Published:Updated:

பொருளாதாரச் சரிவிலிருந்து மீள கூடுதல் பணத்தை அச்சடிக்கலாமா? - சாதக பாதகங்கள் என்னென்ன? #LongForm

money
money

ரூபாய் நோட்டுகள் அச்சிடுவது மற்றும் பண நிர்வாகத்தில் ரிசர்வ் வங்கியின் பங்கு என்ன... பணம் எங்கு அச்சடிக்கப்படுகிறது?

"பணத் தாள்களை வெளியிடுவதை ஒழுங்குமுறைப்படுத்துதல், இந்தியாவின் நிதி ஆதாரத்தில் ஸ்திரத்தன்மையைப் பாதுகாக்கும் வகையில் இருப்புகளை வைத்துக்கொள்ளுதல், நாணயத்தையும் கடன்முறையினையும் நாட்டு முன்னேற்றத்துக்கு உரியவகையில் இயக்குதல்" ஆகியவைதான் இந்திய ரிசர்வ் வங்கியின் முக்கியப் பணி.

இந்திய ரிசர்வ் வங்கி, 1935-ம் ஆண்டு ஏப்ரல் முதல் நாள், இந்திய ரிசர்வ் வங்கிச் சட்டம், 1934-ன் விதிகளுக்கு ஏற்ப அமைக்கப்பட்டது. இந்திய ரிசர்வ் வங்கி தொடங்கப்பட்டதும், முதலில் அதன் மத்திய அலுவலகம் கொல்கத்தாவில் இயங்கியது. பின்னர், நிரந்தரமாக 1937-ம் ஆண்டிலிருந்து மும்பைக்கு மாற்றப்பட்டது. இந்த மத்திய அலுவலகத்தில்தான் வங்கியின் அனைத்துக் கொள்கைகளும் உருவாக்கப்படுகின்றன. தொடக்கத்தில் தனியாருக்குச் சொந்தமானதாக இருந்தபோதிலும் 1949-ம் ஆண்டில் தேசிய மயமாக்கப்பட்டதன் பின்னரே, இந்திய ரிசர்வ் வங்கி முழுமையாக இந்திய அரசுக்குச் சொந்தமானது.

1935-ம் ஆண்டு முதல் இதுவரை 24 பேர் ரிசர்வ் வங்கியின் கவர்னராக இருந்திருக்கிறார்கள். தற்போது கவர்னராக இருக்கும் சக்திகாந்த தாஸ் 25-வது கவர்னர்.

தொடுதல் இல்லாத 'Tap and Go'; அதிகப்படியான பணப் பரிவர்த்தனை! - ஒப்புதல் அளித்த ரிசர்வ் வங்கி #corona

ரூபாய் நோட்டுகள் அச்சிடுவது மற்றும் பண நிர்வாகத்தில் ரிசர்வ் வங்கியின் பங்கு என்ன... பணம் எங்கு அச்சடிக்கப்படுகிறது... பணம் அச்சடிக்க ஆகும் செலவுகள் என்ன... பணவீக்கத்துக்கும் பணம் அச்சடிப்பதற்கும் என்ன தொடர்பு...? எல்லாக் கேள்விகளுக்கும் இந்தக் கட்டுரையில் விடை கிடைக்கும்.

பண நிர்வாகம்

இந்தியாவில் பண நிர்வாகப் பணியை ரிசர்வ் வங்கிதான் செய்கிறது. இந்திய ரிசர்வ் வங்கி சட்டம் 1934-ன் படி, முக்கியப் பணியாகிய பண நிர்வாகப் பொறுப்பை ரிசர்வ் வங்கியின் பண நிர்வாகத்துறை ஏற்றுள்ளது. ரூபாய் நோட்டுகள் மற்றும் நாணயங்களை விநியோகித்தல், புழக்கத்திலிருக்கும் புழங்க தகுதியற்ற ரூபாய் நோட்டுகளைத் திரும்பப்பெறுதல் ஆகியன பண நிர்வாகத்தின் முக்கியமான பணிகள்.

