published:Updated:

மோசடி நிதிநிறுவனங்களைத் தோலுரிக்கும் புதிய சட்டம்... ஏமாற்றம் தடுக்கப்படுமா?!

தெ.சு.கவுதமன்

சிறப்பு நீதிமன்றத்தில் வழக்கு தொடுக்கப்பட்டு மோசடி நிதி நிறுவனத்தின் சொத்துகள் அனைத்தும் கையகப்படுத்தப்படும்.

மோசடி
மோசடி ( vikatan )

தேக்கு மரம் வளர்ப்பு, ஈமு கோழி வளர்ப்பு, பி.ஏ.சி.எல் எனப் போலி நிறுவனங்கள், பல்வேறு அறிவிப்புகளுடன் பொதுமக்களின் சேமிப்புகளைச் சுரண்டுவது காலங்காலமாக நடந்துவருகிறது. அதிக வட்டி, சொந்த வீடு, வீட்டு மனைக்கான சேமிப்பு எனப் பல்வேறு வடிவங்களில் முறைப்படுத்தப்படாத நிறுவனங்கள், மக்களிடமிருந்து டெபாசிட்டுகளைப் பெற்று ஏமாற்றுவது, தொடர்கதையாக உள்ளது. ஏமாறும் மக்களுக்கும் குறைவில்லை. ஏமாற்றப்படுபவர்கள் பெரும்பாலும் அடித்தட்டு, நடுத்தரக் குடும்பத்தைச் சேர்ந்த மக்களாகவே உள்ளனர். தங்கள் சேமிப்பை இழந்தபிறகுதான் பதறியடித்துக்கொண்டு புகார் அளிக்க வருகிறார்கள்.

பி.ஏ.சி.எல் மோசடி
பி.ஏ.சி.எல் மோசடி
vikatan

இதுவரையில், மோசடியில் ஈடுபடும் நிறுவனங்களின்மீது, தங்களை ஏமாற்றிவிட்டதாக மட்டுமே புகார் அளிக்க முடியும். அந்தப் புகாரின்பேரில் பெரிய அளவில் நடவடிக்கை எடுக்கவும் வாய்ப்பில்லை. மக்களிடமிருந்து டெபாசிட்டுகளைப் பெறும் நிறுவனங்களின் செயல்பாட்டைக் கண்காணிக்க ஆர்பிஐ, செபி உள்ளிட்ட ஒன்பது அமைப்புகள் செயல்பட்டுவருகின்றன. ஆனால், இவற்றுக்கிடையே எந்த ஒருங்கிணைப்பும் இல்லாமல் தனித்தனியே செயல்பட்டு வருகின்றன. மேலும், டெபாசிட் என்ற வார்த்தைக்கான அர்த்தம் தீர்க்கமாக வரையறுக்கப்படவில்லை. இதனால் பல்வேறு நிறுவனங்கள், தாங்கள் வாங்குவது டெபாசிட்டில் சேராது என்று மறுக்கும் வாய்ப்பு இருந்தது.

இந்த மோசடிகள் அனைத்துக்கும் முற்றுப்புள்ளி வைப்பதற்காகத்தான் 'முறைப்படுத்தப்படாத டெபாசிட்டுகள் தடைச்சட்டம் 2019' அமலுக்கு வந்துள்ளது. மேலும், ஏற்கெனவே இருக்கும் ஆர்பிஐ சட்டம், செபி சட்டம் மற்றும் மல்ட்டி ஸ்டேட் கோஆபரேட்டிவ் சொசைட்டீஸ் சட்டங்களிலும் திருத்தம் கொண்டுவரப்பட்டுள்ளது.

