சீனாவிலிருந்து வெளியேறும் நிறுவனங்கள்..! - இந்தியாவில் கால்பதிக்குமா..?

இ ந்தியா உட்பட உலக நாடுகள் பலவற்றுக்கும் கொரோனா பெருந்தொற்று கடும் பொருளாதார நெருக்கடியை உருவாக்கி யிருந்தாலும், மறுபக்கம் அரிதான சில நல்வாய்ப்புகளையும் வழங்கியிருக்கிறது. . தற்போது உலக நாடுகளின் கோபம் சீனாவை நோக்கித் திரும்பியிருக்கிறது. கொரோனாவின் தாக்கம் குறித்த உண்மையான தகவல்களை சீன அரசு மற்ற நாடுகளுக்கு உரிய நேரத்தில் வழங்கவில்லை என்பது பல நாடுகளின் பகிரங்கக் குற்றச்சாட்டாக இருக்கிறது.

. அதுமட்டுமல்லாமல், உலகின் உற்பத்தி கேந்திரமாக சீனா விளங்கிவருவதால், அங்கு கொரோனா பெருந்தொற்றால் உற்பத்தி நிறுத்தம் ஏற்பட்டபோது, ஒட்டுமொத்த உலகமே பொருள் தட்டுப்பாட்டால் அவதிப்பட்டது. இதன் காரணமாக, தொழில் முதலீட்டுக்கு ஒரு நாட்டை மட்டுமே பெருமளவு சார்ந்திராமல், வருங்காலத்தில் தங்களது முதலீடுகளைப் பரந்துபட்டு வேறு நாடுகளுக்கும் விரிவுபடுத்த சர்வதேச தொழில் முதலீட்டாளர்கள் விரும்புவார்கள் என்பதே பல பொருளாதார நிபுணர்கள் முன்வைக்கும் கருத்தாக உள்ளது. இது போன்ற ஒரு முதலீட்டு நல்வாய்ப்பை இந்தியா எவ்வாறு பயன்படுத்திக்கொள்ளும் என்பதே இன்றைக்குப் பலரின் கேள்வியாக இருக்கிறது.

கடும் போட்டியைத் தரும் தென்கிழக்கு ஆசிய நாடுகள்..!

அமெரிக்காவுக்கும் சீனாவுக்கும் இடையே நடைபெற்ற வர்த்தக யுத்தத்தில் உண்மையிலேயே வெற்றிபெற்ற நாடு வியட்நாம்தான். வேகமான நகரமயமாக்கம், தொழில்நுட்ப வளர்ச்சி, இளமையான சமுதாயம் மற்றும் அதிகப்படியான பெண்களின் பங்களிப்பு ஆகியவற்றின் துணையுடன் தென்கிழக்கு ஆசிய நாடுகள் மீண்டும் ஒரு முறை ஏற்றுமதிக்கான உலக வரைபடத்தில் முக்கிய இடம்பிடிக்கத் தொடங்கியுள்ளன.

. அமெரிக்காவுடனான வர்த்தக அளவைவிட ஆசிய நாடுகளுடனான வர்த்தக அளவு அதிகமாக உள்ள நிலையில், சமீபகாலமாகவே சீனா ஆசியன் (ASEAN) நாடுகளில் தனது முதலீடுகளைக் குறிப்பாக, அதிநவீன தொழில்நுட்ப நிறுவனங்களில் தனது முதலீட்டை அதிகப்படுத்தி வருகிறது. மறுபக்கம், வர்த்தக யுத்தத்தின் தொடர்ச்சியாக சீனாவுக்கான மாற்றைத் தேடி அலைந்துவரும் அமெரிக்கா, தென்கிழக்கு ஆசிய நாடுகளில் அதிக முதலீடுகளைச் செய்து வருகிறது. அமெரிக்காவுக்கான ஏற்றுமதியை ஒரே வருடத்தில் 40% வரை அதிகரிக்க முடிந்த வியட்நாம்தான் தென் கிழக்கு ஆசிய நாடுகளில் அதிக லாபம் அடைந்த நாடு.