ஆர்.பி.ஐ கவர்னர்கள்
ஆர்.பி.ஐ கவர்னர்கள்

ரிசர்வ் வங்கியின் 18 அலுவலகங்கள் மற்றும் விரிவானமுறையில் இணைக்கப்பட்ட 4,195 பணக் கருவூலங்கள், 488 சிறிய கருவூலங்கள், வங்கிகள் மூலம் நிர்வகிக்கப்படும் 3,562 சிறு நாணயக் கிடங்குகள் மற்றும் அரசு கருவூலங்கள் மூலம் இப்பணிகள் செயல்படுத்தப்படுகின்றன.

மக்களிடம் எப்படி பணம் போய்ச் சேருகிறது?

ரிசர்வ் வங்கி அகமதாபாத், பெங்களூர், போபால், புவனேஷ்வர், பேலாபூர் (நவிமும்பை), கொல்கத்தா, சண்டிகர், சென்னை, குவஹாத்தி, ஹைதராபாத், ஜெய்ப்பூர், கான்பூர், லக்னோ, மும்பை (கோட்டை), நாக்பூர், புதுடெல்லி, பாட்னா, திருவனந்தபுரம் ஆகிய இடங்களில் அமைந்துள்ள அலுவலகங்களின் மூலம் பணச் செயல்பாடுகளை மேற்கொள்கிறது. இந்த அலுவலகங்கள் பணத்தாள்களை அச்சிடும் அச்சகங்களிலிருந்து, புதுத்தாள்களை நேரடியாகப் பெறுகின்றன.

ரிசர்வ் வங்கி
ரிசர்வ் வங்கி

அதைப் போன்றே கொல்கத்தா, ஹைதராபாத், மும்பை, புதுடெல்லி ஆகிய இடங்களில் அமைந்துள்ள ரிசர்வ் வங்கி அலுவலகங்கள் நாணயக் கூடங்களிலிருந்து நாணயங்களைப் பெறுகின்றன. இந்த அலுவலகங்கள் அவற்றை மற்ற ரிசர்வ் வங்கி அலுவலகங்களுக்கு அனுப்புகின்றன. பணத்தாள்களும் ரூபாய் நாணயங்களும் பண அறையிலும், சிறு நாணயங்கள் நாணயக்கூடத்திலும் இருப்பு வைக்கப்படுகின்றன. இங்கிருந்தே வங்கியின் கிளைகளுக்கு பணத்தாள்களையும், நாணயங்களையும் பெற்று பொதுமக்களுக்கு வழங்குகிறது.

வடிவமைப்பு

பணத் தாளின் வடிவமைப்பைப் பொறுத்தவரை, அதன் பாதுகாப்பு அம்சமே முக்கியம் என்பதால், அவ்வப்போது பணத் தாளின் வடிவமைப்பை ரிசர்வ் வங்கி மாற்றும். பாதுகாப்பு அம்சங்களில் குறைபாடு இருப்பது கண்டுபிடிக்கப்படும் சூழலிலும், கள்ள நோட்டு அதிகரிப்பது கண்டுபிடிக்கப்படும் சூழலிலும் கறுப்புப் பணமாக பதுக்கி வைக்கப்படுவது கண்டுபிடிக்கப்படும் சூழலிலும் பழைய பணத்தாள்களை முடக்கி வைத்து புதிய வடிவமைப்பில் ரிசர்வ் வங்கி வெளியிடும்.

பணம்
பணம்

காந்தியின் படம்

மகாத்மா காந்தியின் படத்தை முதன்முதலில் 1996-லிருந்துதான் ரிசர்வ் வங்கி பயன்படுத்தத் தொடங்கியது.

முதலில், 100 ரூபாய் பணத்தாளில்தான் காந்தியின் உருவப்படம் அச்சடிக்கப்பட்டது. அதன்பிறகே மற்ற பணத்தாள்களில் அச்சடிக்கப்பட்டது. இந்தியா ஒரு ரூபாய், 2 ரூபாய், 5 ரூபாய் என சிறிய மதிப்பிலான பணத்தாள் மற்றும் காசுகளை கொண்டுள்ளது. எந்த ஒரு நாடு, சிறு சிறு மதிப்பில் பணத் தாளையோ, காசுகளையோ தயாரிக்கிறதோ அந்த நாட்டின் பொருளாதாரம் மேம்பட்டதாக இருக்கும். ஏனெனில், சிறு மதிப்புக்குக்கூட பொருள்கள் வாங்கும் அளவுக்கு அந்தப் பணத்துக்கு மதிப்பு இருக்கிறது.

பணத் தாள் நுகர்வு!

