Published:Updated:

பிசினஸில் வளர உங்களுக்குத் தேவை தைரியம்..! வெற்றி வழிகளைச் சொல்லும் புத்தகம்!

வெற்றி வழிகள்
பிரீமியம் ஸ்டோரி
வெற்றி வழிகள்

MBA BOOKS

பிசினஸில் வளர உங்களுக்குத் தேவை தைரியம்..! வெற்றி வழிகளைச் சொல்லும் புத்தகம்!

MBA BOOKS

Published:Updated:
வெற்றி வழிகள்
பிரீமியம் ஸ்டோரி
வெற்றி வழிகள்

தைரியமே உங்களுடைய முன்னேற்றத்துக்கு அடிப்படையானதாக இருக்கிறது. கொஞ்சம் சிந்தித்துப் பார்த்தால், தைரியமே உங்களை இன்றைக்கு நீங்கள் இருக்கும் நிலைக்குக் கொண்டு வந்துள்ளது என்பது உங்களுக்குத் தெளிவாகப் புரியும். நீங்கள் கார்ப்பரேட் எக்ஸிக்யூட்டிவாக இருந்தால், சொந்தமாகத் தொழில் தொடங்க வேண்டும் என்ற கனவை நனவாக்க தைரியமே துணையாக இருக்கும் என்பதைத் தெளிவாக எடுத்துச் சொல்கிறது நாம் இந்த வாரம் பார்க்கவிருக்கும் புத்தகம்.

புத்தகத்தின் பெயர்:
Dare to Scale 
 ஆசிரியர்:
Warsha Joshi; 
Evan Le Clus 
பதிப்பாளர்:
Panoma Press
புத்தகத்தின் பெயர்: Dare to Scale ஆசிரியர்: Warsha Joshi; Evan Le Clus பதிப்பாளர்: Panoma Press

நீங்கள் உங்களுக்காக உழைக்கும் தைரியம்...

அதிக சிரத்தையுடன்கூடிய கடின உழைப்பை நம்மில் பெரும்பான்மை யானவர்கள் அடுத்தவர்களுடைய கனவை நனவாக்குவதற்காகவே செலவிடுகிறோம். தொழில் முனைவோராக இருப்பவர்கள் மட்டுமே அவர்களுடைய உழைப்பை அவர்களுடைய கனவு நனவாக்கு வதற்காகச் செலவிடுகின்றனர். அதாவது, பணிக்குச் செல்லும் பெரும்பான்மைக்கு எதிரான சிறுபான்மையினராகிய தொழில் முனைவோர்கள் அவர்களுடைய தைரியத்தின் காரணமாகவே பெரும் பான்மையினர் செய்யும் விஷயத்தைச் செய்வதைத் தவிர்த்து தனித்துவத் தைக் காட்டி முன்னேற முயற்சி செய்கின்றனர். இந்த தைரியமே தொழில்முனைவோர், அவருடைய குடும்பம், நண்பர்கள் மற்றும் அவர் செய்யும் தொழில் பல்வேறு விதமாகப் பங்கேற்கும் நபர்கள் (stakeholders) போன்றவர்களைப் பலனடையச் செய்கின்றனர்.

நேற்றைக்கு ஆரம்பித்த ஒரு ஸ்டார்ட்அப் நிறுவனம் ஆனாலும் சரி, மூன்று தலைமுறைகளைத் தாண்டி நடந்துகொண்டிருக்கும் ஒரு தொழிலில் ஈடுபட்டுவரும் தொழில் முனைவோரானாலும் சரி, அந்தந்த நிலைக்கும் காலகட்டத்துக்கு ஏற்ப செய்யும் தொழிலை விரிவாக்கம் செய்து பெரிதாக்குவது எப்படி என்பதைத் தொழில்முனைவோரான நீங்கள் அவசியம் தெரிந்து வைத்திருக்க வேண்டும் என்கிறார்கள் இந்தப் புத்தகத்தின் ஆசிரியர்கள்.

நிறுவனத்தின் வளர்ச்சியைக் கண்டறிய உதவும் 5 விஷயங்கள்...