. சீனா... அடிப்பட்ட புலி..!

. `ஒட்டுமொத்த உலகத்துக்குமான ஏற்றுமதியாளர்’ என்ற முதன்மைநிலையை அவ்வளவு எளிதாக சீனா விட்டுக் கொடுத்து விடாது. . குறிப்பாக, அமெரிக்காவுக்கு நிகரான பெரும் வல்லரசாக உருவெடுத்திருக்கும் சீனாவின் பொருளாதார வலிமையையும் குறைத்து மதிப்பிட முடியாது. சீனாவில் முதலீடு செய்துள்ள பன்னாட்டு நிறுவனங்களை சீனாவிலிருந்து வெளியேற அந்த நாட்டு அரசு அவ்வளவு எளிதில் அனுமதிக்காது என்றே கருதப்படுகிறது. பல பொருளாதார நிபுணர்களின் எதிர்பார்ப்புக்கு நேர்மாறாக, கொரோனா நெருக்கடியால் உருவான பங்குச் சந்தை வீழ்ச்சியைப் பயன்படுத்திக்கொண்டு உலகெங்குமுள்ள பல நிறுவனங்களை சீனா கையகப்படுத்திவருகிறது.

. இந்தியாவின் ஒட்டுமொத்த உள்நாட்டு உற்பத்தி அளவைவிட அதிக அளவில் சீனாவின் கைவசமுள்ள அந்நியச் செலாவணி இருப்பு (3.4 ட்ரில்லியன் அமெரிக்க டாலர்) சர்வதேச நிறுவனங்களை சீனா கையகப்படுத்த உதவிகரமாக உள்ளது. இந்தியாவிலும்கூட, ஹெச்.டி.எஃப்.சி நிறுவனப் பங்குகளை சீன மத்திய வங்கி வாங்கியதும், அதற்கு பதிலடியாக சீன முதலீடுகளுக்கு நமது மத்திய அரசு கட்டுப்பாடுகள் விதித்ததும் இங்கு நினைவுகூரத்தக்கது.

`சீனா, தனது நாணயத்தின் மதிப்பை அதிரடியாகக் குறைக்கும்பட்சத்தில், அந்த நாட்டிலிருந்து ஏற்றுமதியாகும் பொருள்களின் விலை குறைய வாய்ப்புள்ளதால், உலகம் முழுவதுமுள்ள மக்கள் சீனப் பொருள்களைத் தொடர்ந்து பயன்படுத்து வார்கள்’ என்று நோபல் பரிசு வென்ற பொருளாதார நிபுணரான அபிஜித் பானர்ஜி சொல்லியிருப்பது கவனிக்கத்தக்கது.

. கொரோனா என்ற வைரஸ் குறித்து எந்தவொரு முன் அனுபவமும் இல்லாத நிலையிலும்கூட மிகத் துரிதமாகச் செயல்பட்டு அந்த நோய் நாடு முழுவதும் பரவாமல் தடுத்தது சீனா. எனவே, இந்த நோயால் ஏற்பட்ட பொருளாதாரப் பின்னடைவிலிருந்து மீண்டெழும் முதல் நாடாகவும் இருக்கும் என்பதே பலரது கருத்து. மேலும், மிகச் சிறப்பான தொழில் கட்டமைப்பு வசதிகளைக் கொண்ட சீனாவிலிருந்து வெளியேற முதலீட்டாளர்கள் அவ்வளவு சீக்கிரம் முன்வருவார்களா என்பதும் கேள்விக்குறியே.

. இந்தியா என்ன செய்ய வேண்டும்..?