பணத்தை அச்சடிக்கும் தாளை அதிக அளவில் நுகர்வு செய்யும் நாடுகளின் பட்டியலில் உலகளவில் இரண்டாம் இடத்தில் இருக்கிறது இந்தியா. முதலிடத்தில் சீனா உள்ளது. பிரத்யேகமான காகிதங்கள், மை, பாதுகாப்பு அம்சங்கள், அச்சிடும் செயல்முறைகள் என ரூபாய் நோட்டுகளில் பல்வேறு சிறப்பம்சங்கள் இடம்பெறுகின்றன. இதற்கு மிகப்பெரிய தொகையும், தொழில்நுட்பமும் அவசியம் தேவை.

ஒவ்வோர் ஆண்டும் ரூபாய் நோட்டுகளை அச்சடிக்க, இந்தியா 22,000 மெட்ரிக் டன் காகிதங்களைப் பயன்படுத்துகிறது. பணம் அச்சடிப்பதற்கான மொத்தசெலவில் 40 சதவிகிதம், காகிதங்களுக்காகச் செலவிடப்படுகிறது. ரூபாய் நோட்டுகளை அச்சடிப்பதற்கான water marked காகிதங்களை, ஜெர்மனியைச் சேர்ந்த Giesecke & Devrient மற்றும் இங்கிலாந்தைச் சேர்ந்த De La Rue என்ற நிறுவனங்களிடம் இருந்து இந்தியா இறக்குமதி செய்கிறது.

பணம் அச்சிடும் இடங்கள்!

இந்தியாவுக்காகப் பணம் அச்சிடும் தேவைகளை இரண்டு நிறுவனங்கள் மேற்கொள்கின்றன. Security Printing and Minting Corporation of India Ltd (SPMCIL)- இதற்குக் கீழே நாசிக் (மகாராஷ்ட்ரா) அச்சகமும், தேவாஸ் (மத்தியப்பிரதேசம்) அச்சகமும் வருகிறது. Bharatiya Reserve Bank Note Mudran Ltd (BRBNML) - இதற்குக் கீழே சல்போனி (மேற்கு வங்கம்) அச்சகமும், மைசூர் (கர்நாடகா) அச்சகமும் வருகிறது.

அதிகரிக்கும் ரூ.2,000 போலி நோட்டுகள்... தமிழகம் 3-ம் இடம்... ஓர் அதிர்ச்சி ரிப்போர்ட்!

SPMCIL நிதியமைச்சகத்துக்கு கீழேயும், BRBNML ரிசர்வ் வங்கிக்கு கீழேயும் வருகிறது. நாணயங்கள், அரசுக்குச் சொந்தமான 4 நாணய சாலைகளில் அடிக்கப்படுகின்றன. மும்பை, ஹைதராபாத், கொல்கத்தா மற்றும் நொய்டா ஆகிய இடங்களில் நாணய சாலைகள் அமைந்துள்ளன. 

10, 20, 50, 100, 200, 500 மற்றும் 2,000 ரூபாய் என பழையது முதல் புதுவரவு வரை அனைத்து பணத்தாள்களும் மேலே குறிப்பிட்டுள்ள அச்சகங்களில்தான் அச்சாகி மக்களின் பயன்பாட்டுக்கு வருகின்றன. 

பணம் அச்சடிக்கும் அச்சகங்கள் மத்திய அரசு மற்றும் ரிசர்வ் வங்கியின் கட்டுப்பாட்டில்தானே இருக்கிறது, கொரோனா காலத்தில் தேவைப்படும் நிதியை அச்சடித்து பயன்படுத்திக் கொள்ளலாமே?

பொருளாதார நிபுணர்கள் சொல்வது போல, மக்களுக்கு நேரடியாகப் பணத்தை கொண்டுபோய் சேர்க்கலாமே? ஆனால் இங்குதான் `பணவீக்கம்' என்கிற ஒரு விஷயம் பிரச்னையாய் வந்து நிற்கிறது. 

பண வீக்கம் என்றால் என்ன என்பதையும், பணத்தை அளவுக்கு அதிகமாக அச்சடித்தால் என்னவாகும் என்பதையும் பின்வரும் உதாரணங்களுடன் பார்க்கலாம்.

பணம் அச்சடிப்பதற்கான காரணங்கள்!