நிதி நிறுவன மோசடி
நிதி நிறுவன மோசடி

முறைப்படுத்தப்படாத டெபாசிட்டுகள் தடைச்சட்டத்தின் முக்கிய அம்சமே, டெபாசிட் என்பதற்கான விளக்கத்தை வரையறுத்திருப்பதுதான். இதன்படி, முன்பணம் என்றோ, சேமிப்பு என்றோ, கடன் என்றோ எவ்வித வடிவமாக இருந்தாலும், இறுதியில் வட்டி, பொருள், லாபம், நிலம் என எதாவது கூடுதலாகக் கிடைக்கும் என்ற உறுதிமொழியுடன், கவர்ச்சிகரமான திட்டத்தின்பேரில் வசூலிக்கப்படும் பணம் அனைத்தும் டெபாசிட் என்ற வரையறைக்குள் வந்துவிடும். இதன்படி நகைச்சீட்டு என்று வசூலிக்கப்படுவதும் டெபாசிட் வகைக்குள் வந்துவிடும்.

டெபாசிட்டுகளை வாங்கும் நிறுவனங்கள் அனைத்தும் இனிமேல் பதிவுசெய்துதான் செயல்பட்டாக வேண்டும். முதலில் முறைப்படுத்தப்பட்ட மற்றும் முறைப்படுத்தப்படாத நிதி நிறுவனங்களின் முழுத்தகவல்களும் திரட்டுவதற்கென ஒரு தனி அமைப்பு ஏற்படுத்தப்படும். அந்த அமைப்பால் திரட்டப்பட்ட தகவல்கள் குறித்து ஆய்வு நடத்தபட்டு, சந்தேகத்துக்குரிய நிறுவனங்கள் குறித்து இவர்களுக்கு மேல்நிலையிலிருக்கும் சிறப்பு அதிகார அமைப்புக்கு தெரியப்படுத்தப்படும். இந்தச் சிறப்பு அதிகாரி, மாநிலச் செயலாளர் அந்தஸ்திலுள்ளவராக இருப்பார். நிதி நிறுவனங்கள் குறித்த புகார்களையும் இவரிடம் அளிக்கலாம்.

நிதி நிறுவன மோசடி
நிதி நிறுவன மோசடி

புகார்களில் குறிப்பிட்டபடி மோசடி நடந்திருந்தால் இந்த வழக்குகளை விசாரிப்பதற்காகவே மாவட்டந்தோறும் அமைக்கப்படவுள்ள, சிறப்பு நீதிமன்றத்தில் வழக்கு தொடுக்கப்பட்டு, மோசடி நிதி நிறுவனத்தின் சொத்துகள் அனைத்தும் கையகப்படுத்தப்படும். பின்னர், அதை விற்றுக்கிடைக்கும் தொகையை முதலீட்டாளர்களுக்குப் பகிர்ந்தளிப்பார்கள். இவை அனைத்துமே 180 நாள் காலக்கெடுவுக்குள் நடத்தி முடிக்க வேண்டும்.

தற்போது கொண்டுவரப்பட்டுள்ள சட்டத்தின்படி, ஆர்பிஐ, செபி உள்ளிட்ட 9 கண்காணிப்பகங்களுக்கும் பொதுவாக ஒரு ஆன்லைன் போர்ட்டல் கொண்டுவரப்படும். எந்த நிதி நிறுவனம் தொடங்கப்பட்டாலும் இந்த போர்ட்டலில் பதிவுசெய்ய வேண்டியது கட்டாயம். அப்படி பதிவுசெய்த நிறுவனம், மோசடியில் ஈடுபட்டால் அதுகுறித்த தகவல், அனைத்துக் கண்காணிப்பகங்களின் பார்வைக்கும் செல்லும். இதன்மூலம், மோசடிக்குற்றச்சாட்டுக்கு உள்ளானவர், மீண்டும் அதேபோன்ற மோசடியில் ஈடுபடுவது தடுக்கப்படும்.