உங்களுடைய பிசினஸ் வேக மாகவோ, விரைவான வளர்ச்சியை அடைவதற்கான குணாதிசயங் களையோ கொண்டிருக்கிறதா என்பதை எப்படிக் கண்டுபிடிப்பது? இதற்கு பின்வரும் ஐந்து விஷயங்களை நீங்கள் கணக்கில் கொள்ள வேண்டும். 1. பிசினஸ் மாடல் மற்றும் விற்றுவரவு. 2. ஸ்ட்ராட்டஜி, நிதி திரட்டுதல் மற்றும் அந்த நிதி அதிக அளவில் முதலீடு செய்யப்படும் தொழிலின் உட்பிரிவுகள். 3. பணியாளர்கள் மற்றும் தலைமையின் குணாதிசயம். 4. கேஷ் ஃப்ளோ மற்றும் நிறுவனத்தின் நடைமுறைகள். 5. நிறுவனத்தின் செயல்பாட்டுத்திறன் என்பவையே அந்த ஐந்து விஷயங்கள்.

இந்த ஐந்து விஷயங்களை அளவீடு செய்யும்போது, எந்தெந்த இடங்களில் நம்முடைய நிறுவனம் சரியாக இல்லாமல் தடுமாறுகிறது, முன்னேற்றம் தேவைப்படுகிறது என்பது உங்களுக்குப் புரியவரும். அதைச் சுலபமாகச் சரிசெய்து கொள்ளலாம். இந்த ஐந்து விஷயங் களிலுமே ஓரளவுக்கு உங்கள் நிறுவனம் ஸ்திரமான தன்மையைக் கொண்டதாக இருந்தால், உங்களுடைய நிறுவனத்தால் வேகமான மற்றும் விரைவான வளர்ச்சிக்கான பாதையில் அடியெடுத்து வைக்க முடியும் என்கிறார்கள் ஆசிரியர்கள்.

பிசினஸில் வளர உங்களுக்குத் தேவை தைரியம்..! வெற்றி வழிகளைச் சொல்லும் புத்தகம்!

சிக்கல்களைச் சந்தித்தால்தான் வளர்ச்சி காண முடியும்...

‘‘தொழிலை ஆரம்பிக்கும் அளவுக்கு ரிஸ்க் எடுத்துவிட்ட நாங்கள், அதை வளர்த்தெடுக்க மாட்டோமா’’ என்று நீங்கள் கேட்கலாம். தொழிலை ஆரம்பிப்பது வேறு, வளர்த்தெடுப்பது வேறு. ஏனென்றால், தொழிலை நடத்தும்போது நாம் எதிர்கொள்ளும் கஷ்டங்கள் அதிகமாகும் வேளையில் (கஷ்டத்தை எதிர்கொள்ளும் கடினமான காலகட்டங்களில்) நாம் குறைந்தபட்ச தடைகள் கொண்ட பாதையையே தேர்ந்தெடுக்க முயல் வோம். ஏனென்றால், ஏற்கெனவே இருக்கும் சிக்கல்களின் இடையே புதியதாக வேறு பல சிக்கல்களை உருவாக்க வேண்டாம் என்ற எண்ணமே நம்மிடையே மேலோங்கி யிருக்கும். இதனாலேயே ஒவ்வொரு சிக்கலான சூழலை எதிர்கொள்ளும் சூழ்நிலையிலும் வளர்ச்சி என்பது கொஞ்சம் கடினமான விஷயமாக இருக்கிறது. ஆனால், இந்தச் சிக்கலைச் சந்திக்காமல் வெற்றி கிடைக்காது.

உங்கள் பிசினஸை அதிவேகமாக வளர்ச்சியடையச் செய்யும்போது உங்களுக்கு அதிகம் பேருடைய உதவி தேவைப்படும். பிசினஸ் கோச் ஒருவர், மென்டார் ஒருவர் மற்றும் உங்களைப் போன்றே வெவ்வேறு தொழில்களில் இருக்கும் நபர்கள் என்ற மூன்று வகை நபர்களுடன் இணைந்து செயல்பட்டால், உங்களுடைய பிசினஸின் வளர்ச்சியின் வேகத்துக்கு ஏற்றாற்போல் உங்களால் ஈடுகொடுத்து செயல்பட முடியும்.