ஒரு நாட்டில் பொதுவாக இரு காரணங்களுக்காக பணம் அச்சடிக்கும் நிலை ஏற்படும். ஒன்று ஏற்கெனவே இருக்கும் நோட்டுகளை மாற்ற வேண்டி வரும்போது. இந்தச் சூழல், கறுப்புப் பணத்தை வெளிக்கொண்டுவரவோ, கள்ள நோட்டுப் புழக்கம் அதிகரித்திருக்கையில் அந்தக் குறிப்பிட்ட நோட்டைச் செல்லாது எனச் சொல்லி அதற்கு மாற்றாக புதிய நோட்டுகளை அச்சடிக்கவோ அரசாங்கம் முன்வரும். இரண்டாவது, பொருளாதார திருத்தத்தை மேற்கொள்ளும்போது புதிய நோட்டுகளை அரசு அச்சடிக்கும்.

ஆர்.பி.ஐ சொத்துமதிப்பு
ஆர்.பி.ஐ சொத்துமதிப்பு
பணம் பறிக்கும் இணையதள மோசடிகள்! - பாதுகாப்பு வழிமுறைகள்..!

பணவீக்கமும் பண அச்சடிப்பும்!

"எந்தக் கணக்கும் இல்லாமல் பணத்தாள்களை அச்சடித்துக் கொண்டே இருந்தால் பணவீக்கம் அதிகமாகும். பொதுவாக அதைக் கண்காணிக்கவே வெவ்வேறு ஃபார்முலாக்கள் பின்பற்றப்படுகின்றன. அதில் ஒன்று ஒரு நாட்டின் உற்பத்தி விகிதத்தை (GDP) அடிப்படையாக வைத்து ரூபாய் நோட்டுகளை அச்சிடும் கணக்கை நிர்ணயிப்பதாகும். அதே போல ரிசர்வ் வங்கியின் கையிருப்பில் இருக்கும் தங்கம், அந்நியச் செலாவணி (வெளிநாட்டு கரன்சிகள்), பாண்டுகள் போன்றவற்றின் மதிப்புக்கு இணையான அளவில் மட்டுமே பணத்தாள்களை அச்சிட வேண்டும். அதற்கு மேல் அச்சிட்டால், பணவீக்கம் அதிகமாகும். 

பணவீக்க விகிதம்
பணவீக்க விகிதம்

ஆனால், கொரோனா மாதிரியான பேரிடர் காலங்களில் பணவீக்க விகிதத்தைக் கருத்தில் கொள்ளாமல், தேவையான பணத்தை அச்சிட்டு மக்களுக்கு நேரடியாகக் கொடுக்கலாம். ``கொரோனாவால் பாதிக்கப்பட்டிருக்கும் நாடுகள் இதுமாதிரியான இக்கட்டான சூழ்நிலைகளில், பணவீக்கத்தை மேலும் ஒரு சதவிகிதம் வரை அதிகப்படுத்திக்கொள்ளலாம் என உலக வங்கி அறிவுறுத்தியிருக்கிறது. ஆனால், இந்தியா இந்த நடைமுறையை கையில் எடுக்காமல், இன்னும் யோசித்துக் கொண்டே இருக்கிறது" என்கிறார் பொருளாதார நிபுணரான ஜோதி சிவஞானம்.

அரசு வேகமாக செயல்பட வேண்டும்!

அண்மையில் பொருளாதாரத்துக்காக நோபல் பரிசு வாங்கிய பொருளாதார நிபுணர் அபிஜித் பானர்ஜி, ``கொரோனா வைரஸ் லாக் டெளனால் தொழிலாளர்கள் பெரிதும் பாதிக்கப்பட்டுள்ளனர், தொழில்கள் முடக்கப்பட்டன. இந்தியப் பொருளாதாரத்தில் 75 சதவிகிதத்துக்கும் மேல் பங்களிப்பு செய்யும் வெகுஜன பொருளாதாரத் தொழில்கள் அல்லது முறைசாரா தொழிலாளர்கள் மிகப்பெரிய அளவில் வேலைகளை இழந்துள்ளனர். இவர்களுக்காக அரசு ஒன்றுமே செய்யவில்லை” என்று தெரிவித்திருந்தார்.