பாதிக்கப்படும் மக்கள்
பாதிக்கப்படும் மக்கள்
vikatan

இந்தச் சட்டத்தின்படி, முறைப்படுத்தப்படாத நிதி நிறுவனங்கள் இயங்குவதும், டெபாசிட்டுகள் பெறுவதும் தடை செய்யப்படும். அத்தகைய நிறுவனங்களை நடத்துபவர்களுக்கு 2 முதல் 7 ஆண்டுகள்வரை சிறைத்தண்டனை விதிக்கப்படும். மேலும் 3 முதல் 10 லட்சம் வரை அபராதம் விதிக்கப்படும். முறைப்படுத்தப்பட்ட நிதி நிறுவனங்கள், டெபாசிட்டுகளுக்கு வட்டியைத் திருப்பியளிப்பதில் ஏதேனும் முறைகேட்டில் ஈடுபட்டால் அவர்களுக்கு 3 முதல் 10 ஆண்டுகள் வரை சிறைத்தண்டனை விதிக்கப்படும். மேலும் வாடிக்கையாளர்களிடமிருந்து திரட்டப்பட்ட டெபாசிட்டுகளைப்போல் இரு மடங்கு தொகை அபராதமாக வசூலிக்கப்படும்.

நிதி திரட்டல் மோசடியில் தொடர்ச்சியாக ஈடுபடுபவர்களுக்கு 5 முதல் 10 ஆண்டுகள்வரை தண்டனை விதிக்கப்படும். எந்தவொரு தனி நபரும், தெரிந்தே மோசடியில் ஈடுபடுவது, வாடிக்கையாளர்களை ஏமாற்றி எதாவது நிதி மோசடித்திட்டத்தில் உறுப்பினராகச் சேர்ப்பது போன்ற தவறுகளைச் செய்தால் அவர்களும் இந்தச்சட்டத்தின்மூலம் தண்டிக்கப்படுவர்.

இந்தச் சட்டம் குறித்து பொதுமக்களிடையே விழிப்புணர்வு ஏற்படுத்தப்பட வேண்டும். எந்த நிதி நிறுவனமானாலும் பதிவுசெய்யப்பட்டுள்ளதா என்பதைத் தெரிந்துகொண்டு செயல்பட வேண்டும். கவர்ச்சிகரமான திட்டங்களை சந்தேகக்கண்கொண்டு பார்க்க வேண்டும்.

ஆடிட்டர் கோபால் கிருஷ்ண ராஜு
ஆடிட்டர் கோபால் கிருஷ்ண ராஜு
vikatan

இந்தச் சட்டம் குறித்து ஆடிட்டர் கோபால்கிருஷ்ண ராஜூவிடம் கேட்டபோது, "இதுவரை புகாரளிக்கப்படாத மோசடி நிறுவனங்கள் குறித்தும் புதிய சட்டத்தின்மூலம் புகார் அளிக்கலாம். இந்தச் சட்டத்தின்மூலம் முறைப்படுத்தப்படாத நிதி நிறுவனங்களின் எண்ணிக்கை வெகுவாகக் குறையும். புகாரின்மீது 180 நாள்களுக்குள் நடவடிக்கை எடுக்கப்படும் என்பதால் இந்தச் சட்டம், பணத்தை இழந்த வாடிக்கையாளர்களுக்குப் பயனுள்ளதாக இருக்கும். ஒருவரின் தொழிலுக்கு உதவுவதற்காக இன்னொரு தனி நபரால் அளிக்கப்படும் தொகை குறித்தெல்லாம் இந்தச் சட்டம் பேசவில்லை.

ஒரு நிறுவனம், ஒரு குழுமம் அல்லது பங்குதாரர் நிறுவனம் மூலம் திரட்டப்படும் டெபாசிட்டுகள் அனைத்தும் கண்காணிப்பு அமைப்பிடம் பதிவுசெய்திருக்க வேண்டும். அப்படிச்செய்யாதவர்கள்மீது இந்தச் சட்டம் பாயக்கூடும். மொத்தத்தில் இந்தச் சட்டம் காலம்தாழ்த்திக் கொண்டுவரப்பட்டாலும், மிகவும் தேவையான ஒன்று" என்றார்.