கேஷ்ஃப்ளோ வந்தால்தான் ஜெயிக்க முடியும்...

உங்களுடைய பிசினஸ் மாடல் என்பது எப்படி நீங்கள் வாடிக்கையாளர் களின் தேவையைப் பூர்த்தி செய்வதன் மூலம் கேஷ் ஃப்ளோவை பிசினஸுக்குள் கொண்டுவருகிறீர்கள் என்பதிலேயே இருக்கிறது. ஒரு நிறுவனத்தில் ஏதாவது ஒன்று வெற்றிகரமாக விற்கப்படாத வரை நிறுவனத்துக்குள் உருப்படியாக எதுவுமே நடக்காது என்பதை நீங்கள் புரிந்துகொள்ள வேண்டும். எனவே, வளர்ச்சி என்பதைத் தக்கவைத்துக் கொள்ள பிசினஸ் மாடலைக் கொஞ்சம் மாற்றிக்கொள்ள வேண்டியிருக்கும் என்பதை மனதில் கொண்டு செயல்பட வேண்டும்.

பிசினஸின் ஸ்ட்ராட்டஜியும் நிதித் திரட்டல் மற்றும் முதலீடு செய்யும் விதமும் (தொழிலின் பல பிரிவுகளில் எந்த உட்பிரிவில் அதிக முதலீடு செய்யப்படுகிறது என்பது குறித்தது - உதாரணமாக, உற்பத்தி, லாஜிஸ்டிக்ஸ், சாஃப்ட்வேர் போன்ற உட்பிரிவுகள்) பெருமளவில் வளர்ச்சிக்கான பாதைக்கு வழிவகை செய்கின்றன.

நன்றாகத்தான் உழைக்கிறோம். ஆனால்..?

‘‘நாங்கள் வேகமாகத்தான் வளர்கிறோம். ஆனால், வளர்ச்சி யைத் தக்கவைத்துக் கொள்ள மிகவும் கஷ்டப்படுகிறோம்’’, ‘‘எங்கள் வாடிக்கையாளர்கள் எல்லோரும் மகிழ்ச்சியுடன் இருக்கின்றனர். ஆனால், கேஷ் ஃப்ளோதான் சொல்லிக் கொள்ளும்படி இல்லை’’, ‘‘எங்களிடம் இருக்கும் பணியாளர்கள் அனைவருமே திறமையானவர்கள்தாம். ஆனால், அவர்களை ஒரு குழுவாக இணைந்து செயல்பட வைப்பது தான் கடினமாக இருக்கிறது’’, ‘‘எங்களுடைய தயாரிப்பு சூப்பராக இருந்தாலும், எங்களால் போட்டியாளர்களை வெல்லவே முடியவில்லை’’ என்பது போன்ற பலவிஷயங்களை வேகமாக வளர்ந்துவரும் நிறுவனத்தின் தலைவர்கள் பலரும் சொல்லக் கேட்டிருப்பீர்கள். இவை அனைத்தும் ஒன்றையே காட்டுகிறது. சரியானதொரு ஸ்ட்ராட்டஜி கண்டறியப்பட்டு செயல்படுத்தப்படாததாலும், தேவையான இடத்தில் சரியான முதலீடுகள் செய்யப்படாத தாலும் மட்டுமே இந்தவித சூழல் நிறுவனத்தினுள் நிலவுகிறது.

உங்களுடைய பிசினஸ் ஸ்ட்ராட்டஜி என்பது ஒரு ப்ளூ பிரின்ட் எனில், சரியான இடங் களில் (பிசினஸின் உட்பிரிவுகளில்) செய்யப்பட்ட தேவையான அளவு முதலீடுகளே அதற்கான அஸ்திவாரமாகும். இது தவிர, பணியாளர்கள் மத்தியில் நீங்கள் அவர்கள் மீது நம்பிக்கை வைத்திருப்பதை வெளிப் படுத்தியும், அவர்களுடைய கனவுகளை உணர்ந்துகொண்டும் அவர்களுடைய வளர்ச்சியில் பங்களித்தும் செயல்பட்டு வந்தால் அவர்கள் நிறுவனத்தின் வேகமான வளர்ச்சிக்கு ஈடுகொடுத்து உழைப்பார்கள் என்கிறார்கள் ஆசிரியர்கள்.