Abijith
Abijith

மேலும் அவர், ``பணவீக்கம் குறித்து அரசு அஞ்சலாம். ஏனெனில் சரக்கு மற்றும் சேவைகள் போதுமான அளவுக்கு இல்லை. ஆனால் வருவாய் இடைவெளியைக் குறைக்க இந்தியா ஏதாவது செய்தாக வேண்டும். பணத்தைச் செலவழிப்பதில் அரசு இன்னும் வேகமாக செயல்பட வேண்டும்.

ஏழைகளுக்குப் பணத்தை நேரடியாக அளிக்க வேண்டும். அப்போதுதான் அவர்கள் தேவை பூர்த்தியடைவதோடு பொருளாதாரமும் மீண்டெழும்.
- அபிஜித் பானர்ஜி

ஏற்கெனவே பொருளாதாரத் தேவை சரிவு ஏற்பட்டுள்ள நிலையில் கொரோனா தொற்று பேரிடியை இறக்கியுள்ளது. லாக் டெளனும் அவசியம்; தொலைநோக்கும் அவசியம். தடுப்பூசி கண்டுபிடிக்கப்படும் வரை கொரோனா எப்படியும் தணியாது, எனவே, தொலைநோக்குடன் திட்டங்களை அரசு வகுக்க வேண்டும்.

`கார்ப்பரேட் வரியை குறைக்காமல் ஏழைகளுக்காக செயல்படுங்கள்!’ நிதியமைச்சருக்கு அபிஜித் பானர்ஜி அறிவுரை

ஏற்கெனவே அறிவித்த நலத்திட்டங்களுடன் மக்களுக்கு இன்னும் கூடுதல் ரொக்கம் அளிக்கப்பட வேண்டும். இதற்குத் தேவையான பணத்தைக் கூடுதலாக அச்சடிக்கவும் செய்யலாம். தவறில்லை" என்று தெரிவித்திருக்கிறார்.

பண வீக்கம் என்பது...

பணப்புழக்கம் அதிகரித்தாலும் விலைவாசி தொடர்ந்து நிலைத்திருப்பதே பணவீக்கம் (inflation). உதாரணமாக, ஒருவர் 10 பெட்சீட்கள் விற்க வேண்டும் என இலக்கு வைத்துக்கொண்டு 30 வீடுகள் உள்ள ஒரு அப்பார்ட்மென்ட்டுக்குச் செல்வதாக வைத்துக்கொள்வோம். அவரிடம் இருப்பது 20 பெட்சீட்கள். 

பணத்தின் மதிப்பு
பணத்தின் மதிப்பு

ஒரு பெட்சீட்டின் விலை 200 ரூபாய். அது குளிர்காலம் என்பதால் மக்களிடம் பெட்சீட்களுக்கான தேவை அதிகமாக இருக்கிறது. 15 வீடுகளில் ஏற்கெனவே பெட்சீட்கள் உள்ளன. 15 வீடுகளுக்கு பெட்சீட் தேவைப்படுகிறது. 200 ரூபாய் பெட்சீட்டை வாங்க, 25 வீடுகள் தயாராக உள்ளன.

ஆக, பெட்சீட்டை வாங்குவதற்கு ஆள்கள் உள்ளனர். அதனால் தேவை (Demand) அதிகம். அதேசமயம் விற்பதற்கு அவரிடம் 20 பெட்சீட்கள் உள்ளன. சப்ளை குறைவு. இதன் விளைவு, 200 ரூபாயாக இருந்த பெட்சீட் விலையை அவர் 400 ரூபாய் என்று உயர்த்தினால் அதுதான் பணவீக்கம்.

பணவீக்கத்தின் வகைகள்!

கிரீப்பிங் (Creeping), கேலோப்பிங் (galloping), ஹைப்பர் (hyper), பாட்டில்நெக் (Bottleneck), கோர் (core) என்று பணவீக்கம் 5 வகைப்படும். அதேபோல் பணவீக்கத்தை அளவிட ஹோல்சேல் பிரைஸ் இண்டெக்ஸ் (Wholesale Price Index), கன்ஸ்யூமர் பிரைஸ் இண்டெக்ஸ் (Consumer Price Index urban / rural), GDP டீஃப்லேட்டர் (deflator) என்ற முறைகள் உண்டு.

'1923'
ஜெர்மனி மிகவும் மோசமான பணவீக்கத்தை சந்தித்த ஆண்டு!