`சீனாவிலிருந்து வெளியேறும் முதலீடுகளை ஈர்க்க வேண்டும்’ என்று இந்திய அரசியல் வட்டாரத்தில் ஏற்பட்டுள்ள முனைப்பு வரவேற்கத்தக்கது. இதற்காகப் பன்னாட்டு நிறுவனங்களுடன் இந்திய அரசின் சார்பில் பேச்சுவார்த்தை தொடங்கிவிட்டதாகக்கூடச் சொல்லப்படுகிறது. புதிய முதலீடுகளைக் கவர்வதற்காகப் பல மாநில அரசுகள் போட்டி போட்டுக்கொண்டு தொழிலாளர் சட்டங்களைத் திருத்தியமைத்துள்ளன. `சில மாநில அரசுகளோ, முதலீட்டுக்குத் தேவையான நில வங்கி தயாராக உள்ளது’ என்றும் அறிவித்துள்ளன. தமிழக அரசும்கூட புதிய முதலீடுகளை ஈர்ப்பது குறித்து ஆய்வு செய்ய ஒரு சிறப்புக் குழுவை அமைத்துள்ளது.

அதேநேரம், `இந்தியாவின் நிலம் மற்றும் தொழிலாளர் நலம் சார்ந்த சட்டத் திருத்தங்கள் மட்டுமே புதிய முதலீடுகளுக்குப் போதுமானவை அல்ல’ என்று ஒருசாரார் வாதிடுகின்றனர். `அரசு அதிகாரிகளின் விருப்பு வெறுப்பு, நிலையற்ற கொள்கைகள், பின்தேதியிட்ட வரிவிகித மாற்றங்கள், அடிப்படைக் கட்டுமான வசதிகளில் போதாமை போன்றவையே பன்னாட்டு முதலீட்டாளர்களால் அதிகம் கவனிக்கப்படும் விவகாரங்கள்’ என்று கருத்துகள் வெளிவருகின்றன.

பன்னாட்டு முதலீட்டாளர்கள் சீனாவை நோக்கிப் படையெடுக்க முக்கியக் காரணம், அங்கு வெகு வேகமாக அதிகரித்த உள்நாட்டுத் தேவை. ஆனால், நம் நாட்டில் உள்நாட்டுத் தேவை குறைவாக இருப்பதுதான் உற்பத்தித் திறன் (Capacity Utilization) குறைந்ததற்கு முக்கியக் காரணம். இதனால்தான் உள்நாட்டுத் தொழில் அதிபர்கள்கூட பெருமளவுக்கு முதலீடு செய்ய முன்வரவில்லை. ஒரு நாட்டின் உள்நாட்டுத் தேவை அதிகரிக்கும்போது, உள்நாட்டுத் தொழில்முனைவோர்களுடன் போட்டி போட்டு அந்நிய முதலீட்டாளர்களும் தொழில் தொடங்க முன்வருவார்கள் என்பதே உண்மை.

இந்தியாவுக்கென்று சில சிறப்புகள் எப்போதும் உண்டு.

. `உலகின் மிகப்பெரிய ஜனநாயக நாடு’ என்பது மட்டுமல்லாமல், மிக அதிக இளைஞர்களைக்கொண்ட நாடாகவும் இந்தியா இருக்கிறது. . இவற்றுடன் மிகச் சிறந்த உள்கட்டமைப்பு, கட்டுப்படியாகக்கூடிய சம்பளம், தரமான உற்பத்தி எனப் பல அம்சங்களிலும் நாம் கவனம் செலுத்தி, அவற்றையும் கொண்டுவந்தால்தான் நம்மால் சீனாவிலிருந்து வெளியேறும் நாடுகளை நம் நாட்டின் பக்கம் இழுக்க முடியும்!

(குறிப்பு: இந்தக் கட்டுரையில் சொல்லப்பட்டுள்ளவை கட்டுரையாளரின் தனிப்பட்ட கருத்துகளே.)

விகடன் லேட்டஸ்ட்

சீனாவிலிருந்து வெளியேறும் நிறுவனங்கள்..! - இந்தியாவில் கால்பதிக்குமா..?

நாணயம் விகடன் டீம்