எவ்வளவு சம்பாதிக்கிறீர்கள் என்பது முக்கியம்...

வேகமான வளர்ச்சியில் பிசினஸின் நடைமுறைகள் மற்றும் கேஷ்ஃப்ளோவின் பங்களிப்பை விவரித்து சொல்லி யிருக்கும் இந்தப் புத்தகத்தின் ஆசிரியர்கள், நீங்கள் விரும்பினாலும் விரும்பா விட்டாலும் உங்கள் பிசினஸின் நடைமுறைகள் பிசினஸுக்கான இதயம் எனில், அது இயங்கு வதற்குத் தேவையான ரத்தம் கேஷ் ஃப்ளோவே என்கின்றனர். ஏனென்றால், எங்கு சுற்றி வந்தாலும் ஒரு பிசினஸ் என்பது கடைசியில் காசு என்பதில் வந்தே முடிவடைகிறது.

கேஷ் தவிர, (பொதுவழக்கில், கேஷ் இஸ் கிங் என்பார்கள் பலர்) மற்றதெல்லாம் ஜர்னல் என்ட்ரி தான் என்பார்கள் அக்கவுன்டிங் புரொஃபஷனல்கள். அதாவது, நீங்கள் என்ன சம்பாதிக் கிறீர்கள் (ஜர்னல் என்ட்ரி) என்பது முக்கியம் இல்லை. எவ்வளவு கேஷ் உள்ளே வருகிறது என்பதுதான் விஷயமே என நச்சென்று சொல்கிறார்கள் ஆசிரியர்கள்.

இறுதியாக, ‘‘சரியான அளவு பொருள் செலவுடன் உபரியான அளவு உற்பத்தி மற்றும் சேவையை உருவாக்க முதலில் உங்களுடைய நிறுவனத்தின் கம்யூனி கேஷன் ஸ்ட்ரக்சர் மிகவும் பவர்புல்லாக இருக்க வேண்டும்.

உற்பத்தித்திறனை அபரிமிதமாக உயர்த்திக்கொள்ள அன்றாடம் செய்ய வேண்டியவை குறித்த மீட்டிங் என்றாலும் சரி, ஒட்டுமொத்த நிறுவனத்தையும் சென்றடையும் கம்யூனிகேஷன் என்றாலும் சரி, உங்களுடைய கொள்கை மற்றும் எதிர்பார்ப்பு குறித்த தெளிவான செய்தியைக் கொண்டு சேர்க்குமாறு பார்த்துக்கொள்ள வேண்டும்’’ என்கின்றனர்.

தொழிலை ஆரம்பிக்க தைரியம் வேண்டும். அதை வழிநடத்தி வளர்த் தெடுக்க உறுதிப்பாடு வேண்டும். உறுதிப் பாட்டைத் தொடர்ந்து நிலைநாட்ட இந்தப் புத்தகத்தில் சொல்லியுள்ள ஐந்து விஷயங்களிலும் கவனம் வைத்தால் நீங்கள் நினைத்த எல்லை களை எல்லாம் கடந்து வளர முடியும் என்று முடிக்கிறார்கள் ஆசிரியர்கள்.

வளர்ச்சியை விரும்பாத நபர்களே இந்த உலகில் இல்லை. அந்த வளர்ச்சியை எப்படி எட்டுவது, எப்படி தக்கவைத்துக்கொள்வது என்பதைப் பல்வேறு உதாரணங்களுடன் தெளிவாக விளக்குகிறது இந்தப் புத்தகம். இந்தப் புத்தகத்தை, தொழில் முனைவோர்கள் அனைவரும் அவசியம் ஒரு முறை படிக்கலாம்!