பணவீக்கத்தைக் கட்டுப்படுத்த வங்கிகள் மூலமாகக் கடன் வழங்குவதைக் கட்டுப்படுத்துதல், பணமதிப்பைக் குறைத்தல் (Demonetisation), புதிய ரூபாய் நோட்டுகளை அறிமுகம் செய்தல், மற்றும்  மக்களின் செலவினத்தைக் குறைத்தல், பொருள்களின் மீதான வரிகளை உயர்த்துதல், சேமிப்புகளை உயர்த்துதல், உபரி பட்ஜெட் நிதியை கணக்கில் காட்டுதல் போன்றவை மத்திய அரசு மற்றும் ரிசர்வ் வங்கியால் நடைமுறைப்படுத்தப்படுகிறது. 

மிகவும் மோசமான பணவீக்கம்!

உலகிலேயே மிக மோசமான பணவீக்கம் (Hyperinflation) 1923-ம் ஆண்டு ஜெர்மனியில் ஏற்பட்டது. 

முதல் உலகப் போரின்போது, நாம்தான் வெல்லப்போகிறோம் என்கிற கனவுக் கோட்டையைக் கட்டிக்கொண்டு, கடன் வாங்கி போர் செய்தது ஜெர்மனி. ஆனால், அந்தப் போரில் மண்ணைக் கவ்வியது. வாங்கிய கடன் கழுத்தை நெரிக்க, தேவையான பணத்தை அச்சடிக்கலாம் என முடிவு செய்தது.

நூற்றுக் கணக்கான ஆலைகள் இரவும் பகலுமாக அச்சடித்து அச்சடித்துக் குவியல் குவியலாகப் பணக் கட்டுகளை வெளியேற்றிய வண்ணம் இருந்தன. எங்கு பார்த்தாலும் பணக் குவியல்கள். இதன் விளைவு, கட்டுக்கடங்காத பணவீக்கம். தத்தளித்தது ஜெர்மனி. அப்போது பணவீக்க விகிதமானது 10 லட்சம் கோடி (10,00,00,00,00,000%) சதவிகிதமாகக் காணப்பட்டது. பொருள்கள், சேவைகளை வாங்க பணத்தைப் பயன்படுத்த முடியாத நிலை ஏற்பட்டது. விறகு வாங்குவதற்குப் பதிலாக ஜெர்மனி மார்க்குகளை (பணத்தை) அடுப்பில் போட்டு எரித்துச் சமைப்பது லாபகரமானதாக இருந்தது.

ஜெர்மனி மார்க்குகள்
ஜெர்மனி மார்க்குகள்

சிறுவர்கள் பணக்கட்டுக்களை தெருவில் வைத்து விளையாடினர். இவ்வாறானதொரு நிலைமை எந்தவொரு நாட்டுக்கும் ஏற்பட்டதில்லை. அண்மைக்காலத்தில் ஜிம்பாவே நாட்டில் ஏற்பட்ட 2,000 சதவிகிதம் பணவீக்கமே சமகாலத்தில் ஏற்பட்ட மோசமான பணவீக்கமாகப் பார்க்கப்படுகிறது

பணத்தின் மதிப்பானது விலைகள் அதிகரிப்பதன் காரணமாக வீழ்ச்சியடைவதால் வணிகத் தீர்மானங்களை மேற்கொள்வதும், முதலீட்டு நடவடிக்கைகளில் ஈடுபடுவதும் சிரமமானதாக மாறும். நம்பகத்தன்மையும் குறையும். இது பொருளாதாரத்தில் மோசமான விளைவுகளை ஏற்படுத்தும்.

இந்தியாவுக்குப் பெருமை சேர்த்த நோபல் நாயகன் அபிஜித்!

இன்னும் தெளிவாக சொல்ல வேண்டுமென்றால் மருத்துவத் துறையில் புற்றுநோய் எப்படியோ, அப்படித்தான் பொருளாதாரத்தில் பண வீக்கம் என்பதும். ஆபத்தான பணவீக்கத்தை கட்டுக்குள் வைத்துக்கொள்ள வேண்டும் என மத்திய அரசு நினைப்பதில் தவறில்லை என்றாலும், அடுத்த வேளை சோற்றுக்குக்கூட வழி இல்லாமல் திண்டாடும் மக்களைக் கண்டுகொள்ளாமல் விடுவது மிகப்பெரிய தவறு!

அடுத்த கட்டுரைக்கு